Aŋasa 19
19
1Fo ka bee ji kashenteŋ nsaa la etirpo
bɔ fo ka la ewulpo nɛ efɛpo.
2Kebaa sha kusɔ be kewora nsaa maa kɔ kumo be kenyi maŋ walɛ;
kewora gerger n to kusɔ n da malɛ maŋ kɔ tɔnɔ.
3Kawuli e naa yɛr basa ko tɔrɔ to
nɛ baa pɔlɔ Enyɛnpe Ebɔrɛ.
4Damawura bee nya beteri saŋkama nna;
ama etirpo bre mo teriana bee shile nna a ka mo.
5Efɛ be shɛdajipo ashi demujikpa maaŋ ta mbe kumu n ji
nɛ e maŋ nya kasogberge.
6Ekama beeŋ ba sha keji esagboŋ,
ŋko esa nɛ e beeŋ tiŋ n chɛ mo to keteri.
7Etirpo maŋ kɔ eniopibi, a bishi eteri.
Kanaŋ kamaso nɛ e pere kenishi a sha bumo baa shile nna a ka mo.
8Esa kama nɛ e bee fin kanyiasheŋ
bee sha mbe kumu nna na.
Esa kama nɛ e pere kenishi ŋ koya, asheŋ beeŋ nite nɛnɛ n sa mo.
9Efɛ be shɛdajipo ashi demujikpa maaŋ paŋ mbe kasogberge kikɛ.
Efɛpo malɛ kikɛ beeŋ mur.
10Ewulpo maŋ daga kedamaya;
Kenya malɛ maŋ daga keji ewurbi so kuwura.
11Kanyiti be keji la kanyiasheŋ nna.
Esa baŋ wora fo kulubi nɛ fo kplaŋ mo so,
k la kemaŋkura nna n sa fo.
12Ewura be agbo du fanɛ buluŋ ka bee ponte to nna
nɛ mbe kuwɔrwu malɛ du fanɛ bunyaŋ ka tɔr afitiri so.
13Kebia wulpo bee wɔtɔ mo tuto asheŋ to nna;
Eche nɛ asheŋ maa bɔlɔ kenishi
malɛ du nna fanɛ bɔrɛfurbi
nɛ k maa teŋ manaŋ.
14Esa beeŋ tiŋ n ji nwu nɛ amansherbi be kapetɛ;
ama Enyɛnpe Ebɔrɛ nawule e naa sa eche lela.
15Nɛ fo kɔ ntɔl nsaa dese a di,
akoŋ e naa mɔ fo.
16Bɛ Ebɔrɛ be mbra so nseŋ ji efute n chɛr.
Fo kplaŋ amo so feeŋ wu manaŋ.
17Kekɛ etirpo kusɔ
du fanɛ fo ka ta kumo m paŋ Enyɛnpe Ebɔrɛ nna;
Ebɔrɛ beeŋ ka fo kumo be kukɔ.
18Ŋini fo mbia kusɔ nɛ k daga pɔɛŋ nɛ b daŋ;
Fo baa maa gberge bumo kusoe a ŋini bumo asheŋ
fee mɔ bumo ŋgblaŋto nna na.
19Shin nɛ esa kama nɛ mbe agbo wɔ mo,
e ka mbe agbo na be kukɔ mo gbagba.
Nɛ fo baŋ ka kumo be kukɔ kelekoŋwule,
feeŋ baa ka mbe agbo be kukɔ saŋkikɛ.
20Esa nɛ e bee nu kasotoji nɛ keŋini,
bee ki enyiashempo nna.
21Dimɛdi beeŋ tiŋ ŋ kre ŋkre;
ama Enyɛnpe Ebɔrɛ be aparsheŋ e naŋ wora.
22Kusɔ nɛ dimɛdi bee fin e la kashenteŋji;
K baa la etirpo bɔ k baa la efɛpo.
23Fo baa wora Ebɔrɛ kasonu feeŋ ji efute tenteŋ;
Esa nɛ e bee ŋana Ebɔrɛ be kagbene bee dese mo nna;
e maa lɔ kufu.
24Ajibi be keku n ji gba du betɔlpo ko so kpakpa nna.
25Gberge kumukpakpasowura kusoe, nɛ esa nɛ e maŋ nyi e koya kebaawɔtɔ;
Ama kefiɛ enyiashempo bre so bee sa mo lakal nna.
26Kebia nɛ e bee yuri mo tuto,
nsaa ju mo nio ashi laŋ to bee ŋaba mbe kumu nna na.
27Fo baŋ yige kebaa koya,
feeŋ teŋ kusɔ nɛ fo nyi gba so.
28Efɛ be shɛdajipo bee kuŋ kashenteŋji ekpa nna;
Asheŋ lubi bee wora alubiworapo ebel nna.
29Kasogberge wɔtɔ nna
ŋkpal basa kpeŋso so.
Ewulpo kikɛ bee nya kebri nna.
Currently Selected:
Aŋasa 19: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
