Utandiko 49
49
Amazwi yakwe Yakobo akusyalikizya
1Yakobo atuma umwi kuti aame ana yakwe onsi, nga lino yiiza ayanena ati, “Palamilini kunondi muleke munene vino cilamucitikila mu manda akwiza:”
2“Konganini nga muvwe, mwe ana aonsi yakwe Yakobo.
Uvwini kuli so Izlaeli.
3“Lubeni, wewe iyeli lyane nupya maka yane,
Nupya wewe mwana wane uwankolelo mu kuvyalwa.
Waluta ana yane yonsi mu kucindama nu mu maka.
4Uli wa luzi lwa mukuku,
lelo utalacindama ukuluta anyonko.
Pamulandu wakuti walongwizye nu muci wane namuze
nga nu kusaalula musanzi wakwe so.
5“Simeoni na Levi aina.
Ni vyanzo vyao impanga zino yakaomvya mu kucita impanzela.
6Nemo ntangalemana nayo mu kulanzyanya kwao kwa mu nkama.
Nupya ntangatola imbali nanti imwi mu maukongano yao.
Pamulandu wakuti yakomile antu mu ukali,
nupya yalemalike yamasaye ku mufulo sile.
7Citipu ciye pa ukali wao, pano wene ukaoofya cuze,
nupya citipu ciye pa cipyu cao pano cakalalisya cuze.
Ndayapasila mu nko zyakwe Yakobo,
nu kuyasalanganyizizya mu nko zyuze zya ina Izlaeli.
8“We Yuda, anyonko yalakulumbanya.
Ulacimvya anisi yako.
Nupya anyonko yalakufukamila yakucindike.
9 #
Mpe 24:9; Umb 5:5 Yuda akoline na cisama,
wino akakoma inyama atwala ku ninga,
Yuda akoline na cisama akalambalala pansi ainyunza.
Wene akoline na cisama, nga kusi umwi angapama ukumuzyula.
10Intuwa ya wene ilikala mu makasa yakwe Yuda amanda pe,
nga na amu mupanda wakwe yalateeka amanda pe.
Inko zilaleta vya mawila kunoli.
Nga yalamuvwila nu kumufukamila.
11Akanyepelela mwana punda mu calo ca matingi.
Mu matingi asuma cuze.
Pano waini wavula ngati amanzi kunoli,
Yuda angafula vyakuzwala vyakwe mwenemo.
12Manso yakwe yaenza cee ngati uwazi pamulandu wakumwa waini.
Mino yakwe yaswepa mpee pamulandu wa kumwa iziya.
13“Zebuluni alikala mumbali yakwe yemba.
Mu nkumba ino Zebuluni alikalamo lilaya ilambwa lyakufisamo amato.
Mpanga yakwe ilafika mpaka nu ku Sidoni.
14“Isakali wene ali wakwe punda wamaka punda wino
akalambalala ainyunza ala ali ni visendo pi tundu lyakwe.
15Lelo akalola ukuti impanga ya upuzo isuma.
Nupya akalola ukuti impanga ya upuzo uluzango.
Caleka akatembelela kuti asende cisendo.
Fwandi wapatikiziwe ukuomba wa muzya.
16“Dani alaya kateeka wa antu yakwe.
Antu yaa yalaya wa mitundu yuze yamu Izlaeli.
17Dani alaya wa nzoka ino ilambalile mumbali ya museo.
Alaya wa nzoka ya usungu ili mumbali ya nzila iluma kwi kulu
lya mfwalisi pakuti wino akwezilepo asumbwe icisila.
18“We Yawe, nkalolela ufyusi wako.
19“Gadi alazanzwa ni umba lya ivi,
lelo alayasenukila nu kuyazinganya.
20“Mu mpanga yakwe Asyeli mulafuma vilimwa visuma.
Alafumya ivyakulya vilinzile ukulya umwene.
21“Nafutali ali wa mpelembe ino ikasimula konsi kuno itemilwe,
Nafutali ali wa mpelembe ino ikavyala ana asuma.
22“Yosefu akoline wa muti uno ukaseeka,
muti ukaseeka uno uli pipi ni ntulo ya manzi.
Misambo yakweo ikatambilizya pa lung'umba.
23Anisi yakwe yamoofizye nu kumuzanza,
yamuzinganya na malapwa yao.
24Lelo ulapwa wa mwi kasa lyakwe utatazile utente,
nga na makasa yakwe akome.
Ku maka yakwe Leza Wamaka yonsi wakwe Yakobo,
Leza wi ali Mucemi, nupya cisyangu cakwe Izlaeli.
25A Leza wakwe so akakwazwa,
Leza Wamaka yonsi akakupolelela
akalenga kuti imvula iyatonya mu vyalo vyako
akalenga kuti tufukoka tuye na manzi.
Akalenga kuti uye ni ng'ombe na ana avule.
26Vintu visuma vino ulapokelela mu upolelelo uu
vilavula cakuti vilavimba myamba ikulu.
Nupya vilavimba twamba,
si upolelelo onsi uye pali Yosefu,
uye pa mpumi yakwe wiyo wino wapaatulwa ukufuma ku ina yakwe.
27“Benjamini ali wa mumbulu uno wapondoka.
Uno ukakoma inyama katondo,
na manguzi nu kuconcoma.”
28Yaa ali antu apanga mitundu ikumi na iili ya ina Izlaeli, nupya vii ali vino isi wao walondolwile kuli cila muntu mu mazwi yakwe akupakasya.
Kufwa nu kuzikwa kwakwe Yakobo
29Lyene Yakobo apeela ilamulo ku ana yakwe aonsi ati, “Ndakai nkulola indi pipi nu kufwa. Caleka nkumunena kuti mukanzike ukwalala ivikolwe vyane mwi cele lya mu calo cakwe Efuloni mwina Hiti, 30#Uta 23:3-20 mu musonso waku Makipela lwaku ufumondaka wakwe Mamule mu mpanga ya Kenani. Abulaamu wakazile icele li pamwi ni calo kuli Efuloni umwina Hiti kuti kuye ku matawa. 31#Uta 25:9, 10; Uta 35:29 Kuku ali kuno yazika Abulaamu na Sala umuci wakwe. Kuku ali kuno yazika Isaki na Labeka umuci wakwe. Kuku ali kuno nazika Leya. 32Icalo nga ni cele ilyayamo vyakazilwe ku mwina Hiti. Kuku kwene akuno muce mukanzike.” 33#Mil 7:15 Lino Yakobo wamalila kutungulula ana yakwe aonsi mu mazwi, alala pa musanzi wakwe, nga afwa.
Currently Selected:
Utandiko 49: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
