Utandiko 48
48
Yakobo wapolelela Efulemu na Manase
1Pacisila cakwe vii, lino Yosefu ali mu musumba, apokelela amazwi akulwala kwakwe isi. Caleka Yosefu asenda ana yakwe yaili aonsi, Manase na Efulemu, nga apita aya ku kufwilizya isi. 2Lino Yakobo uvwa ukuti Yosefu umwana wakwe umonsi wataiza ku kumufwilizya, aikomelezya akatuka aikala pa musanzi. 3#Uta 28:13, 14 Yakobo anena Yosefu ati, “Leza Wamaka yonsi walolike kunondi lino wampolelile ku Luzi mu mpanga ya Kenani. 4Wanenyile ati, ‘Ndalenga kuti uvyale ana avule, pakuti amu mupanda wako yakaye inko zivule. Ndapeela impanga ii ku amu mupanda wako kuti iye impanga yao amanda pe.’ ”
5Yakobo atwalilila ukunena Yosefu ati, “Yosefu ana yako yaili aonsi, yano avilwe kunuli mu Eguputo lino ntali nize, nayo kwene akwane. Efulemu na Manase yene akwane wa ana yane aonsi, Lubeni na Simeoni. 6Ndi ulavyala ana aonsi nayauze, yene yatalapendwa ukuti akwane. Yene yalapokelela upyanyi wa mpanga kupitila muli yasilenzi, vili Efulemu na Manase. 7#Kuf 35:16-19 Nacita ci pamulandu wakuti nkwelenganya vyacitikile nyoko Lakeli. Nasosile pano Lakeli wafwilile mu mpanga ya Kenani mupipi nu musumba wa Efulata, ala nkuswilila kumwitu ukufuma ku Mesopotamya. Imuzika mu mbali ya museo uwaya ku Efulata.” (Musumba wa Efulata ndakai ukaamwa ukuti Betelemu.)
8Lino Yakobo walola ana yakwe Yosefu aonsi auzya ati, “Uzye alumendo yaa aweni?”
9Yosefu aasuka ati, “Alumendo yaa ali ana aonsi yano Leza wampeela muno mpanga ya Eguputo.”
Yakobo avwanga ati, “Yalete kunondi pakuti ningayapolelela.” 10Manso yakwe Yakobo yatalolekesyanga pamulandu wa ukote. Caleka walolanga cizyuzye. Lyene Yosefu atwala alumendo kunoli, acino Yakobo ayakumbatila, nga ayatonsola. 11Yakobo anena Yosefu ati, “Ntapaalilanga ukuti ningakulola nupya, lelo ndakai Leza watalenga kuti nkulole pamwi na ana yako kwene.” 12Lyene Yosefu afumya alumendo pa makokola yakwe Yakobo nga afukama pansi afupime inkolelo yakwe.
13Yosefu aimika Efulemu kwi kasa limani lyakwe Yakobo, na Manase amwika kwi kasa lilunji. 14Lelo Yakobo apusanya makasa yakwe. Aika ikasa lilunji pa mutwe wakwe Efulemu, nanti cingaya kuti wali umwance pali Manase, nga atambalika ikasa lyakwe limani aika pa mutwe wakwe Manase, ciye Manase wali ali iyeli. 15Lyene Yakobo apolelela Yosefu ati,
“Si Leza wino ivikolwe vyane, Abulaamu na Isaki,
yatumikilanga apolelele alumendo yaa!
Si Leza wino uwantungulula kufika na pa wanda wi lelo
apolelele alumendo yaa!
16Si mungeli wino uwampuswisye mu mauzanzo onsi
apolelele alumendo yaa!
Si zina lyane ni zina lya vikolwe vyane Abulaamu na Isaki
likalilile pa alumendo yaa!
Si yavyale ana avule na kuti amu mupanda wao yaye avule!”
17Lino Yosefu walola ukuti isi wika ikasa lilunji pa mutwe wakwe Efulemu citamuzanzizye. Caleka Yosefu asisya ikasa lyakwe isi pa mutwe wakwe Efulemu nu kwika pa mutwe wakwe Manase. 18Yosefu anena isi ati, “Awe asi vivyo tata, wi ali kwi kasa lilunji ali wikolo awino ika ikasa lyako pa mutwe wakwe.”
19Yakobo akana ati, “Awe! Manyile mwanane. Na amu mupanda wakwe Manase kwene yalaya luko lukulu. Lelo Efulemu alaya mukulu ukuluta Manase nga na amu mupanda wakwe yalaya inko zikulu.”
20 #
Aye 11:21
Caleka pa wanda ulya kwene Yakobo ayapolelela ati, “Aina Izlaeli yalaomvya mazina inu pa kupolelela antu yauze.” Yalavwanga yati, “Si Leza amupolelele ndi vino wapolelile Efulemu na Manase.” Mu nzila ii Yakobo alenga Efulemu ukuya wankolelo pali Manase.
21Lyene Yakobo anena Yosefu ati, “Wakwe vino watulola, nemo indi pipi nu kufwa, lelo Leza alaya nawe nga alalenga kuti muswilile ku mpanga ya vikolwe vinu. 22Nkunena wewe Yosefu, asi anyonko foo ukuti nkukupeela ciputulwa ca Syekemu, impanga ivunde cuze ino napokolwile ku ina Amoli pa kuyalwisya ku lupanga lwane nu ulapwa.”
Currently Selected:
Utandiko 48: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
