Aŋasa 28
28
1Basa lubi bee shile nna nsaa gbɛ a keni
fanɛ esa ko ka bee ju bumo na,
ama basa nɛ baa wora asheŋ niŋiso bre
bee nite kenyɛnso nna
fanɛ buluŋ na.
2Efuli be basa baa kɔ kumu kpakpaso,
baa chɛrga bejuŋkparpo manaŋ manaŋ nna.
Ama ejuŋkparpo nyiashempo bre
bee ji kuwura nna a chɛr.
3Ejuŋkparpo nɛ e bee mɛaŋ betirpo,
du nna fanɛ bɔrɛgboŋ
nɛ k bee jija adɔjibi na.
4Basa nɛ baa wora a da mbra so
e naa ji a chɛ belubiworapo to.
Basa nɛ baa bɛ mbra so bre
maa sha belubiworapo be asheŋ.
5Belubiworapo maŋ nyi
kananɛ baa wora asheŋ
nɛ amo be ekpa so,
mannɛ aloŋ nɛ bumo
nɛ baa ŋana Enyɛnpe Ebɔrɛ bre du.
6Kebaa la etirpo nsaa ji kashenteŋ bɔ
kebaa la damawura fɛpo.
7Enyiashempo e naa bɛ mbra so.
Esa nɛ e bee ta basa nɛ b maa fɛ nfɛra
pɔɛŋ nsaa wora asheŋ keteri,
bee wɔtɔ mo tuto anishinyɔr to nna.
8Esa kama nɛ e bee wɔtɔ basa nɛ
b paŋ mo amansherbi nchu ga,
be kapetɛ beeŋ yɔ esa nɛ
e bee wu betirpo kuwɔr kutɔ.
9Ebɔrɛ maa nu esa nɛ e maa bɛ
mbra so be kabɔrɛkule.
10Esa kama nɛ e bee ŋin basa nɛ
baa wora asheŋ nɛ a niŋi a wɔtɔ alubi to,
beeŋ tɔr kejigbelɛ nɛ mo gbagba sho to,
ama esa nɛ e maŋ kɔ alubi
beeŋ ji kapetɛ lela.
11Damawuraana bee fɛ nna fanɛ
b nyi asheŋ,
ama etirpo nɛ e bee pin asheŋ to
beeŋ tiŋ m pin fanɛ
mannɛ damawuraana kikɛ e nyi asheŋ.
12Esa lela baŋ ji kuwura
basa bee ji eyur nna,
ama esa lubi bre baŋ ji kuwura
basa bee shile nna a ŋana.
13Esa kama nɛ e bee ta mbe alubi a ŋana
maaŋ yɔ anishito kikɛ,
ama Ebɔrɛ beeŋ wu esa nɛ e bee bugi to
a kaŋɛ mbe alubi
nsaa tuba a lar amo to bre kuwɔr.
14Esa kama nɛ e bee ŋana Ebɔrɛ
bee nya nɛfa nna,
ama esa kama nɛ e kɔ kagbene kpakpaso
bre bee luri asheŋ to nna.
15Ewura lubi nɛ e bee tɔrɔ betirpo
du nna fanɛ buluŋ nɛ e bee ponte to na,
ŋko shishiri nɛ akoŋ kɔ.
16Ewura nɛ e bee mɛaŋ mbe basa
maa ji asheŋ nɛ amo be ekpa so,
ama emo nɛ e maa sha kapuni bre
beeŋ ji efute tenteŋ.
17Esa kama nɛ e mɔ esa,
be nfɛra beeŋ baa ji a bri mo
hale nɛ e ya wu.
Mo alɛ maaŋ nya kechɛto kikɛ.
18Kashenteŋji bee kuŋ esa nna,
ama esa nɛ e maŋ niŋi bre bee tɔr manaŋ manaŋ nna.
19Edɔpo nɛ e pre kenishi a shuŋ
beeŋ nya ajibi yɛlyɛla so,
ama basa nɛ baa jija bumo be saŋɛ bre
nɛ ketir e naa ba la saŋkama.
20Ebɔrɛ beeŋ nɛfa bekama
nɛ baa ji kashenteŋ,
ama E beeŋ gberge bekama
nɛ baa sha fanɛ b bɔla ekpa lubi so
n dii dama manaŋ na kusoe.
21Ŋkpɛato maŋ walɛ,
ama brɔbu fimbi beeŋ tiŋ n shin nɛ
basa ko e wora kusɔ nɛ k maŋ daga.
22Esa kama nɛ e bɔlɔ miri so n dii dama
beeŋ ki etirpo.
23Ji esa kashenteŋ nɛ
e chɔrɔ fo echefoso a chɔ
kemalga efɛ be mmalga nɛ a beeŋ wora mo ebel.
24Esa kama nɛ e bee fɛ fanɛ,
keyuri mo tuto ŋko mo nio maŋ la kulubi
maŋ kɔr eyu pɔtɛ to.
25Bejimunipo bee baga asheŋ to nna,
ama asheŋ beeŋ nite nɛnɛ n sa esa kama nɛ
e ta mbe yirda n deŋi Enyɛnpe Ebɔrɛ so.
26Esa kama nɛ e ta mbe yirda n deŋi
mo gbagba be kumu so la ewulpo nna,
ama ekama nɛ e bee sɔ benyiashempo
be mmalga, beeŋ nya kekuŋ.
27Esa kama nɛ e bee bugi enɔ a kɛ betirpo
maaŋ fin shɛŋ ŋ gben,
ama basa damta beeŋ sho ekama
nɛ e bee kplaŋ betirpo so kɔnɔ.
28Esa lubi baŋ ji kuwura
basa bee shile nna a ŋana,
ama b baaŋ gboŋi mo kuwura bre
basa nɛ baa wora asheŋ nɛ a niŋi
bee nya bumo be amu nna.
Currently Selected:
Aŋasa 28: GJNb
Highlight
Share
Compare
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
