Yàkúbù 1
1
1Èmi, Yàkúbù àtsìtsɛ́-Ɔ̀ɖáyé òŋu àtsìtsɛ́-Yèésù† Kírísítò† Ɔlá-wa, èmi ní wà tse ìwé yèé bɛ́ fú ŋɛ́#ɛ́. Ɛ̀ŋɛ ɔma-Ɔ̀ɖáyé ŋa yèé kpàkpa túùnkã́ náyé gbaŋgba#á wérí lɔ si#ɛ́, ǹ wà kí ŋɛ́ kpó.
Bí è wà náàɖã́wò, bí ó wà ní e gbé gbà#á ní
2Ìnàbí-mi ŋa, bí iŋɛ́ ìrɔ́ ɔ̀kã̀lɔ́ɔ̀kã̀ kpó wá ńǹtá-ŋɛ́, tsí kó wáa ɖã́ ŋɛ́ wò, kó ɖɔ̃̀ fú ŋɛ́ títí e wà táyè. 3Kó yé ŋɛ́ ní bí iŋɛ́-kã̀ wáa ɖã́ ŋɛ́ wò, tsí ká rí ní è gba Ɔ̀ɖáyé gbɔ́ ìɖéǹɖè#ɛ́, bí è nyáa fùɖá ńnɛ̀#ɛ́, è nákó nyáa gbódzú rere ńǹkɛ̀ɛ́. 4Ó ɖi, ó wà ní e gbódzú títí lɔ ńǹtã̀ntã́, àtsùgbée ìlò-ŋɛ́ kó sã̀ dzálɛ̀, tsí ká máa rí íbàɖí-kã̀ kpókpó fɔ̀ nára-ŋɛ́.
5Báàyí#ɛ́, bí ɔ̀nyà-kã̀ wà, tsí kò nɛ́ ifɛ̀ɛ́nɔ́, kó bere Ɔ̀ɖáyé ní kó fú òŋu, tsí nákó fúu ńnɛ̀. Iŋɛ́ yèé Ɔ̀ɖáyé náa fúnɛ#ɛ́, náa fúu ńnɔ́ tútù náàrìmáa kpòtsé. 6Tsí bí ò wà bèrèé ńfɛ̀ɛ́nɔ́#ɛ́, nàa bèrèé òŋu àkaralé ní nákó fú òŋu ńnɛ̀. Kò wà ní o wà dzèrèbe. Ɛnɛ yèé wà dzèrèbe#ɛ́, ɛnɛ nyɛ̀ŋɛ̀ wà kíbí awu náa wà tse, tsí àhũ náa wà kpa bɛ́#ɛ́ ni. Náa wà kpa lɔ nóòtã́, tsí wà kpa lɔ nóòsì, tsí kà mí láyé. 7Ó ɖi, ɔ̀nyà-ìrɔ́ nyɛ̀ŋɛ̀ kó máa módzú si ní òŋu bòkó gba iŋɛ́-kã̀ ńɖi-Ɔlɔ́dzɔ́. 8Ìsérè‐ɛ̀ ti kpɛ̃́ méèdzì, tsí kà nyáa tse iŋɛ́-kã̀, tsí kó nódzú.
9Ńbɛ̀ɛ́, bí ìnàbí-wa olí-Yèésù-kã̀ wà, tsí ó dzɛ́ olákèmà, ayè kó wà tɛ́ɛ, iŋɛ́ yèé tse#ɛ́, ó fɛ́ fú Ɔ̀ɖáyé. 10Tsí bí ìnàbí-wa olí-Yèésù-kã̀ gbo wà, tsí ó dzɛ́ olówó, ayè kó wà tɛ́ òŋu gbo ní Ɔ̀ɖáyé ɖɛ òŋu bɔ̀, iŋɛ́ yèé tse#ɛ́, nákó wáa tsɛ̀rá kíbí ìbóbó náa rɔ bɛ́#ɛ́ ni. 11Kíbí odzúùrɔ̃̀ náa bɔ́, tsí rã̀, tsí kpa ewé, tsí ìbóbó‐ɛ̀ náa rɔ, tsí ká ɖànu, tsí kà tsàfɛ́ŋú ró#ɛ́, bɛ́ɛ̀ ké ní nákó lɔ fú olówó#ɛ́ gbo#ɛ́. Odzú‐ɛ̀ nákó kpã́ si ńŋɛ́‐ɛ̀ ŋa làkóò, tsí nódzúùrɔ̃̀-ɔdzɔ́ ɔ̀kã̀ntso, nákó tsàrìsí.
12Bí iŋɛ́-kã̀ ɖã́ɛ̃ wò, tsí ò kò kí ńnɛ̀, ò wɛ éwo-ire. Ó ɖi, bí ò gbódzú, tsí fùɖá ńnɛ̀ɛ́#ɛ́, Ɔ̀ɖáyé nákó fɛ́ɛ náàyɛ̀. Ɔ̀yà nyɛ̀ŋɛ̀ ní ó tàlé si fú ɛnɛ yèé nɛ́ àmúɖɔ̃̀ fúu ŋa#á.
13Bí à ɖã́ɛ̃ wò ní o tse íbàɖí, kò wà ní o fɔ̀ ní Ɔ̀ɖáyé ní wà ɖã́ òŋu wò#ɛ́. Ó ɖi, iŋɛ́-kã̀ kpókpó kàkó nyáa sɔ́ Ɔ̀ɖáyé ní kó tse íbàɖí, tsí Ɔ̀ɖáyé òŋu ká‐ɛ̀ gbo, kà sɔ́nɛ ní ká tse íbàɖí. 14Awù-íbàɖí tìwɔ ká‐ɛ̀ɛ gìɖì ní náa sɔ́ɛ si náàɖã́wò#ɛ́. 15Tsí awù#ɛ́ náa ǹɖe, tsí bí àbi. Tsí àbi#ɛ́ gbo náa ǹɖe, tsí bí ikú fɛ́ɛ ńǹkɛ̀ɛ́.
16Ìnàbí ŋa, àrínódzú-mi ŋa, è máa rú ara-ŋɛ́ gba ɔ̀nà-òmírɛ̃̀. 17Ó ɖi, iŋɛ́-ire ɔ̀kã̀lɔ́ɔ̀kã̀ kpó náa ti ńɖi-Ɔ̀ɖáyé ni. Ɔ̀yà inɔ́ tã̀ã́, ànyì tã̀ã́ ɔ̀kã̀lɔ́ɔ̀kã̀ kpó, ńɖi-Ɔ̀ɖáyé nɔ́ɔ̀rɔ̃ ní náa ti#ɛ́. Òŋu ní ɖá odzúùrɔ̃̀ òŋu òtsùkpá má nára-àrã̀wo ŋa gbo#ɛ́. Tsí iŋɛ́ nyɛ̀ŋɛ̀ ŋa#á, à náa wà sɔ́, tsí wà kparɔ ìɖì, tsí wà má si ńǹɖì-kã̀, tsí wà mú òkùkù lɔ ńbòmírɛ̃̀. Ó ɖi, Ɔ̀ɖáyé òŋu kà tse bɛ́ɛ̀. Kà sɔ́ láyé. Mímá gé ní ó dzɛ́ si#ɛ́. 18Ńbɛ̀ɛ́, ó ɖé ńnɔ́‐ɛ̀, tsí ó wí afɔ̀-òtítɔ́‐ɛ̀ fú wa, àwa olí-Yèésù ŋa, àtsùgbée àa kó rí àyɛ̀. Tsí náàŋírĩ-iŋɛ́ yèé ó ɖá ŋa kpó#ɛ́, ó tsã̀ wá ní àa kó wà kíbí dzídzɛ àtsɛ̃̀tsɛ̃̀ yèé à nákó ń rò fú òŋu#ɛ́.
Ká wà gbɔ́ɔ̀lú fú Ɔ̀ɖáyé
19Ìnàbí ŋa, àrínódzú-mi ŋa, kó yé ŋɛ́ si ní ó wà ní ɛnɛ kṹnukṹ kó yáa wà tsí etí si náfɔ̀. Ó ɖi, arũ kó máa wà yá fúnɛ, tsí ká máa wà bínɔ́ kóyá kóyá gbo. 20Iŋɛ́ yèé tse#ɛ́, ɛnɛ yèé bínɔ́ si#ɛ́ kà nyáa tse òtítɔ́-Ɔ̀ɖáyé. 21Àtóoríi bɛ́ɛ̀#ɛ́, è kɔ iŋɛ́ kpó yèé ŋa náa gbɛ̃ɛ̃́rĩ́ ìlò#ɛ́ dzɔ̀ɔ́. Tsí íbàɖí wíwò fúnɛ gbo, è náa kɔ òŋu gbo dzɔ̀ɔ́. È ɖɛ̃ ilɛ̀, tsí e mú iŋɛ́ nyɛ̀ŋɛ̀ ŋa kpó rì, tsí gba afɔ̀ yèé Ɔ̀ɖáyé gbɛ̃̀ si ńnɔ́-ŋɛ́#ɛ́ òŋu inɔ́ tútù. Afɔ̀ nyɛ̀ŋɛ̀ ní nákó gbà ŋɛ́ là#á.
22Báàyí#ɛ́, bí è wà rɛ̃tígbè-afɔ̀#ɛ́ gé, kò tó. Ó wà ní e wà tse si ńǹtá‐ɛ̀ gbo. Bí kò tsi bɛ́ɛ̀, è wà rú ara-ŋɛ́ ni. 23Ɛnɛ yèé náa wà gbɔ́ afɔ̀#ɛ́ gé, tsí kà múu tsitsɛ́ tse#ɛ́, màa ń sàwé ɔ̀nyà-ìrɔ́ yèé ó dzɛ́#ɛ́ fú ŋɛ́. Ɛnɛ nyɛ̀ŋɛ̀ wà kíbí ɔ̀nyà-kã̀ náa kɛ́ awò, tsí wà ń wo odzú, tsí náa rí ara‐ɛ̀ ńnɛ̀ kíbí ó wà gbà#á. 24Tsí kíbí ó rí ara‐ɛ̀ tã́#á, ó kɛ́ awò si, tsí lɔ, tsí kíbí kò kpɛ̃́ gé#ɛ́, ó gbàgbé kíbí ó rí ara‐ɛ̀ gbà#á. 25Ó ɖi, ɛnɛ yèé náa wà tse si ńǹtá-afɔ̀#ɛ́, òŋu kà wà kíbí ɛnɛ nyɛ̀ŋɛ̀. Òŋu náa wà yɛ afɔ̀-Ɔ̀ɖáyé#ɛ́ wò, tsí náa mú ara‐ɛ̀ bɔwɔ́-Ɔ̀ɖáyé. Kà gbɔ́ afɔ̀-Ɔ̀ɖáyé, tsí gbàgbé‐ɛ̀. Náa wà tse si ńǹtá‐ɛ̀ gé ni. Tsí ayè náa wà tɛ́ɛ ńnɛ̀, iŋɛ́ yèé tse#ɛ́, afɔ̀-Ɔ̀ɖáyé#ɛ́, ó sã̀ dzálɛ̀, tsí ó nɛ́kpá yèé nákó nyáa ń gbà wá dzɔ̀ɔ́ nɔ́wɔ́-àbi dzídzɛ#ɛ́ gbo.
26Bí ɔ̀nyà-kã̀ ɖédzú kíbí à náa sɛ̃ Ɔ̀ɖáyé gbà#á, ni òŋu wà sɛ̃̀ɛ̃́ rere, tsí arũ‐ɛ̀ kà gbé túrúú, ɛnɛ nyɛ̀ŋɛ̀ wà rú ara‐ɛ̀ ni. Tsí itsɛ́ yèé ó wà tse ŋa kpó nɛ́gbɛ́-Kírísítò#ɛ́, kà dzɔ iŋɛ́-kã̀ kpókpó nódzú-Ɔ̀ɖáyé. 27Bí ò wà wo o sɛ̃ Ɔ̀ɖáyé Boba-wa ìɖéǹɖè, iŋɛ́ yèé nàa tse ŋa#á ní: Ó wà ní o wà kpalɛwo okpó ŋa òŋu ɔma-òkú ŋa, tsí kíbí à wà ńǹréré si#ɛ́, nàa mɔ́wɔ́ gbè fú ŋa. Tsí nàa wà tsɔ́ éwo-ara-ɛ̀ɛ, tsí iŋɛ́-ayé ŋa kó máa gbɛ̃ɛ̃́rĩ́ ìlò-ɛ̀ɛ. Bí ò wà sɛ̃ Ɔ̀ɖáyé bɛ́ɛ̀, nàa má kpó nódzú‐ɛ̀.
© (Active), Wycliffe Bible Translators, Inc. All rights reserved.