1 Koriintios 11

1Antetzxh ebʼan kam uvaʼ nik etil inbʼantaʼ. Tan aʼ nik inbʼan kam uvaʼ ibʼan u quBʼaal JesuKriisto.

Uvaʼs itxhusun Paʼp tiʼ vikutxt inqʼa niman tetz Jesuus iviʼ tiʼ inatxhax Tiuxh

2Niketz voksa eqʼij, jankʼal ex inmol s-niman tetz Jesuus, tan txhaqpaq nik etulsa in sekʼuul tiʼ kamxh invaʼq u yol uvaʼ nik val ebʼantaʼ. Tul ile antxh nik motx ebʼan kam inqʼa txhusel sete vaʼn.

3Niketz insaʼeʼ laʼ etootzaqi uvaʼ, aʼ u quBʼaal Tiuxh iviʼ tiibʼa u quBʼaal JesuKriisto, eche tatin u quviʼ tiibʼa u qutxhiʼoʼl. Tul aʼ u quBʼaal JesuKriisto iviʼ tiibʼa inqʼa vinaq. Aʼetz vet inqʼa vinaq iviʼ tiibʼa inqʼa ixoq.{*}#11.3 At kaʼvaʼl nik elkaʼpun u yol ‹viʼ› nik tal u versiikulo uvaʼa. Bʼaxa, ‹vatz quBʼaal Tiuxh at tiqleʼm s-tiibʼa,› chich telaʼpun. Aʼ u kaʼv, ‹u taqʼil,› chiche. ‹Aʼ elnaʼq s-kʼatza,› chiche. Echatxh nik tale t-Efeesios 5.23 4Jatvaʼletz vinaq uvaʼ kutxel iviʼ uvaʼs sebʼt inatxht Tiuxh, atz maq sebʼt iqʼexsat viyol quBʼaal Tiuxh, tul niketz teesa iqʼije u quBʼaal JesuKriisto, uvaʼ at tiqleʼm s-viʼ. Pet aʼl bʼaʼn uvaʼ yeʼ laʼ ikutx u vinaq iviʼ, tul yeʼ laʼ teesa iqʼij u quBʼaal JesuKriisto.

5Pet jatvaʼletz inqʼa ixoq uvaʼ yeʼ kutxel iviʼ uvaʼs sebʼt inatxht Tiuxh, atz oq sebʼt iqʼexsat viyol quBʼaal Tiuxh, tul niketz teesa iqʼije vitzumel uvaʼ at tiqleʼm s-viʼ. Pet aʼl bʼaʼn uvaʼ laʼ ikutx u ixoq iviʼ, tul yeʼ laʼ teesa iqʼij vitzumel. Tan eelaetz kuxh vete u ixoq tuchʼ u xaol uvaʼ eesamal vet xiʼl iviʼ, oq yeʼ nik ikutx iviʼ. 6Tan oq yeʼ nik ikutx u ixoq iviʼ uvaʼs sebʼt inatxht Tiuxh, atz oq sebʼt iqʼexsat viyol quBʼaal Tiuxh, tul tiraetz teesa el u xiʼl iviʼ. Pet oqetz chʼixvebʼal vet u ixoq laʼ inatxha uvaʼ laʼ eesal el u xiʼl iviʼ, tul aʼletz ikutx iviʼ.

7Pet u vinaq, tan yeʼ laʼ utxhi laʼ ikutx iviʼ. Tan aʼ u vinaq kʼutxhul tetz kam uvaʼ nik isaʼ quBʼaal Tiuxh. Atz aʼ u vinaq oksabʼ iqʼij quBʼaal Tiuxh. Pet u ixoq, tan aʼ u ixoq oksabʼ iqʼij u vinaq. 8Tan eche uvaʼs ixeʼt tzaan u qʼij saq. Tan jit aʼ elkeʼl u bʼaxa vinaq kʼatz u bʼaxa ixoq. Pet aʼ elkeʼl u bʼaxa ixoq kʼatz u bʼaxa vinaq. 9Tul jit tiʼ u ixoq viinqixsalik u vinaq, pet tiʼ u vinaq viinqixsalik u ixoq. 10Echetz s-tiʼile laʼ ikutx u ixoq iviʼ, tan aʼ nik ikʼutxh tuchʼ vikutxt iviʼ uvaʼ nik inima vitzumel, atz at tiqleʼm vitzumel s-viʼ. Atz nik ikʼutxh vinimat vitzumel vatz inqʼa aanxel.

11-12Pet s-quvatz, oʼ inqʼa niman tetz quBʼaal Jesuus, kʼuxhetz aʼxh elkeʼl u ixoq kʼatz u vinaq, poro echatetz kuxh vet u vinaqe. Tan antxh u ixoq nik alan vet u vinaq vatz qʼij saq. Tan yeʼl koq u vinaq, tul yeʼletze u ixoq. Atz yeʼl koq u ixoq, tul yeʼlatetze u vinaq. Echetz vaʼlaq kuxh elnaʼq tzaan kʼatz quBʼaal Tiuxh, tul nikaq ilotxh tibʼ s-vatzaq.

13Antetz kuxh vet ex itzʼan oq bʼaʼn uvaʼ yeʼl iviʼ u ixoq laʼ ikutxa uvaʼ sebʼt inatxht Tiuxh. 14Tan vatz inqʼa xaol uvaʼ chʼixvebʼal kuxhtuʼ laʼ ikuy u vinaq ichʼij u xiʼl iviʼ. 15Pet inqʼa ixoq, tan oq laʼ ikuy ichʼij u xiʼl iviʼ, tul oksabʼ iqʼij u ixoq u xiʼl iviʼ uvaʼ niim ichʼijeʼ. Tan aʼ itxaʼk u xiʼl iviʼ u ixoq uvaʼ nik ichʼijeʼ s-kutxbʼal tetz iviʼ.

16Kamaletz at xaol uvaʼ yojo ibʼ kuxh isaʼ tiʼ iyolox inqʼa yol inqʼa nik valeʼ. Tul toq val sete: Eche oʼ inqʼa iqʼon iviʼ, uvaʼ taʼnxh nik qutxhus uvaʼ laʼ ikutx inqʼa ixoq iviʼ uvaʼs sebʼt inatxht Tiuxh, atz sebʼt iqʼexsat viyol quBʼaal Tiuxh. Pet yeʼl invaʼtoʼq uqʼeʼybʼal nik qutxhus xoʼl inqʼa niman tetz Jesuus, inqʼa chʼexel vet taʼn quBʼaal Tiuxh.

Uvaʼs nikich ipalsat inqʼa niman tetz Jesuus yol tiʼ inimal u tulsataq vikamebʼal quBʼaal Jesuus s-kʼuul

17Pet toqetz intzʼibʼa bʼen jolt u yol sete. Poro yeʼl ex laʼ voksa eqʼij s-tiʼ. Tan jit aʼ u bʼaʼn nik ebʼaneʼ uvaʼs nik ekʼult etibʼ. Pet aʼ u yeʼbʼaʼn nik ebʼaneʼ.

18Bʼaxa tzietz toq val sete tiʼ kam uvaʼ nik motx ebʼaneʼ uvaʼs nik ekʼult etibʼ. Tan nik vabʼi uvaʼ jit eela eyol sevatzaq. Tul echilxh vet nik inqejeʼ uvaʼ echxhte. 19Niketz inatxhp s-ve uvaʼ il ex jatxel vet etibʼ sevatzaq. Tan nik motx eyoj etibʼ sevatzaq tiʼ tilixeʼ jaʼl ex sibʼxh laʼ chiibʼ quBʼaal Tiuxh setiʼ.

20Jankʼal eche uvaʼ nik ebʼan tiʼ vekʼult etibʼ tiʼ inimal vetulsat vikamebʼal quBʼaal Jesuus sekʼuul tiʼ vitxhojt inqʼa qupaʼv, tan jitetz ech, eche uvaʼ nik ebʼaneʼ.{*}#11.20 Aʼ nik tal u versiikulo uvaʼa tiʼ: —...inimal vetulsat vikamebʼal quBʼaal Jesuus sekʼuul, —chiche. Aʼ nik tal tiʼ tetxhbʼut inqʼa niman tetz Jesuus u ‹última cena.› Tan at nik tal viyolbʼal quBʼaal Tiuxh u ‹cena del Señor.› Pet nimal kuxh talax nik tal inqʼa xaol s-tiʼ. Tan at xaol nik alon ‹mesa del Señor.› Atz at nik alon ‹santa cena.› Pet eela kuxh nik elkaʼpun. Tan aʼ nik tal, tiʼ uvaʼ vaʼl nikich tetxhbʼun inqʼa xaol tiʼ inimal u tulsataq vikamebʼal quBʼaal Jesuus s-kʼuul, atz u kuybʼal uvaʼ nik taqʼ quBʼaal Jesuus. 21Tan at ex, uvaʼ bʼaxa nik etetxhbʼun el vatz emol. Tul jitoq nik etitzʼa jolt emol. Tul atetz vet jolt emol uvaʼ kamy kuxh vet t-vaʼy, tan oq yeʼl tetxhbʼubʼal ati. Atetz txhan vet jolt emol uvaʼ qʼabʼaʼm nik yaʼk vet tiʼ tukʼal taʼl uuva. Pet jit quBʼaal Tiuxh nik toksa iqʼij s-tuchʼ.

22Tiraetz kantxhaq uvaʼ nik motx ebʼaneʼ. Pet aʼl bʼaʼn uvaʼ aʼl laʼ txʼaʼon ex, atz laʼ ukʼ ex aʼ tetotzotz. Pet tiʼetz uvaʼ ech nik ebʼane, tul ¡tira nik eteesa iqʼij inqʼa niman tetz Jesuus, inqʼa chʼexel vet taʼn quBʼaal Tiuxh! Atz ¡aʼl nik echʼixvisat tzaqa tziʼ aʼxh yeʼl tetz! ¿Kametz toq val vet, tiʼ uvaʼ nik ebʼaneʼ nik enatxheʼ? ¿Maqetz aʼl toq voksat eqʼij tuchʼ uvaʼ nik ebʼaneʼ? ¡Yeʼle! Yeʼl ex laʼ voksa eqʼij s-tiʼ.

Uvaʼs talt Paʼp yol tiʼ kam laʼ ibʼan inqʼa niman tetz Jesuus tiʼ inimal vikamebʼal quBʼaal Jesuus uvaʼ laʼ motx tulsa s-kʼuul

Tio 26.26-29; Kuxh 14.22-25; Luk 22.14-20

23Tan kamxh uvaʼ qat ikʼutxh u quBʼaal Jesuus s-ve, tul antxh uvaʼe qat intxhus sete. Tan tuulbʼaletz u aqʼbʼal uvaʼs toqnaʼqich oksaloq vet quBʼaal Jesuus tiqʼabʼ inqʼa iqʼesal uqʼeʼybʼal, tul tiqʼo tzaan Jesuus u paan. 24Tul taqʼ Jesuus taʼntiuxh te quBʼaal Tiuxh s-tiʼ. Tul ipixh Jesuus s-tuul. Tul ech tal Jesuus s-eche: —Kʼulvaq u paan. Tul txʼaʼvaq, tan aʼ vintxhiʼoʼle uvaʼ toq vaqʼ kʼaxbʼisaloq setiʼ. Tul txhaqpaq laʼ enimataʼ, tul laʼ etulsa in sekʼuul, —xeʼt Jesuus.

25Yaʼetz vet itxʼaʼon Jesuus tuchʼ inqʼa nikich itxhus tibʼ s-kʼatza, tul tiqʼo tzaan Jesuus u koopa. Tul ech tal Jesuus s-eche: —U taʼl uuva uvaʼ at kuʼ tuul u koopa, tan aʼ vinkaqale uvaʼ toq eloq setiʼ. Tul aʼ vinkaqal toq jeqbʼan ka vaʼt vinyol sexoʼl. Tul txhaqpaq laʼ etukʼat u taʼl uuva tu koopa, tul laʼ etulsa sekʼuul uvaʼ qat el vinkaqal setiʼ, —xeʼt Jesuus.#Tio 26.26-28; Kuxh 14.22-24; Luk 22.19-20{*}#11.25 Tuulbʼal u versiikulo uvaʼa, aʼ nik tal u yol ‹taʼl uuva› chiche. Aʼ nik tal tiʼ u qʼuʼich taʼl uuva uvaʼ nikich ibʼanbʼe inqʼa xaol s-naʼya. Tan aʼich vatzil tajaʼe tiʼ itxʼix, eche qukʼat qukapeel tiʼ qutxʼix. 26Echetz txhaqpaq laʼ etetxhbʼut u paan, atz etukʼat u taʼl uuva, aʼetz nik etulsa sekʼuul, atz nik ekʼutxhe vikamebʼal u quBʼaal Jesuus, tetxhal laʼ tul inpaqte.

Uvaʼs talt Paʼp uvaʼ jit loqʼs kuxh laʼ etxhbʼul u paan, atz jit loqʼs kuxh laʼ ukʼal u taʼl uuva s-eche

27Jatvaʼletz ex, uvaʼ yeʼxhkam kuxh tiqleʼm tetxhbʼul u paan, atz tukʼal u taʼl uuva sevatz, tul yeʼ nik etulsa vikamebʼal quBʼaal Jesuus sekʼuul, tul aj paʼvetz vet exe tiʼ teesal iqʼij vikʼaxbʼ vitxhiʼoʼl quBʼaal Jesuus, atz u tel vikaqal. 28Pet bʼaxa laʼ etulsa sekʼuul kam bʼanel taʼn vetatin vatz quBʼaal Tiuxh. Yaʼne laʼ etetxhbʼu vet u paan, atz laʼ etukʼa u taʼl uuva. 29Tan jaʼl uvaʼ yeʼl kuxh tiqleʼm tetxhbʼul u paan s-vatz, atz tukʼal u taʼl uuva, tul juntetz kuxh vet nik tiqʼo tzaan u kʼaxkʼoe s-tiibʼa. Tan yeʼ nik titzʼa s-bʼaxa uvaʼ vaʼl kuxh vet tatin tuchʼ jankʼal inqʼa niman tetz Jesuus. 30Xaʼtetze mamala kuxh yaabʼ, atz mamala kuxh inqʼa uqlinaʼq kuxh itxhiʼoʼl at sexoʼl. Tul at inqʼa qumol s-niman tetz Jesuus nik motx ikam sexoʼl. 31Tan aʼl bʼaʼn uvaʼ junt laʼ qulsa s-qukʼuul kam u qatineʼ. Tul laʼ qujaq qukuya te quBʼaal Tiuxh. Tul yeʼletz laʼ ikuy quBʼaal Tiuxh tul u kʼaxkʼo s-qiibʼa.

32Pet oqetz nik qoksal s-jik taʼn quBʼaal Tiuxh, atz nik ikʼaxbʼisa oʼ tzitza vatz txʼavaʼ, tul aʼetz isaʼe uvaʼ jit tzum laʼ ijaʼp u yol s-qiibʼa tuchʼ inqʼa xaol, inqʼa jit niman tetz Jesuus uvaʼs laʼ ipal u qʼij saq tzitza vatz txʼavaʼ.

33Pet tuulbʼaletz uvaʼ laʼ ekʼult etibʼ tiʼ etetxhbʼut u paan, atz tiʼ etukʼat u taʼl uuva, tul laʼ motx etxʼebʼ etibʼ sevatzaq. Tul vaʼlxh laʼ etetxhbʼutaʼ. 34Atz oqetz at ex, uvaʼ kamy ex t-vaʼy, tul aʼl txʼaʼon tzaan ex tetotzotz. Echetz yeʼ laʼ eteesat iqʼije u quBʼaal Jesuus tuchʼ inqʼa kantxhaq uvaʼ nik ebʼaneʼ uvaʼs laʼ motx emolt etibʼ. Atz echetz yeʼ laʼ ekʼaxbʼisale taʼn quBʼaal Tiuxh.

Ateletz kuxh jolt yol uvaʼ yeʼ qat val bʼen. Pet yaʼn laʼ valt inuqul sete uvaʼs laʼ vaqʼbʼ sexoʼl.

Currently Selected:

1 Koriintios 11: ixlC

Highlight

Copy

Compare