Romaanos 12

Uvaʼs talt Paʼp vikʼayit ok tibʼ inqʼa niman tetz Jesuus te quBʼaal Tiuxh

1Tiʼetz uvaʼ qat itxum quBʼaal Tiuxh evatz, ex inmol s-niman tetz Jesuus, tul toq intiila bʼekʼu sete uvaʼ jikxh laʼ etatin tuchʼ vetxhiʼoʼl vatz quBʼaal Tiuxh. Atz laʼ jetxhon ok ex s-kʼatza. Atz aʼ laʼ ebʼan kam uvaʼ nik ichiibʼ quBʼaal Tiuxh s-tiʼ. Aʼetz kʼutxhbʼal tetz venimat u quBʼaal Tiuxhe. Tul ech laʼ ebʼan tiʼ etoksat etibʼ vatz quBʼaal Tiuxh, eche nik itzʼeʼsal jaʼ invaʼq u txoo s-oya viʼ u natxhkʼuulabʼal. Pet aloq ex itzʼlich s-laʼ etoksat etibʼ vatz quBʼaal Tiuxh.

2Tul yeʼl ex laʼ ok bʼen ex tiʼ kam inqʼa kantxhaqla txumbʼal uvaʼ nik etil ibʼant jolt inqʼa xaol vatz txʼavaʼ, inqʼa yeʼ ootzaqin tetz Tiuxh. Pet tira jalpuvaq vetxumbʼal tiʼ vichʼexp vetitzʼabʼal; tul akʼ txumbʼal veteʼ. Echetz laʼ ibʼene sete kame uvaʼ nik isaʼ quBʼaal Tiuxh, jankʼal inqʼa bʼaʼn, atz jankʼal inqʼa nik ichiibʼ quBʼaal Tiuxh s-tiʼ, atz jankʼal vitxhabʼal vet tiqʼol viyolbʼal quBʼaal Tiuxh s-bʼaʼn.

3Tiʼetz vibʼaʼnil u quBʼaal Tiuxh sinkʼatza, tiʼ uvaʼ qat toksa in sitxhaq sexoʼl, ex inqʼa jit tij imam Israeel, tul toq intiila bʼekʼu jolol yol sete jununil ex: Yeʼ laʼ etitzʼa uvaʼ palnaʼq ex viʼ vemol tiʼ etoksat eqʼij s-tiibʼa. Pet aʼ laʼ etitzʼa etibʼ tiʼ kam vetatin xoʼl emol. Tul aʼ laʼ etitzʼa paqte tiʼ kam etatin tiʼ vechʼij tiʼ vekʼuqbʼat ekʼuul tiʼ quBʼaal JesuKriisto taʼn quBʼaal Tiuxh.

4Tan jit eela u qetz, atz u qutxumbʼal tiʼ qulotxht qibʼ vatz quBʼaal Tiuxh. Jankʼal eche tatin u qutxhiʼoʼl jununil oʼ, tan kʼuxh vaʼl kuxh u tilixeʼ, pet nimalen kuxh elnaʼqle. Tul jitetz vaʼl koq kuxh u aqʼon nik ibʼan txhaq vatzul u qutxhiʼoʼl, pet atxh aqʼon nik ibʼan junun.

5Echatetz bʼanel qaʼne, oʼ inqʼa niman tetz Jesuus. Tan kʼuxh sibʼlen qatineʼ u tilixeʼ, pet vaʼl kuxh qok kʼatz quBʼaal JesuKriisto, tul vaʼl kuxh txeyel qibʼ s-quvatzaq.#1 Koriintios 12.12

6Pet atxh ibʼen kam inqʼa nik qutxʼol ibʼanaxeʼ jununil oʼ, tan aʼ nik qubʼan kam uvaʼ qat taqʼ quBʼaal Tiuxh s-qe tuchʼ vibʼaʼnil.

Oqetz at xaol sexoʼl uvaʼ, aʼ nik itxʼol talax viyol quBʼaal Tiuxh, tul aʼxh laʼ tal kam uvaʼ nik iqejeʼ uvaʼ quBʼaal Tiuxh nik alon s-te.

7Oqetz at xaol sexoʼl uvaʼ, aʼ nik itxʼol kʼuulaʼm xoʼl inqʼa niman tetz Jesuus tuchʼ lotxhoʼm, tul kʼuulanoqetza.

Oqetz at xaol sexoʼl uvaʼ, aʼ nik itxʼol txhusuʼm, tul txhusunoqetza.

8Oqetz at xaol sexoʼl uvaʼ, aʼ nik itxʼol taqʼax itial vimol, tul ibʼanetza.

Oqetz at xaol sexoʼl uvaʼ, aʼ nik itxʼol ilotxhox inqʼa imol, inqʼa nik isaʼon kam tetz s-te, kʼuxh puaq nik isaʼon s-te, tul taqʼetz tuchʼ ayaʼl ikʼuul.

Oqetz at xaol sexoʼl uvaʼ, aʼ nik itxʼol tiqʼol iviʼ xoʼl inqʼa niman tetz Jesuus, tul tiqʼoetz iviʼ. Aloq aʼxh titzʼabʼal laʼ ibʼan tuchʼ bʼaʼnil.

Oqetz at xaol sexoʼl uvaʼ, aʼ nik elk taanima tiʼ ilotxhox imol uvaʼ txumlebʼal ivatz, tul lotxhonoqetz tuchʼ chiibʼichil.#1 Koriintios 12.4-11

Uvaʼs talt Paʼp uvaʼ atoqxh taanima inqʼa niman tetz Jesuus s-vatzaq laʼ ibʼana

9Tul tzaoqxh tetaanima tiʼ vesaʼt etibʼ sevatzaq. Pet yanoq ekʼuul te inqʼa yeʼbʼaʼn. Pet aʼxh kʼaqoq etaʼn ibʼanax u bʼaʼn uvaʼ nik isaʼ quBʼaal Tiuxh. 10Tul atoqxh tatin inqʼa emol sevatz laʼ ebʼana. Atz atoqxh tiqleʼm sevatz laʼ ebʼana. 11Tul ayaʼlxh ekʼuul ebʼan u bʼaʼnla aqʼon tetz quBʼaal Tiuxh, uvaʼ sebʼt ex s-tiʼ. Pet jit kuxh ex qʼeʼay ebʼana. Tul aʼxh laʼ ebʼanvat u taqʼon quBʼaal Tiuxh tuchʼ vitzʼaʼl viTiuxhil Tiuxh sekʼatza. 12Atz chiibʼoq kuxh ex tuulbʼal uvaʼ nik etxʼebʼtaʼ kam uvaʼ laʼ ibʼan u quBʼaal Tiuxh sexoʼl. Tul kotxʼvaq evatz kʼuxh nik epal t-kalabʼaq itzaʼlal. Tul bʼenamen laʼ enatxhkʼuulat Tiuxh. 13Tul lotxhvaq inqʼa emol s-niman tetz Jesuus tiʼ kam uvaʼ nik isaʼon s-te. Tul aqʼvaq ivatbʼal inqʼa xaol, inqʼa tzajnaʼql s-naatxh.

14Tul aʼl ejaqt bʼaʼnil te quBʼaal Tiuxh tiibʼa inqʼa nik ojqeʼlan ex, tiʼ uvaʼ, ex niman tetz Jesuus. Jaqvaq bʼaʼnil s-tiibʼa, pet jit aʼl laʼ etalt yaabʼla yol s-tiʼ. 15Tul chiibʼoqvaq ex kʼatz inqʼa xaol uvaʼ nik ichiibʼeʼ. Pet txumunoqvaq ex kʼatz inqʼa xaol uvaʼ nik itxumuneʼ. 16Tul tuchʼ bʼaʼnil laʼ atink ex sevatzaq sejununil. Atz yeʼ kuxh palan etetz viʼ emol. Pet yeʼ laʼ ebʼan kaʼl ekʼuul tiʼ etatin kʼatz inqʼa xaol, inqʼa meebʼaʼ tatineʼ. Tul yeʼ kuxh etaqʼ bʼen etibʼ s-nim tiʼ etalt etibʼ s-aj txumbʼal.#Proveervios 3.7

17Tul yeʼ laʼ etaqʼ ichʼexel u yeʼbʼaʼn uvaʼ laʼ ibʼan vemol sete. Tul bʼanvaq yaʼl tiʼ ibʼanax inqʼa kam tibʼaʼnil uvaʼ bʼaʼn laʼ elkaʼp vatz inqʼa xaol s-kaqaayil. 18Tul bʼanvaq yaʼl tiʼ etatin tibʼaʼnil tuchʼ jankʼal inqʼa xaol, oq at teqʼabʼ tiʼ ibʼanax u bʼaʼn te vemol laʼ etila.

19Ex, uvaʼ nik inchiibʼ setiʼ, jit aʼ, ex laʼ kʼaxbʼisan vemol uvaʼ laʼ kʼaxbʼisan ex. Pet aqʼvaq ka tiqʼabʼ quBʼaal Tiuxh tiʼ ikʼaxbʼisaleʼ. Tan ech tzʼibʼamal ka t-viyolbʼal quBʼaal Tiuxh s-eche:

—In laʼ aqʼon ichʼexel

u yeʼbʼaʼn.

Atz laʼ nal itxhoj

u yeʼbʼaʼn t-inqʼabʼ

uvaʼ laʼ ibʼan te vimol,

—chich quBʼaal Tiuxh.#Deuteronoomio 32.35

20Echetz aʼ u bʼaʼn laʼ ebʼan sivatzil u yeʼbʼaʼn uvaʼ laʼ ibʼan vemol sete. Tan ech nik tal viyolbʼal quBʼaal Tiuxh uvaʼ tzʼibʼamal ka s-eche:

—Oq laʼ kam vamol t-vaʼy,

uvaʼ nik itxhiʼan seʼe,

tul laʼ aaqʼ itxʼix.

Atzoq laʼ tzaq itziʼ vamol,

tul laʼ aaqʼ tajaʼ.

Tan oq ech

uvaʼe laʼ abʼan

te vamol,

tul toqetz kuxh

chʼixvoq vete vamol

uvaʼ nik itxhiʼan seʼe.

Tul laʼ ijalpu vet

vitxumbʼal see,

—chich u yol.#Proveervios 25.21-22{*}#12.20 Proveervios 25.21-22. Nik tal t-viyaʼtebʼal u versiikulo uvaʼ tu Viivlia Reina Valera 1,960 uvaʼ: —Haciendo ésto, ascuas de fuego amontonarás sobre su cabeza, —chich tu kastiiya. Aʼetz nik elkaʼpun t-quyolbʼal s-eche: —Echetz laʼ abʼane, eche vaʼq xaol uvaʼ aʼl sibʼal tzʼaʼla txaʼ aqʼtxhaʼl laʼ taqʼ tzaan t-vaʼl atibʼal, tul laʼ taqʼ tisqʼu vimol, —chiche. Aʼ nik tiqʼo tzaan Paʼp tiʼ val u txumbʼal uvaʼ nikich ibʼan inqʼa xaol s-naʼya. Oq nikich itzaj ixamal vaʼq xaol t-totzotz, tul chʼixvebʼaletz vet vatz inqʼa imol. Tan aʼ yeʼ nik txhabʼan uvaʼ yeʼ laʼ ikuy itzaj vixamal tu totzotz. Niketz ibʼen vet u xaol uvaʼ qat tzaj vixamal, tul maʼt ijaq vet tetz te vimol. Tul qat aqʼax vet tzaan txaʼ ixamal tuul vaʼl loʼtxh. Tul qat tisqʼu vet tzaan tiviʼ. Tul qat qʼaʼv vet tzaan tu totzotz. Sebʼtetz tel ka isibʼel u txaʼ xamal tiʼ bʼey uvaʼ nik tisqʼu tzaan u ixoq. Aʼetz vet uvaʼe, nik eesan ichʼixvebʼal u ixoq. Tul nikatetz inatxh vet ixoq u chixvichil, tiʼ uvaʼ nik tilix taʼn inqʼa tetz tzʼalol. Aʼ nik tal u yol uvaʼ, aʼl laʼ ibʼanax u bʼaʼnil te inqʼa xaol uvaʼ nik itxhiʼan tiʼ inqʼa niman tetz Jesuus, tul kamal laʼ ijalpu vitxumbʼal. Atz yeʼ vet laʼ txhiʼan tiʼ vimol uvaʼ laʼ bʼanon bʼaʼnil s-te.

21Echetz jit aʼ laʼ aaqʼvat eebʼ tiʼ ibʼanax u yeʼbʼaʼn, oq nik ibʼan inqʼa xaol u yeʼbʼaʼn see. Pet aʼl aʼ, axh laʼ eesan iqʼij u yeʼbʼaʼn tuchʼ vabʼant u bʼaʼn.

Currently Selected:

Romaanos 12: ixlC

Highlight

Compare

Copy