Yàkúbù 3
3
Iŋá nárũ-ɔ̀nyà, ó nɛ́kpá
1Ìnàbí-mi ŋa, náàŋírĩ-ŋɛ́#ɛ́, ɔ̀nyà kpíkpɔ̀ kó máa ɖi akɔ́nɛ. Iŋɛ́ yèé tse#ɛ́, è ti mà ní ɛdzɔ́ yèé Ɔ̀ɖáyé bòkó kpè fú àwa akɔ́nɛ ŋa#á, nákó le lárè. 2Báàyí#ɛ́, àwa kpó, àa náa tse iŋɛ́ kpíkpɔ̀ sé. Tsí bí ɔ̀nyà-kã̀ wà, tsí kà fɔ afɔ̀-kã̀ sé#ɛ́, ni ɛnɛ nyɛ̀ŋɛ̀ sã̀ dzálɛ̀ ńnɛ̀ɛ́, tsí nákó nyáa mú ara‐ɛ̀ rere gìɖì gbo. 3Bí àa rí atsĩ gbo#ɛ́, à náa mú okù so irɛ̃-kã̀, tsí ń so arũ‐ɛ̀, tsí à náa dzì ńǹtá‐ɛ̀, tsí wà rɛ̃̀ wérí. Bí ɔlá‐ɛ̀ fa okù#ɛ́, atsĩ#ɛ́ náa gbɔ́ɔ̀lú fúu. Ńbɛ̀ɛ́, okù#ɛ́ náa tse tsí à náa nyáa nyí òŋu ká‐ɛ̀ kpó kpaɖà wérí ńǹkɛ̀ɛ́.
4Èkéèdzì‐ɛ̀#ɛ́, ɔkɔ̃̀-odzómi lákṹ kã̀ŋa gbo wà, tsí bí à wà tù ŋá ńǹtá-àhũ, awu lákṹ náa wà télè ŋá. Ńbɛ̀ɛ́, ɔ̀kpá tsígíɖí-kã̀ náa wà náànyì-ɔkɔ̃̀#ɛ́, tsí tarũ bɔ̀ nómi si. Tsí àtɔ̀kɔ̃̀#ɛ́ náa káà gbé gbe ɔ̀kpá#á si, tsí náa wà nyíi lɔ ńbí ó wò ní ɔkɔ̃̀#ɛ́ kó gbà#á. 5Kíbí ɔ̀kpá#á dzɛ́ iŋɛ́ tsígíɖí nára-ɔkɔ̃̀-odzómi#ɛ́, bɛ́ɛ̀ ké ní iŋá gbo dzɛ́ iŋɛ́ tsígíɖí nára-ɔ̀nyà#á, tsí náa wà samala, tsí wà nyɛ ara‐ɛ̀ ńŋɛ́ lákṹ yèé ó wà tse ŋa kpó#ɛ́.
Bí à mú iná tsígíɖí-kã̀ gbo bɔ̀ ńkóko, náa dzó kóko#ɛ́ kpó búláá. 6Bɛ́ɛ̀ ní iŋá nárũ-ɔ̀nyà gbo wà#á. Ó wà kíbí iná tsígíɖí#ɛ́ bɛ́ ni. Bí à múu, tsí wà ń wíìnyɛ̀#ɛ́, afɔ̀-íbàɖí ɔ̀kã̀lɔ́ɔ̀kã̀ kpó ní náa fɔ̀ fùɖá wá#á. Iŋɛ́-ara-wa-kã̀ ní ó dzɛ́#ɛ́, tsí náa gbɛ̃ɛ̃́rĩ́ ara-wa kpó. Tsí ìnyɛ̀ yèé náa wà bɔ́ nárũ-wa#á, òŋu gbo wà kíbí iná tsígíɖí#ɛ́ bɛ́, tsí náa mú ayé-wa dzoná. Ńɖi-Ètsù†, ńbí iná-àrìtã́ wà#á, ńbɛ̀ ní afɔ̀ nyɛ̀ŋɛ̀ ŋa náa ti#ɛ́.
7Ɔ̀nyà kã́rũ-ɛrã ɔ̀kã̀lɔ́ɔ̀kã̀ kpó. Ɛrã-kóko gbo, ɛyɛ ŋa gbo, edzò ŋa gbo, ɛdzã ŋa gbo, ɔ̀nyà kã́rũ-ŋa kpó. 8Ó ɖi, iŋá òŋu, ɔ̀nyà-kã̀ kpókpó kò nɛ́kpá si ńǹtá‐ɛ̀. Iŋɛ́-íbàɖí-kã̀ ní ó dzɛ́#ɛ́, tsí ɔ̀nyà-kã̀ kpókpó kà nyáa kárũ‐ɛ̀ kò. Kíbí edzò náa bunɛ, tsí náa mú oró si nára fúnɛ, tsí à náa kú#ɛ́, bɛ́ɛ̀ ní iŋá gbo wà#á.
9Iŋá yèé à náa kɛ́, tsí wà ń nyɛ Ɔlɔ́dzɔ́ Boba-wa#á, iŋá#á ké ní à náa kɛ́, tsí wà ń ɖɔ̃́ èhée fú ɔ̀nyà ŋa#á, ɔ̀nyà yèé ŋa Ɔ̀ɖáyé tse ńǹwànwà tòŋu ká‐ɛ̀#ɛ́. 10Nárũ#ɛ́ ɔ̀kã̀ntso ní àa náa nyɛ Ɔ̀ɖáyé#ɛ́, nárũ#ɛ́ ké ní àa náa ré fú ɔ̀nyà ŋa#á. Ìnàbí-mi ŋa, kó máa dzɛ́ bɛ́ɛ̀. 11Omi-ìrɔ́ méèdzì kà bɔ́ ti néwo-oɖò ɔ̀kã̀ntso nɛ́? Éwo-oɖò-kã̀ kà wà sɔ̃ omi ɖíɖɔ̃̀ tã́, tsí tɔ́ wà sɔ̃ omi kíkorò gbo. 12Ìnàbí-mi ŋa, kíbí egi-màángò-kã̀ kà la ɛnyɛ̀#ɛ́, tsí egi-òrì-kã̀ gbo kà so màángò#ɛ́, bɛ́ɛ̀ ké ní à kàkó nyáa kpɔ̃mi ɖíɖɔ̃̀ néwo-oɖò yèé wà sɔ̃ omi kíkorò#ɛ́ ńnɛ̀ɛ́.
Ɛnɛ yèé nɛ́ ifɛ̀ɛ́nɔ́-òtítɔ́#ɛ́, ìrɛ̃̀-ɛsɛ̀‐ɛ̀ ní náa nyàá ɖíre#ɛ́
13Bí ɔ̀nyà-kã̀ náàŋírĩ-ŋɛ́ ní òŋu nɛ́ ifɛ̀ɛ́nɔ́, kó nyàá ɖíre fúnɛ ńǹgbèngbé‐ɛ̀. Kó wà tse iŋɛ́-ire òŋu inɔ́ tútù, tsí kó nyà ɖíre fúnɛ ní ó nɛ́ ifɛ̀ɛ́nɔ́ ìɖéǹɖè.
14Ó ɖi, bí è wà dzowú-nɛ hɛ́hɛ́hɛ́, tsí è náa wà ɖugbã̀-nɛ gbo#ɛ́, è máa wà tsòɖòbò, tsí wà tse kɛ́rɛ́kɛ́rɛ́ ní ɛ̀ŋɛ nɛ́ ifɛ̀ɛ́nɔ́. 15Ifɛ̀ɛ́nɔ́-ìrɔ́ nyɛ̀ŋɛ̀ kò tsi ifɛ̀ɛ́nɔ́ ni. Kò ti ńɖi-Ɔ̀ɖáyé. Ifɛ̀ɛ́nɔ́ ti ìtalɛ̀ bí ni, ifɛ̀ɛ́nɔ́-Ètsù† ni. Mímí-Ɔ̀ɖáyé† kà fúnɛ ńfɛ̀ɛ́nɔ́-ìrɔ́ nyɛ̀ŋɛ̀. 16Ńbí ɔ̀nyà ŋa wà dzowú, tsí wà ɖugbã̀ ara-ŋa#á, àtansɔ gé ní náa bɔ́ ńnɛ̀#ɛ́. Iŋɛ́ kòdzɔkòdzɔ kpó ní à náa wà tse#ɛ́.
17Báàyí#ɛ́, bí ɔ̀nyà-kã̀ nɛ́ ifɛ̀ɛ́nɔ́ yèé ti ńɖi-Ɔ̀ɖáyé#ɛ́, bí ɛnɛ nyɛ̀ŋɛ̀ náa gbé#ɛ́ ní. Náàtsɛ̃̀tsɛ̃̀#ɛ́, inɔ́‐ɛ̀ náa má. Èkéèdzì‐ɛ̀#ɛ́, náa dzɛ́ ɔ̀nyà tútù-kã̀ fú ara‐ɛ̀ gé ni. Kà dzára gbo. Tsí náa dzɛ́ ɔ̀nyà-kã̀ yèé náa rɛ̃tígbè-nɛ#ɛ́ gbo, tsí kà dzinya-nɛ gbo. Tsí náa rí ànyínɔ́ fúnɛ gbo, tsí náa wà tse ore fúnɛ gbo gé ni. Kà dzɛ́ ɔ̀nyà-banɛ́ná banómi, tsí kà dzɛ́ atsendzɔdzú gbo láyé. 18Ó ɖi, bí è wà wò ní ɔ̀nyà ŋa kó wà ɖɔ̃̀#ɛ́, ó wà kíbí ɔma dzídzɛ ní è wà gbɛ̃̀ bɛ́ɛ̀#ɛ́, tsí bí ó wù, tsí so ńǹkɛ̀ɛ́, èso‐ɛ̀ nákó tse tsí ìtsèntse-ŋɛ́ nákó dzɔdzú-Ɔ̀ɖáyé.
© (Active), Wycliffe Bible Translators, Inc. All rights reserved.