Aŋasa 27
27
1Sa maa puchi echefoso,
ŋkpal manɛ so fo maŋ nyi
kananɛ asheŋ beeŋ ba du echefo.
2Shin nɛ basa pɔtɛ e baa kpaŋ fo,
fo gbagba e sa maa kpaŋ fo kumu.
3Ewulpo be kewɔtɔ esa agbo to
wɔgbɛ a chɔ e ka sulɔ ajembu nɛ leele.
4Esa nɛ e bee nya agbo manaŋ manaŋ
lubi a chɔ,
esa nɛ e bee kɔ kukɔrkɔ lubi.
5Keji esa kashenteŋ kpakpaso
bɔ kebaa sha mo ŋgblaŋto.
6Eteri lela be kefiɛso bɔ edoŋ ka lela fo so.
7Fo baŋ ji m moɛ,
mushoŋ gba maŋ naa wora fo keji,
ama nɛ akoŋ kɔ fo feeŋ ji ajibi kama.
8Esa baŋ lar laŋ to,
e du nna fanɛ kabuibi ka lar kesha to na.
9Tulale nɛ efɛa belbelso be duwu
bee sa kagbenefuli nna,
ama a maŋ fo eteri lela be kasotoji so.
10Sa maŋ kplaŋ fo teri
ŋko fo tuto mo teri so.
Fo alɛ e sa maŋ yɔ fo niopibi nɛ
e wɔ kufɔ kutɔ n ya kaa fin kechɛto
tɔrɔ be saŋɛ.
Eteri nɛ e taga fo to
beeŋ tiŋ n chɛ fo to a chɔ
fo niopibi nɛ e wɔ kufɔ.
11M pibi ba kɔ kanyiasheŋ,
nɛ kumo be loŋ e sa ma kagbenefuli
nɛ n nya kɔnɔ n tuge
esa kama nɛ e bee malga a gbiti ma to.
12Enyiashempo bee gelge asheŋ nna,
ama esa nɛ e maa pin asheŋ to
manaŋ manaŋ bre bee suse amo to nna.
13Esa baŋ ta mbe kusɔbuuso
n nase tarma n ji kukɔ n sa efɔ,
nɛ efɔ na baŋ maŋ tiŋ ŋ ka kukɔ na
fo sɔ amodoŋwura be kusɔbuuso na
n tal to.
14Awɔr be kecha n chɔrɔ esa chipurdidi
beeŋ tiŋ a la tɔrɔ n sa
esa nɛ fee chɔrɔ na ekpa ko so.
15Eche elushapo du fanɛ
bɔrɛfurbi nɛ k maa teŋ manaŋ nna.
16Keshin nɛ e yige kolu
du fanɛ kekuŋ afu ekpa nna,
ŋko keta enɔ n jɔ ŋkuchu.
17Kananɛ baa ta kebɛlso a yee kebɛlso na,
aloŋ nɛ beteri bee chɛrga abar be nfɛra.
18Fo baŋ keni kedibisɔrso so nɛnɛ
feeŋ ji kumo be asɔrso.
Fo baŋ keta fo nyɛnpe nɛnɛ
feeŋ baa nya kechɔrɔ saŋkama.
19Kananɛ fee keni nchu kleŋklembi to
a wu fo kumu na,
aloŋ nɛ fo kagbene bee ŋini
esa nɛ e la fo kashenteŋto.
20Kananɛ luwu nɛ nchaŋ maa moɛ na,
aloŋ nɛ dimɛdi maa nya asɔ a moɛ.
21Kananɛ baa ta edɛ a keni a pin
shuwa nɛ gbiti be kela na,
aloŋ nɛ esa be kefur gba
beeŋ tiŋ n shin nɛ fo pin mbe da.
22Kebri maaŋ tiŋ n ju kawuli ashi esa to.
23Baa keni fo mbolpɔ nɛ mboe so nɛnɛ,
24ŋkpal manɛ so kanya
nɛ kemaŋkura maaŋ baa wɔtɔ mbaanaayɔ.
25Fo baa kuya afitiri a sa fo asɔbɔya
nɛ a bee laŋɛ a purge nɛnɛ,
26feeŋ nya mbɔlpo nɛ mboe
n fa n tɔ asɔbuuso nɛ kasawule.
27Fo alɛ nɛ fo mbia
nɛ fo nyɛrbi beeŋ naŋ nya kenyipochu damta n nuu.
Currently Selected:
Aŋasa 27: GJNb
Highlight
Share
Compare
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
