Aŋasa 26
26
1Ketarso be bɔrɛ kɔ tɔnɔ
a chɔ kesa ewulpo bunyaŋ.
2Kɔnɔsho nɛ k maŋ bɛ ekpa so
maaŋ tiŋ m pɛ esa.
K du nna fanɛ mbuibi ka firgi a choŋ na.
3Kananɛ baa ta kebarga nɛ chembi
a keta gbaŋɛ nɛ kurma a shuŋ na,
aloŋ nɛ ewulpo daga kuchuchɔ.
4Fo baa tuge ewulpo to,
baaŋ tre fo alɛ gba ewulpo.
5Shin nɛ ewulpo e pin mbe kawulisheŋ,
nɛ mannɛ aloŋ e beeŋ baa fɛ fanɛ
e nyi asheŋ nna.
6Keta kubɔya ŋ shuŋi ewulpo
du nna fanɛ
fo ka ku fo gbagba be aya so
ŋko fo ka ji kɔrtɔ nna.
7Ewulpo be keŋasa,
du nna fanɛ bobi be aya na.
8Ewulpo be kesa bunyaŋ
du nna fanɛ fo ka kre kejembu n wɔtɔ katebabu to nɛ fo to na.
9Ewulpo be keŋasa
du nna fanɛ ewi
ashi nsanuupo be enɔ to.
10Ewulpo nɛ e na chamcham a choŋ
be kebir paa
du nna fanɛ ekpampo ka bee to
asɔbɔya a lɛ jijiga na.
11Kananɛ jɔnɔ bee gbu
nsaa bɛta a ji amo na,
aloŋ nɛ bewulpo bee lɔŋɛ a tal bumo be kawulisheŋ to.
12Ewulpo bɔ esa nɛ
e bee tre mbe kumu enyiashempo,
mo alɛ nseŋ wuli.
13Etɔlpo e naa kaŋɛ fanɛ
buluŋ wɔ ekpa to so
e maaŋ yɔ ndɔ to.
14Kananɛ kukuloŋ yil epul to
a yɔ a ba na,
aloŋ nɛ etɔlpo bee dese gedo so
a kilgi a laŋɛ a dese.
15Lɔma be keku m min gba
du betɔlpo ko so gba kpakpa nna.
16Etɔlpo kikɛ bee fɛ nna fanɛ
e nyi asheŋ a chɔ basa damta.
17Keta fo kɔnɔ n wɔtɔ
kolu nɛ k maŋ la feya to,
du nna fanɛ fo ka bee gberge jɔnɔ
nɛ e maŋ nyi fo be kusoe na.
18-19Kefule esa nseŋ kaŋɛ fanɛ
fee pel mo nna,
du nna fanɛ ebompo ka bee to
atanyembi kpalakpala na.
20Ndibi baa maŋ wɔ edɛ to
edɛ na bee duŋ nna,
aloŋ nɛ ŋkuli baa maŋ wɔtɔ kolu bee ku.
21Kananɛ ndibi nɛ ajanwulɛ
bee shin nɛ edɛ bee nyɛrga na,
aloŋ nɛ elushapo bee keta kolu to a chɛr.
22Ŋkuli wɔ ebel ga
nɛ basa bee sha kumo.
23Kamalga belbelso
nɛ nfɛra lubi wɔ kumo be kaman
du nna fanɛ b ka ta shuwa
n fɛfa ebɔ be kusɔ so nɛ k bee nyɛkpɛ na.
24Esa lubi be kamalga belbelso so,
b maa pin fanɛ e kɔ nfɛra lubi.
25Kanaŋ kamaso nɛ
esa lubi be kamalga wɔ ebel,
sa maŋ kaŋ yirda mo.
26Kanaŋ kama nɛ e wora,
mbe nfɛra lubi na beeŋ lar efuli
nɛ ekama e pin kumo.
27Fo baa kur fo barkasa be kemaŋ,
fo gbagba e naŋ kilgi n tɔr kumo to.
Fo baa gbelti kejembu nɛ fo bɛa fo barkasa,
k beeŋ kilgi m bɛa fo gbagba.
28Esa nɛ fo kishi nɛ fee ku efɛ a deŋi.
Kefur esa kɔnɔ to
nɛ k maŋ shi kagbene to
du fanɛ fo ka mɔ mo ŋgblaŋ to nna.
Currently Selected:
Aŋasa 26: GJNb
Highlight
Share
Compare
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
