Utandiko 47
47
1Caleka Yosefu apita na ina yakwe yasano nga yaya kuli Falao. Yosefu anena Falao ati, “Tata na inane yonsi yatiiza ukufuma ku mpanga ya Kenani. Yatiiza na maufyo ya mfwele, ing'ombe nga na vyonsi vino yakwata. Ndakai yatiyakuula insakwe mu muputule wa Gosyeni.” 2Lyene Yosefu alondolola aina yakwe kuli Falao. 3Falao auzya aina yakwe Yosefu ati, “Uzye imilimo ci ino mukaomba?”
Nayo yaasuka Falao yati, “Musambazi sweswe yakacema ya viteekwa wakwe vino ivikolwe vitu vyali.” 4“Twatitwiza ku kwikala mu mpanga ii pamulandu wakuti mu mpanga yaku Kenani cipowe caticiipa cuze cakuti kusi mulemvwe uno umuntu angacemela maufyo yakwe. Twapapata tupele nsambu yakwikala mu muputule wa Gosyeni.”
5Falao anena Yosefu ati, “Ndakai so na ina yako yatiiza kuti ikale nawe. 6Yosefu impanga ii ya Eguputo iyakwao. Leka yakikale mu muputule wa Gosyeni, kuno kwazipa cuze. Nupya ndi pangaya yamwi munoyali angamanya ningo utesi wa viteekwa, uike ukuya yakangalila ya viteekwa vyane.”
7Lyene Yosefu aiza na isi Yakobo amulondolola kuli Falao. Yakobo apolelela Falao. 8Nga Falao auzya Yakobo ati, “Uzye uli ni myaka inga?”
9Yakobo aasuka ati, “Indi ni myaka umwanda onga na makumi yatatu mu umi wa kululumba kwane. Imyaka yane ili inono nupya iya ucuzi, ino itangakolana ni myaka ya kululumba kwa vikolwe vyane.” 10Yakobo asyalikizya na mazwi ya kupolelela Falao, nga apita.
11Lyene Yosefu aleka isi na aina yakwe yikala mu Eguputo nga ayapeela muputule wa mpanga usuma cuze mupipi nu musumba wa Lamesesi, wakwe vino Falao wapeezile ilamulo. 12Yosefu apeela ivyakulya kuli isi, ku ina yakwe, nu ku amu ng'anda yakwe isi kulingana ni mpendwa ya antu muli cila ng'anda.
Miombele yakwe Yosefu mu nsita ya cipowe
13Cipowe cali iciipe cuze cakuti kutali ivyakulya nanti vimwi mu mpanga yonsi. Caleka antu amu mpanga ya Eguputo na amu Kenani inzala iyatonsya. 14Lino antu yakukala ingano, Yosefu akolonganika impiya zyonsi mu Eguputo nu mu Kenani, nga azitwala kwi sano lyakwe Falao. 15Lino aina Eguputo na ina Kenani yasumba impiya zyonsi, yonsi kwene yiiza kuli Yosefu nga yamunena yati, “Tupeleko ivyakulya. Uzye ukulonda tufwe ale ukulola? Cita cimwi, pano impiya zitu zyatizisila zyonsi.”
16Yosefu aasuka ati, “Kaletini iviteekwa vinu, twizakauzyanya ni vyakulya ndi impiya zinu zyatizisila zyonsi.” 17Caleka yaleta iviteekwa vyao kuli Yosefu. Yosefu ayapeela ivyakulya yakauzyanya ni ngamila, imfwele, imbuzi, ing'ombe na yapunda. Mwaka ulya iusila ala yakukauzyanya ivyakulya ni viteekwa vyao.
18Mwaka walondelelapo yiiza kunoli nga yavwanga yati, “Musambazi tutangakufisa, mwine impiya zitu zyonsi zyatizisila, nga ni viteekwa vitu vyonsi ivyakwako. Pasi nanti icintu cimwi cisile cino tungakupeela suka sile mili itu ni mpanga muno tukalima. 19Uzye ukulonda tufwe ale ukulola? Tupeleko ivyakulya. Utaleka tutazyele impanga muno tukalima. Tupeleko ivyakulya pakuti ukale impanga zitu muno tukalima pamwi naswe kwene. Tumaya azya yakwe Falao, ni mpanga zitu muno tukalima zimaya izyakwakwe. Tupeleko ingano kuti tutafwa ni nzala, nga ni mbezu zya kukomela.”
20Mu nzila ii ali muno Yosefu wakalile Falao impanga yonsi ya Eguputo. Mwina Eguputo wensi cimupatikizya kukazya impanga yakwe pamulandu wakuti cipowe cakuzile cuze. Caleka impanga yonsi iya yakwe Falao. 21Yosefu acita antu yonsi ukuya azya monsi mu Eguputo. 22Impanga zino Yosefu atakazile azizyo sile zino yasimapepo yalimangamo, pamulandu wakuti Falao wayapeelanga ivyakulya insita zyonsi, nupya yene yatulilwe ivyakulya. Uli mulandu yene yatakazizye impanga zyao. 23Yosefu anena antu ati, “Uvwini vino namamunena, ndakai natinkalila Falao impanga zinu zino mukalimamo kumwi namwe kwene. Imbezu aizi kakomelini mu vyalo vino mukalima. 24Insita yakuzombola mulinzile kutulika mitumba isano. Mutumba onga uwakwe Falao, lelo mitumba ini ino yasyala mulinzile kusunga mupaatulemo imbezu ni vyakulya vinu pamwi na amu ng'anda zinu.”
25Antu yazumilila pamwi yati, “Endi musambazi twazumila ukuya azya yakwe Falao pano watucitila visuma nupya wapususya umi witu.”
26Caleka Yosefu apanga isunde lya mpanga mu Eguputo lyakuti pa nsita yakuzombola antu yalinzile yapeela mutumba onga kuli Falao pa mitumba isano. Kufika na pa wanda wilelo, isunde lii licili likaomba mu mpanga ya Eguputo. Impanga zino yasimapepo yalimangamo zyene kateeka atalemileko.
Kulenga kwakwe Yakobo kwakusyalikizya
27Aina Izlaeli yikala mu Eguputo ku muputule wa Gosyeni. Yaya akama nupya yavyala ana avule cuze. 28Yakobo aikala mu Eguputo imyaka ikumi lyonga na cinimbali, mpaka akwata ni myaka umwanda onga na makumi yani na cinimbali. 29#Uta 49:29-32; 50:6 Lino Yakobo walola insita ya mfwa yakwe yapalama atuma uwakuya ama Yosefu umwana wakwe umonsi. Nga lino Yosefu wafika kunoli, Yakobo amunena ati, “Ndi wantemwa, pisya makasa yako mu mpamba zyane alino ulape mulapo ukuti ndi naca nafwa utalanzika muno mu Eguputo. 30Nkulonda kuti uce ukanzike kuno kwazikwa ivikolwe vyane. Ukamfumye muno mu Eguputo nu kuya nzika ku matawa ukwalala ivikolwe vyane.”
Yosefu aasuka ati, “Endi, ndacita wakwe vino walanda.”
31Lyene Yakobo anena Yosefu ati, “Lapa mulapo ukuti ulacita vii.” Alino Yosefu alapa mulapo, nga Yakobo ainama pa musanzi wakwe, ataizya.
Currently Selected:
Utandiko 47: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
