Romaanos 13

Uvaʼs talt Paʼp te inqʼa niman tetz Jesuus uvaʼ laʼ motx inima inqʼa iqʼesalaq itenam

1Tul jankʼal inqʼa niman tetz Jesuus, laʼ toksa tibʼ tiʼ inimal inqʼa iqʼesalaq itenam. Tan jit loqʼs koq kuxh at inqʼa iqʼesal, pet quBʼaal Tiuxh nik saʼon s-tiʼ. Atz quBʼaal Tiuxhe nik kuyun tok siqʼesalil. 2Echetz jaʼl uvaʼ, aʼ kuxh palsa yolil nik ibʼan te viqʼesal, aʼetz nik ipalsa iyole uvaʼ quBʼaal Tiuxh kuyun tok siqʼesalil. Jatvaʼletz inqʼa nik palsan viyol u mam iqʼesal, tul juntetz kuxh nik itxhok ijaʼpe u yol s-tiibʼa taʼn quBʼaal Tiuxh.

3Tan jatvaʼl inqʼa atoʼk siqʼesal, tan jit kuxh aʼ itxaʼk ixoʼvisal inqʼa xaol uvaʼ, aʼ u bʼaʼn nik ibʼaneʼ. Pet aʼ itxaʼk inqʼa iqʼesal ixoʼvisal inqʼa xaol uvaʼ, aʼ u kantxhaq nik ibʼaneʼ. Oqetz nik asaʼeʼ uvaʼ jit kuxh xoʼvalom laʼ avatin vatz inqʼa iqʼesal, tul aʼetz abʼan u bʼaʼn, echetz laʼ toksal aqʼije tiʼ u bʼaʼn uvaʼ laʼ abʼana. 4Tan aʼ itxaʼk viqʼesal uvaʼ laʼ ibʼan u taqʼon quBʼaal Tiuxh tiʼ ilotxhox jankʼal inqʼa xaol, atz tuchʼ ex inpaqte. Pet oqetz aʼ u kantxhaq nik abʼaneʼ, tul toqetz xoʼvoq axhe te viqʼesal. Tan aʼetzxh itxaʼke u espaada uvaʼ iqʼomal taʼn viqʼesal. Tul taqʼonvil quBʼaal Tiuxhe. Tul aʼ itxaʼk laʼ tila jaʼle u xaol uvaʼ nik bʼanon u kantxhaq, aʼetz uvaʼe, laʼ ikʼaxbʼisa.

5Echetz tetxhal kuxh laʼ etoksa etibʼ tiʼ inimal inqʼa iqʼesal etenam. Poro jitetz kuxh, tiʼ uvaʼ laʼ exoʼva tul kʼaxkʼo setiibʼa, pet, tiʼ uvaʼ atxh u nimaʼm t-vetaanima.

6Xaʼtetze nik etaqʼ jankʼal u puaq uvaʼ nik ibʼekʼ u mam iqʼesal etaqʼtaʼ tiʼ vetatineʼ. Tan nik itxhojp inqʼa iqʼesal, tiʼ uvaʼ taqʼon quBʼaal Tiuxh nik ibʼaneʼ. Tul jun qʼij tiʼ ibʼanax u aqʼon. 7Tul txhojvaq kam uvaʼ, tetxhal laʼ etxhoja nik talax sete. Oq nik ijaq jaʼmil ornaato sete, tul txhojvaq. Oq nik ijaq u iiva sete, tul txhojvaq. Oq at tiqleʼm viqʼesal, tul kʼutxhvaq s-te uvaʼ at tiqleʼm sevatz. Oq at invaʼq iqʼesal uvaʼ ikʼulel laʼ oksal iqʼij, tul oksavaq iqʼij.#Tio 22.21; Kuxh 12.17; Luk 20.25

Uvaʼs talt Paʼp te inqʼa niman tetz Jesuus uvaʼ yeʼ laʼ ibʼan inqʼa kantxhaqla txumbʼal s-vatzaq

8Yeʼ ekuy ikaj etxʼoq xeʼ emol tiʼ puaq. Tul atoqxh sekʼuul ibʼanax u bʼaʼnil te vemol, eche laʼ tatin vetxʼoq sekʼuul uvaʼ at xeʼ vaʼq emol. Tul at kuxh sekʼuul uvaʼ laʼ etaqʼa. Tan jaʼl uvaʼ taanimaxh nik tzajk visaʼt vimol, tul eela kuxh vete s-tuchʼ uvaʼ, aʼ vet inqʼa bʼekʼbʼal s-kaqaayil nik inima.

9Tan ech nik tal inqʼa bʼekʼbʼal s-eche:

—Yeʼ laʼ ayansa eebʼ

tuchʼ uvaʼ jit akʼulel

eebʼ s-tuchʼ.

Yeʼ laʼ yatzʼon axh.

Atz yeʼ laʼ elqʼ axh.

[Yeʼl invaʼq yol laʼ aal

tiʼ amol

uvaʼ tzʼeqo tzij kuxhtuʼ.]

Atz yeʼ laʼ aatxhva,

kamoqxh at xeʼ amol,

—chich inqʼa bʼekʼbʼal.#Eeksodo 20.13-17; Deuteronoomio 5.17-21

Tul atel kuxh inqʼa bʼekʼbʼal s-tiʼ. Pet aloq aʼxh nik iyaʼebʼe inqʼa bʼekʼbʼal u yol uvaʼ ech nik tal s-eche:

—Atoqxh avaanima

tiʼ vamol

eche vavaanima

seʼe sajunal,

—chiche.#Leviitiko 19.18

10Tan oq at qaanima tiʼ u qumol, tul saʼetz koq kuxh qubʼan yeʼbʼaʼn s-te. Echetz jaʼl uvaʼ atxh taanima tiʼ vimol, tul aʼetz nik inima vete jankʼal inqʼa nik tal inqʼa bʼekʼbʼal.

11Jankʼalxhte inqʼa qat val sete, tul nimavaq. Tul atoqxh etxumbʼal tiʼ vetatin t-inqʼa qʼij, inqʼa atil oʼ s-txheel setuchʼ. Tul aʼxh laʼ ebʼan kam uvaʼ nik val sete. Tul ech laʼ ebʼan tiʼ ebʼantaʼ, eche vaʼq xaol uvaʼ nik tul vet ivatz t-vataʼm. Tan il u qʼij aalemal inaqbʼix tiʼ quchitixeʼ. Tan aalemal ijetxhon vet tzaan u qʼij s-quvatz tiʼ u quchitixeʼ, tiʼ uvaʼ ateleenich qʼij atich ka s-quvatz uvaʼs qok tiʼ inimal Jesuus. 12Iletz vet inqʼa qʼij nik imotx s-qe tiʼ qatin vatz u txʼavaʼ. Tan ech nik ibʼan, eche nik ipal paʼl tuulbʼal u aqʼbʼal, tul nal kuxh nik isaqbʼ veteʼ. Echetz tanbʼavaq ibʼanax inqʼa kantxhaq, eche uvaʼ nik ibʼan inqʼa xaol tu tokto. Tul maqvaq taqʼonv Satanaas sekʼatza tiʼ ebʼant inqʼa kantxhaq. Pet aʼ ebʼan u bʼaʼn, eche nik ibʼant inqʼa xaol vaʼq bʼaʼnla aqʼon s-qʼiil. Ech ebʼan, eche nik ibʼan vaʼq sol uvaʼ nik toksa kolbʼal tziʼ taanima tiʼ imaqax uvaʼ nik ibʼan txhʼaʼo s-tuchʼ. 13Aʼetzxh ebʼan u jikla txumbʼal, eche vaʼq xaol uvaʼ qʼiil nik ibʼan kam invaʼq uvaʼ bʼaʼn. Pet jit tira kuxh laʼ etxhaqpu etibʼ tiʼ ibʼanax mamala etxhbʼuʼm tuchʼ qʼabʼaʼm. Atz yeʼ laʼ ebʼan u yansa ibʼ. Atz yeʼ laʼ ebʼan inqʼa kantxhaqla atxhaʼv uvaʼ nik isaʼ vetxhiʼoʼl. Atz yeʼ laʼ ebʼan yajo ibʼ. Atz yeʼ laʼ etxhiʼkʼuula etibʼ.

14Pet aʼetz laʼ ebʼan kam u bʼaʼnla txumbʼal ibʼan u quBʼaal JesuKriisto, eche laʼ ibʼan vaʼq xaol uvaʼ laʼ toksa u toksaʼm, tiʼ ikʼutxhtaʼ kam xaolil. Pet jit aʼ laʼ elk etaanima tiʼ ibʼanax kam inqʼa oʼtla txumbʼal tetz bʼano paʼv kʼaqel taʼn. Tul yeʼ laʼ etaqʼ etibʼ ibʼekʼ inqʼa kantxhaqla atxhaʼv tetz vetxhiʼoʼl.

Currently Selected:

Romaanos 13: ixlC

Highlight

Compare

Copy