Ɛksodɔs 6

1Ndoŋ nna nɛ Enyɛnpe Ebɔrɛ kaŋɛ Mosis le: “Naniere bre feeŋ wu kusɔ nɛ meeŋ wora ewura Fɛɛro. Ŋkpal ma eleŋ nɛ ŋ kɔ na so, e beeŋ shin nɛ ma basa e yɔ. Kashenteŋ nɛ mee kaŋɛ fo na fanɛ meeŋ tintiŋ mo hale nɛ e ju bumo nɛ b lar mbe kasawule ere so.”

Ebɔrɛ ka naŋ tre Mosis be asheŋ

2Ebɔrɛ ka kaŋɛ loŋ n loge na nɛ e naŋ kaŋɛ Mosis le: “Ma e la Enyɛnpe Ebɔrɛ na. 3N daŋ lar men nananyɛnana Eebraham nɛ Aizek nɛ Jeekɔb so fanɛ Ebɔrɛ Elempo nna, ama n daa maŋ shin nɛ b pin fanɛ ma e la Enyɛnpe Ebɔrɛ na. 4Ade kikɛ be kaman nɛ ma nɛ bumo wora kɔnɔkoŋwule be ŋkre nɛ n nase kɔnɔ n sa bumo fanɛ meeŋ ta Keenan be kasawule nɛ b daa wɔ kumo so fanɛ befɔ na n sa bumo. 5Kede malɛ be buushi naniere bre n nu Israɛl be basa nɛ Ijiptebi nyaŋ n wɔtɔ a tɔrɔ fanɛ anya na be kushu nseŋ nyiŋi ma kɔnɔkoŋwule be ŋkre be kɔnɔ naseso na. 6Ŋkpal loŋ so, kaŋɛ Israɛl be basa na fanɛ ŋ kaŋɛ fanɛ: ‘Ma e la Enyɛnpe Ebɔrɛ na, ma alɛ beeŋ lara menyi ashi kenyaya nɛ men wɔtɔ ashi Ijipt to na to. Meeŋ bɔla ma eleŋgboŋ na so ŋ gberge Ijiptebi kusoe nɛ b shin nɛ men nya men be amu. 7Menyeeŋ ba kraa la ŋ gbagba be basa nɛ ma alɛ e baa la menyi be Ebɔrɛ. Saŋɛ na so nɛ menyeeŋ pin fanɛ ma e la Enyɛnpe Ebɔrɛ nɛ e la menyi be Ebɔrɛ nɛ e lara menyi kenyaya to ashi Ijiptebi be enɔ to. 8Meeŋ yɛr menyi kasawule nɛ n nase kɔnɔ fanɛ meeŋ ta n sa Eebraham nɛ Aizek nɛ Jeekɔb na so. Ma, Enyɛnpe Ebɔrɛ na beeŋ ta kumo n sa menyi nɛ k baa la menyeya.’ ” 9Mosis daŋ malga le be asheŋ kikɛ n sa Israɛlebi na ama b daa maŋ nu n sa mo ŋkpal awurfoŋ nɛ b daa wɔtɔ na so nɛ bumo be aba daŋ pɔ bumo. 10Ndoŋ nna nɛ Enyɛnpe Ebɔrɛ kaŋɛ Mosis: 11“Yɔ Ijipt be ewura Fɛɛro gbagba kutɔ n ya kaŋɛ mo fanɛ e shin nɛ Israɛlebi na e lar mbe kasawule so n yɔ.” 12Nɛ Mosis kaŋɛ Enyɛnpe Ebɔrɛ: “Keni, Israɛlebi na gba e kini kenu n sa ma na nɛ nuso nɛ ewura Fɛɛro bre beeŋ nu n sa ma nɛ m maŋ nyi kamalga ere?” 13Ndoŋ nna nɛ Enyɛnpe Ebɔrɛ kaŋɛ Mosis nɛ Ɛɛrɔn fanɛ b ya kaŋɛ Israɛlebi na nɛ Ijipt be ewura Fɛɛro, kenishipereso fanɛ e shin nɛ Israɛlebi na e lar ashi Ijipt be efuli so.

14Ruben nɛ e daa la Jeekɔb pibinyɛn wurkoŋ na be mbinyɛnsoana be atre e daa la Hanɔk nɛ Pallu nɛ Hesron nɛ Karmi. Bumo e ki Ruben be kanaŋ be mbunana na. 15Simiɔn malɛ be mbinyɛnsoana be atre e daa la Jemuwɛl nɛ Jamin nɛ Ohad nɛ Jakin nɛ Zohar nɛ Shaul nɛ e daa la Keenanche pibinyɛn na. Bumo alɛ e ki Simiɔn be kanaŋ be mbuna na. 16Livai be mbinyɛnsoana be atre e daa la Gɛshɔn nɛ Kohaf nɛ Merari. Livai daŋ ji nfɛ kalfa nɛ adesa nɛ ashunu nna pɔɛŋ nseŋ wu. 17Gɛshɔn be mbinyɛnsobi nde: Libni nɛ Shimei. 18Kohaf malɛ be mbinyɛnsobi be atre e daa la Amram nɛ Ishar nɛ Hebron nɛ Uziɛl. Kohaf daŋ ji nfɛ kalfa nɛ adesa nɛ asa nna pɔɛŋ nseŋ wu. 19Mɛrari be mbinyɛnsobi malɛ be atre e daa la Maali nɛ Mushi. Bumo alɛ e ki Livaiebi be kanaŋ to be mbuna na. 20Nɛ Amram malɛ ta Jokabed nɛ e daa la mo tuto mo sipoche na ŋ ki mbe eche nɛ mo nɛ mo kurge Ɛɛrɔn nɛ Mosis. Amram daŋ ji nfɛ kalfa nɛ adesa nɛ ashunu nna pɔɛŋ nseŋ wu. 21Ishar be mbinyɛnsobi be atre e daa la Koora nɛ Nefeg nɛ Zikri. 22Uziɛl malɛ be mbinyɛnsobi be atre e daa la Mishaal nɛ Elzafan nɛ Sitri. 23Nɛ Ɛɛrɔn malɛ ta Elisheba nɛ e daa la Aminadab pibiche nsaa la Nashɔn malɛ mo sipoche na ŋ ki mbe eche nɛ mo nɛ mo kurge Nadab nɛ Abihu nɛ Eleazar nɛ Itama. 24Koora be mbinyɛnsobi be atre e daa la Azir nɛ Elkana nɛ Abiasaf. To, Kooraebi be kanaŋ be mbuna e daa la na. 25Ndoŋ nna nɛ Ɛɛrɔn pibinyɛn Eleazar malɛ ta Putiɛl pibiche ko ŋ ki mbe eche nɛ mo nɛ mo kurge Finihas. To, bumo e daa la Livai be kanaŋ to be mbuna be benimu. 26To, loŋ be Ɛɛrɔn ere gbagba nɛ Mosis e daa la basa nɛ Enyɛnpe Ebɔrɛ daŋ kaŋɛ le na: “Men ya lara Israɛl be basa kanaŋ kanaŋ so ashi Ijipt be kasawule so.” 27Mosis nɛ Ɛɛrɔn ere e daŋ malga n sa Ijipt be ewura Fɛɛro fanɛ e sa Israɛl be basa ekpa nɛ b lar ashi Ijipt na.

Enyɛnpe Ebɔrɛ ka sa Mosis nɛ Ɛɛrɔn kamalga be asheŋ

28To, kachɛ nɛ Enyɛnpe Ebɔrɛ daŋ malga n sa Mosis ashi Ijipt be kasawule so na, 29le nɛ e kaŋɛ: “Ma e la Enyɛnpe Ebɔrɛ na. Amoso, kaŋɛ Ijipt be ewura Fɛɛro asheŋ nɛ ŋ kaŋɛ fo ere kikɛ.” 30Nɛ Mosis kaŋɛ mo le: “Enyɛnpe, fo nyi ŋ ka maa tiŋ kamalga nɛ nuso nɛ meeŋ wora m malga nɛ Fɛɛro e nu n sa ma?”

Currently Selected:

Ɛksodɔs 6: GJNb

Highlight

Copy

Compare