1 Tìmɔ̀té 6

1Bí olí-Yèésù-kã̀ wà, tsí ó tɔ́ dzɛ́ arú si ró, ó wà ní kó wà nɛ́ àrísá fú olówó‐ɛ̀ ńŋɛ́ ɔ̀kã̀lɔ́ɔ̀kã̀ kpó. Bí kò wà nɛ́ àrísá fú olówó‐ɛ̀#ɛ́, ɔ̀nyà ŋa nákó wà gbɛ̃ɛ̃́rĩ́ ɛ́kɔ-Ɔ̀ɖáyé, tsí wà gbɛ̃ɛ̃́rĩ́ ɛ̀kɔ́ yèé àa wà tse fúnɛ gbo#ɛ́. 2Tsí bí arú-kã̀ wà, tsí olówó‐ɛ̀ dzɛ́ olí-Yèésù, kó máa rí ní àŋa dzɛ́ ìnàbí ńYèésù gbígbàgbɔ́ gé, tsí kó wà módzú ɖií. Kà kàa bɛ́ɛ̀, ó wà ní kó wà tsitsɛ́ fúu rere lárè, iŋɛ́ yèé tse#ɛ́, ɛnɛ yèé ó wà tsitsɛ́ fú#ɛ́, olí-Yèésù ni, tsí òŋu ká‐ɛ̀ nɛ́ àmúɖɔ̃̀ fúu.

Kpɔ́lù wà wíìnyɛ̀-èrè-òtítɔ́

Iŋɛ́ yèé wà ní o tsɛ̀kɔ́‐ɛ̀ fú ŋa, tsí ɖáàmí le ŋá ní ká tse#ɛ́, òŋu ní dzɛ́ ní: 3Bí ɔ̀nyà-kã̀ wà, tsí wà tsɛ̀kɔ́-òmírɛ̃̀ fú ɔ̀nyà ŋa, tsí kò dzɛ́ ní òŋu kó kɔ́ ŋa náfɔ̀-ire ti Yèésù Kírísítò Ɔlá-wa#á, tsí kò dzɛ́ gbo ní òŋu kó kɔ́ ŋa kíbí ká gbé gbà, tsí ká dzɔdzú-Ɔ̀ɖáyé#ɛ́, 4bí ɔ̀nyà-kã̀ wà tse bɛ́ɛ̀#ɛ́, náa wà kɛ́ ara‐ɛ̀ gbegbé, tsí kà ma iŋɛ́-kã̀ kpókpó gbo ró. Ɛnɛ nyɛ̀ŋɛ̀ ti ɖi àkɔ̃̀rɔ̃̀ si ńǹsérè. Náa wò ní òŋu kó wà rã́ã̀rã̀ gé, tsí wà tã afɔ̀ ŋa wò, tsí wà tse àrã́dzìnyà gbo. Ìgbèngbé-ɛnɛ nyɛ̀ŋɛ̀ ŋa#á náa fa owú dzídzɛ òŋu àfàdzà wá náàŋírĩ-ɔma-ɛgbɛ́-Kírísítò ŋa. À náa wà fìfɔ̀ kíìfɔ̀ nára-ara-ŋa. Tsí à náa módzú si ńǹtá-enìkéèdzì-ŋà ŋa ní àŋa ní tse iŋɛ́ yèé kò sã̀#á. 5Tsí kíbí ó dzɛ́ ní ìsérè-ŋa kú kpó, tsí à kò ma òtítɔ́ ró#ɛ́, à náa wà dzìnyà làkóò náàrìmáa mí gé ni. Tsí à náa ɖédzú Ɔ̀ɖáyé sísɛ̃̀ dzɛ́ iŋɛ́-èrè wíwò-kã̀, tsí àŋa kó ń ɖi olówó ni.

6Ìɖéǹɖè#ɛ́, bí ò dzɛ́ olí-Yèésù, tsí iŋɛ́ yèé wà nɔ́wɔ́‐ɛ̀ɛ ti tóɛ, tsí ɖɔ̃̀ fɛ́ɛ gbo#ɛ́, èrè lákṹ-kã̀ wà ńnɛ̀ fɛ́ɛ. 7Àa wá náyé#ɛ́ nɔ́wɔ́ nákpo, tsí àa nákó sɛ̃̀ lɔ gbo nɔ́wɔ́ nákpo ké. 8Ńbɛ̀ɛ́, bí dzídzɛ òŋu ìwɔ̀ra ŋa wà nɔ́wɔ́-wa#á, kó tó wa, tsí kó ɖɔ̃̀ fú wa gbo.

9Ɛnɛ yèé ŋa náa wò ní àŋa kó ɖi olówó#ɛ́, Ètsù† náa sɔ fɛ́tsa fú ŋa, tsí à náa dzì ńnɛ̀. Gbà ńǹtá-awù-iŋɛ́ kpíkpɔ̀ ní ó ɖã́ ŋa wò, tsí à kà tsèsérè tã́ná, tsí à náa tɛ̀ náànyì-iŋɛ́ bíbàdzɛ́ ŋa#á. Tsí awù#ɛ́ náa fà ŋá káà dzì nɛ́ɛ̀rá, tsí à náa tsɛ̀rá kpó bútúbútú. 10Ìɖéǹɖè#ɛ́, odzú gúgù si ńǹtá-owó ní dzɛ́ ogùgù-iŋɛ́-íbàɖí ɔ̀kã̀lɔ́ɔ̀kã̀#á. Odzú-ɔ̀nyà kã̀ŋa gù si ńǹtá-owó, tsí à kɔ ɔ̀nà sísɛ̃́#ɛ́ dzɔ̀ɔ́, tsí à kò gba Yèésù gbɔ́ ró. Tsí ìréré-ŋa ɖi agúgú, tsí wà gú oŋù-ɛ̀ɖɔ̃̀-ŋa.

Tìmɔ̀té kó tse si ńǹtá-ɛ̀kɔ́-Kpɔ́lù ŋa kpó

11Ó ɖi ìwɔ òŋu, ò dzɛ́ ti Ɔ̀ɖáyé. Ńbɛ̀ɛ́, nà sá fú iŋɛ́ nyɛ̀ŋɛ̀ ŋa kpó. Nà múgírí, tsí o tse òtítɔ́, tsí o wà tse iŋɛ́ yèé náa dzɔdzú-Ɔ̀ɖáyé#ɛ́. Nà múgírí, tsí o nɛ́ àkaralé si ńǹtá-Yèésù, tsí o nɛ́ àmúɖɔ̃̀ fúnɛ, tsí o gbódzú ńŋɛ́ ɔ̀kã̀lɔ́ɔ̀kã̀, tsí o dzɛ́ ɔ̀nyà tútù-kã̀ fú ara-ɛ̀ɛ gbo gé. 12Kíbí ɔmɔ̀tsɔ́ ŋa náa ɖìgírí si kũkũ, tsí wà ɖugbã̀-ara-ŋa, tsí ká làdzɔ̀ɔ́ fú ara-ŋa#á, ìwɔ gbo nà ɖìgírí bɛ́ɛ̀, tsí o gba Yèésù gbɔ́, tsí o rí àyɛ̀-àrìtã́. Àyɛ̀-àrìtã́#á, Ɔ̀ɖáyé tsã̀ɛ́ ní kó tɔwɔ́-ɛ̀ɛ ni. Ńnɛ̀ ní ò ǹɖe ɖóro nódzú-ɔ̀nyà kpó, tsí wí òtítɔ́ ti nára-Yèésù#ɛ́.

13Ɔ̀ɖáyé, òŋu ní náa fú iŋɛ́ ɔ̀kã̀lɔ́ɔ̀kã̀ kpó náàyɛ̀#ɛ́, tsí Yèésù Kírísítò gbo, òŋu ní ɖóro nódzú-Kpɔ̃̀tíyù Kpìlátò†, tsí wí òtítɔ́#ɛ́. Nódzú-Ɔ̀ɖáyé òŋu Yèésù#ɛ́, ǹ wà wí fɛ́ɛ ní 14afɔ̀ yèé ǹ fɔ̀ fɛ́ɛ ŋa kpó#ɛ́, o tse si ńǹtá-ŋa. Nà wà tse si ńǹtá-ŋa làkóò náàrìmáa gbɛ̃ɛ̃́rĩ́ ìlò-ɛ̀ɛ, tsí ɔ̀nyà-kã̀ kpókpó kó máa nyáa dzìnyàɛ́. Nà wà rɛ̃̀ bɛ́ɛ̀ títí fú àsòkò yèé Yèésù Kírísítò Ɔlá-wa nákó wá nódzú-ɔ̀nyà kpó#ɛ́. 15Náàsòkò yèé nákó dzì ńǹɖì‐ɛ̀ tútútú#ɛ́, ní Ɔ̀ɖáyé nákó wí, tsí Yèésù nákó wá#á. Ɔ̀ɖáyé òŋu níìkã̀ntso ní dzɛ́ Olíkpá, tsí dzɛ́ olí-kùsɛ̀ɛ̀ ɔ̀kã̀lɔ́ɔ̀kã̀, tsí dzɛ́ ólú yèé kpeéwo fú ólú ŋa gbo kpó#ɛ́. 16Òŋu níìkã̀ntso ní kà kú láyé#ɛ́. Ó wà ńmímá si. Mímá#á, ɔ̀nyà-kã̀ kpókpó kàkó nyáa sɔ́má‐ɛ̀. Òŋu ní ɔ̀nyà-kã̀ kpókpó kò rí wòrí, tsí ɔ̀nyà-kã̀ kpókpó gìɖì gbo kàkó nyáa rí#ɛ́. Ǹ wà wúùre ní ɔ̀nyà kpó kó sɛ̃̀ɛ̃́. Ikpá-oyè dzídzɛ kó dzɛ́ tɛ̀ɛ̀ títí lɔ náàrìtã́. Ɛ̀tsɛ.

17Báàyí#ɛ́, ɛnɛ yèé ŋa dzɛ́ olówó, tsí wà náyé#ɛ́ si bí#ɛ́, nà fɔ̀ fú ŋa ní ká máa wà rí ara-ŋa, tsí wà mí kã owó rírí-ŋa. Àkaralé kò wà ńnɛ̀. Ó ɖi, ká wà mí kã Ɔ̀ɖáyé. Òŋu ní náa fú wa ńŋɛ́ kpó, tsí náa tsɔ̀ wá kũ̀ si bùràà, àtsùgbée àa kó wà ń táyè#ɛ́. 18Tsí nà wí fú ŋa ró ní ká wà tse ore fúnɛ. Tsí kíbí à rí owó tó#ɛ́, ore tsítse gbo kó kpɔ̀ fú ŋa bɛ́ɛ̀. Ká wà fúnɛ ńŋɛ́ òŋu ɛ̀ɖɔ̃̀ tútù, tsí ká dzɛ́, tsí wà kpɛ̃́ iŋɛ́ bá ɛnɛ-àtíbɔ̀ ŋa gbo. 19Bí à wà tse bɛ́ɛ̀#ɛ́, ó wà kíbí à wà tsùkólóbo si fú ànyìwà-ɔ̀la bɛ́ ni. Tsí à nákó rí àyɛ̀ yèé dzɛ́ àyɛ̀-òtítɔ́#ɛ́.

20Tìmɔ̀té-mi, afɔ̀ yèé à ń bɔwɔ́-ɛ̀ɛ#ɛ́, nà tsákìí banɛ́ rere. Ɔ̀nyà kã̀ŋa wà, tsí à náa wà wíìnyɛ̀-ayé yèé, tsí afɔ̀ ŋa#á náa dzɛ́ afɔ̀-akpotu gé ni. Nà yɛ̀fɛ́ fú ɛnɛ nyɛ̀ŋɛ̀ ŋa. Ɔ̀nyà kã̀ŋa gbo wà, tsí à náa wà rí ara-ŋa ní àŋa ma iŋɛ́ ti nára-Ɔ̀ɖáyé, tã́ná kò sì dzɛ́ bɛ́ɛ̀. Nà yɛ̀fɛ́ fú àŋa gbo. 21Ɔ̀nyà kã̀ŋa tɛ̀ náànyì-iŋɛ́ mímà nyɛ̀ŋɛ̀#ɛ́, tsí à kɔ ɔ̀nà sísɛ̃́#ɛ́ dzɔ̀ɔ́, tsí à kò wà tɛ̀ náànyì-Yèésù ró.

Ɔ̀ɖáyé kó tse ore-ɔ̀fɛ́ fú ŋɛ́.

Currently Selected:

1 Tìmɔ̀té 6: ngl

Highlight

Copy

Compare