Aŋasa 30
30
Agɔr be aŋasa
1Jake pibi Agɔr be kubɔya nde.
Esa ko bee ponte a kaŋɛ Ebɔrɛ le:
“Ma eleŋ loge, ma eleŋ loge.
2N duli kusɔbɔya a chɔ dimɛdi;
M maŋ naa kɔ dimɛdi be nfɛra
3M maŋ kɔ kanyiasheŋ,
ma alɛ maŋ nyi shɛŋ a laŋɛ
Ebɔrɛ be kaplɛa so.
4Wanɛ e dii n yɔ Ebɔrɛ so m bɛta m ba?
Wanɛ e tiŋ m pɛ afu n wɔtɔ enɔ to?
Ŋko ŋ gbargbar nchu
n wɔtɔ mbe kusɔbuuso to?
Wanɛ e ta kasawule n yili kumo be eyilikpa?
Loŋ be esa be ketre
ŋko mo pibi be ketre e la nuso?
Nɛ fo nyi, fo kaŋɛ ma.
5Ebɔrɛ be kamalga kikɛ la kashenteŋ nna.
E la kusɔ kuŋso nna n sa bekama
nɛ baa shile a ba mo kutɔ
m baa ka fin kekuŋ na.
6Sa maŋ ta shɛŋ n ti mbe m mmalga so,
mannɛ aloŋ, e beeŋ fiɛ fo so n ta fo ŋ ki efɛpo.”
7Enyɛnpe Ebɔrɛ, asɔ anyɔ nɛ mee kule
fanɛ fo wora n sa ma
pɔɛŋ nɛ n wu.
8Sa maŋ shin nɛ ŋ ki efɛpo
Fo alɛ e sa maŋ shin nɛ m baa la
etirpo ŋko damawura.
Baa sa ma kacha kama be kusɔ jiso.
9Saŋɛ na so maaŋ ki damawura
nseŋ teŋ fo so
ŋko nɛ ketir e shin nɛ n ya yuri n jija fo ketre.
10Sa maa debɔr kayɛrbi a ŋini mo nyɛnpe,
nɛ mannɛ aloŋ
e beeŋ sho fo kɔnɔ nɛ fo ji awurfoŋ.
11Basa ko bee sho bumo tutoana kɔnɔ nna
nsaa maa keni bumo nioana a bɔlɔ kenishi.
12Beko malɛ bee fɛ fanɛ
baa wora asheŋ nɛ a niŋi nna
ama alubi damta e bɔlɔ bumo to.
13Basa ko bee wu bumo be amu nna
a maa keni basa a bɔlɔ kenishi.
14Basa ko be kebaawɔtɔ e la
kebaa kɔ kumu kpakpaso
a mɛaŋ betirpo nɛ bebɔlpo.
15Kejimuni la mborobicheso anyɔ nna.
Bumo kikɛ be atre e la: ‘Ta n sa ma.’
Asɔ asa e wɔtɔ a maa moɛ.
Asɔ ana malɛ e maa kaŋɛ fanɛ a kukwe loŋ.
16Amo e la, nchaŋ, nɛ eche egbentepo,
nɛ kasawule wɔlso,
nɛ edɛ nɛ esa maaŋ naŋ tiŋ n duŋ.
17Ejita e naŋ ji
bekama nɛ baa fɛl bumo tutoana
nsaa keni bumo nioana jiga na
be eblaŋ kupuŋ to.
18Asɔ ana e naa wul ma nfɛra to
a shin nɛ maa pin asheŋ to.
19Amo e la, kananɛ kusore bee firgi,
nɛ kananɛ kuwɔ bee gbeye ajembu so,
nɛ kananɛ teku so be ekuloŋgboŋ
bee wu a yɔ kakpa nɛ k bee yɔ,
nɛ kananɛ enyɛn nɛ eche bee sha abar.
20Eche nɛ e bee lar mo kul kaman be da
e la keji nseŋ kpra kɔnɔ so
ŋ kaŋɛ fanɛ e maŋ wora kulubi.
21Asɔ ana nɛ kasawule maa tiŋ a nyiti
nsaa kpal amoso a gbuŋgbuŋ to.
22Amo e la, kenya ka ki ewura,
nɛ ewulpo ka ji m moɛ,
23nɛ eche nɛ basa maa sha ka nya ekul,
nɛ kebita nɛ e suge mo chepe mo kul.
24Asɔ fimfimbi ana e wɔ kasawule so
a kɔ kanyiasheŋ ga.
25Atutulombi maŋ kɔ eleŋ
ama amo alɛ bee fin amo be ajibi a yili dɔchubɔrɛ so nna.
26Kukukaka maŋ shi
kumo alɛ bee tiŋ a futi kedibi a luri to.
27Elotɔr maŋ kɔ ewura,
amo alɛ nsaa bɛ abar so
kenimu kenimu so fanɛ esoji na.
28Ketigbolu maŋ la shɛŋ
kumo alɛ bee nya ekpa a luri ewurkpa.
29Asɔ ana e naa wora asheŋ fanɛ bewura,
nsaa tia awurya.
30Buluŋ nɛ e la asɔbɔya to be enyɛn
nsaa maa tu shɛŋ a bɛta kaman na,
31nɛ kananɛ kaboelote bee nite,
nɛ kananɛ koshinyɛn bee nite,
nɛ ewura nɛ mbe benapo kulti mo.
32Nɛ fee puchi nsaa kɔ kumu kpakpaso
nɛ kawuli a kre asheŋ lubi
fo yige amo be kewora.
33Fo bri kenyipochu to a beeŋ lar ŋku
Fo ŋmɛa fo kamuna
k beeŋ gbege n lar ŋklaŋ.
Aloŋ nɛ fo wɔtɔ basa agbo to,
kolu beeŋ ba.
Currently Selected:
Aŋasa 30: GJNb
Highlight
Share
Compare
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
