Loma Kulondolola
Kulondolola
Kalata wakwe Paulo ku ina Loma walemvilwe kuti ateyanye nzila ya kutandalila iuvi lyamu Loma ndi vino welenginye. Ipange lyakwe lyali ilyakuti aombe pa nsita imwi inono mu ina Klistu ali kuku, nga ndi yamwazwa, aye akaombe nu ku Sipeni kwene.
Wene walemvile kalata wii kuti alondolole kumanya kuno wakweti pa utailo wa ina Klistu nga nu kuomba kuno utailo ukaomba mu umi wa ina Klistu. Lupapulo luu, lukweti mazwi yakwe Paulo amalilike amwi landwe lyakwe.
Pacisila cakulamuka amwi uvi lyaku Loma nga nu kuyanena vino akayapepela, Paulo walanda mutwe wa cisambililo ukati, “Ilandwe Lisuma likasokolola vino Leza akacita antu kuya aololoke pa manso yakwe kupitila mu utailo wao kufuma pa kutandika kufika nu ku mpelelekezyo” (1:17).
Paulo lyene wavungulula mutwe uu wa cisambililo. Antu onsi, Ayuda na Akulukuwa kwene, yalinzile kucitwa kuya aololoke pa manso yakwe Leza, pano onsi yali pisika lya maka iifyo. Antu yakacitwa kuya aololoke pa manso yakwe Leza kupitila mu utailo wao muli Yesu Klistu. Alino Paulo walondolola umi upya muli Klistu uno ukafuma mu kuya nu utandano upya na Leza. Muntu uwataila ali nu mutende na Leza nga Mupasi wakwe Leza wamukulula ku maka i iifyo ni mfwa. Mu capita 5 kufika na capita 8 Paulo walanda vino Masunde yakwe Leza na maka ya Mupasi wakwe Leza yakaomba mu umi wa mwina Klistu uwataila. Alino Paulo watwalilila kulanda pa vintu na vyuze vikulu vyamu lupapulo kwene luu.
Utantiko wa vili mu lupapulo luu
Kulondolola nga nu mutwe wa cisambililo 1:1-17
Muntu alinzile kutuulwa 1:18–3:20
Nzila ino Leza akatuulilamo antu 3:21–4:25
Kuya nu Umi upya muli Klistu 5:1–8:39
Izlaeli mwi pange lyakwe Leza 9:1–11:36
Miyele ya ina Klistu 12:1–15:13
Mazwi yakusyalikizya nga nu kulamuka kwakwe 15:14–16:27
Currently Selected:
Loma Kulondolola: MamL13
Highlight
Share
Compare
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013