Mpendwa 3
3
Kulanda pa amu mupanda wakwe Aloni
1Yaa ali amu mupanda wakwe Aaloni na Mose ali kweneko pa nsita ino Yawe wavwanzile na Mose pa Mwamba wa Sinai. 2#Mpe 26:60 Amazina ya ana yakwe Aaloni a Nadabu, ali iyeli, nga palondelela Eleaza na Itamali. 3Ana yakwe Aaloni yao, yapasilwe amafuta yalasikwa usimapepo. 4#Levi 10:1, 2; Mpe 26:61 Lelo Nadabu na Abiu yakomilwe mu Lwanga lwa Sinai pa manso yakwe Yawe lino yezizye kocela Yawe impolelwa ku moto ukowele. Yene yatakweti ana. Acino Eleaza na Itamali yatumikilanga wakwe yasimapepo pa nsita yonsi lino Aaloni isi acili umumi.
Aina Levi yasontwa ukuya yasimapepo
5Yawe anena Mose ati, 6“Leta amu mutundu wakwe Levi, nu kuyapeela mu makasa yakwe Aaloni pakuti yatumikila wakwe yasimapepo. 7Yene yamaombanga umulimo onsi wa usimapepo ukwi Taalu lyane lya Ukongano alino nu kutumika pa manso yakwe Yawe. 8Yalinzile yawaka ni viya vyonsi vya mwi Taalu lya Ukongano nu kutumikila aina Izlaeli yonsi asyala. 9Umulimo sile uno aina Levi yakweti ukutumikila Aaloni na ana yakwe. 10Ali cino uce uwasonta sile Aaloni na ana yakwe ukuomba umulimo wa usimapepo. Muze wino alezya ukuomba umulimo uwo alinzile kukomwa.”
11Nupya Yawe anena Mose ati, 12#Kuf 13:2 “Lola, natinsolola aina Levi mu ina Izlaeli yonsi mu cifulo cakuti ningasolola umwana umonsi iyeli muli cila mwanaci umwina Izlaeli. Ali cino inkuti aina Levi akwane nene. 13Pasi pano amayeli yonsi akwane. Lino nakomozile amayeli yonsi mu Eguputo, naipaatwilile cila iyeli lya ina Izlaeli, usi mulandu lingaya ilya muntu nanti ilya nyama. Yene yalinzile ukuya akwane. Nene indi Yawe.”
Kupendwa kwa ina Levi
14Yawe apeela ilamulo kuli Mose mu Lwanga lwa Sinai ati, 15“Penda ana yakwe Levi mu ndupwa zyao nu mu nko zyao. Mwapenda umonsi wensi kutandika uwa mwezi onga ukuya papela.” 16Mose nawe avino acita. 17Yaa ali mazina ya ana yakwe Levi: Gelisyoni, Koati na Melali. 18Inko zya ana yakwe Gelisyoni yafuma mu mazina ya ana yakwe yaa: Libini na Syimei. 19Inko zya ana yakwe Koati yafuma mu mazina yaa: Amulamu, Izali, Hebuloni na Uzieli. 20Inko zya ana yakwe Melali yafuma mu mazina ya ana yakwe yaa: Maali na Musyi. Yene yali inko zya ina Levi ukulingana ni ng'anda zyao.
21Uluko lwakwe Libini nu luko lwakwe Syimei yafuma kuli Gelisyoni. Yakwene yali amu nko zyakwe Gelisyoni. 22Impendwa ya onsi yonsi ali nu mwezi onga nanti ukuluta yali pamwi 7,500. 23Amu nko zyakwe Gelisyoni yalinzile kukuula insakwe zyao lwaku uwondaka, kwi tundu li Taalu lya Ukongano. 24Intunguluzi ya ang'anda yakwe Gelisyoni a Eliyasafu umwana wakwe Laeli. 25Mwi Taalu lya Ukongano aina Gelisyoni yali nu kuwaka Itaalu, Itaalu kwene ni insalu yakucingilikizya, insalu yakucingilikizya pa mulyango wa kwingilila mwi Taalu lya Ukongano, 26insalu yakucingilikizya pa wingililo wa musolo uwalizizya Itaalu alino na kavuwa, alino ni myando, ukwikapo sile ni ncito ili yonsi ikumile ku mulimo ukaombwa mwenemo.
27Uluko lwakwe Amulamu, na lwakwe Izali, na lwakwe Hebuloni nga na lwakwe Uzieli, lwafuma kuli Koati. 28Impendwa ya onsi yonsi ukutandikila pa mwana ali nu mwezi onga nanti ukuluta yali 8,600. Aina Koati yali nu kuwaka mu ncende icindame. 29Inko zino zyafuma kuli Koati zilinzile kukuula insakwe zyao lwaku kaeya ki Taalu. 30Ni ntunguluzi yao a Elizafani, umwana wakwe Uzieli. 31Umulimo wao wali uwa kuwaka Mbokosi ya Upangano, itebulo, ivyakutekapo inyali, utuvuwa, iviya vyamuzilo vino yasimapepo yakaomvya mu Ncende Yamuzilo, nga ni nsalu yakucingilikizya pa mulyango wa Ncende Yamuzilo kuluta. Yakwene yali nu kuwaka kutumikila konsi kukumile vintu vii.
32Umukalamba wa ntunguluzi zya ina Levi a Eleaza, umwana wakwe Aaloni simapepo. Wene wasonsilwe ukuya kangalila wakwe yakasunga ya Ncende Yamuzilo.
33Uluko lwakwe Maali nu luko lwakwe Musyi, yafuma muli Melali. 34Impendwa ya onsi yonsi ali nu mwezi onga nanti ukuluta yali 6,200. 35Uluko luu lulinzile kukuula insakwe zyao lwaku katutu ki Taalu, ni ntunguluzi yao a Zulieli umwana wakwe Abiaili. 36Aina Melali yapilwe umulimo wa kuwaka amafulemu yi Taalu, nkangalo, impanda, vikalilo umwa kusimpa impanda, na vyonsi vikumile umulimo wa vintu vii, 37Nupya yapilwe umulimo wa kuwaka mpanda, vikalilo umwa kusimpa impanda, impopo ni myando, vyonsi vii ivya musolo wa kunzi.
38Mose na Aaloni na ana yakwe yalinzile kukuula insakwe zyao lwaku ufumondaka wi Taalu lya Ukongano. Yene yapilwe umulimo wa kuwaka imilimo yonsi ino ikacitika mu Ncende Yamuzilo ikumile aina Izlaeli. 39Impendwa yonsi ya ina Levi ukulingana ni inko zyao, ali nu mwezi onga nanti ukuluta, yano Mose wapenzile pi lamulo lyakwe Yawe, yali 22,000.
Aina Levi yatoola cifulo ca ana mayeli aonsi
40Yawe anena Mose ati, “Ana mayeli aonsi ya ina Izlaeli akwane. Acino uyapende kulingana na mazina yao, kutandikila pali wino ali nu mwezi onga nanti ukuluta. 41Mu cifulo ca ana mayeli ya ina Izlaeli, aina Levi yamaya akwane. Nu mucifulo ca mayeli ya viteekwa vya ina Izlaeli, mayeli ya viteekwa vya ina Levi yamaya akwane. Nene indi Yawe.” 42Acino Mose apenda mayeli yonsi ya ina Izlaeli wakwe vino Yawe wamupeezile ilamulo. 43Impendwa yonsi ya mayeli aonsi ali nu mwezi onga nanti ukuluta yali 22,273.
44Yawe nupya anena Mose ati, 45“Mpaatwile aina Levi mu cifulo ca mayeli yonsi ya ina Izlaeli, nga na mayeli ya viteekwa vya ina Levi mu cifulo ca mayeli ya viteekwa vya ina Izlaeli. 46Pasi pano impendwa ya ana mayeli ya ina Izlaeli ilusile impendwa ya ana aonsi ya ina Levi yali 273. Mulinzile kukala ana yaa pa kuyakulula. 47Pali cila mwana mulinzile ukulipa impiya zyakwe siluva zisano kulingana ni cipimilo caku Ng'anda ikulu yakwe Leza. 48Lyene mupeele impiya zizyo zya ukuluzi kuli Aaloni na ana yakwe.” 49Acino Mose acita vino yamunenyile, atola 50impiya zizyo zyakwe siluva izyali 1,365, ukulingana ni cipimilo caku Ng'anda ikulu yakwe Leza. 51Nga azipela kuli Aaloni na ana yakwe wakwe vino Yawe wamupeezile ilamulo.
Mambwe-Lungu Bible © The Bible Society of Zambia, 2013