Gaalatas 6
6
1Toqetz val sete, ex inmol s-niman tetz Jesuus, oqetz tuul kuxh laʼ ikuʼ invaʼq emol t-paʼv laʼ etila, tul aʼetz vet ex laʼ lakon tuchʼ bʼaʼnil, ex inqʼa txhabʼamalxh vet tiqʼol viyolbʼal quBʼaal Tiuxh s-bʼaʼn etaʼn. Pet iqʼomal kuʼl etibʼ tuchʼ etxumbʼal laʼ ebʼanvat. Tul laʼ exee etibʼ tiʼ ebʼantaʼ, tan avoqe ant ex laʼ etxhbʼul ekuʼ t-paʼv. 2Echetz lotxhvaq etibʼ sevatzaqil tiʼ inqʼa itzaʼlal uvaʼ laʼ motx palk ex. Oqetz ech laʼ ebʼane, echetz laʼ motx enimate inqʼa yol uvaʼ ibʼekʼ ka u quBʼaal JesuKriisto.#Xhun 13.34 3Tan jaʼl invaʼq uvaʼ niim kuxh vet nik inatxheʼ, tul aʼetze yeʼl tiqleʼm, juntetz kuxh nik teesa tibʼe t-bʼey s-junal. 4Pet juntxh etitzʼa etibʼ jununil ex, oq bʼaʼn vebʼanoʼm. Echetz laʼ tutxh echiibʼe s-tiʼ. Pet jit aʼ laʼ ebʼanvat etibʼ eela tiʼ etoksat eqʼij kʼatz vaʼtoʼq emol. 5Echetz jununil ex tiʼ etilt etibʼ. Tan aʼ vet etiqatz uvaʼ, aʼ u bʼaʼn laʼ ebʼana.
6Jaʼletz ex, uvaʼ nik etxhusux tiʼ viyolbʼal quBʼaal Tiuxh, tul ikʼulelxhtuʼ uvaʼ laʼ elotxh u txhusul etetz tuchʼaq kam uvaʼ at sexeʼ.
7Tul yeʼ kuxh sotz ekʼuul, tiʼ uvaʼ yeʼxhabʼil nik ilon ex. Tan nik til u quBʼaal Tiuxh kam uvaʼ nik ebʼaneʼ. Tan yeʼ laʼ oleʼv ex tiʼ isotzsal ikʼuul. Tan ech bʼanel taʼn, eche u vinaq uvaʼ laʼ avi. Tan kamxh uvaʼ laʼ tava u vinaq, tul antxh uvaʼe toq til ivatz. 8Tan jaʼl uvaʼ, aʼ kuxh nik ibʼan kam inqʼa kantxhaq tetz u oʼtla txumbʼal tetz bʼano paʼv, inqʼa iqʼomal kuxh taʼn; tan tetxhal toq til ikantxhaqul, tan tetxhal ibʼen t-kʼaxbʼichil s-tiʼ. Tan kam uvaʼ laʼ itxhika, tul antxh uvaʼe laʼ imola. Pet jaʼl uvaʼ, aʼ nik ibʼan kam inqʼa nik isaʼ viTiuxhil Tiuxh, tan tetxhal laʼ ikʼul qʼij isaq uvaʼ yeʼl iyaʼebʼal taʼn viTiuxhil Tiuxh. 9Poro yeʼvaqetz laʼ etanbʼa ibʼanax u bʼaʼn. Tan tetxhal laʼ opoon invaʼl qʼij, tul laʼ qukʼul vet qutxʼaqaʼm, oq yeʼ laʼ pal qukʼuul tiʼ ibʼanax u bʼaʼn, eche nik imolt vet u vinaq ivatz kam uvaʼ nik tava.
10Echetz nik valte sete uvaʼ qubʼanvaqxh u bʼaʼn te inqʼa xaol s-kaqaayil tuulbʼal uvaʼs laʼ utxh qubʼantaʼ. Poro aʼxh bʼaxa laʼ qubʼanvat u bʼaʼn te inqʼa qumol s-niman tetz Jesuus, tan eela tuchʼ qitzʼin qatzik qibʼ s-tuchʼ.
Uvaʼs toksat Paʼp iqʼij vikamebʼal quBʼaal Jesuus vatz u kurus
11 Poro inetz vet toq tzʼibʼan kaʼt inqʼa yol sete. Aloq tetxhlalxh vintzʼibʼ, tan nimaqxh ichʼijeʼ.
12At jolol inqʼa sexoʼl uvaʼ nik yaʼlun ex, tiʼ uvaʼ tetxhal laʼ qolox el inbʼiil te vetxhiʼoʼl. Aloq jit nikoq kuxh motx ibʼan s-eche, pet aʼ kuxh nik motx isaʼeʼ uvaʼ laʼ oksal iqʼij. Tul yeʼ laʼ motx eesal iqʼij tiʼ vinimal vikamebʼal u Kriisto vatz kurus, nik motx taleʼ. 13Poro jitoq inqʼa xaol inqʼae, inqʼa qolel vet el inbʼiil te vitxhiʼoʼl, nik motx niman inqʼa bʼekʼbʼal s-kaqaayil. Pet aʼaq kuxh isaʼ toksataq iqʼij setiʼ, tiʼ enimat viqolox el inbʼeeq te vetxhiʼoʼl.
14Pet in, tan yeʼl inbʼeeq t-vitzʼabʼal uvaʼ laʼ voksa inqʼij tiʼ jankʼal inqʼa nikich motx inbʼan tiʼ inimal inqʼa bʼekʼbʼal. Pet aʼ nik voksa iqʼij vinuqul inqʼa bʼaʼnla txhaq yol tiʼ vikamebʼal quBʼaal JesuKriisto vatz u kurus. Echetz yeʼxhkam vet itxaʼk s-ve kam inqʼa kantxhaq nik tutxh vatz u txʼavaʼ, inqʼa jit aʼ tzajnaʼq t-amlikaʼ kʼatz quBʼaal Tiuxh. Tan, tiʼ uvaʼ tetxhal ikam vitxhiʼoʼl u quBʼaal JesuKriisto vatz kurus s-qiʼ, echetz yeʼxhkam nik vatxhva vet ok ibʼanax kam inqʼa kantxhaq nik ibʼanax vatz txʼavaʼ. 15Echetz yeʼxhkam itxaʼk vatz quBʼaal Tiuxh, kʼuxh qolel el inbʼeeq te u qutxhiʼoʼl, atz kʼuxh yeʼ qolel el. Pet taʼn kuxh at itxaʼk s-qe uvaʼ laʼ qunima vet kam inqʼa akʼla txumbʼal; tan aʼ uvaʼe, qat iviinqixsa quBʼaal Tiuxh t-qaanima. 16Jatvaʼletzxh ex, uvaʼ, aʼ iqʼomal vet u akʼla txumbʼal tetz quBʼaal JesuKriisto etaʼn, tul aʼetz vibʼaʼnil quBʼaal Tiuxh laʼ atin tetaanima; tul laʼat toybʼa evatz. Tan ex vet itenam quBʼaal Tiuxh, echiche inqʼa tij imam Israeel, tan itenamich quBʼaal Tiuxh.
17Toqetz val sete uvaʼ yaʼoq vet sevatz tiʼ viqolox el inbʼeeq te inqʼa txhiʼoʼl. Tan pay vet inkʼuul tiʼ talaxeʼ. Tan ilat vintxhiʼoʼl at mamala yutxhʼ s-tiʼ, poro tiʼ valt inuqul viyol quBʼaal JesuKriisto sexoʼl.
Uvaʼs taqʼt bʼen Paʼp bʼaʼnil ikʼuul inqʼa niman tetz Jesuus, tul yaʼ vet tiʼ itzʼibʼal bʼen viyol
18Tul aʼ vibʼaʼnil u quBʼaal JesuKriisto laʼ atin tetaanxelal, ex inmol s-niman tetz Jesuus.
[Tul echxh laʼ ibʼane.]
Currently Selected:
Gaalatas 6: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
