Gaalatas 5

Uvaʼs talt Paʼp uvaʼ quBʼaal Jesuus qat eesan el inqʼa niman tetz jaqʼ inqʼa bʼekʼbʼal

1Qatetz ichit oʼ u quBʼaal JesuKriisto, tiʼ uvaʼ yeʼl oʼ txeyel oʼ taʼn inqʼa bʼekʼbʼal laʼ ibʼana. Echetz s-tiʼile txhabʼamoqxh vet etatin tuulbʼal uvaʼ chitel vet ex taʼn u quBʼaal JesuKriisto. Pet yeʼetz ekuy veteʼ uvaʼ laʼ etoksa etibʼ paqte jaqʼ vitatxhʼt ex inqʼa bʼekʼbʼal tiʼ inimaleʼ, eche u yuuka, u txeyol tetz kaʼvoʼq vaʼk.

2Pet abʼitaq vinuqul toq val sete, in Paʼp: Poro oqetz tetxhalxh laʼ qolpeʼl inbʼiil te vetxhiʼoʼl, tiʼ uvaʼ bʼaʼn vet etatin vatz quBʼaal Tiuxh nik etaleʼ, tul yeʼxhkametz itxaʼke kam uvaʼ qat ibʼan u quBʼaal JesuKriisto, tiʼ uvaʼ jit vet ex aj paʼvom vatz quBʼaal Tiuxh. 3Toqetz inkaʼpaqu talax sete. Jaʼl ex inqʼa aʼ tel kuxh laʼ enima u bʼekʼbʼal tiʼ iqolpeʼl inbʼiil te vetxhiʼoʼl, tul tetxhaletz kuxh laʼ enima vet jankʼal inqʼa bʼekʼbʼal oq eche. 4Jaʼletz ex, uvaʼ, aʼ inqʼa bʼekʼbʼal laʼ enima, tiʼ uvaʼ jit vet ex aj paʼvom vatz quBʼaal Tiuxh nik etaleʼ, tul tiraetz nik irinp vet ele vetatin kʼatz u quBʼaal JesuKriisto. Atz eyetz vet el exe jaqʼ u bʼaʼnil tetz kuybʼal epaʼv vatz quBʼaal Tiuxh. 5Pet oʼ, tan aʼ viTiuxhil Tiuxh nik kʼuqbʼan qukʼuul uvaʼ jit vet oʼ aj paʼvom vatz quBʼaal Tiuxh. Echetz tiʼ u qukʼuqbʼat qukʼuul tiʼ kam uvaʼ ibʼan u quBʼaal JesuKriisto, tul nik qutxʼebʼeʼ uvaʼ bʼaʼn vet qatin vatz quBʼaal Tiuxh. 6Tan, tiʼ uvaʼ, oʼ vet niman tetz Jesuus, tul yeʼl oʼ laʼ el vet qaanima s-tiʼ, kʼuxh qolel vet el inbʼiil te u qutxhiʼoʼl, atz kʼuxh yeʼ qolel el. Pet aʼ kuxh laʼ qukʼuqbʼavat qukʼuul tiʼ kam uvaʼ ibʼan u quBʼaal JesuKriisto s-qiʼ, tiʼ uvaʼ sibʼxh taanima s-qiʼ.

7Poro aʼxh txhʼuyel exe tiʼ inimal u quBʼaal JesuKriisto s-bʼaʼn, eche vaʼq xaol uvaʼ nik ixeʼt qʼexoq, tetxhal toleʼveʼ. Pet ¡jaʼletzebʼ kuxh qat sotzsan ekʼuul tiʼ etanbʼat inimal vinuqul! 8Tan jit tetz quBʼaal Tiuxhe inqʼa txumbʼal inqʼae, u quBʼaal Tiuxh uvaʼ saʼon tzaan ex.

9Pet noqetz etil etibʼ, tan nal kuxh toq ipaxin u yaabʼla txhusbʼal sexoʼl uvaʼe, eche nik ipaxin u aqʼbʼal jaʼ tuul paan xoʼl u qʼota. 10Niketz inatxhp s-ve taʼn quBʼaal Tiuxh uvaʼ yeʼl invaʼtoʼq txhusbʼal laʼ etitzʼa etok bʼen s-tiʼ. Pet jaʼl uvaʼ nik txhokon isotzsal ekʼuul, tul quBʼaal Tiuxh toq aqʼon kuʼ yol tinuqul s-tiʼ, tiʼ ibʼen tu kʼaxkʼo, kʼuxh jabʼilxhtuʼ.

11Pet toq val sete, inmol s-niman tetz Jesuus, tan yeʼxhkam nik intxhus viqolpeʼl bʼeeq te vitxhiʼoʼl inqʼa xaol. Tan eche uvaʼ ant koqxh nik val inuqul tiʼ viqolpeʼl bʼeeq te vitxhiʼoʼl inqʼa xaol, tul yeʼletz u vinaqe uvaʼe laʼ txhiʼan s-viʼ. Pet ¡kametz koq s-tiʼil nik teesa u vinaq inqʼij, uvaʼ nik alon iqolpeʼl bʼeeq te vetxhiʼoʼl! Pet tiʼ uvaʼ nik inpaxsa paʼl vijaʼ quBʼaal JesuKriisto vatz kurus, tul aʼetz uvaʼe, nik itxhiʼan u vinaq s-tiʼ. 12Pet jaʼletz inqʼa xaol uvaʼ, aʼ kuxh nik itxhus ex, tiʼ uvaʼ laʼ qolox el inbʼiil te vetxhiʼoʼl, tul ¡aʼetz ikʼulel uvaʼ, aʼ koq u tetz laʼ qolpeʼl s-kaqaayil!

Uvaʼs talt Paʼp uvaʼ kʼuxh chitel vet inqʼa niman tetz Jesuus tiʼ yeʼ inimal inqʼa bʼekʼbʼal, poro jit aʼ nik tal uvaʼ kam koq kuxh vet paʼv laʼ bʼanaxi

13Pet jankʼaletz ex inmol s-niman tetz Jesuus, tan at invaʼt yol toq val sete tiʼ u chitpichil uvaʼ qat isaʼ tzaan ex quBʼaal Tiuxh s-tiʼ; aʼe, uvaʼ laʼ chitp ex tiʼ inimal inqʼa bʼekʼbʼal. Poro tuchʼetz koqe uvaʼ chitel vet ex tiʼ inimal inqʼa bʼekʼbʼal, tul aʼ koq saʼ etal veteʼ uvaʼ kam kuxh kantxhaq laʼ ebʼana, tiʼ uvaʼ chitel vet ex laʼ enatxha; atz tira kuxh laʼ etxhaqpu vet etibʼ tiʼ ibʼekʼt ex inqʼa tatxhaʼv vetxhiʼoʼl. Yeʼle. Pet aʼ laʼ ebʼane uvaʼ laʼ motx elotxh etibʼ, atz laʼ ekʼuula etibʼ sevatzaq, tan at etaanima sevatzaqil. 14Tan aʼ nik ex qunimavat vet jankʼal inqʼa bʼekʼbʼal, oq nik qunima vaʼl u yol uvaʼ ech nik tal s-eche: —Atoqxh avaanima tiʼ vamol, eche vavaanima seʼe, —chich u yol.#Leviitiko 19.18 15Echetz xeevaqxh etibʼ. Tan oq laʼ kuxh motx txhiʼan ex, atz laʼ kuxh motx eyaj etibʼ sevatzaq, tul jatxo ibʼetze toq motx yaʼk ex sevatzaq.

Uvaʼs talt Paʼp kam laʼ ilix tiʼ inqʼa xaol, inqʼa aʼ u tatxhaʼv vitxhiʼoʼl nik bʼekʼon

16Toqetz val sete, bʼanvaq kam uvaʼ nik isaʼ viTiuxhil Tiuxh. Tan oq ech laʼ ebʼane, tul jitetz aʼ laʼ ebʼan u oʼtla txumbʼal tetz bʼano paʼv. 17Tan tira yeʼ nik isaʼ u oʼtla txumbʼal kam uvaʼ nik isaʼ viTiuxhil Tiuxh. Tul yeʼat nik isaʼ viTiuxhil Tiuxh kam uvaʼ nik isaʼ u oʼtla txumbʼal tetz bʼano paʼv. Tan nik motx itxhʼaʼoi tibʼ s-vatzaqil. Xaʼtetze yeʼ nik etoleʼv tiʼ ibʼanax kam u bʼaʼn uvaʼ nik esaʼ ibʼanaxeʼ. 18Pet aʼl bʼaʼn uvaʼ, aʼ laʼ etiqʼo vet tetz viTiuxhil Tiuxh; pet jitetz vet aʼ atoʼk ex jaqʼ inqʼa bʼekʼbʼal laʼ ibʼana.

Uvaʼs talt Paʼp kam laʼ ilix tiʼ inqʼa xaol, inqʼa, aʼ u oʼtla txumbʼal tetz bʼano paʼv nik bʼekʼon

19Tul veqlelxhtuʼ jabʼistee inqʼa ibʼanoʼm u oʼtla txumbʼal tetz bʼano paʼv. Aʼetze inqʼaa: Yansa ibʼ tuchʼ vaʼt xaol uvaʼ jit ikʼulel tibʼ s-tuchʼ; inqʼa txoqebʼal kʼuulla txumbʼal; atz inqʼa txhaqpinaʼq kuxh tiʼ ibʼanax kamaq kuxh paʼvil; 20inqʼa natxhkʼuula bʼitichla tiuxh; kunaʼm; txhiʼtxhoil; txhʼaʼo; txhoʼnichil aanima; kʼaʼnal; etxha ibʼ; yao ibʼ; jatxo ibʼ sevatzaq; 21txhiʼal kʼuul; yatzʼoʼm; qʼabʼaʼm; inimal nimla qʼij uvaʼ, aʼ kuxh u yeʼbʼaʼn nik ibʼanax s-tuul; atz kam telaq kuxh yeʼbʼaʼnil uvaʼ eela tuchʼ inqʼa yaʼnxh vall sete. Poro niketz intiila bʼekʼu inpaqte sete, tan jaʼl inqʼa xaol uvaʼ, aʼ kuxh inqʼa yeʼbʼaʼn nik ibʼaneʼ, aʼetz inqʼae, yeʼl tokebʼal tiʼ ibʼen tal uvaʼ nik ibʼanvat quBʼaal Tiuxh iqʼesalil.

Uvaʼs talt Paʼp kam laʼ ilix tiʼ inqʼa xaol, inqʼa, aʼ viTiuxhil Tiuxh nik bʼekʼon

22Petetz inqʼa bʼaʼn uvaʼ laʼ qubʼana uvaʼ nik isaʼ viTiuxhil Tiuxh uvaʼ, eche taqʼt viʼoq bʼaʼnla tzeʼ ivatz tilixeʼ. Aʼetze inqʼaa: At taanima tiʼ imol; chiibʼichil; tibʼaʼnil laʼ atink s-vatzaq; nik ikotxʼ ivatz; ayaʼlxh bʼaʼn s-te; bʼanol tetz bʼaʼnil; kʼuqlebʼ kʼuul tatineʼ; 23iqʼomal kuʼl tibʼ tuchʼ itxumbʼal; maqo ibʼ tiʼ kamxh paʼvil. Yeʼletz invaʼq bʼekʼbʼal laʼ maqon oʼ tiʼ ibʼanax inqʼae. 24Echetz jatvaʼlxh vet oʼ inqʼa niman tetz Jesuus, tan qat motx qutanbʼal vet ibʼanax inqʼa oʼtla qutxumbʼal tetz bʼano paʼv, inqʼa kantxhaqla atxhaʼv, inqʼa tzʼeʼyxh u qutxhiʼoʼl tiʼ ibʼanaxeʼ. 25Tiʼetz uvaʼ qat itzʼeʼvy vet ex vatz quBʼaal Tiuxh taʼn viTiuxhil, tul aʼetz laʼ qubʼane uvaʼ jik laʼ qatin vatz u quBʼaal Tiuxh, tul aʼ viTiuxhil Tiuxh laʼ iqʼon qubʼey. 26Pet yeʼ laʼ qukuy tok u oksa qʼijil s-quxoʼl tiʼ qukʼaxbʼisat qibʼ s-quvatzaq, atz tiʼ itxhoʼn qaanima s-quvatzaq.

Currently Selected:

Gaalatas 5: ixlC

Highlight

Copy

Compare