Loma 1
1
1Kalata kufuma kuli Paulo, muomvi wakwe Klistu Yesu, mutumwa uwasolwa nu kwamwa na Leza ku kukosola Ilandwe Lisuma.
2Ilandwe Lisuma lyalavilwe mpiti na Leza kupitila muli vino yakasema yalemba mu Malembelo Amuzilo. 3Lyene ilya pali Yesu Klistu Mwene witu, Mwana wakwe Leza! Muli u muntu wakwe, wene wavilwe mu mupanda wakwe Davidi. 4Lelo muli umuzilo wakwe wa uleza wene wasininkiziwe pa kuzyukuka kufuma ku afwe ukuti wene Mwana wakwe Leza. 5Kupitila muli Klistu amuno Leza wampeela isyuko lyakuya mutumwa pakuti ntungulule antu amu nko zyonsi kuti yataile nu kuyela Leza na kuti Klistu acindikwe. 6Namwe kwene mwe ina Loma, Leza wamwama kuti muye antu yakwe Yesu Klistu.
7Caleka nalemba kalata kuli mwemwe mwensi mwe yakundwe yakwe Leza amu Loma, mwe muno mwaamwa kuti namwe kwene muye antu yakwe amuzilo. Leza Tata nu Mwene witu Yesu Klistu amupeele cikuku nu mutende.
Paulo wapepa nu kulondesya kulola aina Klistu aku Loma
8Pa kutandika, nkutaizya Leza wane muli Yesu Klistu pali mwemwe mwensi, pano utailo winu uvwika ku antu amu nsi yonsi. 9Leza ali kambone wane, wino nkatumikila nu mwenzo wane onsi pa kukosola Ilandwe Lisuma lya Mwana wakwe. Leza amanyile vino nkamutaka manda onsi mu mapepo yane. 10Nkapapata mu mapepo kuti Leza ndi akulonda, aleke kuti ince nize mupempule. 11Pano nkulondesya kumulola kuti tukize tukankane wila wakwe Mupasi Wamuzilo uno napokelela pakuti mukomeleke. 12Ntwazile mukuti utailo uno mukweti wakomya utailo wane, nane utailo uno nakwata wakomya utailo winu.
13 #
Mil 19:21
Mwe inane nkasi mumanye vino insita zingi nkapanga ukwiza mupempula. Lelo kuli cikandesya. Nkalonda kwiza zombola vizao vya ku Mupasi muli mwemwe wakwe vino nacita mu Akulukuwa yauze. 14Pano nemo indi nu mulimo wa kutumikila umuntu ali wensi, musambilile nu mututu, uwa mano na mbulwa mano kwene. 15Caleka nkalondesya kukosola Ilandwe Lisuma na kuli mwemwe mwe muno mwikala mu Loma.
Maka yi Landwe Lisuma
16 #
Mk 8:38
Pano nsi na nsonyi zya pi Landwe Lisuma, pano ali maka yakwe Leza akutuula wino wensi wataila, nkolelo ku Ayuda, nga nu ku Akulukuwa. 17#Hab 2:4 Pano Ilandwe Lisuma likasokolola vino Leza akapindulula umuntu kuti aye mololoke, apa kukwata utailo kufuma ku kutandika kufika nu ku mpelelekezyo. Ndi vino malembelo yataka, “Muntu wino Leza wacita ukuya mololoke pa utailo wakwe wene alaya nu umi.”
Muntu wensi waifya
18Lyene ukali wakwe Leza wati usokoloka kufuma kwiyulu pamulandu wankota na maifyo ya antu, pano inkota zyao ziipe zikacilikizya icumi kuti citamanyika. 19Leza akayavunuka pano vino antu yangamanya pali aliwe, Leza umwisikulu wavilanga kunoyali mu musango uno yangamanya ningo. 20Pano kufuma lino Leza waumvile insi maka ya u Leza wakwe nanti yatangaloleka ningo mu manso itu, lelo yakaloleka mu vintu vino wacita. Caleka antu yatange yalole pa kukanila. 21#Efe 4:17 Nanti angala Leza yamumanya, lelo yakana kumulumbanya nanti kumutaizya. Amelenganyo yao yaseleukila ku vya uwelewele ni myenzo yao yazulamo mfinzi. 22Yakaitaka kuya antu yamano, lelo yene iviwelewele. 23#Mil 4:16 Mu cifulo cakupepa Leza asiifwa, yene yakapepa tuluwi tuno yapanga mu unkolanya wa muntu akafwa nanti vyunyi nanti nyama nanti visela. 24Acino Leza wayafutatila kuti yangacita vya nkota vya lunkumbwa lwa myenzo yao, yasuke yacitilana ni vya nsonyi vya kusausya miili yao. 25Yene yafutatila cumi ca pali Leza nu kutaila ufi. Yene yakapepa nu kutumikila viumbwa vino Leza waumba mu cifulo cakwe kaumba umwisikulu uwalinga kulumbanyiwa pe na pe! Ameni.
26Pamulandu kwene uu Leza wayafutatila kuti yalondele vilondwa vyao vya nsonyi. Anaci yakuulungana na anaci yauze, mu musango utalinzile kucita. 27Icili cimwi na onsi kwene. Yene yata ukuya ku aci yao, lelo yakaulungana na onsi yauze, nga nu kuiletelela pa kuluvyanya kwao.
28Mulandu uno antu yakana kusunga mano ya cumi apali Leza mu myenzo yao, Leza wayafutatila kuti yalondela melenganyo yao a ukakasi na kuti yacita vintu vino vitaine kucita. 29Myenzo yao yazulamo uyi wa misango yonsi wakwe vii, ukakasi, kuitemwa, lupato, uzuwa, utazi wa katwe, lwete, ufi, lufyengo, lwambo, 30yaya alunya, asoka Leza, a cilumba, a mataki, akayuvwa, yene yakalondelezya inzila zipya zyakucitilamo viipe, asyayela akwasi, 31imbulwa mano, yasifikilizya upangano, yasi na luse nanti a mizu ku antu yauze. 32Nanti angala yamanya vino Leza wapingula ukuti antu akacita vii yalinzile ukufwa, lelo ala yakutwalilila kuvicita, yalundapo nu kukomelezya yao akavicita.
Upinguzi wakwe Leza usi uwa kasoozi
Currently Selected:
Loma 1: MamL13
Highlight
Share
Compare
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
