Kòlósì ŋa 1

1-2Èmi, Kpɔ́lù òŋu ìnàbí-wa Tìmɔ̀té, àwa ní wà tse ìwé yèé bɛ́ fú ɛ̀ŋɛ yèé dzɛ́ ti Ɔ̀ɖáyé akpá akpá, ɛsɛ̀ ɛsɛ̀ si, tsí dzɛ́ ti Yèésù† Kírísítò† gbo si, tsí wà ńǹlú-Kòlósì si#ɛ́. È dzɛ́ ìnàbí-wa ŋa, iŋɛ́ yèé tse#ɛ́, è tɔ́ nɛ́ àkaralé si ńǹtá-Kírísítò si ró. Àa dzɔ́ wà kí ɛ̀ŋɛ kpó. Adzítsɛ́-Yèésù† Kírísítò ní ǹ dzɛ́#ɛ́. Iŋɛ́ yèé tse#ɛ́, ó dzɔdzú-Ɔ̀ɖáyé, tsí ó tsã̀ mí ni. Ɔ̀ɖáyé Boba-wa kó tse ore-ɔ̀fɛ́ fú ŋɛ́, tsí kó fú ŋɛ́ ńtútùúrɔ̀ gbo.

Kpɔ́lù wà ɖɔ́kpɛ́ fú Ɔ̀ɖáyé

3Ńǹwèrè kíìwèrè, bí àa wà wúùre fú Ɔ̀ɖáyé Boba-Yèésù Kírísítò Ɔlá-wa fú ŋɛ́, àa náa wà ɖɔ́kpɛ́ fúu fú ŋɛ́. 4Iŋɛ́ yèé tse#ɛ́, àa gbɔ́ ní è nɛ́ àkaralé si ńǹtá-Yèésù Kírísítò si, tsí è nɛ́ àmúɖɔ̃̀ gbo fú ɛnɛ yèé dzɛ́ ti Ɔ̀ɖáyé ŋa#á kpó. 5È wà tse bɛ́ɛ̀, iŋɛ́ yèé tse#ɛ́, è wà ɖóro ɖe iŋɛ́ yèé Ɔ̀ɖáyé kpaɖí si fú ŋɛ́ nɔ́ɔ̀rɔ̃#ɛ́. È gbɔ́ iŋɛ́ nyɛ̀ŋɛ̀ ńǹwèrè yèé à wáa dzíkɔ̀-òtítɔ́, ikɔ̀ ɖíɖɔ̃̀-Yèésù fú ŋɛ́#ɛ́ ni. 6Ikɔ̀ ɖíɖɔ̃̀#ɛ́, à dzɛ́ɛ wérí náàdzàkáyé#ɛ́ kpó, tsí ó tse tsí ɛnɛ yèé nɛ́ àkaralé si ńǹtá-Kírísítò ŋa#á, wà ɖi kpíkpɔ̀ máa, tsí à wà tse ore fúnɛ gbo. Bɛ́ɛ̀#ɛ́ ké ní à dzɛ́ɛ fú ɛ̀ŋɛ gbo#ɛ́. Kíbí è gbɔ́ɔ, tsí è rí mà ní Ɔ̀ɖáyé náa tse ore-ɔ̀fɛ́ fúnɛ ìɖéǹɖè#ɛ́, ó tse tsí ɔ̀nyà kpíkpɔ̀ náàŋírĩ-ŋɛ́ nɛ́ àkaralé si ńǹtá-Kírísítò, tsí è wà tse ore fúnɛ gbo. 7Èkpàfìrásì ní tsɛ̀kɔ́ nyɛ̀ŋɛ̀ fú ŋɛ́#ɛ́. Èkpàfìrásì#ɛ́, àrínódzú-wa ni, tsí ó wà tsitsɛ́-Kírísítò bá wa, tsí náa wà tsitsɛ́-Kírísítò ńɖi-ŋɛ́ gbo òŋu òtítɔ́. 8Kíbí Mímí-Ɔ̀ɖáyé† tse tsí è wà nɛ́ àmúɖɔ̃̀ fú ɛnɛ yèé ŋa dzɛ́ ti Ɔ̀ɖáyé#ɛ́, òŋu ní fɔ̀ɔ́ fú wa#á.

9Kíbí àa gbɔ́ bɛ́ɛ̀#ɛ́, ti nɔ́dzɔ́ nyɛ̀ŋɛ̀#ɛ́, àwa gbo, àa kò mí ìre wúwú fú Ɔ̀ɖáyé fú ŋɛ́. Àa náa wà bèrèé ní Mímí‐ɛ̀ kó fú ŋɛ́ ńfɛ̀ɛ́nɔ́ òŋu ìrã̀ã́mà ɔ̀kã̀lɔ́ɔ̀kã̀ kpó, tsí e ma awù‐ɛ̀ rere dzálɛ̀. 10Ɔ̀ɖáyé kó tse fú ŋɛ́ bɛ́ɛ̀, tsí ìgbèngbé-ŋɛ́ kó wà kíbí ìgbèngbé-ɛnɛ yèé dzɛ́ tɛ̀ɛ̀ ŋa#á. Ìgbèngbé-ŋɛ́ kó wà bɛ́ɛ̀, tsí iŋɛ́-ŋɛ́ kó dzɔdzú‐ɛ̀ nɔ́ɔ̀nà ɔ̀kã̀lɔ́ɔ̀kã̀ kpó, tsí e màá máa, tsí e tse ore ɔ̀kã̀lɔ́ɔ̀kã̀ gbo kpó. 11Ɔ̀ɖáyé kó mú ikpá lákṹ kpàtàkìkì‐ɛ̀ kpó, tsí kó ń ɖáàmí le ŋɛ́ rere, tsí e gbódzú, tsí e fɛ̀ɖɔ̃̀ tù gbo ńnɔ́-iŋɛ́ kpó yèé è wà tse#ɛ́. 12È náa ɖɔ́kpɛ́ fú Ɔ̀ɖáyé Boba-wa òŋu ayè títɛ́. Ó tse tsí è nákó nyáa gba iŋɛ́-ire yèé ŋa ó kpaɖí si nɔ́ɔ̀rɔ̃ si fú ɛnɛ yèé dzɛ́ tɛ̀ɛ̀ ŋa#á.

Kírísítò láre iŋɛ́ ɔ̀kã̀lɔ́ɔ̀kã̀ kpó

13Ɔ̀ɖáyé gbà wá dzɔ̀ɔ́ nɔ́wɔ́-Ètsù† olí-òkùkù, tsí kò nɛ́kpá si ńǹtá-wa ró, tsí ó kɛ́ wa lɔ káà si ńbí Ɔma àrínódzú‐ɛ̀ wà dzoyè#ɛ́. 14Ɔma#á sɛ̃̀ gbà wá rà, tsí Ɔ̀ɖáyé mú àbi-wa ŋa, tsí ń tɔrɛ fú wa. 15Ɔ̀nyà-kã̀ kpókpó kàkó nyáa rí Ɔ̀ɖáyé. Ó ɖi, bí àa rí Ɔma bíbí‐ɛ̀ gé, àa kó mà ní àa wà rí Ɔ̀ɖáyé. Ó láre iŋɛ́ ɔ̀kã̀lɔ́ɔ̀kã̀ kpó yèé Ɔ̀ɖáyé ɖá#á. 16Iŋɛ́ yèé tse#ɛ́, ńǹtá‐ɛ̀ ní Ɔ̀ɖáyé gbà, tsí ɖá iŋɛ́ ɔ̀kã̀lɔ́ɔ̀kã̀ kpó#ɛ́. Iŋɛ́ yèé wà ńǹtalɛ̀ bí, tsí ɔ̀nyà nákó nyáa rí òŋu odzú#ɛ́, iŋɛ́ yèé wà nɔ́ɔ̀rɔ̃, tsí ɔ̀nyà kàkó nyáa rí òŋu odzú#ɛ́, adzítsɛ́-ɔ̀rɔ̃† gbo, ikpá ɔ̀kã̀lɔ́ɔ̀kã̀ kpó yèé wà ńǹgbèrí#ɛ́ gbo, àŋa kpó, ńǹtá‐ɛ̀ ní Ɔ̀ɖáyé gbà, tsí ɖá ŋa#á. Ó tse bɛ́ɛ̀, àtsùgbée ayé#ɛ́ kpó kó rí lílákṹ-Ɔma bíbí‐ɛ̀. 17Ɔma#á ti wà si bɔ̀ fú iŋɛ́ ɔ̀kã̀lɔ́ɔ̀kã̀ kpó. Tsí Ɔ̀ɖáyé gbà ńǹtá‐ɛ̀ gbo, tsí gba iŋɛ́ ɔ̀kã̀lɔ́ɔ̀kã̀ kpó ɖóro ńǹɖì‐ɛ̀ si. 18Kíbí éwo ní dzɛ́ olí-ɔ̀nyà#á, bɛ́ɛ̀ ké ní Kírísítò gbo dzɛ́ olí-éwo fú ɛgbɛ́‐ɛ̀#ɛ́ ńnɛ̀ɛ́. Òŋu ní tsɛ̃̀tsɛ̃̀ rí àyɛ̀ titɔ̃#ɛ́. Ó tsɛ̃̀tsɛ̃̀ dzí ti náàŋírĩ-òkú ŋa wá náyé#ɛ́. Ó tse bɛ́ɛ̀, àtsùgbée kó gba iwádzú ńnɔ́-iŋɛ́ ɔ̀kã̀lɔ́ɔ̀kã̀ kpó. 19Ó dzɔdzú-Ɔ̀ɖáyé ní òŋu ká-òŋu kpó, akpá akpá, ɛsɛ̀ ɛsɛ̀, òŋu kó gbé ńnɔ́-Ɔma bíbí-òŋu. 20Tsí ó dzɔdzú‐ɛ̀ gbo ró ní kó gbà ńǹtá‐ɛ̀, tsí tɔ́tse àŋírĩ-òŋu ká‐ɛ̀ òŋu iŋɛ́ ɔ̀kã̀lɔ́ɔ̀kã̀ kpó. Yèé wà ńǹtalɛ̀ bí gbo, yèé wà ńǹgbèrí gbo, àŋa kpó, ńǹtá‐ɛ̀ ní ó gbà, tsí tɔ́tse àŋírĩ-òŋu ká‐ɛ̀ òŋu ŋa méèdzì#ɛ́. Ɔma‐ɛ̀ kú si ńǹtá-egi-ìɖáàgàlàdzà†, tsí àmbara‐ɛ̀ ɖà ńlɛ̀, tsí ó tse tsí ìdzà kò wà náàŋírĩ-Ɔ̀ɖáyé òŋu iŋɛ́-kã̀ kpókpó ró. À wà ɖɔ̃̀ ńǹkɛ̀ɛ́.

21Tsí ɛ̀ŋɛ gbo fe, dzɔ̀ɔ́ dzɔ̀ɔ́#ɛ́, è náa wà tse ìsérè-íbàɖí ŋa, tsí è náa wà lìlò-íbàɖí ŋa gbo. Iŋɛ́ nyɛ̀ŋɛ̀ ŋa kpó wà nyà ɖíre ní è dzɛ́ ɔ̀tɛ̀-Ɔ̀ɖáyé, tsí ńnɔ́-ayé-ŋɛ́ kpó#ɛ́, ó wà kíbí è wà ńǹɖì dzídzɛ̃̀ sã́ŋú sã́ŋú si fúu bɛ́. 22Ó ɖi báàyí#ɛ́, Ɔma bíbí‐ɛ̀ wá nɔ́ɔ̀nyà ńǹtalɛ̀ bí, tsí kú. Tsí gbà ńǹtá-ikú‐ɛ̀#ɛ́, Ɔ̀ɖáyé tɔ́tse àŋírĩ-ɛ̀ŋɛ‐ɛ̀ méèdzì. Ó tse bɛ́ɛ̀, àtsùgbée nɔ́dzɔ́ yèé à nákó gbɛ̃́ ŋɛ́ lɔ káà ɖóro nódzú‐ɛ̀#ɛ́, àbi-ŋɛ́ ŋa kó máa bɔ̀ si ró, tsí inɔ́-ŋɛ́ ŋa gbo kó má kpó, tsí ká má bá ŋɛ́ fɔ̀ gbo. 23Ó ɖi, ó wà ní e nɛ́ àkaralé si ńǹtá‐ɛ̀ si làkóò, tsí àkaralé-ŋɛ́ kó máa tì mì dzígí gìɖì. Kíbí à wáa dzíkɔ̀ ɖíɖɔ̃̀-Yèésù Kírísítò fú ŋɛ́#ɛ́, iŋɛ́ yèé è gbɔ́#ɛ́, ó wà ní e módzú si nɔ́ɔ̀nà si fú òŋu gbo làkóò làkóò. Ikɔ̀ ɖíɖɔ̃̀ yèé bɛ́#ɛ́, à dzɛ́ɛ fú ɔ̀nyà kpó ńǹtalɛ̀#ɛ́. Tsí èmi, Kpɔ́lù, èmi gbo, ǹ wáa ɖi ɛnɛ yèé wà dzíkɔ̀ ɖíɖɔ̃̀#ɛ́ fú ɔ̀nyà ŋa#á.

Ɔ̀ɖáyé ɖá itsɛ́ fú Kpɔ́lù ní kó tse fú ɔma-ɛgbɛ́-Kírísítò ŋa

24Báàyí#ɛ́, ayè wà tɛ́ mi ní ǹ wà réré náàtsùgbé-ŋɛ́. Ìɖéǹɖè#ɛ́, ǹ wà réré bá Kírísítò náàtsùgbé-ɛgbɛ́‐ɛ̀. Ɛgbɛ́‐ɛ̀#ɛ́, ó wà fúu kíbí ara tòŋu ká‐ɛ̀ bɛ́. Tsí ìréré-mi ŋa kpa kɔ̃́ ìréré yèé bɔ̀ si ŋa#á, tsí ká tó si ńǹɖì‐ɛ̀. 25Ɔ̀ɖáyé tsã̀ mí ní èmi kó tsitsɛ́, àtsùgbé-ɛnɛ yèé nɛ́ àkaralé si ńǹtá-Kírísítò ŋa#á. Itsɛ́ yèé ó ɖá bɔwɔ́-mi#ɛ́ ní dzɛ́ ní èmi kó dzíkɔ̀-òŋu rere dzálɛ̀ fú ŋɛ́#ɛ́. 26Ikɔ̀#ɛ́ dzɛ́ ètò-kã̀ yèé ó tse si#ɛ́. Tsí ètò#ɛ́, ó ɖúkùú ti títí ńǹkpìnkpìlɛ̀-iŋɛ́ ŋa#á kpó ni. Ɔ̀nyà-kã̀ kpókpó kò màá wòrí. Ó ɖi báàyí#ɛ́, ó ɖíreé kpó fú ɛnɛ yèé dzɛ́ tɛ̀ɛ̀ ŋa#á. 27Ó wò ní òŋu kó ɖíre òkpì-ètò yèé òŋu ń ɖúkù si#ɛ́ fú ŋa ni. Òkpì-ètò#ɛ́ ní dzɛ́ ní Ɔ̀ɖáyé nákó tse iŋɛ́ lákṹ kpàtàkìì-kã̀ fú ɛnɛ yèé kò dzɛ́ ɔma-Ìyúɖà ŋa#á, tsí nákó mu ɔ̀nyà kpó. Ó ɖi, ètò#ɛ́ òŋu ká‐ɛ̀ ní dzɛ́ ní Kírísítò wɔlé dzokó ńnɔ́-ŋɛ́, tsí ó tse tsí è karalé si ní iyì-Ɔ̀ɖáyé#ɛ́ nákó dzɛ́ tɛ̀ŋɛ gbo. 28Ikɔ̀-Kírísítò#ɛ́ ní àwa òŋu, àa wà dzɛ́ fú ɔ̀nyà ɔ̀kã̀lɔ́ɔ̀kã̀ kpó#ɛ́. Àa náa wà fɔ̀ fú ɔ̀nyà kpó ní ká tsɔ́ éwo-ara ŋa rere, tsí àa náa wà tsɛ̀kɔ́ gbo òŋu ifɛ̀ɛ́nɔ́ ɔ̀kã̀lɔ́ɔ̀kã̀ kpó fú ɔ̀nyà kpó. Àa wà tse bɛ́ɛ̀, àtsùgbée nɔ́dzɔ́ yèé à nákó gbɛ̃́ ɔ̀nyà ŋa lɔ káà ɖóro nódzú-Ɔ̀ɖáyé#ɛ́, Kírísítò kó tse ɔ̀kã̀ntso bá ɔ̀nyà kpó si, tsí àkaralé-ŋa gbo kó ti ɖonùgbó si. 29Náàtsùgbée bɛ́ɛ̀#ɛ́, ǹ wà ńtsɛ́ si kũkũ. Kírísítò fú mi náàmí, tsí àmí#ɛ́ náa wà tsitsɛ́ nára-mi òŋu ikpá, tsí mà nyáa ɖìgírí, tsí wà tsitsɛ́.

Currently Selected:

Kòlósì ŋa 1: ngl

Highlight

Copy

Compare