Mpendwa 4
4
Milimo ino yapilwe ku ina Levi amu luko lwakwe Koati
1Alino Yawe anena Mose na Aloni 2ukupenda aina Levi, yao amu luko lwakwe Koati, ukupitila mu nko zyao nu mu ng'anda zyao. 3Nu kupenda aonsi yonsi ali ni myaka amakumi yatatu ukufika pa myaka amakumi yasano. Ayanena kuti yalole angalinga kutumikila mwi Taalu lya Ukongano. 4Fwandi incito ya ina Koati ukuwaka vintu vyamuzilo cuze.
5Lino insita ya kusamya insakwe yafika, Aaloni na ana yakwe yalinzile kwingila mukasi ki Taalu lya Ukongano nu kusamula insalu ya kucinga Mbokosi ya Upangano nga yavimbe mbokosi kwene iyo. 6Alino lyene yangavimbapo impapa inyuke ningo nu kuvimba papela insalu ya cifungo. Alino nu kwika mipingilo ningo iyakusendela mbokosi.
7Api tebulo lya mukate uwapeelwa kuli Yawe yalinzile kwanzikapo insalu ya cifungo nga nu kutendekelapo imbale, imbakuli ni ngeso, nga ni misazi ya mawila ya vyakumwa. Api tebulo lyonsi palinzile paya imikate yakwimula kuli Yawe. 8Pali vyonsi vii yalinzile kuvimbilikizyapo insalu iyenzu, ino nupya yalinzile yafupa mu mpapa zinyukwe ningo nu kusomekamo mipingilo.
9Yalinzile yatoola insalu ya cifungo nu kufupilizya icakuteekapo ilampi, pali pamwi ni vyakulukusizyako itwi, utambi, musazi wa mafuta kumwi ni viombelo vyonsi vikumile ku ncito yamusango ndi uwo. 10Lyene yalinzile kuvifupilizya ningo nu kuvingizya mu mpapa zinyukwe ningo, nga yavike pa cintamba.
11Pa kavuwa kakwe Zaabu, napo yali nu kuvimbapo insalu ya cifungo, ino nupya yalinzile yafupa mu mpapa zinyukwe ningo nu kusomekamo mipingilo. 12Yalinzile kutoola iviya vyonsi vyakuomvya mu Ncende Yamuzilo nu kuvifupilizya ningo mu nsalu ya cifungo, ino nupya yalinzile yafupa mu mpapa zinyukwe ningo, nga yavike pa cintamba. 13Yalinzile kuzyola nu kusisya itwi pa kavuwa ka mukuwa, alino yanzepo insalu yi langi liyenzulukile. 14Lyene yalinzile kwikapo viombelo vyonsi ivyakuomvya pa kavuwa, vili wa malwangayo, yafoloko, yafosyolo ni ngeso zya kukanyizizya. Alino lyene yavimbilikizyepo impapa inyuke ningo nu kusomekamo mipingilo. 15Lino Aaloni na ana yakwe yalamala kuvimbilikizya vintu vyamuzilo pamwi ni viombelo vyonsi, lyene ali lino ana yakwe Koati yali nu kwiza vikusya. Lelo yatalinzile kukumya ku vyamuzilo, pano ndi yacita vivyo yalafwa.
Fwandi aluko lwakwe Koati yalinzile kusenda viya vya mwi Taalu lya Ukongano lyonsi lino yakulisezya.
16Eleaza umwana wakwe Aaloni simapepo alinzile kuwaka musazi wa mafuta ya kwika mu nyali, nu ubani wa cinunkilo cisuma, na mawila ya cakulya, na mafuta akusolwela, nga ni vintu vyonsi ivya mwi Taalu vino vyapaatwilwa Yawe.
17Alino Yawe anena Mose na Aaloni ati, 18“Mutakaleke uluko lwakwe Koati lukapaatuluke ku ina Levi. 19Acino fwandi na pakuti yapita ulumi nu kukana fwa pamulandu nu kupalama ku vintu vyamuzilo cuze, mulinzile kuyacitila vii: Aaloni na ana yakwe yalinzile kwingila mu ncende yamuzilo nu kulangilila cila muntu umulimo wakwe alino ni viya vino alinzile kusenda. 20Lelo aluko lwakwe Koati yatakezye ukwingila mwenemo kuti yalolekesye pa vintu vyamuzilo nanti panono. Ndi yacita vivyo yalailetelela yafwe.”
Milimo ya ina Levi aluko lwakwe Gelisyoni
21Yawe anena Mose ati, 22“Penda ana yakwe Gelisyoni mu nko zyao nu mu ng'anda zyao. 23Upende na onsi yonsi ali ni myaka amakumi yatatu ukufika pa makumi yasano, yao angalinga kutumikila mwi Taalu lya Ukongano. 24Uu, uli mulimo uno aina Gelisyoni yali nu kuomba mu kusenda katundu wao. 25Yalasenda insalu yakucingilikizya Itaalu, Itaalu lya Ukongano ni nsalu yakucingilikizya iya mukasi kaliko, kumwi ni yakunzi, ni mpapa inyuke ningo yakucingilikizya apapela yaliko, pamwi ni nsalu yakucingilikizya pa mulyango wa kwingilila mwi Taalu lya Ukongano. 26Alino nupya insalu zyakucingilikizya musolo ni zyakucingilikizya pa wingililo wa musolo uwazinguluka Itaalu pamwi na kavuwa. Alino nu mwando ni viombelo vyonsi vino yakaomvya kweneko. Iyo, ali ncito ino amu nko zyakwe Gelisyoni yali nu kuwaka. 27Mose na Aaloni yalinzile kusininkizya ukuti aluko lwakwe Gelisyomu yaomba imilimo yonsi nu kusenda vyonsi vino Aaloni na ana yakwe yayanena. 28Fwandi iyo ili milimo ya nko zyakwe Gelisyoni ino yalinzile ukuomba mwi Taalu lya Ukongano. Itamali umwana wakwe Aaloni simapepo alinzile kwangalila imilimo yao.
Milimo ya ina Levi aluko lwakwe Melali
29“Yawe anena Mose kuti apende aina Levi aluko lwakwe Melali, 30nu kupenda aonsi yonsi ali ni myaka amakumi yatatu nu kufika amakumi yasano. Amunena kutoola yao angalinga ukuomba umulimo wa mwi Taalu lya Ukongano. 31Milimo yao ukuwaka misendele ya vimiti vya kupangila Itaalu lya Ukongano, amasalala, incesi impopo pamwi ni nkangalo. 32Alino ni mpanda pamwi ni mpopo zyakusimpa ukuzingulusya musolo. Nu tupopo twa ku myando pamwi nu tunkolonkolo tonsi utungalondekwa. Muli nu kuyasontelela vino yali nu kusenda nu kuvilumbula mazina. 33Fwandi iyo ili milimo ya aluko lwakwe Melali mu kuomba kwao kwa mwi Taalu lya Ukongano. Ni ntunguluzi yao a Itamali umwana wakwe Aaloni simapepo.”
Kupendwa kwa ana yakwe Levi
34Awe mukwai Mose na Aaloni pamwi ni ntunguluzi zya maumba, iyapenda ana yakwe Koati kupitila mu nko zyao nu mu ng'anda zyao. 35Aonsi yonsi ali ni myaka kutandikila pa makumi yatatu kufika pa makumi yasano yano iizile ku kuomba imilimo ya mwi Taalu lya Ukongano, 36impendwa yao yonsi kulingana ni nko zyaliko, yali 2,750. 37Ikwene, ili mpendwa iyapenzilwe ukufuma mu nko zyakwe Koati, alingine ukuomba mwi Taalu lya Ukongano. Apenzilwe kuli Mose na Aaloni ndi muno Yawe wapeezile Mose ilamulo. 38Aina Gelisyoni nayo yapenzilwe kulingana ni nko zyao na ang'anda zyao. 39Aonsi yonsi pyu ali ni myaka kutandikila pa makumi yatatu kufika pa makumi yasano, angalinga ukuomba mwi Taalu lya Ukongano, 40yano yapenzilwe kulingana ni nko zyao na ang'anda zyao, impendwa yali 2,630. 41Ikwene ili mpendwa yonsi pyu ya aluko lwakwe Gelisyoni alinzile ukuomba mwi Taalu lya Ukongano. 42Aina Melali yapenzilwe kulingana ni nko zyao na ang'anda zyao. 43Aonsi yonsi ali ni myaka kutandikila pa makumi yatatu kufika pa makumi yasano, alinzile ukuomba mwi Taalu lya Ukongano, 44yano yapenzilwe kulingana ni nko zyao, impendwa yali 3,200. 45Ikwene ili mpendwa yonsi pyu ya aluko lwakwe Melali. Mose na Aaloni yayapenzile kulingana ni lamulo lino Yawe wapeezile Mose. 46Acino Mose, na Aaloni ni ntunguluzi zya ina Izlaeli aina Levi yonsi kulingana ni nko zyao nga nu mu ng'anda zyao. 47Aonsi yonsi ali ni myaka kutandikila pa myaka makumi yatatu kufika pa myaka amakumi yasano, alinzile ukuomba mwi Taalu lya Ukongano nanti ukulisenda, 48impendwa yao yali 8,580. 49Api lamulo lya mwene kupitila muli Mose, cila muntu wapilwe umulimo uwakuomba nu kunenwa civiya cino angasenda. Avino yapenzilwe, wakwe vino Mose wapezilwe ilamulo kuli Yawe.
Mambwe-Lungu Bible © The Bible Society of Zambia, 2013