Apokaliipsis 8

Uvaʼs tilt Xhun teesal el vijuqv lakʼubʼ tetz u uʼ

1Taʼnetz kuxh teesa el JesuKriisto, uvaʼ ech tilix, eche chelem karneʼl, vijuqv lakʼubʼ tetz u uʼ, tul tira tzʼinun vet tu amlikaʼ. Tul kamal nikʼaʼmil oora ibʼana. 2Yaʼne vil juqvaʼl inqʼa aanxel uvaʼ txaklich vatz quBʼaal Tiuxh. Tul vil taqʼax juunil itrompeeta.

3Yaʼne ul vaʼt u aanxel txakeʼvoq vatz u natxhkʼuulabʼal. Tul mamala insieenso aqʼax s-te tiʼ itzʼeʼsat ok viʼ u natxhkʼuulabʼal. Tul taqʼ ikʼul tibʼ u insieenso tuchʼ vinatxhkʼuulat jankʼal inqʼa xaol Tiuxh, inqʼa niman tetz quBʼaal Tiuxh. Tul iqʼomich val u olibʼ txaʼ xamal taʼn uvaʼ ooroxhtuʼ. Tul aʼ atich u natxhkʼuulabʼal vatz tal uvaʼ kʼuqlich quBʼaal Tiuxh. 4Tul yekich vet jaʼ visibʼel u insieenso tuchʼ vinatxhkʼuulaʼm inqʼa niman tetz Jesuus vatz quBʼaal Tiuxh. Aʼ uvaʼe, nikich itzʼeʼsa u aanxel viʼ u natxhkʼuulabʼal.

5Yaʼne itxey tzaan u aanxel u olibʼ txaʼ xamal tetz insieenso. Tul inojsa u tatibʼ txaʼ xamal s-taqʼtxhaʼlil u xamal uvaʼ nikich toybʼ viʼ u natxhkʼuulabʼal. Tul ikʼoni koʼp vatz u txʼavaʼ. Tul ul vet raaya uvaʼ oqxh ixhaakalil ibʼana. Atz ul vet mamala qul, tul vululkabʼinyichxh veteʼ. Atz ul vet kotzʼinebʼ. Tul ul vet val u kabʼnaano.

Uvaʼs tilt Xhun toqʼsal juqvaʼl inqʼa trompeeta

6Yaʼne motx ibʼan vet tibʼ tutxh juqvaʼl inqʼa aanxel tiʼ toqʼsal inqʼa itrompeeta. 7Tul toqʼsa vet u bʼaxa aanxel vitrompeeta. Tul yekich koʼp vet saqbʼatz tuchʼ xamal uvaʼ yujich tibʼ tuchʼ kaq vatz u txʼavaʼ. Atz yekich tzʼeʼ vet vitoxtanul inqʼa tzeʼ te kaqaayil inqʼa tzeʼ. Tul tira motx tzʼeʼ jankʼal inqʼa kʼoatxh tuchʼ inqʼa itza tuchʼ jankʼal inqʼa txhiko.

8Yaʼne toqʼsa vet vikaʼv aanxel vitrompeeta. Tul yekich koʼp vet val u mamaʼ xamal tu maar. Tul xeʼt oybʼoq tinikʼa u maar. Tul echich tilix, eche invaʼq mamaʼ vitz uvaʼ laʼ oybʼ mam xamal s-tiʼ. Tul oxtanul vet u maar bʼen s-kaq, te kaqaayil u maar. 9Tul tira kam vitoxtanul inqʼa txoo, te kaqaayil inqʼa txoo, inqʼa at xeʼ u maar. Atz tira motx juytzʼ vitoxtanul inqʼa vaarko, te kaqaayil inqʼa vaarko, inqʼa at viʼ u maar.

10Yaʼne toqʼsa vet vitoxv aanxel vitrompeeta. Tul yekich elbʼen val u mamaʼ txʼumil vatz amlikaʼ. Tul sebʼtich toybʼeʼ, eche toybʼ xamal. Tul een koʼpik viʼ vitoxtanul xaomla aʼ, te kaqaayil inqʼa xaomla aʼ. Atz koʼp at viʼ inqʼa titzʼebʼal aʼ. 11Tul aʼich ibʼij u txʼumil ‹Kʼayunchil,› tan tira kʼaybʼix vet vitoxtanul u xaomla aʼ, te kaqaayil u xaomla aʼ. Tul mamala vet xaol motx kam taʼn u aʼ, tan oqxhich vet ikʼayale.

12Yaʼne toqʼsa vet vikajv aanxel vitrompeeta. Tul yekich yan vet jalil u qʼij. Atz bʼen vet jalil u qʼij s-qʼeq, te kaqaayil u qʼij. Atz yekichat yan vet jalil u ichʼ. Atz bʼen vet jalil u ichʼ s-qʼeq, te kaqaayil u ichʼ. Atz yekichat yan vet inqʼa txʼumil. Atz bʼen vet vitoxtanul s-qʼeq te kaqaayil txʼumil. Echetz s-tiʼil yeʼxh vet jankʼal saq ibʼan s-qʼiil; atz yeʼxh vet jankʼal saq ibʼan s-aqʼbʼal.

13Yaʼne vil ipal vaʼt u aanxel vatz amlikaʼ. Tul jankʼalxh tiʼ iqul sichʼini. Tul ech tal s-eche: —¡Txumlebʼal, txumlebʼal inqʼa palsan yolla xaol, inqʼa jeqlel vatz txʼavaʼ! ¡Txumlebʼalxh inqʼa xaol, inqʼa jeqlel vatz txʼavaʼ toq ibʼaneʼ uvaʼs laʼ ikʼult inqʼa kʼaxkʼo uvaʼ toq koʼpoq s-tiibʼa uvaʼs toq toqʼsat oxvaʼt inqʼa aanxel vitrompeeta! —chichich u aanxel.

Currently Selected:

Apokaliipsis 8: ixlC

Highlight

Copy

Compare