1 Koriintios 2
2
Uvaʼs talt Paʼp uvaʼ jit tuchʼ yol tetz aj txumbʼal vatz txʼavaʼ ex talvat Paʼp viyolbʼal quBʼaal Tiuxh, pet tuchʼ u tiqleʼm viTiuxhil Tiuxh uvaʼ atich s-kʼatza
1Echetz s-tiʼile nik qal sete, jankʼal ex inmol s-niman tetz Jesuus, uvaʼ yeʼl josqʼilla txhaq yol inbʼanbʼe tiʼ talax inqʼa iyol quBʼaal Tiuxh sexoʼl, inqʼa vil vabʼi. Atz jit tuchʼ sibʼla txhaq ootzaqibʼal ex valvat sexoʼl. 2Atz jit kam tel koq kuxh ex val sexoʼl, pet taʼn kuxh inkʼaq vibʼ, s-tiʼ uvaʼ, aʼ ex val sexoʼl inqʼa bʼaʼnla txhaq yol tiʼ u quBʼaal JesuKriisto, atz tiʼ vikamebʼal vatz kurus. 3Tan ajtetz ok vet in sexoʼl tiʼ talax inqʼa bʼaʼnla txhaq yol tiʼ quBʼaal JesuKriisto, tul yeʼ nikich intxʼol yol nikich innatxheʼ. Tan tetxhichxh intʼuntʼutxh taʼn xoʼval.#Vibʼanoʼm inqʼa Apoostol 18.19 4Atz jitoq bʼokʼtziimla yol, atz jitoq tuchʼ yol tetz aj txumbʼal vatz txʼavaʼ ex inbʼanbʼe tiʼ valt inqʼa bʼaʼnla txhaq yol sexoʼl. Pet aʼ ex inkʼutxh sexoʼl kame u tiqleʼm viTiuxhil Tiuxh at sinkʼatza. 5Echetz jit aʼ laʼ bʼenk ekʼuul tiʼ viyolon u xaol tuchʼ u txumbʼal tetz vatz txʼavaʼ tiʼ eqejtaʼ. Pet aʼ bʼenk ekʼuul tiʼ u tiqleʼm quBʼaal Tiuxh tuchʼ inqʼa nik motx ikʼutxh sevatz.
Uvaʼs talt Paʼp uvaʼ, aʼ viTiuxhil Tiuxh laʼ lotxhon inqʼa niman tetz Jesuus tiʼ tootzaqil u mam bʼaʼnil
6Pet nik qaleʼl vaʼl u yol tiʼ quBʼaal JesuKriisto uvaʼ at itxumbʼalil s-tiʼ. Aʼetz nik qal te inqʼa niman tetz Jesuus, inqʼa txhabʼamal vet tiqʼol viyolbʼal quBʼaal Tiuxh taʼn. Aloq jit txumbʼal tetz inqʼa xaol vatz txʼavaʼ, atz jit txumbʼal tetz inqʼa iqʼesal, inqʼa at vatz txʼavaʼ s-txheel, inqʼa yeʼ ootzaqin tetz quBʼaal Tiuxh. Tan toq motx sotzoq inqʼae. 7Pet aʼ nik qal sete vitxumbʼal quBʼaal Tiuxh uvaʼ itzʼamichxh vet tzaan s-qiʼ, u txumbʼal uvaʼ yeʼich ootzaqimal s-jatxhaq tzaan, atz tetxhal qul tzitza s-tuul. Aʼetz vitxumbʼal quBʼaal Tiuxh uvaʼ titzʼa tzaan s-qiʼ s-naʼya uvaʼs yeʼnaqich xeʼtoq u qʼij saq tiʼ qatin s-kʼatza tu nimla tatineʼ. 8Pet tira yeʼ bʼen u titzʼabʼal quBʼaal Tiuxh te vaʼq inqʼa iqʼesal vatz txʼavaʼ, inqʼa itzʼlel tintanul inqʼa yaʼbʼ s-txheel, inqʼa yeʼ ootzaqin tetz quBʼaal Tiuxh. Pet eche uvaʼ bʼenaq koq s-te, tul yeʼlebʼ u quBʼaal JesuKriisto yatzʼax el vatz kurus taʼn, u quBʼaal JesuKriisto uvaʼ sibʼxh tiqleʼm. 9Pet echetz ibʼan, eche val u yol uvaʼ tzʼibʼamalxh ka t-viyolbʼal quBʼaal Tiuxh uvaʼ ech nik tal s-eche:
—Qat ibʼan quBʼaal Tiuxh
tutxh val u mam bʼaʼnil
te inqʼa xaol, inqʼa at
taanima tiʼ quBʼaal Tiuxh;
u mam bʼaʼnil
uvaʼ yeʼxhabʼil invaʼq ilon,
atz yeʼxhabʼil invaʼq abʼin,
atz yeʼxhabʼil invaʼq
itzʼan bʼen,
—chich u yol.#Isaiias 64.4; Jeremiias 3.16
10Kʼuxhetz yeʼxhabʼil vaʼq ootzaqinich tetz vitxumbʼal quBʼaal Tiuxh uvaʼ kolelich kuxh taʼn, pet yaʼnetz qat taqʼ qootzaqi s-txheel taʼn viTiuxhil. Tan tekʼxh nik itxhʼoti viTiuxhil Tiuxh.
Tul tootzaqlat viTiuxhil Tiuxh kamxh uvaʼ oqxh itzaʼlal tootzaqile uvaʼ at tu taanima quBʼaal Tiuxh.
11Tan echat kuxh, eche u taanima vaʼq u xaol. Tan yeʼxhabʼil invaʼq ootzaqin tetz kam uvaʼ kolel tu taanima, pet taʼnxh u taanxelal u xaol ootzaqin tetz.
Echatetz kuxh tatine u quBʼaal Tiuxh, tan yeʼxhabʼil vaʼq ootzaqin tetz kam uvaʼ oqxh itzaʼlal tootzaqile uvaʼ at tu taanima, pet taʼn kuxh viTiuxhil ootzaqin tetz. 12Antetzxh viTiuxhil Tiuxhe uvaʼ, aʼ tzajnaʼq s-kʼatza, nik aqʼon qootzaqi kame inqʼa mam bʼaʼnil uvaʼ ayaʼlxh ikʼuul quBʼaal Tiuxh qat taqʼ s-qe. Pet jit itxumbʼal invaʼq xaol vatz txʼavaʼ uvaʼ yeʼ ootzaqin tetz quBʼaal Tiuxh nik aqʼon qootzaqi.
13Aʼetz inqʼa mam bʼaʼnile uvaʼ nik qal sete. Pet yeʼl yol nik qutxakunsa tiʼ talax sete uvaʼ itxhusuʼm koq invaʼq aj txumbʼal vatz txʼavaʼ. Pet aʼ nik qal sete jabʼiste uvaʼ, aʼ viTiuxhil nik txhusun s-qe. Echetz aʼ nik qal jabʼiste u tetz quBʼaal Tiuxh nik tal viTiuxhil Tiuxh te u qaanxelal.
14Pet u xaol, uvaʼ jit niman tetz Jesuus, tan keʼch koq saʼ ibʼen inqʼa yol s-te uvaʼ nik tal viTiuxhil Tiuxh. Tan aʼl tira yeʼl kuxh itxakunbʼal u yol s-vatz kam uvaʼ nik tal viTiuxhil Tiuxh. Tul keʼchetz koq laʼ motx ibʼen s-te, pet tuchʼ viTiuxhil Tiuxh laʼ bʼenk s-te. 15Pet koq inqʼa xaol uvaʼ at vet viTiuxhil Tiuxh t-taanima, tan aʼetz inqʼae, nik ibʼen jankʼal inqʼa yol s-te uvaʼ nik tal viTiuxhil Tiuxh. Pet yeʼ laʼ utxhi laʼ oksal t-bʼey taʼn inqʼa xaol, inqʼa yeʼl viTiuxhil Tiuxh t-taanima.
16Tan ech nik tal vaʼt u yol uvaʼ tzʼibʼamal ka t-viyolbʼal quBʼaal Tiuxh s-eche:
—Yeʼxhabʼil invaʼq
ootzaqin tetz
u titzʼabʼal quBʼaal Tiuxh.
Atz yeʼxhabʼil invaʼq
laʼ aqʼon iyol
u quBʼaal Tiuxh,
—chich u yol.#Isaiias 40.13
Echetz vete oʼ, inqʼa niman tetz Jesuus, tan qootzaq veteʼ kam u titzʼabʼal quBʼaal JesuKriisto s-qiʼ.
Currently Selected:
1 Koriintios 2: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
