Aŋasa 31
31
Ewura Lamwɛl be aŋasa
1Kanyiasheŋ be mmalga
nɛ Masa be ewura Lamwɛl mo nio ŋini mo nde.
2M pibi Lamwɛl, kabɔrɛkule so nɛ
m bɔla n nya fo;
amoso kaŋ kusoe n nu kusɔ
nɛ mee shin nɛ ŋ kaŋɛ fo ere.
3Sa maa ta fo eleŋ a jija a bɛ beche so.
Beche ko bee da bewura nna a lɛ.
4A maŋ daga bewura nɛ bejuŋkparpo
ka bee nuu nsa a boo
ŋko a sha nsa ga.
5Nɛ mannɛ aloŋ baaŋ boo
nseŋ teŋ efuli be mbra
nɛ edaŋkaresheŋ so
nsaa maaŋ tiŋ n ji kashenteŋ
n sɔ bumo nɛ basa bee mɛaŋ na n yige.
6Yige nsa n sa bumo nɛ
b maŋ naa kɔ tama kikɛ
nsaa yɔ kemur to na.
7Shin nɛ loŋ be basa
e baa nuu nsa a boo
a teŋ bumo be ketir nɛ awurfoŋ so.
8Baa malga a sa bumo nɛ
b maa tiŋ a malga a kuŋ
bumo be amu na
nsaa kɔ a sa bepɔshipo.
9Baa ji demu nɛ kumo be ekpa so
a sa betirpo
nɛ bumo nɛ b maŋ la shɛŋ na.
10Eche nɛ e kɔ da lela
a tiŋ a wora asheŋ nɛnɛ maa tiŋ a nya.
E bɔ shuwa nɛ gbiti.
11Mo kul bee yirda mo nna
a maa fɔŋ shɛŋ shɛŋ so.
12Eche na be kebaawɔtɔ to kikɛ
asheŋ lela nawule
nɛ e bee wora mo kul.
13E maa chena jiga.
Saŋkama e bee fɛa nna a lue ewajɛ.
14E du fanɛ yawujipo nna
a fin ajibi kaplɛkama a ba epe.
15E bee wule a koso nna a wora ajibi
a sa mbe laŋ to ebi pɔɛŋ nɛ kare bee cha,
nsaa ŋini mbe mbita ashuŋ nɛ
baaŋ baa shuŋ.
16Mo gbagba e naa nite a fin
kasawule lela a tɔ
nsaa ta mbe amansherbi a nase kudɔ.
17E bee pre kenishi nna a shuŋ
nsaa ta mbe eleŋ
a wɔtɔ kusɔ kama nɛ e bee wora to.
18E bee ji yawu nna a nya tɔnɔ
nsaa shuŋ a fo kiidiso.
19Mo gbagba e naa fɛa jese a lue ewajɛ.
20E bee bugi enɔ nna a chɛ betirpo
nɛ bumo nɛ asheŋ bee pɔɔ bumo so to.
21E maa fɔŋ awo so
ŋkpal manɛ so mbe laŋ to ebi kikɛ kɔ awo to be asɔbuuso.
22Mo gbagba e naa baa mbe asɔbuuso,
nsaa buu asɔ lela fanɛ ago be ewajɛ.
23Mo kul bee nya kemaŋkura nna
nsaa tiŋ a luri kade be benimu to.
24E bee lue ewajɛ nɛ eshata nna
a fa a sa eyawujipo.
25E kɔ eleŋ nna
nsaa sa mbe kumu bunyaŋ;
e maa fɔŋ echefoso be asheŋ so.
26E kɔ kanyiasheŋ nna
nsaa fɛ nfɛra pɔɛŋ a malga.
27E bee keni mbe laŋ to ebi so nɛnɛ nna,
mo alɛ maŋ kɔ ntɔl.
28Mbe mbia bee puchi mo so nna
nɛ mo kul bee kpaŋ mo a kaŋɛ le:
29“Beche damta bee wora asɔ
ama fo peya chɔ bumo kikɛ.”
30Kebita bee loge,
nɛ kela bee chɛrga,
ama eche nɛ e bee sha Ebɔrɛ bre
daga k baa fur nna.
31Shin nɛ loŋ be eche be asheŋ
e baa bɔlɔ fo kenishi
nɛ fo baa kpaŋ mo basa to.
Currently Selected:
Aŋasa 31: GJNb
Highlight
Share
Compare
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
