Yàkúbù 4
4
Odzú-ŋɛ́ kó nyà ńǹtá-iŋɛ́-ayé yèé ŋa, tsí kó kí ńǹtá-Ɔ̀ɖáyé
1Báàyí#ɛ́, è ma kí tse tsí tiŋɛ́ náa wà dzɛ́ àrã̀ òŋu ìdzà gé#ɛ́ɛ̀? Kṹnukṹ náa wà wo kó tse iŋɛ́ yèé wà wùú#ɛ́, iŋɛ́-íbàɖí ŋa. Tsí iŋɛ́ ŋa#á náa ɖi fà, tsí n fà ńnɔ́-ŋɛ́. Iŋɛ́ nyɛ̀ŋɛ̀ ŋa ní náa bá àrã̀ wá náàŋírĩ-ŋɛ́#ɛ́. 2Bí odzú-ŋɛ́ wà ńǹtá-iŋɛ́-kã̀, tsí è kò ríi#ɛ́, náa wà fú ŋɛ́ ní e kpa ɔlá‐ɛ̀ ǹɖe. Bí odzú-ŋɛ́ bilà si ńǹtá-iŋɛ́-ɔ̀nyà-kã̀, tsí è kò nyáa ríi gbà#á, è náa tédzú mú àrã̀ òŋu ìdzà bɔ̀ ńnɛ̀. Iŋɛ́ yèé tse tsí è kà rí iŋɛ́ yèé è wà wò ŋa#á, è kà bere Ɔ̀ɖáyé ní kó fú ŋɛ́ ńnɛ̀ ni. 3Tsí bí è bèrè gìɖì gbo#ɛ́, è kà ríi, iŋɛ́ yèé tse#ɛ́, ìsérè yèé è wà ń bere iŋɛ́#ɛ́, kò sã̀. È náa wà bere iŋɛ́ nyɛ̀ŋɛ̀ ŋa, tsí e ń tse awù-ara-ŋɛ́ ŋa gé ni.
4Iŋɛ́ nyɛ̀ŋɛ̀ yèé è wà tse#ɛ́, è kò wà tse òtítɔ́ fú Ɔ̀ɖáyé nɛ́! Kíbí è wà dzáfɔ̀-iŋɛ́-ayé ŋa lárè#ɛ́, è ɖi ɔ̀tɛ̀-Ɔ̀ɖáyé ńnɛ̀ɛ́. Ó ɖi, bí è ní ɛ̀ŋɛ kó tɛ̀ náànyì-iŋɛ́-ayé ŋa#á, è ɖi ɔ̀tɛ̀-Ɔ̀ɖáyé ni. 5Ɔ̀ɖáyé fɔ̀ si ńǹwé‐ɛ̀ ní: “Òŋu ní dzɛ́ olí-mímí yèé wà fú wa#á, tsí òŋu kà dzɛ́ ńǹɖì‐ɛ̀.” Kíbí ó fɔ̀ bɛ́ɛ̀#ɛ́, è máa ɖédzú afɔ̀-aréma ni. 6Tsí kíbí kà dzɛ́ ńǹɖì‐ɛ̀ bɛ́ɛ̀#ɛ́, ó wà tse ore-ɔ̀fɛ́‐ɛ̀ ŋa máa fú wa lárè ró. Ńnɛ̀ ní à kɔ afɔ̀-òtítɔ́ yèé gbo si ńǸwé-Ɔ̀ɖáyé† ní:
“Ɛnɛ yèé ŋa náa wà kɛ́ ara-ŋa#á,
Ɔ̀ɖáyé náa nyí ànyì kã̀ ŋá.
Ó ɖi, ɛnɛ yèé ŋa náa tɛ ara-ŋa bɔlɛ̀#ɛ́, náa tse ore fú ŋa.”#4:6 Ìwé-Òwe ŋa 3:34 (Proverbes 3:34)
7Báàyí#ɛ́, è náa tɛ ara-ŋɛ́ bɔlɛ̀ fú Ɔ̀ɖáyé. È máa dzɛ́ fú Ètsù† gìɖì ɖã́wò, tsí nákó sá ǹɖe ńɖi-ŋɛ́, tsí lɔ sã́ŋú sã́ŋú. 8È sɔ́ tìmá-Ɔ̀ɖáyé, tsí Ɔ̀ɖáyé gbo kó sɔ́ tìmá-ŋɛ́. Ɔ̀nyà-íbàɖí ŋa! È kpɔ ɛsɛ̀ ńnɔ́-íbàɖí tsítse. Ɛ̀ŋɛ yèé ìsérè-ŋɛ́ ti kpɛ̃́ méèdzì si ŋa#á, ìsérè-ŋɛ́ kó wà ńǹtá-Ɔ̀ɖáyé òŋu níìkã̀ntso. 9È náa rí mà ní ɔ̀nyà-íbàɖí ŋa ní è dzɛ́#ɛ́, tsí òŋu ní wà bá ìréré wá fú ŋɛ́#ɛ́. È náa wà náànyínɔ́ si, tsí e wà sɔkṹ. Àrĩ́-ŋɛ́ gbo kó ɖi ɔkṹ, tsí ayè títɛ́-ŋɛ́ gbo kó ɖi ara kúkú fú ŋɛ́. 10È tɛ ara-ŋɛ́ bɔlɛ̀ fú Ɔ̀ɖáyé, tsí nákó bu irɔ̃ si néwo fú ŋɛ́.
11Ìnàbí-mi ŋa, è máa fɔ afɔ̀-enìkéèdzì-ŋɛ́ ŋa ńbàɖí. Bí ò wà fɔ íbàɖí nára-enìkéèdzì-ɛ̀ɛ, olí-Yèésù, tsí wà kpɛdzɔ́ báa, máa módzú si ní enìkéèdzì-ɛ̀ɛ gé ní ò wà kpɛdzɔ́ bá#á. Ò wà dzinya-ɛkpa-Ɔ̀ɖáyé† gbo ńnɛ̀ɛ́, tsí ò wà fɔ̀ ní kò sã̀. Tsí bí ò wà dzinya ɛkpa-Ɔ̀ɖáyé#ɛ́, ò mú ara-ɛ̀ɛ si ńǹɖì-àkpɛ̀dzɔ́, tsí ò kò wà rɛ̃̀ si nɛ́kpa#á ró. 12Ɔ̀ɖáyé òŋu níìkã̀ntso gé ní náa ɖá ɛkpa fú ɔ̀nyà#á, tsí òŋu gé ní dzɛ́ àkpɛ̀dzɔ́ gbo#ɛ́. Òŋu ké gé ní nɛ́kpá, tsí kó ń gbanɛ là nàmí kó ń múnɛ tsɛ̀rá#á. Tsí ìwɔ fe, kí ò dzɛ́, tsí ò wà kpɛdzɔ́ bá enìkéèdzì-ɛ̀ɛ?
È máa wà mɔ́wɔ́ kpɛ̀ɖɔ̃̀ fú iŋɛ́ yèé è nákó tse nɔ́ɔla ŋa#á
13Báàyí#ɛ́, è rɛ̃tígbè, ɛ̀ŋɛ yèé náa fɔ̀ ní: Nɔ́mbɛ́ nàmí nɔ́ɔla, àa nákó ǹɖe, tsí lɔ ńǹlú yèé, tsí bí àa tó bɛ̀, àa nákó gbé bɛ̀ fú ɔɖɔ̃́-kã̀, tsí àa nákó tsòwò, tsí rí èrè ńnɛ̀. 14È wà wíìnyɛ̀ bɛ́ɛ̀, tsí è kò sì ma ànyìwà-ɔ̀la bí ayé-ŋɛ́ nákó gbé gbà#á. Àyɛ̀-ŋɛ́ wà kíbí òwúrɔ̀ bɛ́ ni. Náa bɔ́, tsí náa gbé fú àsòkò-kã̀ gé, tsí à kà ríi ró. 15È nákó wà fɔ̀ ní fee, bí Ɔlɔ́dzɔ́ dzɛ́, tsí àa wà náàyɛ̀ si, àa nákó tse yèé, tsí tse yèé. 16Ó ɖi fee, è náa wà kɛ́ ara-ŋɛ́ si ńǹɖì lákṹ, tsí è náa ti wà mɔ́wɔ́ kpɛ̀ɖɔ̃̀ fú iŋɛ́ yèé è bòkó tse ŋa kpó#ɛ́. Ìnyɛ̀ nyɛ̀ŋɛ̀ ŋa kpó yèé è wà wí#ɛ́, ìnyɛ̀-íbàɖí ńnɛ̀ɛ́. 17Ńbɛ̀ɛ́, bí ò mà ní ore tsítse ní dzɛ́ tòŋu, tsí ò kò wà tseé#ɛ́, ò wà dzàbi-Ɔ̀ɖáyé ni.
© (Active), Wycliffe Bible Translators, Inc. All rights reserved.