Ɛksodɔs 5

Mosis nɛ Ɛɛrɔn ka yɔ Ijipt be ewura kutɔ be asheŋ

1Ade kikɛ be kaman nɛ Mosis nɛ Ɛɛrɔn yɔ Ijipt be ewura Fɛɛro kutɔ n ya kaŋɛ mo le: “Enyɛnpe Ebɔrɛ nɛ e la Israɛlebi be Ebɔrɛ na yɛ: ‘Shin nɛ ma basa e yɔ n ya wora kejigboŋ m bunyaŋ ma ashi keshishɛrsawule na so.’ ”

2Ndoŋ nna nɛ ewura Fɛɛro bishi bumo le: “Wanɛ e la Enyɛnpe Ebɔrɛ ere nɛ k daga fanɛ n nu n sa mo n shin nɛ Israɛlebi e yɔ? Ma ere maŋ nyi Enyɛnpe Ebɔrɛ kama, ma alɛ maaŋ shin nɛ Israɛlebi na e yɔ.” 3Ndoŋ nna nɛ Mosis nɛ Ɛɛrɔn kaŋɛ: “Israɛlebi be Ebɔrɛ na e lara mbe kumu ŋ ŋini anyi. Amoso sa anyi ekpa nɛ an ta nchɛ asa n nite n yɔ keshishɛrsawule na so n ya lara sarga ndoŋ n sa Enyɛnpe Ebɔrɛ nɛ e la anyi be Ebɔrɛ na. Nɛ mannɛ aloŋ e beeŋ shin nɛ alɔ ŋko kena e ba mɔ anyi.”

4Nɛ ewura Fɛɛro kaŋɛ: “Mosis nɛ Ɛɛrɔn, manɛ nna nɛ menyee sha kelara basa na ashi bumo be kushuŋ to? Men yige anya na nɛ b baa shuŋ bumo be kushuŋ! 5Ŋkpal manɛ so, Israɛlebi na e shi ga a chɔ anyi, nɛ menyee sha kelara bumo ashi kushuŋ ere to na!”

6Kumo be kamɔnchɛ kikɛ nɛ ewura Fɛɛro kaŋɛ basa nɛ baa keni anya na so na nɛ kushuŋ na be bejuŋkparpoana na le: 7“Men sa maŋ naa fin afitiri nɛ baa ta a wɔtɔ eshii to a baga a kuya ebirkesi na a sa basa na. Men shin nɛ bumo gbagba e baa yɔ n ya kaa fin amo. 8Ama men shin nɛ b baa kraa kuya ebirkesi na nɛ a baa fo kananɛ b chɛr a kuya amo na. Men sa maŋ shin nɛ kukoŋwule gba e duga so. Ntɔl e kɔ bumo so so nɛ baa kaŋɛ le: ‘Shin nɛ an ya lara esarga n sa anyi be Ebɔrɛ.’ 9Men sa bumo kushuŋ kpakpaso n ti so nɛ b baa shuŋ, saŋɛ na so b maaŋ naa nya dama a nu efɛ be mmalga fuloŋ ere.”

10Ndoŋ nna nɛ basa nɛ baa keni anya na so na nɛ kushuŋ na be bejuŋkparpoana yɔ n ya kaŋɛ Israɛlebi na le: “Ewura Fɛɛro yɛ e maaŋ naŋ sa menyi afitiri nɛ baa ta a wɔtɔ eshii to a kuya ebirkesi na kikɛ. 11E yɛ men gbagba e baa yɔ n ya kaa fin amo ashi kakpa nɛ menyeeŋ nya amo, ama menyi alɛ e ba kraa kuya ebirkesi na nɛ a ba fo kananɛ men chɛr a kuya amo na gbagba chap.” 12Ndoŋ nna nɛ Israɛlebi pesaŋ to n sɔ Ijipt be kasawule so kikɛ a keni a fin afitiri nɛ baa ta a wɔtɔ eshii to a kuya ebirkesi na. 13Nɛ Ijipt be basa nɛ baa keni anya na so na malɛ bɛ so a nyaŋ bumo fanɛ b kuya ebirkesi na nɛ a fo kananɛ a chɛr a fo saŋɛ nɛ b daa sa bumo afitiri na. 14Ade kikɛ be kaman nɛ Ijipt be basa nɛ baa keni anya na so na wɔtɔ a bri Israɛlebi na be bejuŋkparpo nɛ b daa juŋkpar bumo kushuŋ na to na nsaa bishi bumo le: “Manɛ so nɛ menyi maa kuya ebirkesi na nɛ a bee fo kananɛ men chɛr a kuya amo saŋkama na?”

15Ŋkpal loŋ so nɛ Israɛlebi na be bejuŋkparpoana na yɔ ewura Fɛɛro kutɔ n ya fubel ŋ ŋini mo ŋ kaŋɛ le: “Yiramu, mannɛ nna nɛ fo wora fo anya loŋ? 16B maŋ naa sa anyi afitiri nɛ anyee ta a wɔtɔ eshii to a kuya ebirkesi na, ama bumo alɛ kraa kaŋɛ fanɛ an baa kuya amo nɛ a baa fo kananɛ an chɛr a kuya amo na. Hale ŋkpal loŋ so a bri anyi. Mannɛ anyi alɛ e bar kuko, fo basa na gbagba e maŋ wora n nyalɛ.”

17Ndoŋ nna nɛ ewura Fɛɛro kaŋɛ bumo le: “Betɔlpo e la menyi kashenteŋto, amoso nɛ men ba kaa kaŋɛ ma fanɛ n shin nɛ men yɔ n ya lara sarga n sa men ‘Nyɛnpe Ebɔrɛ na.’ 18Men bɛta epul ere to n ya kaa shuŋ men be ashuŋ! B maaŋ sa menyi afitiri na kuraa. Menyi alɛ kraa beeŋ baa kuya ebirkesi na nɛ a baa fo kananɛ men chɛr a kuya amo na.” 19Ndoŋ nna nɛ Israɛlebi na be bejuŋkparpoana na pin fanɛ awurfoŋ tu bumo kashenteŋto ŋkpal b ka kaŋɛ bumo fanɛ karechɛ kama be ebirkesi nɛ baaŋ baa kuya na maaŋ duga so kikɛ na so.

20B ka baŋ lar ewura Fɛɛro kutɔ nɛ b ba tu Mosis nɛ Ɛɛrɔn nɛ b yil a jo bumo. 21Ndoŋ nna nɛ b kaŋɛ bumo le: “Enyɛnpe Ebɔrɛ gbagba wu kusɔ nɛ men wora anyi nna na. Mo alɛ beeŋ gberge menyi kusoe, ŋkpal men ka shin nɛ ewura Fɛɛro nɛ mbe basa nya agbo n wora anyi nseŋ sa bumo ekpa fanɛ b mɔ anyi na so.” 22Ndoŋ nna nɛ Mosis naŋ lɔŋɛ m bishi Enyɛnpe Ebɔrɛ le: “Enyɛnpe Ebɔrɛ, manɛ e ba nɛ fo ta tɔrɔ m ba fo basa ere so le? Ama le so nɛ fo shuŋi ma nfe a? 23Yili saŋɛ nɛ fo shuŋi ma fanɛ m ba yili fo katelamu to m malga n sa ewura Fɛɛro na kikɛ nɛ e baa wɔtɔ a tɔrɔ Israɛlebi ere, ama fo alɛ maŋ wora shɛŋ n chɛ fo basa to kuraa.”

Currently Selected:

Ɛksodɔs 5: GJNb

Highlight

Copy

Compare