Popular Bible Verses from Gaalatas 5

Share

Petetz inqʼa bʼaʼn uvaʼ laʼ qubʼana uvaʼ nik isaʼ viTiuxhil Tiuxh uvaʼ, eche taqʼt viʼoq bʼaʼnla tzeʼ ivatz tilixeʼ. Aʼetze inqʼaa: At taanima tiʼ imol; chiibʼichil; tibʼaʼnil laʼ atink s-vatzaq; nik ikotxʼ ivatz; ayaʼlxh bʼaʼn s-te; bʼanol tetz bʼaʼnil; kʼuqlebʼ kʼuul tatineʼ; iqʼomal kuʼl tibʼ tuchʼ itxumbʼal; maqo ibʼ tiʼ kamxh paʼvil. Yeʼletz invaʼq bʼekʼbʼal laʼ maqon oʼ tiʼ ibʼanax inqʼae.

Toqetz val sete, bʼanvaq kam uvaʼ nik isaʼ viTiuxhil Tiuxh. Tan oq ech laʼ ebʼane, tul jitetz aʼ laʼ ebʼan u oʼtla txumbʼal tetz bʼano paʼv.

Tiʼetz uvaʼ qat itzʼeʼvy vet ex vatz quBʼaal Tiuxh taʼn viTiuxhil, tul aʼetz laʼ qubʼane uvaʼ jik laʼ qatin vatz u quBʼaal Tiuxh, tul aʼ viTiuxhil Tiuxh laʼ iqʼon qubʼey.

Echetz jatvaʼlxh vet oʼ inqʼa niman tetz Jesuus, tan qat motx qutanbʼal vet ibʼanax inqʼa oʼtla qutxumbʼal tetz bʼano paʼv, inqʼa kantxhaqla atxhaʼv, inqʼa tzʼeʼyxh u qutxhiʼoʼl tiʼ ibʼanaxeʼ.

Tul veqlelxhtuʼ jabʼistee inqʼa ibʼanoʼm u oʼtla txumbʼal tetz bʼano paʼv. Aʼetze inqʼaa: Yansa ibʼ tuchʼ vaʼt xaol uvaʼ jit ikʼulel tibʼ s-tuchʼ; inqʼa txoqebʼal kʼuulla txumbʼal; atz inqʼa txhaqpinaʼq kuxh tiʼ ibʼanax kamaq kuxh paʼvil; inqʼa natxhkʼuula bʼitichla tiuxh; kunaʼm; txhiʼtxhoil; txhʼaʼo; txhoʼnichil aanima; kʼaʼnal; etxha ibʼ; yao ibʼ; jatxo ibʼ sevatzaq; txhiʼal kʼuul; yatzʼoʼm; qʼabʼaʼm; inimal nimla qʼij uvaʼ, aʼ kuxh u yeʼbʼaʼn nik ibʼanax s-tuul; atz kam telaq kuxh yeʼbʼaʼnil uvaʼ eela tuchʼ inqʼa yaʼnxh vall sete. Poro niketz intiila bʼekʼu inpaqte sete, tan jaʼl inqʼa xaol uvaʼ, aʼ kuxh inqʼa yeʼbʼaʼn nik ibʼaneʼ, aʼetz inqʼae, yeʼl tokebʼal tiʼ ibʼen tal uvaʼ nik ibʼanvat quBʼaal Tiuxh iqʼesalil.

Pet jankʼaletz ex inmol s-niman tetz Jesuus, tan at invaʼt yol toq val sete tiʼ u chitpichil uvaʼ qat isaʼ tzaan ex quBʼaal Tiuxh s-tiʼ; aʼe, uvaʼ laʼ chitp ex tiʼ inimal inqʼa bʼekʼbʼal. Poro tuchʼetz koqe uvaʼ chitel vet ex tiʼ inimal inqʼa bʼekʼbʼal, tul aʼ koq saʼ etal veteʼ uvaʼ kam kuxh kantxhaq laʼ ebʼana, tiʼ uvaʼ chitel vet ex laʼ enatxha; atz tira kuxh laʼ etxhaqpu vet etibʼ tiʼ ibʼekʼt ex inqʼa tatxhaʼv vetxhiʼoʼl. Yeʼle. Pet aʼ laʼ ebʼane uvaʼ laʼ motx elotxh etibʼ, atz laʼ ekʼuula etibʼ sevatzaq, tan at etaanima sevatzaqil.

Tan tira yeʼ nik isaʼ u oʼtla txumbʼal kam uvaʼ nik isaʼ viTiuxhil Tiuxh. Tul yeʼat nik isaʼ viTiuxhil Tiuxh kam uvaʼ nik isaʼ u oʼtla txumbʼal tetz bʼano paʼv. Tan nik motx itxhʼaʼoi tibʼ s-vatzaqil. Xaʼtetze yeʼ nik etoleʼv tiʼ ibʼanax kam u bʼaʼn uvaʼ nik esaʼ ibʼanaxeʼ.

Tan aʼ nik ex qunimavat vet jankʼal inqʼa bʼekʼbʼal, oq nik qunima vaʼl u yol uvaʼ ech nik tal s-eche: —Atoqxh avaanima tiʼ vamol, eche vavaanima seʼe, —chich u yol.

Pet yeʼ laʼ qukuy tok u oksa qʼijil s-quxoʼl tiʼ qukʼaxbʼisat qibʼ s-quvatzaq, atz tiʼ itxhoʼn qaanima s-quvatzaq.

Qatetz ichit oʼ u quBʼaal JesuKriisto, tiʼ uvaʼ yeʼl oʼ txeyel oʼ taʼn inqʼa bʼekʼbʼal laʼ ibʼana. Echetz s-tiʼile txhabʼamoqxh vet etatin tuulbʼal uvaʼ chitel vet ex taʼn u quBʼaal JesuKriisto. Pet yeʼetz ekuy veteʼ uvaʼ laʼ etoksa etibʼ paqte jaqʼ vitatxhʼt ex inqʼa bʼekʼbʼal tiʼ inimaleʼ, eche u yuuka, u txeyol tetz kaʼvoʼq vaʼk.