1 Koriintios 4

Uvaʼs talt Paʼp uvaʼ lotxhonal kuxh tatin kʼatz quBʼaal Jesuus

1Echetz yeʼ kuxh etoksa quqʼij, tan yiqxh oʼ kuxh taqʼonvil quBʼaal JesuKriisto. Atz oʼ kuxh iqatzin tetz talax inqʼa iyol quBʼaal Tiuxh, inqʼa yaʼn nik taqʼ ootzaqiloq s-txheel. 2Pet toqetz val sete, jabʼilxh oʼ, inqʼa iqatzin talax inuqul inqʼa iyol quBʼaal Tiuxh, tul aʼ isaʼ uvaʼ kʼuqlebʼalxh kʼuul oʼ laʼ ibʼana tiʼ ibʼanax u taqʼon quBʼaal Tiuxh. 3Atz eche in, tan yeʼxhkam nik voksa s-tuul, kʼuxh kamxh nik etal s-viʼ tiʼ u vaqʼon nik inbʼaneʼ, atz kʼuxh kamxh laʼ tal inqʼa aqʼolaq kuʼ yol tinuqul s-viʼ. Tul jitoq in nik alon yol s-viʼ uvaʼ bʼaʼn uvaʼ nik inbʼaneʼ. Pet taʼn kuxh u quBʼaal Tiuxh laʼ alon yol s-viʼ.

4Kʼuxh ile nik innatxh tuchʼ u vitzʼabʼal uvaʼ yeʼl invaʼq yeʼbʼaʼn nik inbʼaneʼ, poro jitetz kuxh, tiʼ uvaʼ nik vitzʼa, tul bʼaʼn koq vet in. Pet aʼ u quBʼaal Tiuxh laʼ alon inuqul u yol s-viʼ, oq uvaʼ bʼaʼn vet in. 5Echetz yeʼ kuxh ebʼaxabʼsa etibʼ tiʼ talax invaʼq yol s-viʼ. Pet txʼebʼvaq; tan laʼ nal ul u quBʼaal JesuKriisto, yaʼne laʼ ul tal inuqul inqʼa yol s-viʼ. Tan aʼ u quBʼaal JesuKriisto laʼ ul aqʼon eluʼl vatz qʼij saq jabʼiste inqʼa ikantxhaqla bʼanoʼm inqʼa xaol, inqʼa muqel kuxh nik motx ibʼantaʼ. Tul aʼ u quBʼaal JesuKriisto laʼ ul alon eluʼl inuqul vatz qʼij saq kam uvaʼ at tu taanima junun xaol. Echetz jununil vet oʼ laʼ toksa quBʼaal Tiuxh quqʼij tiʼ kam qubʼanoʼm.

6Toqetz val sete, ex inmol s-niman tetz Jesuus, kam s-tiʼil nik viqʼo tzaan vibʼ s-tuul tuchʼ Apoolos, tan, tiʼ uvaʼ nik qusaʼ ex. Tul laʼ bʼen sete kam u yol tzʼibʼamal ka t-viyolbʼal quBʼaal Tiuxh uvaʼ ech s-eche:

—Tul yeʼl ex laʼ pal paʼl ex

s-tiibʼa kam nik tal

viyolbʼal quBʼaal Tiuxh

uvaʼ tzʼibʼamal,

—chich u yol.

Tul yeʼ laʼ ebʼana uvaʼ vaʼl emol laʼ etoksa iqʼij, atz vaʼt laʼ eteesa txha iqʼij. 7Tan yeʼxhabʼil invaʼq nik alon sete uvaʼ, aʼ vet ex palnaʼql ex viʼ inqʼa emol s-kaqaayil. Jankʼalxh inqʼa txumbʼal uvaʼ at sekʼatza, tan quBʼaal Tiuxhe qat aqʼon sete. Tiʼetz uvaʼ qat ekʼul vetxumbʼal te quBʼaal Tiuxh, tul ¡kametz s-tiʼil nik etaqʼ bʼen etibʼ s-nim s-tuchʼ, tul yeʼ nik etulsa vet sekʼuul uvaʼ, aʼ quBʼaal Tiuxhe qat aqʼon sete!

8Tan aʼ nik etitzʼa uvaʼ tzʼeqel vet etatin vatz quBʼaal Tiuxh. Yeʼletza. Atz ex vet txʼiol iqʼij tiʼ tootzaqil viyolbʼal quBʼaal Tiuxh nik enatxheʼ. Atz aʼ nik enatxheʼ uvaʼ, ex vet iqʼesal kʼatz quBʼaal JesuKriisto. Ape bʼaʼnetz kuxhteʼe, uvaʼ nuqetz koqxhtuʼ uvaʼ, aʼ vet ex nik bʼanon iqʼesalil, atz tzʼeqeletz koqxh vet etatin vatz quBʼaal Tiuxh; tul ¡tetxhoqetz ant vet oʼe laʼ bʼanon iqʼesalil sekʼatza!

9Pet aʼ nik vitzʼa s-qiʼ, oʼ inqʼa apoostol, uvaʼ, aʼ, oʼ qat taqʼ bʼen oʼ quBʼaal Tiuxh s-chʼixvebʼal, atz aʼ, oʼ qat taqʼ ka oʼ tiyaʼtebʼal u tilixeʼ, eche tiqʼol pereexho taʼn invaʼq qʼesal sol. Tan ech kuxh vet qatin, eche vaʼq pereexho uvaʼ, aʼ vet u kamchil nik itxʼebʼeʼ. Atz ech kuxh vet qatin, eche saatxhvil tiʼ itzeʼlet oʼ inqʼa xaol, atz inqʼa aanxel, atz vatz jankʼal inqʼa at vatz txʼavaʼ amlikaʼ s-kaqaayil.{*}#4.9 Eche u yol tal Paʼp ‹vaʼq pereexho uvaʼ, aʼ vet u kamchil nik itxʼebʼeʼ,› tan aʼ tiqʼo tzaan Paʼp tuul viyol tiʼ u xaol uvaʼ nik taqʼax vet kuʼ yol tinuqul tiʼ ikamsal el. Tan at inqʼa aʼl nikich itzokʼox el iviʼ, atz at inqʼa aʼl nikich toksal ok vatz bʼalam uvaʼ kamyxh t-vaʼy. Tul ech ivatz mamala xaol nikich itxhiʼixeʼ. Atz vaʼt u yol nik tiqʼo tzaan Paʼp tuul viyol uvaʼ: —Ech kuxh vet qatin, eche saatxhvil tiʼ itzeʼlet oʼ inqʼa xaol, —chiche. Aʼetz tiqʼo tzaan Paʼp tuul viyol, eche uvaʼ nikich ibʼan inqʼa grieego tiʼ ikʼutxht kam kuxh invaʼq tzeʼlebʼal vatz inqʼa xaol, tul aʼaq isaʼ yeʼ laʼ ipal ikʼuul inqʼa xaol. Tul chiʼtetz kuxh vet inqʼa xaol tiʼ isaqileʼ. Atz kamal aʼ nik ikʼutxhux s-vatz tiʼ titzʼeʼv vaʼq xaol uvaʼ, ech ivatz laʼ kami, tul mam kuxh tzeʼeʼm nik motx ibʼan s-tiʼ. Tan jit nuq koqxhtuʼ. Echichetz kuxh vet u tatin Paʼpe vatz inqʼa xaol, tan kamal jit inuqul uvaʼ nikich tal Paʼp vatz inqʼa xaol. Tul jit nikich koq kuxh tal Paʼp u yol, pet aʼebʼ nikich tul s-kʼuul Paʼp kame uvaʼ ulbʼel tu tenam Ateenas uvaʼs itzeʼlel taʼn inqʼa xaol. Ile nik tal t-Vibʼanoʼm inqʼa Apoostol 17.22-34. Tul echat kuxh itzeʼlel Paʼpe paqte uvaʼ nikich talt Paʼp viyolbʼal quBʼaal Tiuxh tu tenam Koriinto, eche uvaʼ nik tal t-Vibʼanoʼm inqʼa Apoostol 18.5-6. Atz tal Paʼp uvaʼ: —Itzeʼlet oʼ inqʼa xaol, atz inqʼa aanxel, atz vatz jankʼal inqʼa at vatz txʼavaʼ amlikaʼ s-kaqaayil, —chiche. Aʼetz nik tal Paʼp tuchʼ viyol uvaʼ tala, tiʼ uvaʼ jankʼal kuxh tenam vatz txʼavaʼ nik tzeʼlen Paʼp, atz kʼuxh inqʼa aanxel tu amlikaʼ, atz kʼuxh inqʼa nik ipal tu kaqiqʼ. Tan nikat itzeʼlel Paʼp taʼn nik taleʼ, pet yeʼxhabʼil vaʼq nik oksan iqʼij Paʼp. 10Tul aʼ, oʼ, uvaʼ yeʼl qutxumbʼal vatz inqʼa xaol, inqʼa jit niman tetz Jesuus, tiʼ uvaʼ nik qupaxsa inqʼa bʼaʼnla txhaq yol tiʼ quBʼaal JesuKriisto. Pet aʼetz vet ex, tan nik etoksa eqʼij, tiʼ uvaʼ, aʼ, ex mam aj txumbʼal tiʼ etatin kʼatz u quBʼaal JesuKriisto nik enatxheʼ. Tul aʼ vet ex nik toksal eqʼij taʼn inqʼa xaol. Pet aʼetz vet oʼ, yeʼxhabʼil nik ijaʼ ivatz s-qe; pet ex, tan tij nik etilixeʼ.

11Tul yeʼx kuxh kaoq inqʼa itzaʼlal s-qiʼ tiʼ ipaxsal inqʼa bʼaʼnla txhaq yol tiʼ quBʼaal JesuKriisto. Tan at nik qupal t-vaʼy; atz at nik qupal t-tzaqatziʼil; atz at yeʼl qoksaʼm chʼexpubʼ qibʼ; atz at nik quqʼosoxeʼ; atz yeʼl invaʼq qatibʼal ati uvaʼ tira laʼ jeqeʼv oʼ s-tuul. 12Tul at nik quql veteʼ, tan aqʼonxh nik qubʼan tiʼ itxhej vaʼq kam qetz. Atz kʼuxh at nik talax yeʼbʼaʼnla yol s-qiʼ, tul aʼ nik qubʼane uvaʼ nik qujaq ibʼaʼnil quBʼaal Tiuxh s-tiibʼa. Atz kʼuxh nik qojqeʼlaleʼ, tul nik qukotxʼ quvatz s-te. 13Atz kʼuxh nik quyoqʼoxeʼ, tul aʼl josqʼil nik qutzaqʼbʼetaʼ. Poro tira yeʼl bʼeeq nik qoksal s-tuul taʼn inqʼa xaol s-kaqaayil. Tan ech kuxhte chʼis qatin s-vatz. Tan oʼ kuxh vet iyanaʼsul tenam vatz jankʼal inqʼa at vatz txʼavaʼ amlikaʼ s-kaqaayil.

14Poro jit aʼ vitzʼabʼal echʼixvisal tuchʼ u yol uvaʼ nik intzʼibʼa bʼen sete. Pet aʼ vitzʼabʼal uvaʼ laʼ txhej etxumbʼal. Tan eche ex innitxaʼa sinvatz, tan at vaanima setiʼ. 15Kʼuxhetz at lavoq mil (10,000) txhusul etetz tiʼ quBʼaal JesuKriisto, poro jit ayaʼl inqʼae ech tatin, eche u vatin setiʼ s-eche vaʼq bʼaala. Tan tuchʼ uvaʼ qat val inqʼa bʼaʼnla txhaq yol sete, tul qat ok ex s-niman tetz Jesuus, echetz qat inbʼene s-eche ebʼaal.

16Pet niketz injaq bʼaʼnil sete, uvaʼ antxh laʼ ebʼan kam uvaʼ nik inbʼan sevatz. 17Echetz il Timoteeo nik intxhaq bʼen sexoʼl tiʼ tulsal sekʼuul kam vintxumbʼal nik inbʼan tiʼ inimal u quBʼaal JesuKriisto. Tan at vaanima tiʼ Timoteeo, eche vaʼq inkʼaol tatin sinvatz. Tul kʼuqlebʼxh kʼuul tatin tiʼ inimal u quBʼaal JesuKriisto. Atz toq tal Timoteeo sete kam laʼ etulbʼe tiqʼol viyolbʼal quBʼaal Tiuxh uvaʼ alel taʼn quBʼaal JesuKriisto, eche inqʼa nik intxhus talaq kuxh tenam, atz xoʼlaq inqʼa niman tetz Jesuus tal uvaʼ nik motx imolvataq tibʼ.

18Tan nik vabʼi uvaʼ at kaʼl inqʼa nik taqʼ vet bʼen tibʼ s-nim sexoʼl. Tan aʼebʼ nik titzʼa uvaʼ yeʼl in laʼ aqʼbʼ in sexoʼl tiʼ toksal s-jik. 19Pet oqetz quBʼaal Tiuxh laʼ saʼon, tul ajt laʼ etil vaqʼbʼ sexoʼl. Tul bʼen vootzaqi inqʼa nik taqʼ bʼen tibʼ s-nim sexoʼl. Atz bʼen vileʼ oq uvaʼ aʼxh nik ikʼutxh tuchʼ u tatineʼ uvaʼ at tiqleʼm taʼn quBʼaal Tiuxh, tetxhlaletzeʼe; pet maq taʼn kuxh nik ibʼan talax inqʼa yol sexoʼl. 20Tan vikʼutxht u xaol vibʼant quBʼaal Tiuxh iqʼesalil s-kʼatza, tan jit uvaʼ tuchʼ kuxh yol laʼ ikʼutxhvat. Pet aʼ laʼ ikʼutxhvat tuchʼ u tatin u tiqleʼm quBʼaal Tiuxh s-kʼatza. 21Echetz ¿kam nik etxʼebʼ s-viʼ uvaʼs laʼ vaqʼbʼeʼ? ¿Maq aʼ nik etxʼebʼeʼ uvaʼ yaj laʼ bʼen inbʼan sexoʼl, tiʼ uvaʼ yeʼ nik etxʼol tiqʼol viyolbʼal quBʼaal Tiuxh? Tul ech laʼ vaqʼbʼ, eche vaʼq xaol uvaʼ iqʼomal ibʼaara taʼn tiʼ ikʼaxbʼisaneʼ. Pet ¿maq aʼ nik etxʼebʼeʼ uvaʼ chiibʼebʼal kuxh laʼ inyolon sexoʼl, atz jik kuxh vintxumbʼal laʼ inkʼutxh sete, tiʼ uvaʼ jalpumal vet vetxumbʼal etaʼn?

Currently Selected:

1 Koriintios 4: ixlC

Highlight

Copy

Compare