1 Tìmɔ̀té 5

Kpɔ́lù wà fɔ̀ kíbí Tìmɔ̀té nákó gbé bá ɔ̀nyà ŋa ńǹrɔ́ǹrɔ́ nɛ́gbɛ́-Kírísítò#ɛ́ gbà#á

1Fee, bí arúkà-kã̀ tse iŋɛ́-kã̀, tsí kò sã̀, máa mú oŋù líle wíìnyɛ̀ fúu. Nà wíìnyɛ̀ fúu kíbí boba-ɛ̀ɛ bɛ́. Tsí nà rí ɔmɔ̀tsɔ́ ŋa gbo kíbí ɔmànà-ɛ̀ɛ ɔnɔkɛ̃̀ɛ̃ ŋa bɛ́. 2Ɔnɔbɛ̃̀ɛ̃ yèé ɖonùgbó ŋa#á gbo, nà wà tse fú àŋa gbo kíbí à dzɛ́ ìnà-ɛ̀ɛ ŋa bɛ́. Tsí èkíɖã ŋa gbo#ɛ́, nà rí àŋa gbo kíbí ɔmànà-ɛ̀ɛ ɔnɔbɛ̃̀ɛ̃ ŋa bɛ́. Ó ɖi, máa wà nɛ́ ìsérè gbígbɛ̃ɛ̃́rĩ́ gìɖì nára-ŋa.

3Okpó yèé ŋa wà, tsí à kò nɛ́ ɔ̀nyà-kã̀ kpókpó#ɛ́, nà mɔ́wɔ́ gbè fú ŋa, tsí o nɛ́ àrísá fú ŋa. 4Ó ɖi, bí okpó-kã̀ wà, tsí ó nɛ́ ɔma nàmí ɔmalɔ́ma#á, ó wà ní ɛnɛ nyɛ̀ŋɛ̀ kó banɛ́‐ɛ̀. Ó wà ní ká ma kíbí à nákó wà tse iŋɛ́ yèé wo odzú-ŋa#á fú aro-ŋà ŋa tã́ná, tsí iŋɛ́ yèé boba-ŋà ŋa òŋu gbágbó-ŋà ŋa tse fú ŋa wáa lɔ#ɛ́, ká sãã́ fú ŋa. Bí à wà tse bɛ́ɛ̀#ɛ́, náa dzɔdzú-Ɔ̀ɖáyé héŋú.

5Bí okpó-kã̀ wà, tsí kò nɛ́ ɔ̀nyà-kã̀ kpókpó, tsí kó mɔ́wɔ́ gbè fúu, náa módzú si nɔ́ɔ̀nà si fú Ɔ̀ɖáyé gé ni. Tsí òsã́-kã̀, òru-kã̀#á, náa wà wúùre fúu, tsí wà bèrèé ní kó mɔ́wɔ́ gbè fú òŋu. 6Tsí bí okpó-kã̀ wà, tsí ó kɛ́ ara‐ɛ̀ si náyé dzídzɛ gé#ɛ́, okpó nyɛ̀ŋɛ̀ òŋu ti kú si nóòro si ni. 7Iŋɛ́ nyɛ̀ŋɛ̀ ŋa#á, ó wà ní o fɔ̀ɔ́ fú okpó ŋa, tsí ɔ̀nyà-kã̀ kpókpó kó máa nyáa dzinya ìgbèngbé-ŋa. 8Bí okpó-kã̀ wà náro-ɔ̀nyà-kã̀, tsí ɛnɛ nyɛ̀ŋɛ̀ kò wà banɛ́‐ɛ̀ rere#ɛ́, tsí yèé yɔ#ɛ́, bí ó dzɛ́ ní okpó#ɛ́ dzɛ́ ɔ̀nyà-aro tòŋu ká‐ɛ̀#ɛ́, ɛnɛ nyɛ̀ŋɛ̀ kó mà ní òŋu kɔ Yèésù ńnɛ̀ɛ́. Tsí kó yée gbo ní asɛ̃ŋɛ gìɖì wà tse ore láre òŋu.

9Ó ɖi, bí à bòkó kɔ ɛ́kɔ-okpó ŋa nɛ́kpa nɛ́kpa si ńǹwé, okpó yèé ɔɖɔ̃́‐ɛ̀ láre ɔgɔ́ɔta#á ní ó wà ní ká kɔ#ɛ́. Tsí kó dzɛ́ ɛnɛ yèé nɔ́kɔ ɔ̀kã̀ntso wòrí gbo gé#ɛ́. 10Tsí ɔ̀nyà ŋa gbo kó màá ní náa tse ore fúnɛ. Tsí kó dzɛ́ ɛnɛ yèé sɛ̃ ɔma rere gbo wáa lɔ#ɛ́, tsí náa gba àledzò gbo rere, tsí náa tsitsɛ́-arú fú ɛnɛ yèé ŋa dzɛ́ ti Ɔ̀ɖáyé#ɛ́ gbo. Ɛnɛ nyɛ̀ŋɛ̀ kó dzɛ́ ɛnɛ yèé bɛ́ bí ɔ̀nyà-kã̀ wà ńǹréré si, ni náa mɔ́wɔ́ gbè fúu#ɛ́. Tsí náa wà tse ore ɔ̀kã̀lɔ́ɔ̀kã̀ kpó.

11Ó ɖi, bí okpó kã̀ŋa wà, tsí à wà néèkíɖã si ró#ɛ́, máa kɔ ɛ́kɔ-ŋa si ńǹwé#ɛ́, iŋɛ́ yèé tse#ɛ́, bí awù tàŋa ká-ŋa kpã́dzú fú ŋa lárè, tsí à kò wà nɔ́wɔ́ nɔ́wɔ́ si fú Kírísítò ró#ɛ́, à náa wò ní àŋa kó sɛ̃̀ nɔ́kɔ. 12Tsí ɔ̀nyà ŋa náa kpɛdzɔ́ mú ŋa ní ɔ̀kã̀ntso tsítse yèé wà náàŋírĩ-àŋa Kírísítò méèdzì dzɔ̀ɔ́ dzɔ̀ɔ́#ɛ́, à kɔ̀ɔ́ dzɔ̀ɔ́, tsí wà tse òmírɛ̃̀. 13Èkéèdzì‐ɛ̀ ró#ɛ́, à náa ɖi ɔ̀gɛ̃, tsí à náa wà lɔ ńkpàtá-ɔ̀nyà ŋa wérí gé ni. Tsí yèé lárè gìɖì#ɛ́ ní dzɛ́ ní, afɔ̀ yèé kò nóòkpì ŋa#á ní à náa wà fɔ̀#ɛ́, tsí à náa wà tarũ bɔ̀ náfɔ̀-olí-afɔ̀ ŋa gé ni. Tsí iŋɛ́ yèé kò dzɔ ní ká fɔ̀ ŋá gbo#ɛ́ ní à náa wà fɔ̀#ɛ́.

14Àtsùgbée bɛ́ɛ̀#ɛ́, èmi ǹ wò ní bí okpó-kã̀ wà néèkíɖã si ró#ɛ́, kó sɛ̃̀ nɔ́kɔ, tsí kó bíma, tsí kó wà banɛ́ kpàtá‐ɛ̀ rere. Ńbɛ̀ɛ́, ɔ̀tɛ̀-wa-kã̀ kpókpó kàkó nyáa rí ɔ̀nà, tsí kó bú wa. 15Ìɖéǹɖè#ɛ́, okpó kã̀ŋa ti kɔ ɔ̀nà sísɛ̃́#ɛ́ dzɔ̀ɔ́, tsí wà tɛ̀ náànyì-Ètsù†. 16Ó ɖi, bí olí-Yèésù ɔnɔbɛ̃̀ɛ̃-kã̀ wà, tsí okpó-kã̀ wà náro‐ɛ̀#ɛ́, ó wà ní kó wà banɛ́ okpó#ɛ́ rere, tsí kó máa dzɛ́ arù fú ɛgbɛ́-Kírísítò#ɛ́. Ńbɛ̀ɛ́, ɛgbɛ́-Kírísítò#ɛ́ nákó nyáa mɔ́wɔ́ gbè fú okpó yèé ŋa wà, tsí à kò nɛ́ ɔ̀nyà-kã̀ kpókpó, tsí kó banɛ́-ŋa#á.

17Tsí onùgbó-ɛgbɛ́-Kírísítò ŋa òŋu#ɛ́, bí ɔ̀nyà kã̀ŋa wà náàŋírĩ-ŋa, tsí à wà gbɛ̃́ ɛgbɛ́#ɛ́ rere, tsí yèé kpã́dzú lárè#ɛ́, bí à wà fɔ afɔ̀-Ɔ̀ɖáyé fú ɔ̀nyà ŋa, tsí wà tsɛ̀kɔ́ fú ŋa gbo#ɛ́, o dzɔ ní ɔma-ɛgbɛ́#ɛ́ ŋa ká wà nɛ́ àrísá fú ŋa, tsí ká fú ŋa ńŋɛ́ yèé à nákó wà dzɛ#ɛ́ gbo. 18Ńnɛ̀ ní à kɔ si ńǸwé-Ɔ̀ɖáyé† ní: “Bí lalá wà tsitsɛ́ fɛ́ɛ, máa mú okù ɖi arũ‐ɛ̀#ɛ́.”#5:18a Ìwé-Àkóro 25:4 (Deutéronome 25:4), Ìwé 1 Kòríntì ŋa 9:9 Tsí à kɔ si ró ní: “Bí ɔ̀nyà-kã̀ tsitsɛ́ fɛ́ɛ, kó gba owó‐ɛ̀.”#5:18b Ìwé-Màtéwò 10:10, Ìwé-Lúkà 10:7

19Bí ɔ̀nyà-kã̀ wáa sɛ́rí onùgbó-ɛgbɛ́-kã̀ fɛ́ɛ, máa gbà si ńǹtá‐ɛ̀ gbòkã́. Nà dzɔ̀ɔ́, tsí ɔ̀nyà méèdzì mɛ́ɛta ká nyà si nódzú fúu tã́ná. 20Tsí bí ó dzɛ́ ní onùgbó-ɛgbɛ́#ɛ́ dzàbi ìɖéǹɖè#ɛ́, nà gbɛ̃́ɛ̃ lɔ náàwùdzɔ nódzú-ɛgbɛ́#ɛ́ kpó, tsí nà wí iŋɛ́ yèé ó tse#ɛ́ fú ŋa, tsí ɛnɛ yèé bɔ̀ ŋa#á gbo ká rí si.

21Nódzú-Ɔ̀ɖáyé òŋu nódzú-Yèésù Kírísítò má nára-adzítsɛ́-ɔ̀rɔ̃† ŋa gbo, ǹ wà wí fɛ́ɛ, tsí wà le oŋù si ńnɛ̀ ní o tse si ńǹtá-ɛ̀kɔ́ ŋa#á kpó. Máa wà gbè fú ɔ̀nyà-kã̀ kpókpó. Nà wà tse iŋɛ́ ŋa#á kpó ɖíɖé ɖíɖé.

22Tã́ná o mɔ́wɔ́ lé ńǹtá-ɔ̀nyà-kã̀, tsí kó tsitsɛ́-Ɔ̀ɖáyé#ɛ́, nà tsèsérè rere. Máa tara. Tsí bí ɔ̀nyà-kã̀ wà dzàbi, máa dzɛ́, tsí kó fàɛ́ si ńnɛ̀. Nà dzɛ́ ɔ̀nyà mímá si gé.

23Máa wà mɔ omi sɔ̃́ŋú ró. Kíbí ó dzɛ́ ní inɔ́ náa ɖɔ́kpɔ fɛ́ɛ, tsí nà tsàkɔ̃̀rɔ̃̀ kpeékpeé gbo#ɛ́, nà wà mɔtí oɖé oɖé.

24Adzàbi kã̀ŋa, tã́ná ká tó ńɖi-àkpɛ̀dzɔ́#ɛ́, àbi#ɛ́ náa ti tsúwádzú fú ŋa, tsí ɔ̀nyà kpó náa ríi. Ó ɖi, àbi ti ɔ̀nyà ìkùbɔ̀ ŋa#á, náànyìwà ní à náa wáa ríi#ɛ́. 25Bɛ́ɛ̀ ké ní ore yèé ɔ̀nyà náa tse fúnɛ gbo#ɛ́, ɔ̀nyà kpó náa ríi#ɛ́. Bí ore tsítse-kã̀ wà ńǹɖúkù gìɖì si báàyí#ɛ́, ìwèrè-kã̀ nákó wáa wá, tsí ɔ̀nyà kpó nákó ríi gé ni.

Currently Selected:

1 Tìmɔ̀té 5: ngl

Highlight

Copy

Compare