Apokaliipsis 9

1Yaʼne toqʼsa vitoʼv aanxel vitrompeeta. Tul vil tel bʼen val u yaabʼla aanxel, eche vaʼq txʼumil. Tul koʼp tuul val u jul uvaʼ yeʼl iyaʼebʼal at bʼen. Tul ech ikoʼp ibʼana, eche tel tzaan vaʼq txʼumil t-amlikaʼ. Tul aqʼax vet tokebʼal u yaabʼla aanxel tiʼ ijaqax u jul, eche ijaqax invaʼq kam tuchʼ laave ibʼana.#Luk 8.31 2Yaʼne ijaq vet u jul. Tul yekich jaʼ vet ul mam sibʼ tuul u jul, eche ijaʼul sibʼ tuul invaʼq mam oorno. Tul tira tokbʼix vet ivatz u qʼij taʼn u sibʼ uvaʼ nikich ijaʼul tu jul. Atz tokbʼix vet u kaqiqʼ. 3Tul jaʼul sakʼ tuul u jul xoʼl u sibʼ. Tul tira motx pax vet el inqʼa sakʼ vatz u txʼavaʼ. Yaʼne aqʼax vet tiqleʼm tiʼ itxhiʼt inqʼa xaol. Tul ech laʼ itxhiʼix inqʼa xaol taʼn, eche itxhiʼon inqʼa bʼaq jej txoo.

4Yaʼne alaxaq vet te inqʼa sakʼ taʼn quBʼaal Tiuxh uvaʼ yeʼlich laʼ ikʼux jankʼal inqʼa txhiko vatz txʼavaʼ. Yeʼl ixaq txhiko laʼ ikʼuxa; atz jitoq ixaq nimla txhaq tzeʼ. Pet aʼ alax te inqʼa sakʼ uvaʼ aʼ laʼich ikʼaxbʼisa inqʼa xaol, inqʼa yeʼl tetxhlal quBʼaal Tiuxh atoʼk tipala.

5Tul alaxat te inqʼa sakʼ uvaʼ jit tira laʼich iyatzʼ inqʼa xaol. Pet laʼich kuxh ikʼaxbʼisa tuulbʼal oʼvaʼl ichʼ. Tul echetz ikʼaxbʼisan vitxhiʼon, eche vikʼaxbʼisan vitxhiʼon inqʼa bʼaq jej txoo. 6Tuulbʼaletz vipal inqʼa xaol t-inqʼa kʼaxkʼo, atz t-inqʼa txhoʼm, tul laʼ itxhok vet ikameʼ. Poro yeʼ laʼ motx ileq vet u kamchil. Atz laʼ tatxhvaaq ikameʼl, poro yeʼ laʼ utxh vet ikameʼ. 7Echichetz tilix inqʼa sakʼ, eche chej uvaʼ bʼanel vet tutxh tiʼ ibʼanax txhʼaʼo. Atz atichaq jaʼ val uvaʼ tiviʼ uvaʼ, eche koroona, uvaʼ ooroxhtuʼ. Tul echichaq ikaʼy, eche ikaʼy xaol.#Joeel 2.4 8Tul atichaq xiʼl iviʼ, eche xiʼl iviʼ ixoq. Atz echich iyakʼil inqʼa tej, eche tej bʼalam.#Joeel 1.6 9Tul atich ok kolbʼal tziʼ taanima, atz kolbʼal tiʼ iqul uvaʼ txhʼitxhʼichxhtuʼ. Tul echich ivulun inqʼa ixichʼ tiʼ ixichʼaneʼ, eche ivulun iqʼex joloq chej uvaʼ juxumal kareʼt taʼn tiʼ ibʼanax txhʼaʼo.#Joeel 2.5 10Atz atich ijej, eche ijej bʼaq jej txoo. Tul atich itzʼuqen ijuʼ vijej. Tul aʼ atich t-vijej ikʼaxbʼisal inqʼa xaol tuulbʼal oʼvaʼl ichʼ. 11Atichetz vaʼl mam iqʼesal inqʼa sakʼ uvaʼ een tzajnaʼqich tu jul. Aʼe val u aanxel palsan iyol quBʼaal Tiuxh. Tul ‹Avadoon› ibʼij. Tul ‹yansanal,› chich telaʼp vibʼij t-quyolbʼal, oʼ inqʼa tij imam Israeel. Tul antxh ‹yansanal,› chich telaʼp paqte tu yolbʼal grieego, u bʼij ‹Apolioon.›

12Aʼetz vaʼl u bʼaxa txumlebʼale uvaʼ laʼ koʼp tiibʼa inqʼa xaol vatz u txʼavaʼ. Pet yaʼn kaʼvaʼt inqʼa txumlebʼal tuleʼ uvaʼ laʼ koʼp tiibʼa inqʼa xaol vatz u txʼavaʼ.

13Yaʼne toqʼsa vet vivaqaq aanxel vitrompeeta. Tul vabʼi iyolon val u qul xoʼl kajvaʼl inqʼa tukʼ uvaʼ at t-junun ixojbʼal u natxhkʼuulabʼal, uvaʼ ooroxhtuʼ, uvaʼ at vatz quBʼaal Tiuxh.#Eeksodo 30.1-3 14Tul ech u yol tal u qul te vivaqaq aanxel uvaʼ yaʼnaqich toqʼsat vitrompeeta uvaʼ atich ok tiqʼabʼ s-eche: —Quxh chit tzaan kajvaʼl inqʼa aanxel, inqʼa qitzel ka tziʼ u mam xaomla aʼ u Eeufrates, —xeʼt u qul. 15Tul ex chitpoq vet tzaan kajvaʼl inqʼa aanxel, inqʼa txʼebʼoʼmyich kuxh tiʼ topoon u oora, atz tiʼ topoon u qʼij, atz tiʼ topoon u ichʼ, atz tiʼ topoon u yaʼbʼ tiʼ iyatzʼax el vitoxtanul inqʼa xaol, inqʼa palsan yol, te kaqaayil inqʼa palsan yol. 16Tul aʼ vet inqʼa aanxel txhaqon laj kʼalal miyoon (200,000,000) tatxhul inqʼa chej uvaʼ atich jaʼ vinaq s-tiʼ bʼanolaq txhʼaʼo. Tul tira vabʼi u tatxhul.

17Pet echetz vil s-eche taʼn quBʼaal Tiuxh, tan vila kam bʼanich taʼn inqʼa chej tuchʼ inqʼa vinaq inqʼa atich jaʼ s-tiʼ. Atichetz kolbʼalaq tziʼ taanima uvaʼ oxvaʼlenich ikaʼyeʼ. Atich kaq, eche xamal tilixeʼ. Atz atich tiʼ xay uvaʼ ukʼnaʼq ikaʼyeʼ, eche u sivan safiiro tilixeʼ, atz eche sibʼ tilixeʼ. Atz atich qʼan ikaʼyeʼ uvaʼ qʼolomaany kuxhtuʼ. Pet inqʼa chej, tan echich inqʼa iviʼ, eche iviʼ bʼalam. Tul aʼ nikich teluʼl titziʼ inqʼa chej u xamal tuchʼ sibʼ, atz tuchʼ xamal uvaʼ qʼolomaanxhtuʼ. 18Aʼetz vet u xamal tuchʼ sibʼ, atz tuchʼ u xamal uvaʼ qʼolomaanxhtuʼ, uvaʼ nikich teluʼl titziʼ inqʼa chej, yatzʼon vitoxtanul inqʼa palsan yolla xaol vatz txʼavaʼ, te kaqaayil. 19Tul aʼetz atich viyakʼil inqʼa chej titziʼ tuchʼ tijej. Tan ataqich iviʼ inqʼa ijej. Tan echich vijej inqʼa chej, eche kan. Tul nikich motx itxhiʼ inqʼa xaol.

20Kʼuxhetz motx koʼp u kʼaxkʼo tiibʼa inqʼa xaol, inqʼa yeʼ motx kami. Poro tira jitoq motx titzʼa tibʼ tiʼ yeʼ ibʼanax inqʼa yeʼbʼaʼn. Tul jitoq motx itanbʼa inatxhkʼuulal inqʼa demoonio. Atz jitoq itanbʼa inatxhkʼuulal inqʼa itiuxh uvaʼ junt motx ibʼita, inqʼa ibʼitichla tiuxh uvaʼ ooroxhtuʼ, atz inqʼa plaataxhtuʼ, atz inqʼa vroonsexhtuʼ, atz inqʼa sivanxhtuʼ, atz inqʼa tzeʼ. Tan jitoq nik tilon inqʼa ibʼitichla tiuxh; atz jitoq nik tabʼineʼ; atz jitoq nik ixaoneʼ.#Saalmo 115.4-7; 135.15-17; Danieel 5.4

21Tul yeʼ motx titzʼa tibʼ inqʼa xaol tiʼ u yatzʼo ibʼ. Atz yeʼat itanbʼa inqʼa qʼiaʼm. Atz yeʼat itanbʼa u yansa ibʼ. Atz yeʼat itanbʼa u elaqʼ.

Currently Selected:

Apokaliipsis 9: ixlC

Highlight

Copy

Compare