Aŋasa 17
17
1Ŋ kaa bee ji nchu nɛ nfɔl nawule
nsaa kɔ kagbenewushi
bɔ ŋ kaa bee ji ebel nsaa wɔ
kagbenejija to saŋkama.
2Kenya nyiashempo
bee ji ebi wulpo so kuwura nna,
nɛ mo nɛ bibi e barga kapetɛ to.
3Edɛ nɛ baa ta a wora
shuwa nɛ gbiti a keni
a pin amo be kela;
ama Enyɛnpe Ebɔrɛ na
e naa wora
dimɛdi be kagbene a keni.
4Alubisheŋ bee wora
belubiworapo ebel nna
nɛ efɛ malɛ bee wora befɛpo ebel.
5Fo baa wora betirpo eyurto,
Ebɔrɛ nɛ E to bumo na
nɛ fee wora eyurto na.
Ebɔrɛ malɛ beeŋ gberge bekama
nɛ bumo braana be awurfoŋ
bee wora bumo ebel na kusoe.
6Benanabi du fanɛ
kuwurwuro nna n sa bumo nanaana;
nɛ mbia malɛ bee ji njɔŋ
ŋkpal bumo kurgepoana so so.
7Kananɛ kamalga nɛ k bee lar
anishi maaŋ tiŋ n shi
ewulpo be kɔnɔ to na;
aloŋ nɛ efɛ maŋ daga ewurjipo
be kɔnɔ to.
8Brɔbu bee shuŋ nna
fanɛ kananɛ baa shuŋ esa kushuŋ
nɛ e bee wora esa nɛ
e shuŋ mo kushuŋ na be aparsheŋ na.
K bee shin nna nɛ
asheŋ bee nite nɛnɛ a sa
esa nɛ e sa kumo na.
9Esa nɛ e bee ta asheŋ a paŋ
bee nya beteri damta nna;
ama esa nɛ e maa ta asheŋ a paŋ bre
bee paŋ beteri nna.
10Enyiashempo be kegbɛlɛ gba
bee shin nɛ e bee koya
asheŋ manaŋ manaŋ
a chɔ ewulpo be kebri
alɛ damta n ŋini mo asheŋ.
11Kumu kpakpasowura kutɔ
nɛ baa shuŋi belubiworapo
nɛ b kɔ kusoe kpakpaso
a kini kenu n sa na.
12Fo ka purgi buluŋ cheso
nɛ k bee yɛla kenishi to
a fin kumo pibi
bɔ fo ka tu ewulpo
a wora kawulisheŋ.
13Fo baa ta kulubi
a ka kelela be kukɔ,
alubi maaŋ lar fo laŋ to kikɛ.
14Emɔrɔ be kefara
du fanɛ nchu be gbi
ka bee shin nɛ k futi nna.
Lar kamɔrɔji to manaŋ
pɔɛŋ nɛ k kurge asheŋ n sa fo.
15Enyɛnpe Ebɔrɛ kishi bumo
nɛ baa malga a kuŋ belubiworapo,
nɛ bumo nɛ baa ku asheŋ a deŋi
basa nɛ b maŋ wora kulubi na ga.
16Amansherbi be kejija
a laŋɛ ewulpo be kekoya so
maŋ kɔ tɔnɔ,
ŋkpal manɛ so ewulpo maaŋ tiŋ
ŋ koya shɛŋ.
17Beteri bee sha abar nna;
nɛ bekurgepo malɛ
bee cha abar to ashi tɔrɔ to.
18Esa nɛ e maŋ kɔ lakal
e naa sɔ mo barkasa
be kukɔ a sulɔ mbe kumu.
19Elushapo kikɛ
maa barga alubi be kewora.
Fo baa puchi ga fee fin
asheŋ nna a sa fo kumu.
20Esa kama nɛ e maa ji kashenteŋ
maaŋ yɔ anishito kikɛ.
Efɛ bee bar esa tɔrɔ nna.
21Ebesa nɛ kagbenejija e
naa mɔ ewulpo mo tuto.
22Kebaa du wasawasa
bee teŋi esa be ŋkpa so nna;
ama saŋkama be kenishitogbir
bee ku esa be ŋkpa so
manaŋ manaŋ nna.
23Edemujipo lubiana nɛ baa ŋana a sɔ brɔbu na
maa tiŋ a ji demu nɛ kumo be ekpa so.
24Enyiashempo kikɛ bee pin kusɔ nɛ k daga kewora nna;
ama ewulpo bre maa tiŋ a yili mbe nfɛra kukoŋwule.
25Mbia wulpo bee wɔtɔ bumo tutoana ebesa to nna,
nsaa shin nɛ bumo nioana malɛ bee wora n daa nyi.
26Esa nɛ e maŋ wora n jija maŋ daga kasogberge;
nɛ esa nɛ e bee wora asheŋ nɛ a niŋi ekpa maŋ daga tɔrɔ.
27Enyiashempo maa malga ga.
E bee wora asheŋ boeŋ boeŋ nna.
28Hale ewulpo gba baa maa tuge asheŋ to chilchil
baa ta mo nna a yili enyiashempo be eyilikpa.
Currently Selected:
Aŋasa 17: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
