Aŋasa 18
18
1Kebaafɛ fo nawule be kumu so be asheŋ,
nɛ kekini kesɔ esa pɔtɛ be nfɛra
la kejimuni nɛ kawulisheŋ nna.
2Ewulpo e naa kini asheŋ be kepin to,
nsaa kaŋɛ fanɛ mo nawule be nfɛra e walɛ.
3Kulubi nɛ anishinyɔr e wɔ aya.
Alubiworapo kikɛ nɛ nyɔmɔ nna.
4Enyiashempo be mmalga du fanɛ ketirbu chiŋgeliŋ to be nchu
nɛ a bee bul a teŋi a shile eleŋso fanɛ kabombi nna.
5Alubiworapo maŋ daga kesɔ n yige ashi kasogberge to,
esa nɛ e maŋ wora n jija malɛ maŋ daga kemɔn kashenteŋ.
6Ewulpo be kudonduloŋ bee wɔtɔ mo asheŋ to nna,
nɛ mbe kɔnɔ malɛ bee bar mo kebri.
7Ewulpo be mmalga e naa ki fanɛ efɔl a kre mo,
nɛ mbe atuwebi malɛ bee gberge mo a wɔtɔ asheŋ to.
8Ŋkuli wɔ ebel ga; nɛ basa bee sha kumo.
9Etɔlpo nɛ esa nɛ e bee jija asɔ kikɛ la kukoŋwule nna.
10Enyɛnpe Ebɔrɛ du fanɛ
ketempreŋ kuŋso nna nɛ basa
nɛ baa wora asheŋ niŋiso bee shile a yɔ mo kutɔ n ya kaa nya kekuŋ.
11Damawuraana bee fɛ nna fanɛ
bumo be amansherbi e naa kuŋ bumo
fanɛ kananɛ baa pɔr egbal a kulti kade a kuŋ kumo na.
12Kamoowu bee yɛr esa kemur to nna;
ama kamoobarase bre bee sa esa kemaŋkura nna.
13Esa kama nɛ e maa kaŋ kusoe
a nu asheŋ nɛnɛ pɔɛŋ nsaa tuge amo to
la ewulpo nna nɛ anishinyɔr bee tiŋ a ji mo.
14Kagbenefuli bee chɛ to nna a sa esa alenfia ashi kulɔ to;
fo baŋ paŋ kumo, kumo ere fo tama loge.
15Enyiashempo kikɛ bela ase nna nɛ e koya asheŋ saŋkama.
16Kakɛ bee bugi ekpa nna a sa esa,
nɛ e bee tiŋ a yɔ basagboŋ kutɔ.
17Esa baŋ juŋkpar m malga ashi demujikpa,
fee fɛ nna fanɛ mo e kɔ kashenteŋ ama mo barkasa gba baŋ malga nna.
18Basa anyɔ baa gberge demu to nɛ k maa nya edesekpa,
kesulgeso e naŋ ku demu na to.
19Keyɔ eteri nɛ fo wora n da so kutɔ n ya fin kechɛto
du kpakpa a chɔ kebure n luri kade nɛ b pɔr egbal ŋ kulti to.
20Kɔnɔlelawura maa wora n daa nyi nna kikɛ.
21Atugebi beeŋ tiŋ m mɔ esa,
ŋko n sa mo ŋkpa;
Esa kama malɛ beeŋ nya mbe m malga be kakɔka.
22Fo baŋ nya eche fo nya kakɛ lela.
Eche lela la Enyɛnpe Ebɔrɛ be kakɛ nna.
23Etirpo bee kule nna pɔɛŋ nsaa nya kechɛto;
ama damawura bre bee malga kanaŋkama nna.
24Beteri damta beeŋ tiŋ n jija esa be kebaawɔtɔ;
ama eteri ko chɔ eniopibi.
Currently Selected:
Aŋasa 18: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
