1 Koriintios 12

Uvaʼs itxhusun Paʼp tiʼ kam inqʼa txumbʼal nik taqʼ viTiuxhil Tiuxh te inqʼa niman tetz Jesuus

1Jankʼal ex inmol s-niman tetz Jesuus, nik insaʼeʼ laʼ etootzaqi tel inqʼa txumbʼal uvaʼ nik qutxʼol ibʼanax taʼn viTiuxhil Tiuxh. 2Nik enatxheʼe tuulbʼal uvaʼs, aʼ nikich enima inqʼa bʼitichla tiuxh, tan tira elnaʼqich ex t-bʼey vatz quBʼaal Tiuxh. Tan nikich kuxh etaqʼ etibʼ bʼokʼtziiloq tiʼ etok bʼen tiʼ inatxhkʼuulal inqʼa bʼitichla tiuxh, inqʼa yeʼ nik iyoloneʼ.

3Pet toqetz vaqʼ etootzaqi tiʼ kam tilix jaʼl uvaʼ nik itxakunsal taʼn viTiuxhil Tiuxh. Tan yeʼl paqul laʼ tala uvaʼ: —Kamoq el Jesuus, —chaq koq oq uvaʼ at viTiuxhil Tiuxh t-taanima. Pet: —Aʼ vet Jesuus inBʼaal, —chich vet u xaol uvaʼ at vet viTiuxhil Tiuxh tu taanima.

4Tan nima vatzlen kuxhte inqʼa txumbʼal uvaʼ nik qutxʼol ibʼanaxeʼ uvaʼ nik taqʼ viTiuxhil Tiuxh s-qe. Aloq vaʼl kuxhte viTiuxhil Tiuxh nik aqʼon qiqleʼm tiʼ ibʼanaxeʼ. 5Atz nima vatzlen kuxhte inqʼa aqʼon qat taqʼ viTiuxhil Tiuxh s-qe tiʼ ikʼuulal inqʼa niman tetz Jesuus. Poro vaʼl kuxhte u quBʼaal Jesuus nik aqʼon s-qe. 6Atz nima vatzlen kuxhte inqʼa bʼanoʼm laʼ qutxʼol ibʼanax taʼn viTiuxhil Tiuxh, poro vaʼl kuxhte u quBʼaal Tiuxh nik aqʼon qiqleʼm jatvaʼl oʼ, inqʼa nik bʼanon kamxh invaʼq aqʼon. 7Tan aʼ itxaʼk u qiqleʼm jununil oʼ qat taqʼ viTiuxhil Tiuxh uvaʼ laʼ qulotxh jankʼal inqʼa niman tetz Jesuus.

8Ayaʼletz inqʼa txumbʼal nik qutxʼol ibʼanax s-bʼaʼn taʼn viTiuxhil Tiuxh inqʼaa: At oʼ, aʼ nik taqʼ viTiuxhil Tiuxh s-qe, uvaʼ atxh qutxumbʼal s-bʼaʼn, tiʼ talax bʼaʼnla txhaq txumbʼal.

Atz at jolt oʼ, aʼ nik taqʼ viTiuxhil Tiuxh s-qe, uvaʼ nik ibʼen inqʼa yol s-qe tiʼ kam uvaʼ toq ibʼan quBʼaal Tiuxh.

9Atz at jolt oʼ, aʼ nik taqʼ viTiuxhil Tiuxh s-qe, uvaʼ kʼuqlel qukʼuul s-bʼaʼn tiʼ quBʼaal Tiuxh tiʼ ibʼanax inqʼa kaebʼal aanima.

Tul at jolt oʼ, aʼ nik taqʼ viTiuxhil Tiuxh s-qe, uvaʼ at qutxumbʼal tiʼ ibʼanax inqʼa yaabʼ bʼaʼn.

10Atz at jolt oʼ, aʼ nik taqʼ viTiuxhil Tiuxh s-qe, uvaʼ nima vatzlen kuxh inqʼa kaebʼal aanima nik qubʼaneʼ.

Atz at jolt oʼ, aʼ nik taqʼ viTiuxhil Tiuxh s-qe, quqʼexsat viyol quBʼaal Tiuxh.

Atz at jolt oʼ, aʼ nik taqʼ viTiuxhil Tiuxh s-qe, tootzaqil s-bʼaʼn kam uvaʼ nik tal u xaol, maq tetz quBʼaal Tiuxh, atz maq tetz demoonio.

Atz at jolt oʼ, aʼ nik taqʼ viTiuxhil Tiuxh s-qe, quyolon t-jolt yolbʼal uvaʼ jit txhusel koq oʼ s-tiʼ.

Atz at jolt oʼ, aʼ nik taqʼ viTiuxhil Tiuxh s-qe, u qel tuul inqʼa yolbʼal inqʼae, tul nik qaleʼ kam nik elkaʼpun.

11Echetz taʼn kuxh vaʼl viTiuxhil Tiuxh nik aqʼon qiqleʼm tiʼ ibʼanax jatvaʼlxh inqʼa txumbʼal inqʼae. Atz aʼ vet viTiuxhil Tiuxh nik aqʼon inqʼa txumbʼal jabʼistee uvaʼ, aʼ laʼ saʼon taqʼax te junun xaol.

Uvaʼs ibʼant Paʼp eela inqʼa niman tetz Jesuus tuchʼ u qutxhiʼoʼl

12Tan ech qatine, oʼ inqʼa niman tetz Jesuus, eche tatin u qutxhiʼoʼl. Tan kʼuxh nima vatzlenxh tatin u qutxhiʼoʼl, poro vaʼl kuxh u qutxhiʼoʼl s-kaqaayil. Echetz qatine s-qukaqaayil kʼatz quBʼaal JesuKriisto. 13Tan vaʼl kuxh viTiuxhil Tiuxh qat ok t-qaanima s-qukaqaayil tiʼ qubʼant vaʼl qatin tuchʼ u quBʼaal JesuKriisto. Echetz vaʼl kuxh vet oʼ s-qukaqaayil kʼuxh tijaq imam Israeel, atz kʼuxh inqʼa jit tij imam Israeel, atz kʼuxh inqʼa loqʼel tok tiʼ aqʼon, atz kʼuxh inqʼa jit loqʼel tok tiʼ aqʼon. Tan vaʼl kuxh qat qukʼult viTiuxhil Tiuxh uvaʼs qat qubʼen s-niman tetz Jesuus.{*}#12.13 ¿Kam nik elkaʼp u yol ‹bautizados en un cuerpo,› chich tu kastiiya? Aʼ nik taleʼ uvaʼ ‹eelaxh motx ipal inqʼa xaol s-tuul.› Atz ‹vaʼlxh motx inatxhtaʼ,› chiche. Tul jit literal nik elkaʼp u yol ‹bautismo› tiʼ ikuʼ inqʼa xaol xeʼ aʼ. Tul antxh nik tal u yol tiʼ ibʼant inqʼa xaol vaʼl iyol s-vatzaq tiʼ kam uvaʼ qat motx pal s-tuul. Tan ech uvaʼe nik tal tu 1 Koriintios 10.2; ‹bautizados en la nube y en el mar,› chiche. Tul echat kuxh nik elkaʼpe u yol ‹beber,› tan ‹eelaxh motx ipal inqʼa xaol s-tuul,› chiche. 1 Koriintios 10.2; Tio 22.24; Kuxh 10.38; Luk 12.50. Pet jit aʼ koqxh nik tal vikuʼ inqʼa xaol xeʼ aʼ. Tul jit aʼ nik tal u tukʼat invaʼq xaol aʼ. Pet at jolt inqʼa aj txumbʼal tiʼ viyolbʼal quBʼaal Tiuxh nik alon, tiʼ uvaʼ aʼxh nik tal u versiikulo tiʼ u kuʼchil xeʼ aʼ. Tul ech nik tal s-eche: —Uvaʼs qukuʼ tuʼ aʼ, oʼ inqʼa niman tetz Jesuus, tul tira vaʼl kuxh vet qatin qubʼan taʼn viTiuxhil Tiuxh, kʼuxh oʼ tij imam Israeel, atz kʼutxh jit oʼ tij imam Israeel, —chiche. Tul literaal u yol ‹bautismo,› nik taleʼ.

14Echetz bʼanel taʼn u qatine, oʼ inqʼa niman tetz Jesuus, eche u qutxhiʼoʼl. Tan jit vaʼl koq kuxh tatin u qutxhiʼoʼl, pet nima vatzlen kuxh elnaʼq tatineʼ. 15Eche u qoq, tan eche uvaʼ ech koq laʼ tal s-eche: —Tan jit in qʼabʼ. Echetz jit in tetz u txhiʼoʼl, —oq chaqe. Tan bʼane jitetz koq txeyel tibʼ u qoq tuchʼ u qutxhiʼoʼl, oq ech laʼ tale.

16Atz echate u quxichin, tan eche uvaʼ ech koq laʼ tal s-eche: —Tan jit in bʼaqʼ vatz. Echetz jit in tetz u txhiʼoʼl, —oq chaqe. Tan bʼane jitetz koq txeyel tibʼ u quxichin tuchʼ u qutxhiʼoʼl, oq ech laʼ tale.

17Atz echetze uvaʼ bʼaqʼ vatz koq kuxh u qutxhiʼoʼl s-kaqaayil, tul yeʼletz qabʼibʼale ati. Atz xichin koq kuxh u qutxhiʼoʼl s-kaqaayil, tul yeʼletz laʼ qunatxh itxʼumal invaʼq kame.

18Pet quBʼaal Tiuxh qat oksan txhaq vatzul u qutxhiʼoʼl tal uvaʼ, aʼ qat saʼon toksataʼ. 19Echetze uvaʼ vatzul koq kuxh u qutxhiʼoʼl, tul yeʼletz u qutxhiʼoʼle tzʼeqele. 20Kʼuxhetz nima vatzlenxh tiqʼot tibʼ u qutxhiʼoʼl, poro vaʼl kuxh vet s-kaqaayil.

21Tan yeʼ laʼ utxhi uvaʼ ech koq laʼ tal u bʼaqʼ quvatz te u quqʼabʼ s-eche: —Yeʼl axh nik atxakun s-ve, —chaq koq. Atz yeʼ laʼ utxhi uvaʼ ech koq laʼ tal u quviʼ te inqʼa qoq s-eche: —Yeʼl ex nik etxakun s-ve, —chaq koq. 22Pet jatvatzul u qutxhiʼoʼl uvaʼ yeʼ kuxh nik qoksa s-tuul, eche yeʼl itxakunbʼal s-quvatz, tul aʼetz uvaʼe, tira at itxakunbʼal s-bʼaʼn. 23Atz jabʼiste u qutxhiʼoʼl uvaʼ jit josqʼil tiloneʼ, tul aʼetz inqʼae, nik quviqe. Atz jabʼiste u qutxhiʼoʼl uvaʼ chʼixvebʼal laʼ qukʼutxhtaʼ, tul aʼetz inqʼae, nikxh qutxhabʼa ikutxuxeʼ. 24Pet jabʼiste u qutxhiʼoʼl uvaʼ josqʼil tilixeʼ, tan yeʼxhkam nik qukutxeʼ. Echetz itxhabʼaxh quBʼaal Tiuxh ikaj u qutxhiʼoʼl, tan taqʼ tiqleʼm jabʼiste u qutxhiʼoʼl uvaʼ yeʼxh jankʼal tiqleʼm tatin s-quvatz. 25Echetz itxhabʼaxh quBʼaal Tiuxh ikaj u qutxhiʼoʼl, tan eela kuxh tiqleʼm s-vatzaq ibʼana. Atz eelaxh nik motx ilotxht tibʼ s-vatzaq. 26Tan oq laʼ kʼaxbʼ invaʼq u qutxhiʼoʼl, tul aalatxh nik motx itxhoʼneʼ. Atzoq laʼ oksal iqʼij invaʼq u qutxhiʼoʼl, tul aalatetzxh nik motx ichiibʼ s-vatzaq.

27Echatetz kuxh qatine s-quvatzaq, oʼ inqʼa niman tetz Jesuus, eche tatin txhaq vatzul u qutxhiʼoʼl. Tan vaʼl kuxh vet oʼ s-tuchʼ, aloq at qaqʼon, atz at qutxumbʼal jununil oʼ qat ibʼana. 28Tan quBʼaal Tiuxh saʼon taqʼax txhaq vatzul inqʼa aqʼon xoʼl inqʼa niman tetz. Tan bʼaxa tzij toksa quBʼaal Tiuxh inqʼa apoostol sitxhaq tiʼ ipaxsal viyol; yaʼne inqʼa nik kʼulun viyol quBʼaal Tiuxh, tul nik taleʼl; yaʼne inqʼa txhusul tetz viyolbʼal quBʼaal Tiuxh; yaʼne inqʼa bʼanolaq kaebʼal aanima; yaʼne inqʼa nik bʼanon bʼaʼn inqʼa yaabʼ; yaʼne inqʼa lotxhonal; yaʼne inqʼa ilol tetz inqʼa aqʼon xoʼl inqʼa niman tetz Jesuus; yaʼne inqʼa nik iyolon tinjolt yolbʼal uvaʼ jit txhusel koq s-tiʼ.

29Echetz jit ayaʼlaqxh apoostol. Atz jit ayaʼl nik kʼulun iyol quBʼaal Tiuxh, tul laʼ taleʼl. Atz jit ayaʼl txhusul tetz viyolbʼal quBʼaal Tiuxh. Atz jit ayaʼl bʼanol kaebʼal aanima. 30Atz jit ayaʼl laʼ bʼanon bʼaʼn inqʼa yaabʼ. Atz jit ayaʼl nik iyolon tinjolt yolbʼal uvaʼ jit txhusel s-tiʼ. Atz jit ayaʼl nik tel tuul inqʼa yolbʼal uvaʼ nik tal inqʼa xaol tinjolt yolbʼal uvaʼ jit txhusel koq s-tiʼ. 31Pet atxhvavaq ibʼanax inqʼa txumbʼal uvaʼ nik taqʼ viTiuxhil Tiuxh uvaʼ sibʼ itxakunbʼal xoʼl inqʼa niman tetz Jesuus.

Uvaʼs itxhusun Paʼp, tiʼ uvaʼ atoqxh taanima inqʼa niman tetz Jesuus s-vatzaq

Pet toq intxhus ex tiʼ vaʼt u bʼaʼnla txumbʼal uvaʼ tira palnaʼq viʼ inqʼa qat vall sete. Tul ech toq inbʼan tiʼ etxhusuxeʼ, eche tiqʼot invaʼq xaol bʼey vatz joltoʼq imol.

Currently Selected:

1 Koriintios 12: ixlC

Highlight

Copy

Compare