Yàkúbù 2
2
È máa rí olówó nódzú lárè
1Ìnàbí-mi ŋa, kíbí è nɛ́ àkaralé si ńǹtá-Yèésù Kírísítò Ɔlá-wa, ɛnɛ yèé láre ɔ̀nyà ŋa kpó#ɛ́, kò wà ní e wà rí ɔ̀nyà kã̀ŋa nódzú láre ɔ̀nyà kã̀ŋa. 2Ká fɔ̀ ní è kpérí si nɛ́gbɛ́-Kírísítò, tsí wà sɛ̃ Ɔ̀ɖáyé, tsí ɔ̀nyà méèdzì wáa tó, tsí wɔ̀ ńnɔlé#ɛ́. Ɛnɛ àtsɛ̃̀tsɛ̃̀#ɛ́, olówó ní ó dzɛ́#ɛ́. Ó wɔ ìwɔ̀ra-àfɛ́ŋú ŋa si, tsí ó mú kabɔ́rɔ́-siká ŋa gbo bɔ̀ nɔ́wɔ́ si. Tsí ɛnɛ-èkéèdzì#ɛ́ òŋu dzɛ́ olákèmà, tsí ìwɔ̀ra yíya ní òŋu wɔ̀ si#ɛ́. 3Tsí ká fɔ̀ ní è rí ɛnɛ yèé wɔ ìwɔ̀ra àfɛ́ŋú si#ɛ́ nódzú lárè, tsí è wí fúu ní: Kó wá, tsí kó wáa dzokó náàntã̀ bí. Tsí è nyí, tsí wà wí fú olákèmà#á òŋu ní: Kó ɖóro bɛ̀ nàmí è wí fúu ní: Kó wáa dzokó ńlɛ̀ nákpo bí. 4Bí ó dzɛ́ bɛ́ɛ̀ ní è wà tse#ɛ́, è kò rí ní ìsérè-ŋɛ́ wà lòò, tsí è wà kpɛdzɔ́-òkṹnù ńnɛ̀ɛ́ɛ̀?
5Ìnàbí ŋa, àrínódzú-mi ŋa, è rɛ̃tígbè rere. Olákèmà ŋa, àŋa yèé kò nɛ́ iŋɛ́-kã̀ kpókpó ńǹtalɛ̀ bí#ɛ́, è kò mà ní Ɔ̀ɖáyé tsã̀ ŋá ní ká gba Yèésù gbɔ́ɔ̀? Ńnɛ̀ ní à ɖi olówó nódzú‐ɛ̀#ɛ́. Tsí ó tsã̀ ŋá gbo ní ká dzogú-òŋu. Ogú dzídzɛ‐ɛ̀ ní dzɛ́ ní kó dzoyè si ńǹtá-ŋa kíbí ó tàlé‐ɛ̀ si fú ɔ̀nyà kpó yèé nɛ́ àmúɖɔ̃̀ fúu#ɛ́. 6Tsí ɛ̀ŋɛ òŋu, è kà sì mú olákèmà ŋa kpe iŋɛ́-kã̀ kpókpó. Nɛ̀ɛ́ ŋa wà ɖí ŋɛ́ si, tsí wà mú ŋɛ́ réré? Kò tsi olówó ŋa niì? Àŋa ní náa fà ŋɛ́ lɔ ńlé-ɛdzɔ́ ŋa#á nɔ̀! 7Tsí nɛ̀ɛ́ ŋa gbo náa wà gbɛ̃ɛ̃́rĩ́ ɛ́kɔ-Ɔlá-ŋɛ́? Olówó ŋa#á ké ni nɔ̀!
8À kɔ si ńǸwé-Ɔ̀ɖáyé† ní: “Ó wà ní o nɛ́ àmúɖɔ̃̀ fú enìkéèdzì‐ɛ̀ɛ kíbí nà nɛ́ fú ara‐ɛ̀ɛ#ɛ́.”#2:8 Ìwé-Orò ŋa 19:18 (Psaumes 19:18) Ɛkpa-oyè dzídzɛ ńnɛ̀ɛ́, tsí bí ó dzɛ́ ní è wà tse si ńǹtá‐ɛ̀#ɛ́, è tse ire. 9Ó ɖi, bí è rí ɔ̀nyà kã̀ŋa nódzú láre ɔ̀nyà kã̀ŋa, àbi-Ɔ̀ɖáyé ní è wà dzɛ#ɛ́, tsí ɛkpa-Ɔ̀ɖáyé† ti ɖáàbi fú ŋɛ́, iŋɛ́ yèé tse#ɛ́, è ti dzɛ̀wɔ̀ ná. 10Bí ó dzɛ́ gìɖì ní ò wà rɛ̃̀ si nɛ́kpa-Ɔ̀ɖáyé ŋa kpó, tsí ó bɔ ɔ̀kã̀, tsí ò kò rɛ̃̀ si ńnɛ̀#ɛ́, nódzú-Ɔ̀ɖáyé òŋu#ɛ́, ò kò rɛ̃̀ si nɔ́ɔ̀kã̀ kpókpó ni. 11Nɛ́kpa-Ɔ̀ɖáyé#ɛ́, Ɔ̀ɖáyé fɔ̀ ní: Máa gbaya-enìkéèdzì-ɛ̀ɛ. Tsí òŋu ké ní fɔ̀ ró ní: Máa kpa ɔ̀nyà nóòkú gbo#ɛ́. Báàyí#ɛ́, bí ò kò gbaya-ɔ̀nyà-kã̀, tsí ò sì kpanɛ nóòkú#ɛ́, ò ti dzɛ̀wɔ̀ ńnɛ̀ɛ́.
12Ɛkpa-Ɔ̀ɖáyé#ɛ́, náa gbà wá dzɔ̀ɔ́ nɔ́wɔ́-àbi dzídzɛ. Ó ɖi, kó yé ŋɛ́ si ní Ɔ̀ɖáyé bòkó kpɛdzɔ́ fú ŋɛ́ ti nára-kíbí è rɛ̃̀ si nɛ́kpa#á gbà#á, tsí ó wà ní ìnyɛ̀-arũ-ŋɛ́ òŋu ìrɛ̃̀-ɛsɛ̀-ŋɛ́ kó wà ɖé bá ɛkpa-Ɔ̀ɖáyé#ɛ́. 13Ńbɛ̀ɛ́, nɔ́dzɔ́ yèé Ɔ̀ɖáyé nákó kpɛdzɔ́#ɛ́, bí ò kà rí ànyínɔ́ fúnɛ, Ɔ̀ɖáyé gbo kàkó rí ànyínɔ́ fɛ́ɛ. Ó ɖi, bí nà rí ànyínɔ́ fúnɛ#ɛ́, nɔ́dzɔ́-ɛdzɔ́ kpíkpè#ɛ́, ɛ̀ɖɔ̃̀-ɛ̀ɛ kàkó mì dzígí.
Kíbí è nɛ́ àkaralé si ńǹtá-Yèésù#ɛ́, è nyàá ɖíre ńǹtsèntse-ŋɛ́
14Ìnàbí-mi ŋa, bí ɔ̀nyà-kã̀ ní òŋu nɛ́ àkaralé si ńǹtá-Yèésù, tsí kò wà nyàá ɖíre ńǹtsèntse‐ɛ̀, èrè mɛ̀ɛ́ wà ńnɛ̀ fúu? Kó nɛ́ àkaralé si ńǹtá-Yèésù bɛ́ɛ̀#ɛ́ kò tó, tsí kó gbàá là. 15Ká fɔ̀ ní ìnàbí olí-Yèésù-kã̀ wà, tsí kò nɛ́ ìwɔ̀ra, tsí wà wɔ̀, tsí kò nɛ́ dzídzɛ gbo, tsí wà dzɛ, 16tsí ɔma-ɛgbɛ́-Kírísítò-kã̀ ǹɖe, tsí wà wí fúu ní: “Kó tó ńlé rere fòò. Ó ɖi, kó máa sũ̀ nébi, tsí kó máa sũ̀ nótútù gbo.” Bí ó wí fúu bɛ́ɛ̀ náàrìmáa fúu ńŋɛ́ yèé wà hã́ã#á, afɔ̀ nákpo ní ó fɔ̀#ɛ́. 17Ńbɛ̀ɛ́, bí ó dzɛ́ ní ńǹrɔ́-bɛ́ɛ̀ ní è wà fɔ̀ ní ɛ̀ŋɛ nɛ́ àkaralé si ńǹtá-Yèésù#ɛ́, tsí è kò wà nyàá ɖíre ńǹtsèntse-ŋɛ́#ɛ́, àyɛ̀ kò wà ńnɛ̀. Ó wà kíbí iŋɛ́ kúkú ni.
18Bóyá ɔ̀nyà-kã̀ nákó fɔ̀ ní: Ɔ̀nyà kã̀ŋa náa nɛ́ ìtsèntse-ire, tsí ɔ̀nyà kã̀ŋa gbo náa nɛ́ àkaralé si ńǹtá-Yèésù gé ni. Ńbɛ̀ɛ́, màa fɔ̀ fúu ní: Bí ɔ̀nyà-kã̀ kò nɛ́ ìtsèntse-ire#ɛ́, kàkó nyáa nyà ɖíre fú mi ní òŋu nɛ́ àkaralé si ńǹtá-Yèésù. Tsí èmi gbo, ti ńǹtsèntse-mi ŋa#á, màa nyà ɖíre fúu ní ǹ nɛ́ àkaralé si ńǹtá-Yèésù. 19Tsí ò mà ní Ɔ̀ɖáyé ɔ̀kã̀ntso gé ní wà#á nɔ̀? Bí ó dzɛ́ bɛ́ɛ̀ ní ó wà fɛ́ɛ#ɛ́, ó sã̀! Ó ɖi, nà tédzú gìɖì gbo ní edzò† ŋa gbo mà bɛ́ɛ̀ títí ɛ̀ɖɔ̃̀ náa wà ɖá ŋa, tsí à náa wà ŋá kpàkpàkpà nódzú‐ɛ̀.
20Ékè! Rí ɔ̀nyà-éwo kò sí fú yèé gé! Bí ò nɛ́ àkaralé si ńǹtá-Yèésù gé, tsí ò kò nɛ́ ìtsèntse-ire#ɛ́, àkaralé yèé ò ní òŋu nɛ́ si ńǹtá-Yèésù#ɛ́ kò nɛ́ ìɖí. Ńbɛ̀ɛ́, màa nya òkpì‐ɛ̀ fɛ́ɛ, tsí o gbɔ́. 21Àa kó rí Àbàràhámì†, gbágbóǹgbàgbò-wa, kíbí ó tse gbà#á. Àbàràhámì#ɛ́, Ɔ̀ɖáyé fɔ̀ fúu ní kó kɛ́ ɔma‐ɛ̀ Ìsákà†, tsí kó ń tsɛbɔ fú òŋu. Tsí kò dzìnyàá. Ó ǹɖe, tsí kɛ́ ɔma‐ɛ̀#ɛ́, tsí ń si ńǹtá-ìdzɛ̀bɔ-Ɔ̀ɖáyé, tsí bòkó kpaá fúu. Iŋɛ́ yèé ó tse nyɛ̀ŋɛ̀#ɛ́ ní tse tsí Ɔ̀ɖáyé gbàá nɔ́ɔ̀nyà-atsòtítɔ́ nódzú-ara‐ɛ̀#ɛ́.
22Báàyí#ɛ́, ò rí ní kíbí ó gba Ɔ̀ɖáyé gbɔ́#ɛ́ ní tse tsí ó nyáa tse awù-Ɔ̀ɖáyé#ɛ́, tsí iŋɛ́ yèé ó tse nyɛ̀ŋɛ̀ gbo#ɛ́ ní tse tsí ó gba Ɔ̀ɖáyé gbɔ́ dzálɛ̀ ńǹkɛ̀ɛ́#ɛ́. 23Kíbí ó tse bɛ́ɛ̀, tsí ó dzɔdzú-Ɔ̀ɖáyé#ɛ́, ó nyà ɖíre ní afɔ̀ yèé à kɔ si ńǸwé-Ɔ̀ɖáyé ti nára‐ɛ̀#ɛ́ dzɛ́ òtítɔ́. À kɔɔ́ si ńǸwé-Ɔ̀ɖáyé ti nára‐ɛ̀ ní: “Àbàràhámì gba Ɔ̀ɖáyé gbɔ́, tsí Ɔ̀ɖáyé gbo tɔ́ ire‐ɛ̀ si fúu, tsí ó gbàá nɔ́ɔ̀nyà-atsòtítɔ́ nódzú-ara‐ɛ̀.”#2:23 Ìwé-Ìkpìnkpìlɛ̀-ayé 15:6 (Genèse 15:6) Ti náànyì-bɛ́ɛ̀#ɛ́ ní ɔ̀nyà ŋa náa fɔ̀ ní Ɔ̀ɖáyé ɖídza báa#á. 24Ńbɛ̀ɛ́, è rí ní iŋɛ́ yèé ɔ̀nyà náa tse#ɛ́, iŋɛ́ nyɛ̀ŋɛ̀ ní náa tse tsí Ɔ̀ɖáyé náa gbàá nɔ́ɔ̀nyà-atsòtítɔ́ nódzú-ara‐ɛ̀#ɛ́. Kò tsi ńti yèé ó gba Ɔ̀ɖáyé gbɔ́ sɔ̃́ŋú#ɛ́ gé ni.
25Èkéèdzì‐ɛ̀#ɛ́, àa kó rí Ràhábà gbo. Àlòwá-kã̀ ní ó dzɛ́#ɛ́, tsí òŋu gbo gba Ɔ̀ɖáyé gbɔ́. Dzɔ̀ɔ́ dzɔ̀ɔ́#ɛ́, kíbí à bɛ ɔma-Ìsàràyɛ́lì† ŋa wá ní ká wáa tsɔ́ ìlú#ɛ́ wò#ɛ́, ńɖɔ̀‐ɛ̀ ní à sɔ̀#ɛ́. Tsí kíbí à bòkó wáa mú ŋa#á, ó mú ŋa ɖúkù ńlé‐ɛ̀, tsí ó mú ŋa sá gba ɔ̀nàɖì lɔ. Tsí iŋɛ́ yèé ó tse nyɛ̀ŋɛ̀#ɛ́, ní tse tsí Ɔ̀ɖáyé gbàá nɔ́ɔ̀nyà-atsòtítɔ́ nódzú-ara‐ɛ̀#ɛ́. 26Ńbɛ̀ɛ́, bí ó wà ńnɛ̀ɛ́. Bí ɔ̀nyà-kã̀ kú, mímí‐ɛ̀ náa ǹɖe, tsí náa bɔ kpàáfù‐ɛ̀ nákpo si. Bɛ́ɛ̀ ké ní bí ò gba Ɔ̀ɖáyé gbɔ́, tsí ò kò nɛ́ ìtsèntse-ire máa#á, àkaralé yèé ò nɛ́ si ńǹtá-Ɔ̀ɖáyé#ɛ́, ó wà kíbí kpàáfù nákpo bɛ́ gé ni. Àyɛ̀ kò wà ńnɛ̀ ró.
© (Active), Wycliffe Bible Translators, Inc. All rights reserved.