Mpendwa 2
2
Imikuulile ya nsakwe zya mitundu ya ina Izlaeli vino yali
1Yawe anena Mose na Aaloni ati, 2“Lino aina Izlaeli yakukuula insakwe zyao, cila muntu alinzile kukuula ukuyelile inzipa yakwe ni mendela zya luko lwakwe. Nupya yalinzile yakuula ukuzingulusya Itaalu lya Ukongano, apafuntwikeko.”
3Lwaku ufumondaka, imitundu ya nzipa ya nsakwe yakwe Yuda yalinzile kukuula insakwe zyao kulingana na maumba muno yaya. Ni ntunguluzi ya antu yakwe Yuda a Nasyoni umwana wakwe Aminadabu. 4Amwi umba lyakwe yali 74,600. 5Amu mutundu wakwe Isakali yalinzile kukuula insakwe zyao pipi nayo. Ni ntunguluzi ya antu yakwe Isakali a Netaneli umwana wakwe Zuali. 6Amwi umba lyakwe yali 54,400. 7Alino amu mutundu wakwe Zebuluni yalondelelepo kukuula insakwe zyao. Ni ntunguluzi ya antu yakwe Zebuluni a Eliabu umwana wakwe Heloni. 8Amwi umba lyakwe yali 57,400. 9Antu yonsi apendilwe ku nsakwe yakwe Yuda, ukulingana ni mitundu yao, yali 186,400. Alio yali nu kutandikilapo kutenuka. 10Lwaku kaeya, imitundu ya nzipa ya nsakwe yakwe Lubeni yalinzile kukuula insakwe zyao kulingana na maumba muno yaya. Ni ntunguluzi ya antu yakwe Lubeni a Elizuli umwana wakwe Syedeuli. 11Amwi umba lyakwe yali 46,500. 12Alino amu mutundu wakwe Simeoni yalondelelepo kukuula insakwe zyao. Ni ntunguluzi ya antu yakwe Simeoni a Syelumieli umwana wakwe Zulisyadai. 13Amwi umba lyakwe yali 59,300. 14Alino amu mutundu wakwe Gadi yalondelelepo kukuula insakwe zyao. Ni ntunguluzi ya antu yakwe Gadi a Eliyasafu umwana wakwe Deueli. 15Amwi umba lyakwe yali 45,650. 16Antu yonsi apendilwe ku nsakwe yakwe Lubeni, ukulingana ni mitundu yao, yali 151,450. Alio yalalondelelapo kutenuka. 17Alino lyene aina Levi yali nu kutenuka yapita pakasi na nkasi ka maumba yaili ankolelo na yaili acisila yala yasenzile Itaalu lya Ukongano. Cila umba lili nu kutenuka mu utantiko uli onga na uno yakakuulilamo insakwe, cila umba ukuyelile inzipa yao. 18Lwaku uwondaka, imitundu ya nzipa ya nsakwe yakwe Efulemu yalinzile kukuula insakwe zyao kulingana na maumba muno yaya. Ni ntunguluzi ya antu yakwe Efulemu a Elisyama umwana wakwe Amiudi. 19Amwi umba lyakwe yali 40,500. 20Alino amu mutundu wakwe Manase yalondelelepo kukuula insakwe zyao. Ni ntunguluzi ya antu yakwe Manase a Gamalieli umwana wakwe Pedazuli. 21Amwi umba lyakwe yali 32,200. 22Alino aina Benjamini yalondelelepo kukuula insakwe zyao. Ni ntunguluzi ya antu yakwe Benjamini a Abidani umwana wakwe Gidyoni. 23Amwi umba lyakwe yali 35,400. 24Antu yonsi apendilwe ku nsakwe yakwe Efulemu, ukulingana ni mitundu yao, yali 108,100. Alio yalaya yakwe citatu kulondelelapo kutenuka. 25Lwaku katutu, antu ya nzipa ya nsakwe yakwe Dani yalinzile kukuula insakwe zyao ukulingana ni mitundu yao. Ni ntunguluzi ya antu yakwe Dani a Aiezeli umwana wakwe Amisyadai. 26Amwi umba lyakwe yali 62,700. 27Alino amu mutundu wakwe Asyeli yalondelelepo kukuula insakwe zyao. Ni ntunguluzi ya antu yakwe Asyeli a Pagieli umwana wakwe Okalani. 28Amwi umba lyakwe yali 41,500. 29Alino amu mutundu wakwe Nafutali yalondelelepo kukuula insakwe zyao. Ni ntunguluzi ya antu yakwe Nafutali a Aiila umwana wakwe Enani. 30Amwi umba lyakwe yali 53,400. 31Antu yonsi apendilwe ku nsakwe yakwe Dani, kulingana na maumba yao, yali 157,600. Alio yalaya akusyalikizya kutenuka viine ni nzipa zyao. 32Impendwa yonsi pamwi ya ina Izlaeli lino yayapenzile ukulingana ni mitundu yao, umwayelile indupwa zyao, iumba ni umba, yali 603,550. 33Ndi muno Yawe wapeezile ilamulo kuli Mose, aina Levi yatayapendile pamwi na ina Izlaeli asyala.
34Acino aina Izlaeli yacitanga consi cino Yawe wapeezile ilamulo kuli Mose ukucita. Ali vino yakuulanga insakwe zyao ukwayelile inzipa yao na cila muntu kutenuka muyelile umutundu wakwe nupya nu mu luko lwakwe.
Mambwe-Lungu Bible © The Bible Society of Zambia, 2013