Loma 2
2
1 #
Mat 7:1; Luk 6:37 We muntu we muno ukapingula auzo, utangaleuka mulandu. Pano ndu kupingula auzo lino nawe ukacita viipe ala nawe ukuivunuka wemwisikulu. 2Lyene twamanya vino upinguzi wakwe Leza kuli yakacita ya viipe uwa cumi. 3Lelo yame ndu kacita viipe nga ala ukupingula auzo pali vino nawe kwene ukacita, uzye ukwelenganya vino ulaleuka upinguzi wakwe Leza? 4Nanti uzye ukasula kuvula kwa luse lwakwe Leza na vino akatutekela mwenzo? Uzye utamanyile vino Leza ali nu luse kunuli kuti akutungulule ku kuzenzuka? 5Lelo wakoma umwenzo, nupya usyalonda kuzenzuka. Caleka ukaitulikila sile ukali wakwe Leza uno alalanga pa Wanda wa upinguzi wakwe wa cumi. 6#Mas 62:12; Map 24:12 Pano Leza alalambula cila muntu kulingana ni milimo yakwe. 7Antu aya nu mute wakucita visuma, ayano Leza alapeela umi wape umwaya lulumbi nu mucinzi. 8Lelo antu akaitemwa, nu kukana kucita vya cumi akacita vino vitaine, yene yalazombola cipyu nu ukali wakwe Leza. 9Ucuzi nu ulanda vilaponela antu yonsi akacita viipe, inkolelo ku Ayuda alino nu ku Akulukuwa kwene. 10Lelo Leza alapeela lulumbi nu mucinzi ku antu yonsi akacita visuma, nga nu kuyapela mutende, inkolelo ku Ayuda alino nu ku Akulukuwa kwene. 11#Malg 10:17 Pano Leza ataya na kasoozi.
12Pano Akulukuwa yatapilwe Masunde yakwe Mose, lelo yakaifya nu kulowa yakalowa nanti Masunde yatayakuma. Ayuda yene yapilwe Masunde nu kwifya yakaifya. Caleka Leza alayapingula kulingana na Masunde. 13Pano kusi uku kuvwa sile Masunde ukukalenga kuti antu yaye aololoke pa manso yakwe Leza, lelo ukukucita vino Masunde yataka ukukalenga. 14Pano Akulukuwa yatapilwe Masunde lelo mu mikalile yao ya civyalilwa lino yacita vino Masunde yataka, ala aisikulu yakulanga vino Masunde yaya mu myenzo yao nanti angala yatapilwe Masunde yakwe Mose. 15Pano micitile yao ikulanga ukuti vino Masunde yakataka ivyalembwa mu myenzo yao. Ni myenzo yao kwene ikasininkizya ukuti vino Masunde yataka ivya cumi, pano limwi melenganyo yao yakayavunuka limwi yakayazumilizya mu kuluvyanya kwao. 16Acino kulingana ni Landwe Lisuma lino nkakosola, avino cilaya na pa Wanda uno Leza alapingula antu kupitila muli Klistu Yesu pa vya nkama vyamu myenzo yao.
Ayuda na Masunde yakwe Mose
17Uzye wemo cili uli? Wemuno ukayaama wemwisikulu uti wewe Muyuda. Wemo wemelela ku Masunde nu kuilumba ukuti wewe wakwe Leza. 18Wemo wamanya cino Leza akalonda kuti wacita nupya wasambilila mu Masunde ukusola vilinzile kucitwa. 19Wemo wasininkizya vino wewe katungulula wa mpafu, na vino wewe luswepo kuli yao ali mu mfinzi, 20mulangilizi wa viwelewele na kasambilizya wa antu atutu. Wemo wasininkizya ukuti mu Masunde mwaya ivya kupanda mano ni vya cumi vyonsi. 21Uzye lyene wemo ungasambilizya umuzo uli lino usyaisambilizya wemwisikulu? Wemo ukakosola uti, “Utaiya” lino wemo ukaiya! 22Wemo ukalesya yauze uti, “Mutalongozya.” Lelo uzye wemo usyalongozya? Wemo wapata tuluwi, lelo uzye usyaiya vya pa maleza? 23Wemo kuitumba pa kukwata Masunde yakwe Leza, lelo uzye usyaleta muzewanya kuli Leza pa kuntayela Masunde yakwe? 24#Eza 52:5 Malembelo yakati, “Mwe Ayuda, mwemwe mwaleka kuti Akulukuwa yavwanga mazwi ya misuli kuli Leza.”
25Wemo ndi ukayela Masunde yakwe Leza ale kusilamulwa kwako kungakuzipila. Lelo ndi usyayela Masunde, ale kusilamulwa kwako ukwasilesile. 26Mukulukuwa wino atasilamulwa ndi akayela Masunde, uzye Leza wene atalamulola wa muntu wiya uwasilamulwa? 27Acino mwe Ayuda mulavunukwa nu muntu wensi atasilamulwa ku mwili, wino akayela Masunde yakwe Leza. Pano musyayela Masunde nanti angala mwasilamulwa ni sunde mukwetu. 28Pano Muyuda inkonko asi wiyo akaloleka wa Muyuda kunzi, wino wasilamulwa ku mwili. 29#Malg 30:6 Lelo Muyuda inkonko umuntu uwaya Muyuda mu mwenzo wakwe, wino mwenzo wakwe wasilamulwa. Kuu, kuli kuomba kwakwe Mupasi Wamuzilo, asi kuomba kwa Masunde yano yalembwa. Umuntu wa musango uu, asi antu akamutasya, lelo Leza akamutasya.
Currently Selected:
Loma 2: MamL13
Highlight
Share
Compare
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
