Aŋasa 29
29
1Fo baŋ wora kumu kpakpaso ŋ kini kenu kasokpele damta,
k maaŋ chɛr nɛ fo mur.
2Asheŋ baa nyala a sa basa niŋiso
basa kikɛ be ŋgbene bee fuli nna,
ama basa lubi baa ji kuwura basa bee shuto nna.
3Esa nɛ e bee sha kanyiasheŋ
bee bar mo tuto kagbenefuli nna,
ama esa nɛ e ju a buu e sakaleche so bre
be kanya bee mur nna.
4Ewura nɛ e bee ji kashenteŋ
be efuli kɔ eleŋ nna,
ama emo nɛ e kɔ kejimuni
nsaa sɔ brɔbu bre be efuli bee bure nna.
5Esa nɛ e bee malga mmalga belbelso
nɛ a maŋ la kashenteŋ a sa mo braana
bee sho mbe kumu kejigbelɛ nna na.
6Belubiworapo be alubi
e naa kilgi a pɛ bumo,
ama basa nɛ baa wora asheŋ nɛ a niŋi bre
bee boŋ kagbenefuli be nshɛ nna.
7Betirpo be kenya kashenteŋ be asheŋ tir ga
n sa basa nɛ baa wora asheŋ niŋiso nna,
ama belubiworapo bre be shɛŋ
maŋ wɔ loŋ to.
8Basa nɛ baa wora basa eyurto
bee bar kebagato kade to nna,
ama benyiashempo bre bee shin nɛ agbo bee wushi nna.
9Enyiashempo baŋ yɛr ewulpo ewurkpa,
ewulpo na beeŋ ya kaa mushe chilchil n jija demu na.
10Emɔpo maa sha basa nɛ baa wora
asheŋ nɛ a niŋi be asheŋ.
Saŋkama e bee fin bumo nɛ e mɔ nna.
11Ewulpo e naa nya agbo
a puŋi kɔnɔ basa to,
enyiashempo bre nya agbo gba
fo maaŋ pin.
12Ewura nɛ e bee nu efɛ
be beyaasepo bee ki basa lubi nna.
13Enyɛnpe Ebɔrɛ e naa sa etirpo
nɛ esa nɛ e bee mɛaŋ mbe basa kikɛ anishi nɛ baa wu.
14Ewura nɛ e bee ji betirpo be demu
nɛ kumo be ekpa so
beeŋ ji kuwura n chɛr.
15Keŋini be kasogberge
bee sa kebia kanyiasheŋ nna,
ama kebia nɛ b yige nɛ e bee wora mbe kepar
bee wɔtɔ mo nio anishinyɔr to nna.
16Belubiworapo baa ji kuwura,
alubi bee wora keshi nna,
ama basa nɛ baa wora asheŋ niŋiso
e naŋ wu bumo be ekar.
17Fo baa gberge fo mbia kusoe
a ŋini bumo asheŋ
baaŋ sa fo kasotowushi nɛ kagbenefuli.
18Efuli be basa baa maa bɛ
Ebɔrɛ be keŋini so,
mbra be kebɛso
nɛ kebaa wora asheŋ nɛ a niŋi maa wɔtɔ.
Ebɔrɛ bee nɛfa basa kama
nɛ baa bɛ mbe mbra so nna.
19Kamalga nawule maaŋ tiŋ ŋ ŋini
kayɛrbi ekpa.
Hale e pin asheŋ to gba e maaŋ wora
kusɔ nɛ k daga.
20Ewulpo be asheŋ kɔ tama
a chɔ esa nɛ e bee kuse a malga.
21Fo baŋ yili kayɛrbi be kebia to n di mo kefɛ,
e beeŋ bar fo kebɔltofinfin kacha ko.
22Esa nɛ e bee nya agbo manaŋ manaŋ
bee bar kebagato nna,
nsaa wora a foe ekpa manaŋ manaŋ.
23Kamoowu bee bar esa kaseto nna,
ama kamoobarase bee sa esa kemaŋkura nna.
24Esa nɛ e bee tu eyu a yuri
la mo gbagba be kumu so be edoŋ nna.
Ŋkpal manɛ so, nɛ b bɔ ntaŋ n lɛ mo so gba
e maaŋ tiŋ n ji kashenteŋ.
25Sa maŋ shin nɛ kusɔ nɛ basa bee fɛ
a laŋɛ fo kaplɛa so e baa tir fo.
Yirda Ebɔrɛ nɛ e baa kuŋ fo.
26Esa kama bee sha fanɛ e ji ewura keteri nna,
ama Enyɛnpe Ebɔrɛ nawule
e naa shin nɛ
ewura bee wora asheŋ nɛ a niŋi.
27Basa nɛ baa wora asheŋ nɛ a niŋi
kishi belubiworapo ga.
Nɛ belubiworapo malɛ gba kishi basa
nɛ ba wora asheŋ nɛ a niŋi.
Currently Selected:
Aŋasa 29: GJNb
Highlight
Share
Compare
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
