Yàkúbù 5
5
Olówó ŋa, è náa tsɔ́ éwo-ara-ŋɛ́, tsí Ɔ̀ɖáyé kó máa ɖáàbi fú ŋɛ́
1Olówó ŋa, è rɛ̃tígbè rere! Ó wà ní e wà kpèébú, tsí wà sɔkṹ máa, àtsùgbée kíbí iŋɛ́-ŋɛ́ ŋa bòkó ra kpó, tsí è nákó dzì nóòfò#ɛ́. 2Àgɔ́-ŋɛ́ ŋa kɔ̃́ kpó fú dzídzɛ, tsí dzídzɛ#ɛ́ bàdzɛ́ kpó. Tsí ìwɔ̀ra-owó geregere-ŋɛ́ ŋa gbo, àmùlɛ̀ ŋa gbo mɔ ŋá kpó. 3Tsí siká òŋu irɛ̃-ɛ̀fɛ́ yèé ŋa wà nɔ́wɔ́-ŋɛ́#ɛ́, à lɔ́ɔ̀gú kpó. Kíbí è kò lò ŋá rere#ɛ́, nɔ́dzɔ́ yèé Ɔ̀ɖáyé nákó kpɛdzɔ́ bá ŋɛ́#ɛ́, lílɔ́ɔ̀gú-ŋa nákó ǹɖe, tsí nya àyídzá-ŋɛ́, tsí nákó dzó ara-ŋɛ́ kpa gbo kíbí iná bɛ́. Ɔdzɔ́-ìtã̀ntã́ ŋa#á sɔ́má tã́ gìɖì tã́ná ó dzɛ́ ní iŋɛ́-owó ŋa gé ní è wà kpaɖí#ɛ́.
4È gba ɔ̀nyà ŋa, tsí à kpaɖí dzídzɛ fú ŋɛ́ nóko, tsí è kò sɛ̃ŋɛ̀‐ɛ̀ fú ŋa. Kíbí è wà ɖí ŋa si#ɛ́, è gbɔ́ kíbí à wà ɖúgbe bò ŋɛ́ tó gé. À wà ɖúgbe bɛ́ɛ̀ títí igbe-ŋa#á káà dzì nétí-Ɔlɔ́dzɔ́ Oláyé gbaŋgba#á. 5Ńǹtalɛ̀ bí#ɛ́, è wà náyé dzídzɛ si, tsí è wà dzɛ, tsí wà mɔ, tsí bí iŋɛ́-kã̀ wà wù ŋɛ́ gé, è náa kɛ́ɛ fú ara-ŋɛ́. Tsí è sara si náfùyɛ̀ kíbí ɛrã náa sara, tsí nɛ́ idzã̀ tã́ná ɔdzɔ́-ká kpaá náa tó#ɛ́. 6Tsí ɛnɛ yèé ŋa dzɛ́ ɔ̀nyà-atsòtítɔ́ nódzú-Ɔ̀ɖáyé#ɛ́, è sɔ́ ŋa fú àkpɛ̀dzɔ́ ŋa ní ká ɖáàbi fú ŋa, tsí kpa ŋá nóòkú. Tsí tiŋa ni òkṹnù ní ó sì dzɛ́#ɛ́. È ɖédzú kàkó tú òkpì-ŋɛ́ nɔ́dzɔ́ nyɛ̀ŋɛ̀ɛ̀?
Odzú-ŋɛ́ kó wà nɔ́ɔ̀nà si fú wíwá-Yèésù
7Ìnàbí-mi ŋa, kíbí ó dzɛ́ bɛ́ɛ̀#ɛ́, è náa fɛ̀ɖɔ̃̀ tù títí fú àsòkò yèé Yèésù Ɔlá-wa nákó wá#á. È rí kíbí bí àtsòko-kã̀ gbɛ̃ dzídzɛ-kã̀, ni náa wà ɖóro ɖèé ní kó sã̀#á káyí. Náa fɛ̀ɖɔ̃̀ tù si, tsí wà ɖóro ɖe òdzò. Náa ɖóro ɖe òdzò-àtsɛ̃̀tsɛ̃̀, tsí kó ń gbɛ̃ dzídzɛ, tsí bí ó gbɛ̃̀ɛ̃́ tã́, náa wo òdzò yèé nákó wáa rɔ̀, tsí múu sã̀#á. 8Ó ɖi, ɛ̀ŋɛ gbo, è fɛ̀ɖɔ̃̀ tù, tsí è kɛ̃̀ɖɔ̃̀, tsí è máa mì dzígí, iŋɛ́ yèé tse#ɛ́, wíwá-Ɔlá-wa#á sɔ́má tã́.
9Ìnàbí-mi ŋa, è máa wà kpɔ̀kɔ̃̀ɔ̃́rɔ̃̀ fú ara-ŋɛ́ ŋa. Bí è wà tse bɛ́ɛ̀, àkpɛ̀dzɔ́ nákó wáa kpɛdzɔ́ bá ŋɛ́. Gìɖì gbo#ɛ́, ó ti tó, tsí ɖóro si nárũ-àkpã̀nàkũ̀ ná.
10Ìnàbí-mi ŋa, àa kó rí kíbí agbáfɔ̀-Ɔ̀ɖáyé fɔ̀† ŋa gbé wáa lɔ, tsí à fɛ̀ɖɔ̃̀ tù tó#ɛ́. À gba afɔ̀-Ɔ̀ɖáyé, tsí fɔ̀ɔ́ fú ɔ̀nyà ŋa, tsí kíbí à wà fɔ̀ɔ́#ɛ́, à mú ŋa, tsí tsoró bá ŋa, tsí à gbódzú, tsí fɛ̀ɖɔ̃̀ tù. Ńbɛ̀ɛ́, ó wà ní ɛ̀ŋɛ gbo, e wà tse bɛ́ɛ̀. 11È rí gé! Ɛnɛ yèé wà réré, tsí gbódzú si#ɛ́, à náa fɔ̀ fúu ní ó wɛ éwo-ire. Tsí è gbɔ́ ìdzã̀mà-Yɔ́bù gbo kíbí ó réré tó, tsí gbódzú#ɛ́ nɔ̀? Náànyìwà#á, Ɔ̀ɖáyé wáa tu kùsɛ̀ɛ̀ fúu. Ìɖéǹɖè#ɛ́, Ɔ̀ɖáyé náa rí ànyínɔ́ fúnɛ.
Bí è wà wíìnyɛ̀, è máa kpe iŋɛ́-kã̀ kpókpó si ńǹtá‐ɛ̀
12Ìnàbí-mi ŋa, iŋɛ́ yèé kpã́dzú lárè#ɛ́ ní dzɛ́ ní bí è wà wíìnyɛ̀, è máa kpe iŋɛ́-kã̀ kpókpó si ńǹtá‐ɛ̀. Ɔ̀rɔ̃ niì, ilɛ̀ niì nàmí iŋɛ́-kã̀ kpókpó gìɖì gé, è máa kpèé si ńǹtá‐ɛ̀. Kà kàa bɛ́ɛ̀, bí ó dzɛ́ ɛ̃ɛ̃ ní è fɔ̀#ɛ́, ni kó dzɛ́ ɛ̃ɛ̃ gé, tsí bí ó dzɛ́ òò ní è fɔ̀#ɛ́, ni kó dzɛ́ òò gbo gé. Bí ó dzɛ́ ńǹrɔ́-bɛ́ɛ̀ ní è wà wíìnyɛ̀#ɛ́, nɔ́dzɔ́-ɛdzɔ́ kpíkpè#ɛ́, Ɔ̀ɖáyé kàkó ɖáàbi fú ŋɛ́.
È wúùre fú Ɔ̀ɖáyé fú ara-ŋɛ́ ŋa
13Náàŋírĩ-ŋɛ́, bí ɔ̀nyà-kã̀ wà réré, kó wúùre fú Ɔ̀ɖáyé. Tsí bí iŋɛ́-kã̀ ɖáàmí le ɔ̀nyà-kã̀, tsí ayè wà tɛ́ɛ, ɛnɛ nyɛ̀ŋɛ̀ kó kpèlè fú Ɔ̀ɖáyé. 14Tsí bí ɔ̀nyà-kã̀ wà rɔ̃̀, ɛnɛ nyɛ̀ŋɛ̀ kó kpe onùgbó-ɛgbɛ́-Kírísítò ŋa, tsí ká wá, tsí ká fɔ̀ ní ó ɖɔkpɛ́-Yèésù Ɔlá-wa, tsí ká dzo àɖɛ̃́ si ńǹtá‐ɛ̀, tsí ká wúùre fú Ɔ̀ɖáyé ní kó bɔɔ́. 15Tsí ńǹwèrè yèé à wà wúùre#ɛ́, bí à nɛ́ àkaralé si ńǹtá-Ɔlá-wa ní nákó bɔɔ́, nákó bɔɔ́ bɛ́ɛ̀ ìɖéǹɖè, tsí àkɔ̃̀rɔ̃̀#ɛ́ nákó ǹɖe, tsí ɖi abarakpá. Tsí bí ó dzɛ́ gìɖì ní ó dzàbi, Ɔ̀ɖáyé nákó múu tɔrɛ fúu. 16Àtóoríi bɛ́ɛ̀#ɛ́, è náa fɔ àbi yèé è dzɛ ŋa#á fú ara-ŋɛ́ ŋa, tsí è náa wúùre fú Ɔ̀ɖáyé fú ara-ŋɛ́ ŋa, tsí Ɔ̀ɖáyé kó sɛ̃̀ fú ŋɛ́ ńtútùúrɔ̀.
Bí ɔ̀nyà-atsòtítɔ́-kã̀ wà wúùre#ɛ́, àmí kpíkpɔ̀ náa wà ńnɛ̀, tsí náa tsɛ gbo gé ni. 17Báàyí#ɛ́, àa kó rí Èlíyà† káyí, agbáfɔ̀-Ɔ̀ɖáyé fɔ̀†-kã̀ ní ó dzɛ́#ɛ́. Ɔ̀nyà kíbí àwa gbo bɛ́ ní ó dzɛ́#ɛ́, tsí òŋu gbo náa tse iŋɛ́ kã̀ŋa sé. Tsí kíbí ó ǹɖe, tsí wúùre nódzúùkpã́ fú Ɔ̀ɖáyé ní òdzò kó máa rɔ̀#ɛ́, ɔ̀ɖã́ mú ńǹlú‐ɛ̀ títí fú ɔɖɔ̃́ mɛ́ɛta, òtsùkpá mɛ́ɛfà. 18Náànyì-bɛ́ɛ̀#ɛ́, ó wáa wúùre fú Ɔ̀ɖáyé ró, tsí Ɔ̀ɖáyé rɔ òdzò wá, tsí ilɛ̀ tù, tsí à sɛ̃̀ gbɛ̃ dzídzɛ ńǹtá‐ɛ̀, tsí ó sã̀.
È fa ɔ̀nyà-íbàɖí si nɔ́ɔ̀nà sísɛ̃́
19Ìnàbí-mi ŋa, bí ɔ̀nyà-kã̀ náàŋírĩ-ŋɛ́ kɔ ɔ̀nà sísɛ̃́ dzɔ̀ɔ́, tsí olòmírɛ̃̀ tàrèé, tsí fàá sɛ̃̀ wá nɔ́ɔ̀nà sísɛ̃́ ró#ɛ́, 20ɛnɛ yèé tse bɛ́ɛ̀#ɛ́ kó mà ní kíbí òŋu káà fàá ti ńbí ó sé ɔ̀nà lɔ si#ɛ́, tsí gbɛ̃́ɛ̃ wá nɔ́ɔ̀nà sísɛ̃́#ɛ́, ó gbàá dzɔ̀ɔ́ ní àyɛ̀‐ɛ̀ kó máa tsɛ̀rá ni. Tsí àbi yèé ɛnɛ yèé nɔ̀#ɛ́ dzɛ gbo#ɛ́, Ɔ̀ɖáyé nákó múu tɔrɛ fúu kpó. Kàkó tédzú‐ɛ̀ gìɖì láyé ró.
© (Active), Wycliffe Bible Translators, Inc. All rights reserved.