Ɛksodɔs 7

1Ndoŋ nna nɛ Enyɛnpe Ebɔrɛ kaŋɛ Mosis le: “Keni meeŋ shin nɛ fo yili ma katelamu to n yɔ ewura Fɛɛro be anishito, nɛ fo da Ɛɛrɔn malɛ e malga n sa mo fanɛ anebi. 2Fo e naaŋ baa malga asheŋ nɛ ŋ kaŋɛ fo na kikɛ a sa Ɛɛrɔn nɛ mo alɛ e kaŋɛ Fɛɛro fanɛ e shin nɛ Israɛl be basa na e lar mbe kasawule so. 3Ama meeŋ shin nɛ Fɛɛro e wora mbe kagbene kpakpa. Hale nɛ n wora etɔɔnɛsheŋ nɛ emamachisheŋ damta m bɛ abar so ashi Ijipt be kasawule so gba, 4Fɛɛro kraa maaŋ nu n sa fo. Kumo be kaman meeŋ shin nɛ b wu ma eleŋ, nɛ m bar kasogberge kpakpaso damta Ijiptebi so pɔɛŋ nseŋ juŋkpar ma basa Israɛlebi be nnaŋana na n lar Ijipt be kasawule na so. 5Saŋɛ nɛ meeŋ bar kasogberge Ijiptebi so nseŋ lara Israɛl be basa ashi bumo to na pɔɛŋ nɛ baaŋ pin fanɛ ma e la Enyɛnpe Ebɔrɛ na.” 6Ndoŋ nna nɛ Mosis nɛ Ɛɛrɔn wora kananɛ Enyɛnpe baŋ ŋini bumo na gbagba chap. 7Saŋɛ nɛ Mosis nɛ Ɛɛrɔn daŋ malga n sa ewura Fɛɛro na nɛ Mosis daa la nfɛ aduburwa nna nɛ Ɛɛrɔn malɛ daa la nfɛ aduburwa nɛ asa.

Ɛɛrɔn be kekpabi na be asheŋ

8Le nɛ Enyɛnpe Ebɔrɛ daŋ kaŋɛ Mosis nɛ mo da Ɛɛrɔn: 9“Nɛ ewura Fɛɛro ka baŋ kaŋɛ menyi le: ‘Men wora kemamachisheŋ ko nɛ k ŋini fanɛ kusɔ nɛ men kaŋɛ ere la kashenteŋ nna.’ Fo kaŋɛ Ɛɛrɔn le: ‘Ta fo kekpabi na n lɛ Fɛɛro be anishito, k beeŋ kilgi kuwɔ.’ ” 10Ndoŋ nna nɛ Mosis nɛ Ɛɛrɔn yɔ ewura Fɛɛro kutɔ n ya wora kananɛ Enyɛnpe Ebɔrɛ ŋini bumo na. Ɛɛrɔn daŋ ta kekpabi na nna n lɛ Fɛɛro nɛ mbe benimu be anishito nɛ k kilgi kuwɔ. 11Ndoŋ nna nɛ Fɛɛro malɛ tre mbe benyiashempo nɛ ŋkilgiwuraana nɛ bumo alɛ gba ba ta bumo be ŋkilgi n wora loŋ gbagba chap. 12Ijipt be ŋkilgiwuraana na gba be ekama daŋ ta mbe kekpabi n wora ademansheŋ nna nseŋ ta amo n lɛ kasawule nɛ a kilgi awɔ. Ndoŋ nna nɛ Ɛɛrɔn be kekpabi nɛ k kilgi kuwɔ na bela bumo peyaana na kikɛ m min. 13Ama ade kikɛ be kaman Fɛɛro kraŋ wora kagbene kpakpaso nna nseŋ kini kenu n sa Mosis nɛ Ɛɛrɔn fanɛ kananɛ Enyɛnpe Ebɔrɛ kaŋɛ na.

Nchuana ka kilgi ŋklaŋ be asheŋ

14Ndoŋ nna nɛ Enyɛnpe Ebɔrɛ naŋ kaŋɛ Mosis le: “Fɛɛro be kagbene du kpakpa ga, kumo so nɛ e kini fanɛ e maaŋ shin nɛ basa na e yɔ na. 15Amoso wule n yɔ Fɛɛro kutɔ kachipurso, saŋɛ nɛ e lar a yɔ Nail be lɔr to na. Ta kekpabi nɛ k daŋ kilgi kuwɔ na ŋ keta n ya kaa jo mo lɔrkar. 16E kaŋ ba nɛ fo kaŋɛ mo le: ‘Enyɛnpe Ebɔrɛ, Israɛlebi be Ebɔrɛ na e shuŋi ma fo kutɔ fanɛ ŋ kaŋɛ fo fanɛ fo shin nɛ mbe basa e yɔ keshishɛrsawule so n ya bunyaŋ mo’, ama hale mbre fo maŋ naŋ nu n sa ma. 17Amoso Enyɛnpe Ebɔrɛ na yɛ: ‘Kesheŋ nɛ mee sha kewora ere e naaŋ shin nɛ fo pin fanɛ ma e la Enyɛnpe Ebɔrɛ na.’ Keni, meeŋ ta kekpabi nɛ k wɔ ma enɔ to ere ŋ ŋmɛa Nail be nchu ere so nɛ a kilgi ŋklaŋ. 18Meeŋ wora loŋ nɛ lɔr na to be ekɔrɔtɔ kikɛ e wu m bɛ a dufɛ nɛ Ijiptebi e nuu kumo to be nchu ŋ gben.” 19Kede be kaman nɛ Enyɛnpe Ebɔrɛ kaŋɛ Mosis le: “Kaŋɛ Ɛɛrɔn le: ‘Teŋi fo kekpabi na n shoŋi Ijipt be nchuana fanɛ eboŋana nɛ nchu be abɔr kursoana nɛ apaana nɛ edampuana nɛ atirbuana kikɛ nɛ a ki ŋklaŋ.’ Ijiptebi be asɔ nɛ baa saŋ nchu a wɔtɔ kikɛ fanɛ mpuya nɛ eboketi nɛ echeenshigboŋ nɛ egarwa kikɛ to be nchu beeŋ ki ŋklaŋ.” 20Ndoŋ nna nɛ Mosis nɛ Ɛɛrɔn wora kusɔ nɛ Enyɛnpe Ebɔrɛ ŋini bumo na. Ɛɛrɔn daŋ maŋ mbe kekpabi so ashi Fɛɛro nɛ mbe beyaasepoana na be anishito nna ŋ ŋmɛa Nail be nchu so nɛ nchu na kikɛ kilgi ŋklaŋ. 21Nɛ ekɔrɔtɔ nɛ a daa wɔ Nail be lɔr na to kikɛ wu nɛ nchu na fara a dufɛ puŋ puŋ puŋ nɛ Ijiptebi na nuu amo ŋ gben. Ŋklaŋ e daa la kaplɛkama ashi Ijipt to. 22Ndoŋ nna nɛ Ijipt be ŋkilgiwuraana malɛ gba ta bumo be ademansheŋ be ŋkilgi n wora loŋ koŋwule na nɛ Fɛɛro be kagbene naŋ ki kpakpa n ti so nɛ e kini kenu n sa Mosis nɛ Ɛɛrɔn fanɛ kananɛ Enyɛnpe Ebɔrɛ kaŋɛ na. 23Kede be kaman nɛ Fɛɛro kilgi n choŋ mbe laŋ to nɛ k maŋ tir mo gba kuraa. 24Ndoŋ nna nɛ Ijiptebi na kikɛ fara a kur a kur Nail be lɔr na be ekarso kikɛ a fin nchu nuuso ŋkpal b ka daa maŋ naa tiŋ a nuu lɔr na to be nchu so so.

25Enyɛnpe Ebɔrɛ ka jija nchu na be nchɛnshunu.

Currently Selected:

Ɛksodɔs 7: GJNb

Highlight

Copy

Compare