Kòlósì ŋa 2

1Ó ɖi ɛ̀ŋɛ òŋu, ǹ wà wò ní e rí mà ní ǹ wà dzà gbè fú ɛ̀ŋɛ òŋu ɔma-ɛgbɛ́-Kírísítò yèé ŋa wà ńǹlú-Làwòɖìsé#ɛ́ tó bɛ́ɛ̀. Tsí ɛnɛ yèé ŋa kpó wà nérè bɛ̀, tsí à kò rí mi wòrí, tsí à kò mà mí gbo#ɛ́, ǹ wà dzà gbè fú àŋa gbo. 2Ǹ wà dzà bɛ́ɛ̀, tsí kó ɖáàmí le ŋɛ́, tsí àmúɖɔ̃̀ yèé è nɛ́ fú ara-ŋɛ́ ŋa#á, kó mú ŋɛ́ tse ɔ̀kã̀ntso. Ǹ wà wò gbo ní ifɛ̀ɛ́nɔ́ kó tó ŋɛ́ rere, tsí bɔ̀, tsí e gbɔ́ òkpì-ètò yèé Ɔ̀ɖáyé tse ɖúkù si#ɛ́ gbo. Ètò#ɛ́, Kírísítò ni. 3Nɔ́wɔ́‐ɛ̀ òŋu níìkã̀ gé ní kɔ́kɔ́rɔ́-ilé-ifɛ̀ɛ́nɔ́ ɔ̀kã̀lɔ́ɔ̀kã̀ òŋu iŋɛ́ mímà ɔ̀kã̀lɔ́ɔ̀kã̀ kpó wà#á. 4Ǹ wà fɔ̀ bɛ́ɛ̀, àtsùgbée ɔ̀nyà-kã̀ kó máa wáa ɖɔ̃ arũ fú ŋɛ́, tsí rú ŋɛ́. 5Kíbí ó dzɛ́ gìɖì ní ǹ kò wà bá ŋɛ́ gbo si#ɛ́, ìsérè-mi òŋu kpó kí ńǹtá-ŋɛ́ si. Ayè gbo wà tɛ́ mi, iŋɛ́ yèé tse#ɛ́, ǹ rí ní iŋɛ́ ŋa#á wà lɔ rere nɔ́wɔ́ nɔ́wɔ́ ńɖi-ŋɛ́, tsí àkaralé yèé è nɛ́ si ńǹtá-Kírísítò#ɛ́, è banɛ́‐ɛ̀ si nɔ́wɔ́ méèdzì.

6Ńbɛ̀ɛ́, kíbí ó dzɛ́ ní à tsɛ̀kɔ́ ti nára-Yèésù Kírísítò Ɔlá-wa fú ŋɛ́ ná#á, è gbé náyé#ɛ́ kíbí ɛnɛ yèé ŋa ó tse ɔ̀kã̀ntso bá si#ɛ́. 7Àkaralé-ŋɛ́ kó ta ogùgù múlɛ̀, tsí kó wà ɖonùgbó máa, tsí wà lera gbo máa. Àkaralé-ŋɛ́ kó wà bɛ́ɛ̀ kíbí à tsɛ̀kɔ́#ɛ́ fú ŋɛ́ gbà#á. È náa wà ɖɔ́kpɛ́ gbo fú Ɔ̀ɖáyé títítí.

8Ó ɖi, è tsɔ́ éwo-ara-ŋɛ́ ŋa rere. Ɔ̀nyà-kã̀ kó máa sɔ ŋɛ́ ɖi arú‐ɛ̀ òŋu ifɛ̀ɛ́nɔ́-ɔ̀nyà yèé à wà kɔ́nɛ#ɛ́. Ɛ̀kɔ́-akpotu-kã̀ ní dzɛ́ ɛ̀kɔ́#ɛ́, tsí à náa wà ń rúnɛ gbo. Tsí à kà fɔ afɔ̀-kã̀ náànyì-afɔ̀-ikpá yèé ŋa wà ńǹtalɛ̀ bí#ɛ́. Tsí ɛ̀kɔ́ nyɛ̀ŋɛ̀#ɛ́, bɛ́ɛ̀ ní à ti wà tseé fú ɔ̀nyà ŋa bàa ti títí dzɔ̀ɔ́ dzɔ̀ɔ́, títí ó wáa tó ńǹtá-àŋa gbo#ɛ́. Ɛ̀kɔ́-ìrɔ́ nyɛ̀ŋɛ̀ òŋu ti Kírísítò, à kò fa ɛkpa ɔ̀kã̀ntso gìɖì ɖã́wò. 9Ó ɖi, Ɔ̀ɖáyé òŋu ká‐ɛ̀ kpó, akpá akpá, ɛsɛ̀ ɛsɛ̀, ńnɔ́-Kírísítò ní ó wà#á. 10Tsí kíbí ó tse ɔ̀kã̀ntso bá ŋɛ́ si#ɛ́, àyɛ̀‐ɛ̀ tɔwɔ́-ŋɛ́ dzálɛ̀ kpó. Òŋu ní kpàtà lé ńǹtá-ikpá ɔ̀kã̀lɔ́ɔ̀kã̀ kpó#ɛ́.

11Kíbí ó tse ɔ̀kã̀ntso bá ŋɛ́ si gbo#ɛ́, ó tse iŋɛ́-kã̀ fú ŋɛ́. Iŋɛ́#ɛ́ wà kíbí à náa ɖákó† fúnɛ#ɛ́ bɛ́. Ó ɖi, kò sì dzɛ́ ní ó ɖákó fú ŋɛ́ ìɖéǹɖè ni fòò. Kíbí è yà gbà#á ní ó rɛ́ ǹɖe#ɛ́. Ó rɛ́ɛ, tsí nyàá ǹɖe kpó bérébéré. Bɛ́ɛ̀ ní Kírísítò náa ɖákó fúnɛ#ɛ́ ńnɛ̀ɛ́. 12Tsí ńǹwèrè yèé à wìwɛ̀-Yèésù† fú ŋɛ́ gbo#ɛ́, ó wà kíbí è kú, tsí Ɔ̀ɖáyé rì ŋɛ́ bá Kírísítò bɛ́. Tsí kíbí à kɛ́ ŋɛ́ ǹɖe ɖóro#ɛ́, ó wà kíbí ó dzí ŋɛ́ ti náàŋírĩ-òkú ŋa wá náyé#ɛ́ bá Kírísítò bɛ́. Ó tse bɛ́ɛ̀, iŋɛ́ yèé tse#ɛ́, è nɛ́ àkaralé ní ó nɛ́kpá, tsí dzí Kírísítò ti náàŋírĩ-òkú ŋa wá náyé#ɛ́. 13Dzɔ̀ɔ́ dzɔ̀ɔ́#ɛ́, è kú nóòro si nódzú-Ɔ̀ɖáyé. Iŋɛ́ yèé tse#ɛ́, kíbí è yà gbà#á sɔ́ ŋɛ́, tsi è dzàbi‐ɛ̀. È kè wà náàŋírĩ-ɛnɛ yèé ŋa dzɛ́ ìmɔ̀lɛ̀‐ɛ̀ gbà ńǹtá-okó ɖíɖá†#á. Ó ɖi báàyí#ɛ́, kíbí ó dzɛ́ gìɖì ní è wà bɛ́ɛ̀ gbo#ɛ́, Ɔ̀ɖáyé tse tsí è wà náàyɛ̀ si ró bá Kírísítò, tsí ó mú àbi-wa ŋa gbo, tsí ń tɔrɛ fú wa. 14Kíbí ó mú àbi-wa ŋa, tsí ń tɔrɛ fú wa bɛ́ɛ̀#ɛ́, ó wà kíbí ká fɔ̀ ní ó kɛ́ ìwé yèé à tɔ́ àbi-wa ŋa si ńnɛ̀#ɛ́, ìwé yèé à má kɛ́, tsí ń ɖáàbi fú wá#á, ó wà kíbí ó kɛ́ɛ, tsí yaá, tsí kɛ́ɛ sɔ taánù lɔ bɛ́. Ó tse bɛ́ɛ̀, náàsòkò yèé à kã Kírísítò si ńǹtá-egi-ìɖáàgàlàdzà†, tsí ó kú#ɛ́ ni. Ó ɖi báàyí#ɛ́, à kàkó nyáa lo ìwé#ɛ́, tsí ń ɖáàbi fú wá ró. 15Ɔ̀ɖáyé gbà ńǹtá-ikú-Kírísítò ńǹtá-egi-ìɖáàgàlàdzà, tsí dzàdzàbɔ́-ikpá-íbàɖí yèé ŋa wà ńǹtalɛ̀ bí#ɛ́, tsí ɖánɔ́ mú ŋa náàwùdzɔ, tsí gba ikpá nɔ́wɔ́-ŋa kpó.

16Ńbɛ̀ɛ́, è máa dzɛ́ fú ɔ̀nyà-kã̀ ní kó ɖáàbi fú ŋɛ́ ti nára-iŋɛ́ yèé è náa dzɛ#ɛ́ òŋu ɔtí-ìrɔ́ yèé è náa mɔ#ɛ́. Tsí kíbí è náa dzɛ ɔɖɔ̃́ ŋa gbà, bí òtsùkpá lé#ɛ́ òŋu kíbí è náa tse gbà nɔ́dzɔ́-ìmíra†#á, ká máa ɖáàbi‐ɛ̀ fú ŋɛ́. 17Iŋɛ́ nyɛ̀ŋɛ̀ ŋa kpó#ɛ́, afɛ́fɛ́-iŋɛ́ yèé bàa ŋa#á ni. Ó ɖi, iŋɛ́-òtítɔ́#ɛ́, Kírísítò ni. 18Tsí è máa dzɛ́ gbo ní ɔ̀nyà-kã̀ kó ɖáàbi fú ŋɛ́, iŋɛ́ yèé tse#ɛ́, è kè wà tsìyɛ̀ ní è wà tɛ ara-ŋɛ́ bɔlɛ̀, tsí è kè wà sɛ̃ adzítsɛ́-ɔ̀rɔ̃† ŋa gbo kíbí à wà wò ní ɛ̀ŋɛ má tse#ɛ́. Ɛnɛ nyɛ̀ŋɛ̀ ŋa#á, iŋɛ́ yèé à náa rí nódzú-àlá-ŋa#á, náa kpã́dzú fú ŋa lárè. Ìsérè-ŋa, ìsérè-ɔ̀nyà ni. Tsí ó tse tsí à náa wà kɛ́ ara-ŋa nákpotu bɛ́ɛ̀ gé ni. 19À kò tse ɔ̀kã̀ntso bá Kírísítò si ró. Kírísítò ní dzɛ́ olí-éwo#ɛ́. Tsí kíbí éwo ní náa sɛ̃ ara kpó òŋu ìsìkéké‐ɛ̀ ŋa#á, bɛ́ɛ̀ ké ní Kírísítò gbo náa sɛ̃ ɛnɛ yèé ŋa kpó nɛ́ àkaralé si ńǹtá‐ɛ̀#ɛ́, tsí náa mú ŋa, tsí ń tse ɔ̀kã̀ntso gbo, àtsùgbée àkaralé-ŋa kó wà ɖonùgbó kíbí Ɔ̀ɖáyé wà wòó gbà#á.

È kú bá Kírísítò, tsí dzàdzàbɔ́ gbo báa

20Kíbí è kú bá Kírísítò#ɛ́, ikpá yèé ŋa wà ńǹtalɛ̀ bí#ɛ́ kò nɛ́kpá si ńǹtá-ŋɛ́ ró. Tsí kíbí è mà bɛ́ɛ̀#ɛ́ fe, kí tse tsí è wà lìlò kíbí ɛnɛ yèé ŋa dzɛ́ ti ìtalɛ̀ bí#ɛ́ ná? Kí tse tsí è dzɛ́, tsí ɔ̀nyà ŋa wáa ɖá ɛ̀wɔ̀ ŋa fú ŋɛ́ ní: 21È máa banɛ́ yèé, arũ-ŋɛ́ kó máa kã̀ yèé, ɔwɔ́-ŋɛ́ kó máa kã̀ yèé? 22Ɛ̀wɔ̀ nyɛ̀ŋɛ̀ ŋa kpó#ɛ́, ɔ̀nyà ŋa ní ɖá ŋa wá, tsí wà tsɛ̀kɔ́‐ɛ̀ fúnɛ#ɛ́. Tsí iŋɛ́ ká dzɛ, tsí kó tã́ òŋu iŋɛ́ ká tse, tsí kó tã́ ŋa ní ɛ̀wɔ̀ ŋa#á wà bá fɔ̀#ɛ́. 23Ìɖéǹɖè ni, ɔ̀nyà ŋa náa ɖédzú ifɛ̀ɛ́nɔ́-kã̀ wà ńnɔ́‐ɛ̀wɔ̀ ŋa#á ni, iŋɛ́ yèé tse#ɛ́, ɛ̀wɔ̀ ŋa#á fú ŋa nɔ́ɔ̀nà ní ká sɛ̃ Ɔ̀ɖáyé kíbí ó wù ŋá gbà#á, tsí wà ɖáàmí le ŋá gbo ní ká wà tsìyɛ̀ ní àŋa wà tɛ ara-àŋa bɔlɛ̀, tsí ká wà mú ara-ŋa gbo títí ká dzì ńǹréré. Kíbí ó dzɛ́ gìɖì gbo ní ɔ̀nyà ŋa wà tsèsérè bɛ́ɛ̀#ɛ́, ɛ̀wɔ̀ ŋa#á kò tì nɛ́ ɛ̀fɛ́-kã̀ kpókpó gìɖì ɖã́wò. À náa wà sɔ́ ɔ̀nyà ŋa gé ní ká wà tse iŋɛ́ yèé wà wù ŋá ŋa#á, tsí ara-ŋa kó tù ni.

Currently Selected:

Kòlósì ŋa 2: ngl

Highlight

Copy

Compare