1 Koriintios 3

Uvaʼs talt Paʼp te inqʼa aj Koriinto uvaʼ laʼ iyaʼsa viyajtaq tibʼ, tiʼ uvaʼ jabʼil s-tiʼ laʼ txhʼuyeʼvika

1Jankʼaletz ex inmol s-niman tetz Jesuus, tan jit ech vulbʼe etxhusux tiʼ viyolbʼal quBʼaal Tiuxh, eche itxhusux inqʼa, aʼ vet viTiuxhil Tiuxh nik bʼekʼon. Pet ech qat intxhusun sexoʼl, eche itxhusux inqʼa xaol inqʼa, yeʼx itxhabʼat tatin kʼatz quBʼaal Tiuxh, inqʼa yaʼnxh nik ichʼij tiʼ tatin kʼatz quBʼaal JesuKriisto, eche ichʼij talaq nitxaʼ. 2Tan jit tuchʼ tzaʼlla yol intxhusvat ex tiʼ tootzaqil quBʼaal Tiuxh. Tan ech vule intxhust ex, eche invaʼq txutxa uvaʼ taʼn kuxh taʼl txhʼuʼ nik taqʼ te vineʼ. Tan yeʼlich laʼ etxʼol tabʼil inqʼa iyolbʼal quBʼaal Tiuxh inqʼa tijxhtuʼ, eche invaʼq neʼ uvaʼ yeʼnaq itxʼoleʼt tetxhbʼul txʼix. Echichetz kuxh ex, eche inqʼa neʼ. Tul il ex ant kuxh atil ex s-txheel. 3Tan yeʼx kuxh etxhabʼat etatin kʼatz quBʼaal Tiuxh, tan ant kuxh nik ebʼan kam u kantxhaq nik tatxhva vetxhiʼoʼl. Tan mamala tel kuxh txhiʼal kʼuul tuchʼ txhʼaʼo at sexoʼl. Atz yeʼ kuxh nik ikʼul tibʼ eyol. Tzitzietz nik ekʼutxhvat uvaʼ yeʼx etxhabʼat etatin kʼatz quBʼaal Tiuxh. Tan ant kuxh nik ebʼan kam u kantxhaq nik tatxhva vetxhiʼoʼl. Atz ant kuxh txhʼuyel ex tiʼ kam uvaʼ nik ibʼan inqʼa xaol, inqʼa jit niman tetz Jesuus.

4Tan at ex ech nik alon s-eche: —Tira een in tiʼ Paʼp, —chich jolol ex. Atz: —Tira een in tiʼ Apoolos, —chich jolt ex. Tzitzietz nik ekʼutxhvat uvaʼ ant kuxh iqʼomal etaʼn vitxumbʼal inqʼa xaol, inqʼa yeʼ ootzaqin tetz quBʼaal Tiuxh. [Tan ant kuxh nik ebʼan kam u tatxhaʼv vetxhiʼoʼl.]

Uvaʼs talt Paʼp inuqul, tiʼ uvaʼ taj aqʼonvil kuxh quBʼaal Tiuxh Paʼp tuchʼ Apoolos, tul aʼetz quBʼaal Tiuxh laʼ aqʼon itxʼaqaʼm s-tiʼ

5Tan jit kam koqxh viqleʼm. Atz kam koqxh tiqleʼm Apoolos. Pet yiqxh oʼ kuxh lotxhol tetz quBʼaal Tiuxh, tiʼ uvaʼ laʼ eqej u quBʼaal JesuKriisto. Tan aʼ u quBʼaal Tiuxhe qat aqʼon s-qe jununil oʼ, jabʼiste u taqʼon nik qubʼaneʼ. 6Eche in, tan aʼ qat taqʼ quBʼaal Tiuxh s-ve uvaʼ, aʼ, in qat alon viyolbʼal sexoʼl s-bʼaxa, eche nik tavat invaʼq vinaq itxhiko.

Aʼetz qat taqʼ quBʼaal Tiuxh te Apoolos taqʼax iyakʼil u txhusbʼal, eche nik takʼsat vaʼq vinaq vitxhiko.

Pet aʼetz quBʼaal Tiuxh nik chʼijsan ex, eche nik ichʼijsat u txhiko. 7Echetz jit aʼ palnaʼq tiqleʼm u avan tetz u txhiko, atz jitoq uvaʼ nik akʼsan u txhiko, pet taʼnxh u quBʼaal Tiuxh uvaʼ nik chʼijsan u txhiko palnaʼq tiqleʼm. 8Poro u avan tetz txhiko tuchʼ u akʼsan tetz txhiko, tan eela kuxh u tiqleʼm. Pet koq tiʼ inqʼa itxʼaqaʼm, tan tootzaq quBʼaal Tiuxh jankʼal vitxʼaqaʼm junun laʼ ikʼul te quBʼaal Tiuxh tiʼ inqʼa taqʼon. 9Echetz oʼ kuxh lotxhonal kʼatz quBʼaal Tiuxh. Tul aʼetz ex, inqʼa niman tetz quBʼaal Tiuxh, eche invaʼq txhiko. Pet jit ex tetz Paʼp, atz jit ex tetz Apoolos. Atz echat ex, eche invaʼq otzotz uvaʼ nik ibʼit quBʼaal Tiuxh.

10Pet taʼntiuxh te vibʼaʼnil quBʼaal Tiuxh uvaʼ, aʼ in qat ibʼanbʼe in tiʼ ixeʼtisal nimaloq inqʼa bʼaʼnla txhaq yol tiʼ Jesuus. Tan ech kuxh vatin qat ibʼana, eche invaʼq vinaq uvaʼ at itxumbʼal s-bʼaʼn tiʼ talax ikuʼ ixeʼ invaʼq otzotz. Pet tikʼenetz qat ul vet jolt xaol tiʼ taqʼax jaʼ inqʼa otzotz viʼ vixeʼ uvaʼ aqʼel vet kuʼ vaʼn. Aloq jununil oʼ nik ilon inuqul kam nik isaʼ vetatin tiʼ echʼij tiʼ viyolbʼal quBʼaal Tiuxh, eche invaʼq u bʼanol otzotz uvaʼ nik ilon inuqul kam nik isaʼ tel tiʼ taqʼax jaʼ u otzotz.

11Tan yeʼ laʼ utxhi uvaʼ tikʼ laʼ aqʼax kuʼ vaʼtoʼq ixeʼ otzotz, tiʼ uvaʼ atxh vet kuʼ, tan aqʼelxh vet kuʼ vixeʼ. Aʼetz u quBʼaal JesuKriistoe uvaʼ, eche ixeʼ vaʼq otzotz tatineʼ. 12Echetz jatvatzul kuxh yol nik ibʼanbʼel tiʼ echʼijsal tiʼ viyolbʼal quBʼaal Tiuxh, eche vaʼq xaol uvaʼ nik bʼiton vaʼq otzotz. Tan at xaol aʼ nik ibʼanbʼe ooro tiʼ ibʼitix jaʼ u otzotz, atz at uvaʼ plaata, atz at uvaʼ bʼaʼnla txhaq sivan, uvaʼ sibʼxh ijaʼmil. Tul at xaol uvaʼ, aʼ nik ibʼanbʼe aqʼin tzeʼ tiʼ ibʼitix jaʼ u otzotz. Atz at uvaʼ chʼim kuxh nik ibʼanbʼe. Atz at uvaʼ xaq tzeʼ kuxh nik ibʼanbʼe. 13Tan yaʼn laʼ tilix veteʼ kam tiqleʼm uvaʼ qat bʼanbʼel tiʼ ichʼijsal inqʼa xaol tiʼ viyolbʼal quBʼaal Tiuxh tu qʼij uvaʼs laʼ taqʼt kuʼ quBʼaal Tiuxh inqʼa yol tinuqul. Tan aʼ vet u taqʼt kuʼ quBʼaal Tiuxh inqʼa yol tinuqul laʼ kʼutxhun maq bʼaʼn, atz maq yeʼbʼaʼn inqʼa yol qat qutxakunsa jununil oʼ tiʼ echʼijsal tiʼ viyolbʼal quBʼaal Tiuxh. Tan aʼ vet u xamal laʼ kʼutxhun kam tiqleʼm inqʼa kam bʼanbʼemal tiʼ invaʼq otzotz.#Malakiias 4.1 14Oqetz bʼaʼn kuxh u aqʼon qat qubʼan vatz quBʼaal Tiuxh, uvaʼ qat qubʼan sexoʼl, tul laʼetz qukʼul qutxʼaqaʼm s-tiʼ, tan bʼaʼn oq ech laʼ ikaj, eche vaʼq otzotz uvaʼ maʼt ipal t-xamal. 15Pet oqetz kantxhaq u aqʼon qat qubʼan vatz quBʼaal Tiuxh uvaʼ qat qal sexoʼl, tul tira laʼ qutzʼeq u qutxʼaqaʼm. Tan kantxhaq oq ech laʼ itzʼeʼ, eche vaʼq otzotz uvaʼ chʼim kuxh bʼanbʼemal s-tiʼ. Aloq tetxhalxh laʼ ikol oʼ vatz u kʼaxkʼo, kʼuxh ech vete teesal el invaʼq xaol xoʼl xamal laʼ qubʼana.

16Bʼenoqetz sete uvaʼ, aʼ, exe u tatibʼal quBʼaal Tiuxh, atz aʼ nik atink viTiuxhil Tiuxh tetaanima, eche tatinich quBʼaal Tiuxh tu tostiuxh uvaʼ tu tenam Jerusaleen. 17Tan jaʼl invaʼq laʼ yansan u tostiuxh uvaʼ quBʼaal Tiuxh bʼiton, tul quBʼaal Tiuxh laʼ kʼaxbʼisan. Tan Tiuxhla Atibʼal tatin s-vatz, atz chʼexel veteʼ. Echatetz kuxh vetatine vatz quBʼaal Tiuxh. Tan jabʼil uvaʼ laʼ yansan etatineʼ, tul laʼ ikʼaxbʼisa quBʼaal Tiuxh. Tan ex tatibʼal quBʼaal Tiuxh, atz ex vet ichʼexoʼm.

18Echetz yeʼ kuxh eteesa etibʼ t-bʼey sejunal tiʼ etitzʼataʼ uvaʼ atxh vet etxumbʼal s-bʼaʼn tiʼ inqʼa txumbʼal nik toksal iqʼij tintanul inqʼa yaʼbʼ s-txheel vatz txʼavaʼ. Echetz oq at invaʼq ex, uvaʼ aj txumbʼal vet ex nik enatxheʼ, tul aʼ ebʼana uvaʼ, eche yeʼl etxumbʼal tiʼ inqʼa tetz vatz txʼavaʼ laʼ ebʼana. Echetz yeʼ laʼ imaqt exe tiʼ itxhej etxumbʼal kʼatz quBʼaal Tiuxh. 19Tan jankʼalxh inqʼa ootzaqibʼal tetz vatz txʼavaʼ, tan yeʼxhkam itxaʼk vatz quBʼaal Tiuxh.

Tan ech val u yol tzʼibʼamal ka t-viyolbʼal quBʼaal Tiuxh s-eche:

—Jankʼalxh u nimla

tootzaqibʼal

inqʼa xaol vatz u txʼavaʼ

nik taleʼ,

tan antxh quBʼaal Tiuxh

nik kʼutxhun

uvaʼ ikʼnaʼq tuchʼ

inqʼa yaabʼla txumbʼal,

—chich u yol.#Joov 5.13

20Atz ech nik tal vaʼt u yol t-viyolbʼal quBʼaal Tiuxh s-eche:

—Tootzaq quBʼaal Tiuxh

uvaʼ tira yeʼ itxaʼk

u titzʼabʼal inqʼa xaol,

inqʼa atxh tootzaqibʼal

nik taleʼ,

—chich u yol.#Saalmo 94.11

21Yeʼxhabʼiletz invaʼq ex laʼ oksan iqʼij vaʼq xaol. Atz aʼ kuxh qutxaʼk elotxhox tiʼ echʼij kʼatz quBʼaal Tiuxh. 22Kʼuxh in, tan in kuxh lotxhol etetz tiʼ echʼijeʼ. Atz kʼuxh Apoolos, tan lotxholat kuxh etetze tiʼ echʼijeʼ. Tul echatetz kuxh Seefase. Atz echat kuxh jankʼal inqʼa kame vatz u txʼavaʼ, tan aʼaq itxaʼk laʼ ichʼijsa ex kʼatz quBʼaal Tiuxh. Kʼuxhetz tuulbʼal uvaʼs at qʼij esaq vatz u txʼavaʼ, tan aʼ itxaʼk laʼ ichʼijsa ex. Tul kʼuxh laʼ kam ex, tan aʼ itxaʼk laʼ etil u bʼaʼnil kʼatz quBʼaal Tiuxh. Atz echat kuxh inqʼa kame uvaʼ nik tutxh sexoʼl s-txheel, atz inqʼa laʼ utxh xamtel, tan jankʼalxh inqʼae, tan antxh tetz vechʼij kʼatz quBʼaal Tiuxh. 23Tul exetz tetz u quBʼaal JesuKriisto. Tul tetz quBʼaal Tiuxh u quBʼaal JesuKriisto.

Currently Selected:

1 Koriintios 3: ixlC

Highlight

Copy

Compare