Romaanos 11
11
Uvaʼs talt Paʼp uvaʼ tiʼ vitijbʼixsat inqʼa tij imam Israeel ikʼuul tiʼ inimal quBʼaal Tiuxh, xaʼtetze txaich kuxh vet ikaj tante
1Pet tiʼ inqʼa yol inqʼaa, tul kamal at xaol ech toq alon s-eche: —¿Maqetz tira qat tixva quBʼaal Tiuxh inqʼa tij imam Israeel, vitenam? —kamal toq taleʼ.
¡Yeʼle! Yeʼl vitenam quBʼaal Tiuxh nik tixva. Tan in tij imam Israeel, u tij imam Avraʼaam. Tul in ixaʼnil Venjamiin, vikʼaol Israeel.#Filipeenses 3.5 2Echetz yeʼl vitenam quBʼaal Tiuxh nik tixva. Tan txaelxh vete taʼn tiʼ ibʼen sitenam. Pet ulsavaq inqʼa yol sekʼuul uvaʼ tzʼibʼamal ka t-viyolbʼal quBʼaal Tiuxh tiʼ vixotxht Eliias inqʼa tij imam Israeel te quBʼaal Tiuxh. Tan ech tal Eliias te quBʼaal Tiuxh s-eche: 3—InBʼaal Tiuxh, qat motx yatzʼaxiy el inqʼa qʼexsan tetz vayolbʼal. Atz qat jinpuliy el inqʼa natxhkʼuulabʼal. Pet taʼnetz kuxh vet in qat kaj in s-niman eetz. Poro ilat in nik talax inyatzʼax el, —chichich Eliias te quBʼaal Tiuxh.#1 Reeyes 19.10-14
4Pet ¿kametz tal quBʼaal Tiuxh te Eliias nik enatxheʼ? Ech tal s-eche: —Jit ajunal. Tan il juqvaʼt mil (7,000) vinaq txaamal vaʼn uvaʼ yeʼx qajeʼvoq vatz Vaal uvaʼ nik tal inqʼa xaol sitiuxh, —xeʼt quBʼaal Tiuxh te Eliias.#1 Reeyes 19.18 5Echatetz kuxhte tuulbʼal inqʼa qʼij s-txheel. Tan txaich kuxh vet tant inqʼa tij imam Israeel, inqʼa qat toybʼa quBʼaal Tiuxh ivatz tuchʼ vibʼaʼnil. 6Qatetz ikʼutxh quBʼaal Tiuxh vibʼaʼnil te inqʼa tij imam Israeel tiʼ itxajteʼl sitenam, poro jit tiʼ kam invaʼq uvaʼ qat ibʼana. Pet eche tiʼ koq kam invaʼq uvaʼ qat ibʼana, tul jitetz vet bʼaʼnile uvaʼ qat ikʼutxh quBʼaal Tiuxh s-te.
7¿Kametz toq qal vet, tiʼ uvaʼ qat ibʼan quBʼaal Tiuxh uvaʼ taʼn kuxh tanul inqʼa tij imam Israeel qat itxajeʼl? Tan aʼl nimal tijaq imam Israeel yeʼ qat txʼolon uvaʼ jit koq vet aj paʼvom vatz quBʼaal Tiuxh qat ibʼana, kʼuxh tzʼeʼyichxh jolol inqʼa ech laʼ ibʼane. Pet txaich kuxh vet inqʼa tij imam Israeel qat motx txʼolon uvaʼ jit vet aj paʼvom vatz quBʼaal Tiuxh qat ibʼana. Atz kʼuxh jolte, tan aʼl motx itijbʼixsat ikʼuul.
8Eche uvaʼ ibʼan jolol inqʼa kʼuyaq qumam s-naʼya uvaʼ tzʼibʼamal ka yol s-tiʼ t-viyolbʼal quBʼaal Tiuxh uvaʼ ech nik tal s-eche:
—Antxh quBʼaal Tiuxh
yansan vet vitxumbʼal.
Tan kʼuxh nik motx tilon
tuchʼ bʼaqʼ ivatz,
pet yeʼ nik ibʼen s-te
kam uvaʼ nik isaʼ
quBʼaal Tiuxh s-tiʼ.
Atz kʼuxh nik motx tabʼin
tuchʼ ixichin,
pet yeʼ nik tabʼi vet vinuqul
kam uvaʼ nik isaʼ
quBʼaal Tiuxh s-tiʼ.
Tul antxh
nik motx ibʼan txheel,
—chich u yol.#Deuteronoomio 29.4; Isaiias 29.10
9Atz ech tal Daviid tiʼ inqʼa motx ibʼan txhʼaʼo s-tuchʼ, inqʼa yannaʼqich vet vitxumbʼal, s-eche:
—QuBʼaal Tiuxh
laʼ bʼanon,
tul laʼ bʼen vichiibʼichil
s-vaʼl kʼaʼa tetz yatzʼbʼal,
atz s-vaʼl petzʼ s-te;
tul bʼenoq s-vaʼl ikʼbʼal,
atz s-vaʼl kʼaxbʼichil
uvaʼ ikʼulelxhtuʼ.
10QuBʼaal Tiuxh
laʼ bʼanon,
tul laʼ juptxʼ vivatz,
tul laʼ bʼen t-tokto;
tul yeʼ laʼ motx ilon veteʼ.
Tul tira ijuk tibʼ isisil
s-bʼenamen,
—chich u yol.#Saalmo 69.22-23{*}#11.10 Saalmo 69.22-23. ¿Kam talax u yol, tiʼ uvaʼ?: —Laʼ bʼen vimeexha s-vaʼl kʼaʼa, atz s-vaʼl petzʼ, —chiche. Aʼ nik tal Daviid, atz, tiʼ uvaʼ nik inatxh Daviid Tiuxh, tul nik ijaq vaʼl kʼaxbʼichil te quBʼaal Tiuxh tiʼ taqʼt tiʼ inqʼa nikich motx itxhiʼan s-tiʼ. Aʼetz nik tal Daviid tiʼ inqʼa nikich motx itxhiʼan s-tiʼ, uvaʼ kʼuxh nikich motx ibʼan nimla qʼij tiʼ tetxhbʼun viʼ imeexha, tul xamtel laʼich ibʼan quBʼaal Tiuxh, tul yeʼbʼaʼn laʼich motx elkaʼp s-te. Jankʼal eche taqʼax kuʼ vaʼq kʼaʼa uvaʼ at txhibʼ s-tuul, tul xamel laʼ bʼen s-txeybʼal tetz u txoo. Atz ¿kam talax u yol uvaʼ?: —Bʼenoq s-vaʼl ikʼbʼal, atz s-vaʼl ichʼexel s-te, —chiche. Aʼetz nik tal Daviid uvaʼ ijaq Daviid te quBʼaal Tiuxh, tiʼ uvaʼ quBʼaal Tiuxh laʼ aqʼon elaʼp s-yeʼbʼaʼn s-te, tul kam kuxh itzaʼlal laʼ palk taʼn quBʼaal Tiuxh. Tul ijaq Daviid te quBʼaal Tiuxh uvaʼ kamxh u yeʼbʼaʼn nikich isaʼ taqʼax tiʼ Daviid, tul antxh uvaʼe laʼich ul s-tiibʼa. Tul aʼ vibʼen t-tokto nik taleʼ, uvaʼ jitoq laʼ til vet topoon inqʼa nik itxhʼaʼoi tibʼ s-tuchʼ. Tul aʼ vijukt tibʼ isisil nik taleʼ eela tuchʼ inqʼa loqʼel tok tiʼ aqʼon. Tan tira nik motx ijuk tibʼ isisil jaqʼ tiqal iqatz, tan yaʼlumal nik motx ibʼantaʼ.
Uvaʼs talt Paʼp uvaʼ, aʼ u teesat el quBʼaal Tiuxh inqʼa tij imam Israeel viʼ taanima ex oksan inqʼa jit tij imam Israeel s-tuul taʼn quBʼaal Tiuxh
11Pet tiʼ inqʼa yol inqʼaa, tul kamal at xaol ech toq alon s-eche: —¿Maqetz taʼn kuxh tzʼeqx vet kaj inqʼa tij imam Israeel vatz quBʼaal Tiuxh uvaʼs yeʼ motx iqejtaʼ uvaʼ, aʼich Jesuuse u Kriisto? Eche vaʼq xaol uvaʼ laʼ ikʼi, tul taʼn laʼ kuʼi, tul yeʼ laʼ isikʼ vet tibʼ paqte, —kamal chiche.
¡Yeʼle! Tan jit tira koq tzʼeqx ka inqʼa tij imam Israeel vatz quBʼaal Tiuxh. Pet at vaʼl ibʼaʼnil nik ex taqʼeʼ. Tan tiʼ vipalsan yolil inqʼa tij imam Israeel, tul ok vet inqʼa jit tij imam Israeel s-tuul tiʼ ikʼult u chitpichil tiʼ yeʼ ibʼen tu kʼaxkʼo tiʼ inqʼa ipaʼv. Echetz laʼ itxhoʼne te inqʼa tij imam Israeel tiʼ tok inqʼa jit tij imam Israeel s-tuul tiʼ ikʼulux vibʼaʼnil quBʼaal Tiuxh. 12Tul bʼaʼnil qat elkaʼp vipalsan yolil inqʼa tij imam Israeel, tiʼ uvaʼ yeʼ ikʼul u Kriisto tibʼaʼnil. Tan mam kalabʼaq tenam, inqʼa jit tij imam Israeel, qat abʼin inqʼa bʼaʼnla txhaq yol tiʼ u Kriisto. Atz, tiʼ uvaʼ yeʼ qat iqej inqʼa tij imam Israeel uvaʼ, aʼich Jesuuse u Kriisto, tul mam bʼaʼnil qat ex elkaʼp te inqʼa jit tij imam Israeel. Tiʼetz u mam bʼaʼnil ikʼaq quBʼaal Tiuxh taqʼax te inqʼa jit tij imam Israeel, ¡aʼetz kol yeʼ laʼ taqʼvat quBʼaal Tiuxh u mam bʼaʼnil te inqʼa tij imam Israeel uvaʼs laʼ itzʼeq vet tatxhul inqʼa tij imam Israeel, inqʼa laʼ ok tiʼ inimal u quBʼaal JesuKriisto!{*}#11.12 ¿Kam talax u yol uvaʼ?: —Laʼ tzʼeq vet tatxhul inqʼa tij imam Israeel, —chiche. Aʼ nik elkaʼpun, tiʼ uvaʼs laʼ tok jolt tijaq imam Israeel tiʼ inimal u quBʼaal Jesuus, tul tootzaq quBʼaal Tiuxh jatvaʼl tatxhul laʼ elkaʼpun.
13Aʼetz vet ex, toq val yol sete, ex inqʼa jit tij imam Israeel, tan ine u apoostol uvaʼ itxhaq quBʼaal JesuKriisto sexoʼl, ex inqʼa jit tij imam Israeel. Tul mam yol u iqatz sinvatz tiʼ viqatzit u aqʼon uvaʼ qat taqʼ quBʼaal Tiuxh s-ve. 14Pet aʼ nik intxʼebʼeʼ uvaʼ avoqe laʼ ok joloq inqʼa inmol s-tijaq imam Israeel s-niman tetz Jesuus tiʼ inpaxsat inqʼa bʼaʼnla txhaq yol tiʼ quBʼaal JesuKriisto xoʼl inqʼa jit tij imam Israeel. Tul laʼ motx chitp inqʼa vaʼl inkaqal s-tuchʼ tiʼ yeʼ ibʼen tu kʼaxkʼo tiʼ inqʼa ipaʼv. Tul aʼ nik vitzʼa uvaʼ tiʼ koq u tok inqʼa jit tij imam Israeel tiʼ inimal u Kriisto, tul laʼat tatxhva vet inqʼa inmol s-aj tenamil tok tiʼ inimal u Kriisto.
15Tan, tiʼ uvaʼ teesa quBʼaal Tiuxh inqʼa tij imam Israeel tiʼ taanima, tul mamala vet xaol vatz u txʼavaʼ, ok bʼaʼnil s-xoʼl tuchʼ quBʼaal Tiuxh. Tul tetxhaletz toq ikʼul quBʼaal Tiuxh inqʼa tij imam Israeel inpaqte uvaʼs toq inimat u Kriisto. Tul echetz laʼ motx ibʼan vet inqʼa tij imam Israeel vatz quBʼaal Tiuxh, eche laʼ titzʼeʼv invaʼq kamnaʼq.
Uvaʼs ibʼant Paʼp eela inqʼa kʼuy imam inqʼa Israeel tuchʼ u paan uvaʼ, aʼ inqʼa bʼaxa ivatz triigo nikich ibʼanbʼel s-tiʼ
16Eche inqʼa bʼaxa ivatz triigo, tan aʼ uvaʼe, nikich ibʼen s-chʼexichla qʼota tiʼ ibʼen s-paan tiʼ toksal vatz quBʼaal Tiuxh. Echatetz kuxh laʼ ulbʼel tant inqʼa qʼotae, tan antatetzxh vet tetz quBʼaal Tiuxh inpaqte.
Echetz aʼ nik elkaʼpun, tiʼ uvaʼ chʼexelich vet inqʼa bʼaxa kʼuy qumam, tul echat kuxh qat ichʼext quBʼaal Tiuxh jolte inqʼa tij imam Israeel. Atz jankʼal eche viʼoq u tzeʼ, tan oq bʼaʼn inqʼa taqʼil, tul bʼaʼnatetze inqʼa iqʼabʼ toq ibʼaneʼ. Echatetz kuxhte inqʼa tij imam Israeel, tan chʼexel inqʼa kʼuy imam taʼn quBʼaal sitenam, tul echat kuxh laʼ ibʼane te inqʼa tij imam Israeel s-jatu.
Uvaʼs ibʼant Paʼp eela inqʼa tij imam Israeel tuchʼ viʼl bʼaʼnla oliivo, aʼetz ibʼanvat Paʼp eela inqʼa jit tij imam Israeel tuchʼ viʼl oliivo uvaʼ nik kuxh titzʼ jaqʼ tzeʼ
17Pet txumbʼalimaletz toq valt sete, ex inqʼa jit tij imam Israeel. Tan ech etatin, eche iqʼabʼ viʼoq oliivo uvaʼ nik kuxh titzʼ jaqʼ tzeʼ. Aʼetz inqʼa tij imam Israeel ech tatin, eche bʼaʼnla oliivo. Echetz qat ibʼan quBʼaal Tiuxh tiʼ teesal el joloq inqʼa tij imam Israeel, eche teesal el joloq itzaqail iqʼabʼ tzeʼ. Tul aʼetz vet ex, inqʼa jit tij imam Israeel, qat toksa ex quBʼaal Tiuxh s-tuul, eche nik itxhunal ok viqʼabʼ u oliivo uvaʼ nik kuxh titzʼ jaqʼ tzeʼ kʼatz vikutxhmal u bʼaʼnla oliivo. Echetz nik ekʼult vet u bʼaʼnil uvaʼ tal quBʼaal Tiuxh taqʼax te inqʼa kʼuy imam inqʼa Israeel, eche nik ikʼult vet viqʼabʼ u jaqʼ tzeʼil oliivo vibʼaʼnil u taqʼil u bʼaʼnla oliivo.
18Kʼuxhetz mam bʼaʼnil nik ekʼul veteʼ, ex inqʼa jit tij imam Israeel, poro yeʼl ex laʼ etaqʼ bʼen etibʼ s-nim viʼ inqʼa tij imam Israeel, inqʼa ech tatin, eche viqʼabʼ u bʼaʼnla oliivo. Pet aʼ laʼ etulsa sekʼuul uvaʼ jit aʼ, ex nik chʼijsan inqʼa tij imam Israeel, eche u qʼabʼ oliivo uvaʼ jit aʼ nik chʼijsan u taqʼil. Pet aʼl aʼe, uvaʼ nik chʼijsan ex, eche viqʼabʼ u oliivo uvaʼ nik itxhunal ok tiʼ u bʼaʼnla oliivo. Tan aʼ vet u taqʼil u bʼaʼnla oliivo nik chʼijsan.
19Echetz yeʼ laʼ utxhi uvaʼ ech laʼ etal tiʼ inqʼa tij imam Israeel s-eche: —¡Aa! Ech bʼak qat teleʼl inqʼa tij imam Israeel, eche itzokʼpeʼl iqʼabʼ viʼoq bʼaʼnla oliivo, tul aʼetz vet oʼ, qat okka oʼ sivatzil, —chaq koq ex tiʼ etaqʼt bʼen etibʼ s-nim s-vatz.
20Ape. Tan kametz koqe uvaʼ eesan el inqʼa tij imam Israeel, pet, tiʼ uvaʼ yeʼ qeex quBʼaal JesuKriisto taʼn uvaʼ, aʼiche u Kriisto. Pet ex, tan tiʼ kuxh veqejt u Kriisto, tul qat oksal ex s-tuul taʼn quBʼaal Tiuxh. Echetz yeʼ etaqʼ bʼen etibʼ s-nim. Pet xoʼvataq epaʼvin vatz quBʼaal Tiuxh. 21Tan yeʼ koq ikuy quBʼaal Tiuxh ipaʼv inqʼa tij imam Israeel, inqʼa yeʼ motx qeon Jesuus uvaʼ, aʼiche u Kriisto, tul aʼetz koq ex, laʼich ikuy ex quBʼaal Tiuxh oq laʼich etanbʼa ikʼuqeʼv ekʼuul tiʼ u quBʼaal JesuKriisto, atz jitoq ex bʼaxa iqʼabʼ u bʼaʼnla oliivo.
22Echetz bʼenoq sete vibʼaʼnil quBʼaal Tiuxh tiʼ etoksal s-tuul. Atz bʼenoqat sete vikʼaʼnal quBʼaal Tiuxh tiʼ inqʼa nik tanbʼan ikʼuqbʼat ikʼuul s-tiʼ. Pet oqetz laʼ etanbʼa ka vekʼuqbʼat ekʼuul tiʼ u bʼaʼnil uvaʼ nik taqʼ quBʼaal Tiuxh sete, tul antetz ex laʼ teesa el ex quBʼaal Tiuxh, eche qat teesat el quBʼaal Tiuxh inqʼa yeʼ qat motx niman. Pet oqetz yeʼ laʼ etanbʼa ekʼuqbʼat ekʼuul tiʼ vibʼaʼnil quBʼaal Tiuxh, tul yeʼlatetz laʼ itanbʼa quBʼaal Tiuxh ikʼutxhux u bʼaʼnil sekʼatza. Pet oqetz laʼ etanbʼa vekʼuqbʼat ekʼuul tiʼ quBʼaal Tiuxh, tul antetzxh vet quBʼaal Tiuxh toq eesan el ex, eche laʼ itzokʼpeʼl u qʼabʼ tzeʼ.
23Pet oqetz laʼ qeex vet u Kriisto taʼn inqʼa tij imam Israeel, tul echatetz toq toksal vet paqte kʼatz quBʼaal Tiuxh, eche laʼ itxhunal ok vaʼq qʼabʼ tzeʼ kʼatz u bʼaʼnla oliivo. Tan at tiqleʼm quBʼaal Tiuxh tiʼ toksal paqte s-kʼatza.
24Pet ex, inqʼa jit tij imam Israeel, tan jit antich ex tiʼ etok kʼatz quBʼaal Tiuxh s-jatxhaq tzaan. Pet antetz vet ex qat kʼulun vibʼaʼnil quBʼaal Tiuxh s-txheel. Tan ech qat tulbʼe quBʼaal Tiuxh etok s-tuul, eche laʼ tiqʼol tzaan inqʼa qʼabʼ oliivo uvaʼ nik kuxh titzʼ jaqʼ tzeʼ, tul laʼ txhunal ok kʼatz vitzeʼil u bʼaʼnla oliivo. Tiʼetz uvaʼ, ech u bʼaʼnile qat ibʼan quBʼaal Tiuxh setiʼ, ex, inqʼa yeʼl ex atich ok ex s-tuul, ¡aʼetz kol yeʼ laʼ kʼulux taʼn quBʼaal Tiuxh inqʼa tij imam Israeel inpaqte, atz aʼ inqʼae, txaelxh taʼn tiʼ ibʼen sitenam! Tan ech laʼ ibʼan quBʼaal Tiuxh, eche laʼ itxhunal ok viqʼabʼ u bʼaʼnla oliivo kʼatz uvaʼ antxh itzeʼil.
Uvaʼs talt Paʼp uvaʼ laʼ chitix inqʼa tij imam Israeel tiʼ u kʼaxkʼo tiʼ yeʼ bʼen tilt u kʼaxkʼo tiʼ inqʼa ipaʼv
25Toqetz vaqʼ etootzaqi kaʼl inqʼa yol, ex inmol s-niman tetz Jesuus. Tan nik vileʼ uvaʼ yeʼx etootzaqit val u yol uvaʼ ile nik taqʼ quBʼaal Tiuxh qootzaqi s-txheel tiʼ vibʼant inqʼa tij imam Israeel tial ikʼuul tiʼ yeʼ iqeex u Kriisto. Tan tuulbʼal intanul qʼij, tul toq itijbʼixsa inqʼa tij imam Israeel ikʼuul. Ayaʼl kuxh s-tuul toq motxoq ok inqʼa jit tij imam Israeel tiʼ iqeex Jesuus uvaʼ, aʼe u Kriisto, jankʼal inqʼa chʼexel vet taʼn quBʼaal Tiuxh tiʼ inimal u Kriisto.
Echetz nik valte sete uvaʼ yeʼ laʼ motx etaqʼ bʼen etibʼ s-nim viʼ inqʼa tij imam Israeel. 26Tan xamtel vet laʼ opoon invaʼl qʼij, tul laʼ ikuy vet quBʼaal Tiuxh ichitp jankʼal inqʼa tij imam Israeel. Tan ech laʼ elkaʼpe val u yol uvaʼ tzʼibʼamal ka t-viyolbʼal quBʼaal Tiuxh s-eche:
—Een laʼ tzajk val u Chitol
tu tenam Sioon,
antxh xoʼl vitenam
quBʼaal Tiuxh.
Tul aʼ u Chitol
laʼ ul eesan el
inqʼa tij
imam Jakoov
tiʼ vitxumbʼal iqʼomal taʼn
uvaʼ yeʼ nik isaʼ
quBʼaal Tiuxh,
—chich u yol.
27Echetz vaʼt u yol tzʼibʼamal ka t-viyolbʼal quBʼaal Tiuxh s-eche:
—Aʼetz vinyole
toq injeqbʼa ka te
inqʼa tij imam Israeel
uvaʼ tetxhal laʼ motx
inkuy sotzsa
inqʼa ipaʼv,
—chich u yol.#Isaiias 59.20-21; 27.9; Jeremiias 31.33-34
28Toqetz val sete tiʼ yeʼ ikʼulviit inqʼa tij imam Israeel inqʼa bʼaʼnla txhaq yol tiʼ Jesuus. Tan tiʼ uvaʼ tira tixva vet el inqʼa tij imam Israeel quBʼaal Jesuus, echetz tixval vete taʼn quBʼaal Tiuxh. Tul aʼletz bʼaʼnil ex elkaʼp vet sete, ex, inqʼa jit ex tij imam Israeel. Pet tiʼ vichʼext quBʼaal Tiuxh inqʼa bʼaxa kʼuy imam inqʼa tij imam Israeel, tul yeʼ nik telka taanima quBʼaal Tiuxh s-tiʼ s-txheel, tan tiʼ uvaʼ tal quBʼaal Tiuxh te inqʼa kʼuy imam uvaʼ laʼ taqʼ bʼaʼnil tiibʼa inqʼa tij imam. 29Tan kam inqʼa bʼaʼnil tal quBʼaal Tiuxh taqʼax te inqʼa tij imam Israeel, tul yeʼl quBʼaal Tiuxh laʼ qʼaʼv tiʼ viyol, kʼuxh ixval viKʼaol. Tul yeʼlat quBʼaal Tiuxh laʼ qʼaʼv tiʼ viyol tiʼ ichʼext vitenam.
30Echetze ex, inqʼa jit tij imam Israeel, tan exich kuxh palsan iyol quBʼaal Tiuxh s-jatxhaq tzaan. Pet s-txheel, tan aʼ vet ex, qat itxum quBʼaal Tiuxh evatz, tiʼ inqʼa ipalsan yolil inqʼa tij imam Israeel. 31Pet echatetz laʼ ibʼane. Tan tiʼ inqʼa ipalsan yolil inqʼa tij imam Israeel, tul ech qat itxumt quBʼaal Tiuxh evatze, echatetz kuxh laʼ itxumt quBʼaal Tiuxh ivatze inqʼa tij imam Israeel inpaqte.
32Aʼetz vet iyaʼebʼal u yol uvaʼa. Tan jankʼal inqʼa xaol s-kaqaayil qat bʼen s-palsan yol, atz s-aj paʼvom vatz quBʼaal Tiuxh. Pet vaʼl kuxh vet qat itxumt quBʼaal Tiuxh ivatz s-kaqaayil.
Uvaʼs talt Paʼp tiʼ u toksal iqʼij quBʼaal Tiuxh
33¡Sibʼxhte vimamala txumbʼal u quBʼaal Tiuxh;
tul mam yol u tootzaqibʼal
quBʼaal Tiuxh!
Tan ¡yeʼxhabʼil invaʼq
laʼ bʼen s-te
kam titzʼabʼal
tiʼ taqʼax kuʼ yol tinuqul!
Atz ¡yeʼxhabʼil invaʼq
laʼ oleʼv tiʼ tootzaqileʼ
kam uvaʼ kʼaqel taʼn
quBʼaal Tiuxh!
34Tan ech nik tal viyolbʼal quBʼaal Tiuxh s-eche:
—¡Yeʼxhabʼil invaʼq
ootzaqin tetz
kam titzʼabʼal
quBʼaal Tiuxh!
Atz ¡yeʼxhabʼil invaʼq
laʼ aqʼon itxumbʼal
quBʼaal Tiuxh
tiʼ kam uvaʼ nik ibʼaneʼ!
—chich u yol.#Isaiias 40.13
35Tul ech nik tal vaʼt viyolbʼal quBʼaal Tiuxh s-eche:
—Yeʼxhabʼil
invaʼq xaol aqʼon
invaʼq kam
te quBʼaal Tiuxh s-bʼaxa,
echetz yeʼl itxʼoq
quBʼaal Tiuxh s-xeʼ,
—chich u yol.#Joov 41.11
36Tan jankʼalxh inqʼa kam s-kaqaayil, quBʼaal Tiuxh txhejsan, atz quBʼaal Tiuxh nik atinsan, atz quBʼaal Tiuxh nik ichiibʼisal taʼn.
Echetz aʼ, u quBʼaal Tiuxh, laʼ oksal iqʼij s-txheel, atz t-inqʼa jattanulxh yaʼbʼ uvaʼ laʼ uli.
Tul echxh laʼ ibʼane.
Currently Selected:
Romaanos 11: ixlC
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
