Ashuŋ Shunso 9

Sɔɔl ka ki Yesu be ebɛsopo be asheŋ

1Saŋɛ ere so kikɛ nɛ Sɔɔl wɔtɔ a kɔ a fin kemur Enyɛnpe be bebɛsopoana na. 2E daŋ yɔ bɔrɛmatapo nimuso kutɔ nna n ya kule mo nwɔl nɛ a beeŋ tiŋ ŋ ŋini Damaskɔs be nshɛrbu to be Juwebi na esa nɛ e la mo. Loŋ na e beeŋ tiŋ m pɛ ndoŋebi be ekama, benyɛn nɛ beche nɛ baa bɛ Enyɛnpe be ekpa na so, n yɔ Jerusalɛm. 3E ka wɔ ekpa na to a yɔ m ba kaa taga to Damaskɔs be kade to nɛ kefulto ko shi awɔlpa so epul na to m ba yuu mo kikɛ so. 4Nɛ e tɔr kasawule nseŋ nu ebɔl ka bee bishi mo: “Sɔɔl, Sɔɔl, manɛ e ba nɛ fee tɔrɔ ma?” 5Nɛ Sɔɔl bishi mo: “Fo wanɛ Enyɛnpe?” Nɛ ebɔl na kaŋɛ: “Ma Yesu nɛ fee tɔrɔ na. 6Niŋi to n yɔ kade to nɛ b ŋini fo kusɔ nɛ k daga nɛ fo wora.” 7Basa nɛ bumo nɛ Sɔɔl daa yɔ na be nnɔ daŋ mɔ bumo ga nɛ b kilgi a yil cham. B daŋ nu ebɔl na, ama bumo alɛ daa maŋ wu esa kama. 8Sɔɔl ka niŋi to m bugi mbe anishi e daa maŋ tiŋ n wu shɛŋ. Ndoŋ nna nɛ b pɛ mbe enɔ to ŋ keta mo n luri Damaskɔs to. 9Nchɛ nsa nɛ e maa tiŋ a wu, jemanɛ na malɛ kikɛ so nɛ e maa ji ŋko a nuu shɛŋ.

10Ebɛsopo ko daa wɔ Damaskɔs to nɛ baa tre mo Ananiyas. Mo nɛ Enyɛnpe daŋ bɔla mbe bɔrɛdare to ŋ kaŋɛ: “Ananiyas.” Nɛ Ananiyas shuli ŋ kaŋɛ: “Ma nde Enyɛnpe.” 11Nɛ Enyɛnpe kaŋɛ mo: “Bela ase n yɔ kubɔrbi niŋiso to n ya luri Judas pe m bishi kanyɛn nɛ e shi Taases nɛ baa tre mo Sɔɔl na be asheŋ. 12E bee kule Ebɔrɛ nseŋ wu kanyɛn ko ashi mbe bɔrɛdare to nɛ baa tre Ananiyas ka ba luri n ta mbe enɔana n deŋi mbe kumu so nɛ e naŋ bɛta a wu.” 13Nɛ Ananiyas kaŋɛ: “Enyɛnpe, basa damta kaŋɛ ma kanyɛn ere be asheŋ fanɛ kananɛ e tɔrɔ fo basa ashi Jerusalɛm. 14Mo alɛ kule ekpa ashi bɔrɛmatapowuraana na kutɔ nna m ba Damaskɔs nfe nɛ e ba pɛ bekama nɛ baa bɛ fo so na nna.” 15Nɛ Enyɛnpe kaŋɛ: “Fo ere e yɔ de, ŋkpal manɛ so, ma e lara mo nɛ e baa shuŋ ma n shin nɛ nnyamase nɛ bewura nɛ Israɛlebi e pin ma. 16Ma alɛ gbagba beeŋ ŋini mo tɔrɔ nɛ a daga e ka ji n sa ma.” 17Ndoŋ nna nɛ Ananiyas yɔ kowu na to n ya ta mbe enɔana n deŋi Sɔɔl so nseŋ kaŋɛ: “Ekurgepo Sɔɔl, Enyɛnpe Yesu gbagba, emo nɛ fo wu ekpa to na e shuŋi ma. Mo e shuŋi ma nɛ fo naa tiŋ a wu nɛ Kiyoyu Cheeŋ na e tiŋ n luri fo to.” 18Epul na to nɛ kusɔ ko fanɛ kɔrɔtɔ be afɔfɔ lar Sɔɔl be anishito n tɔr nɛ e naŋ fara a wu ŋ koso nɛ b bɛr mo kabɔrɛbɛr. 19Kede be kaman nɛ e ji n naŋ nya mbe eleŋ.

Sɔɔl ka bɔ kubɔya na ashi Damaskɔs be asheŋ

Ndoŋ nna nɛ Sɔɔl wora nchɛnnyɔ ashi Damaskɔs be bebɛsopo na kutɔ 20nseŋ yɔ nshɛrbuana to epul na to n ya fara a bɔ kubɔya na a kaŋɛ Yesu be asheŋ a kaŋɛ: “Mo e la Ebɔrɛ Pibinyɛn na.” 21K daŋ chinchiŋ bekama nɛ b nu kumo na ga nɛ b bishi abar: “Mannɛ kanyɛn ere e daa wɔ Jerusalɛm a mɔ bekama nɛ baa ti ketre ere yirdaso na a? Kumo be kaman, mannɛ kepɛ loŋ be basa n ya bɔɔ bɔrɛmatapowuraana na enɔ so so nɛ e ba nfe a?” 22Ama Sɔɔl be kebɔ kubɔya na daŋ baa wora eleŋ nna a ti so nɛ mbe keŋini fanɛ Yesu e la Kristo na gba daŋ bɛ ekpa so a kɔ eleŋ amo to ga nɛ Juwebi nɛ b wɔ Damaskɔs to na be ŋgbene wul bumo to ga nɛ b paŋ keji mo emɔrɔ.

23K ka ba wora nchɛnnyɔ nɛ Juwebi na ba abar so m ba kre nia nɛ b mɔ Sɔɔl. 24Nɛ Sɔɔl nu kesheŋ nɛ b daa sha kewora na. Kapa nɛ kanyɛ malɛ kikɛ b daa wɔ kade na to be mbunaana na to nna a fin kenya mo m mɔ. 25Ndoŋ nna nɛ kanyɛso ko, Sɔɔl be bebɛsopo ta mo n wɔtɔ kelantaŋɛ gboŋ ko to m bɔla kade na be egbal so n ta mo ŋ gbelge to.

Sɔɔl ka ba Jerusalɛm be asheŋ

26Sɔɔl ka yɔ Jerusalɛm n ya kaa sha keba bebɛsopo na to, b daa maŋ yirda fanɛ e la ebɛsopo nseŋ daa ŋana mo. 27Nɛ Baanabas ba mbe kechɛto to m ba keta mo n yɔ beshuŋipo na kutɔ n ya bugi asheŋ to ŋ kaŋɛ bumo kananɛ Sɔɔl daŋ wu Enyɛnpe na ekpa to nɛ Enyɛnpe na malga mo kutɔ. Kede be kaman nɛ e naŋ kaŋɛ bumo kananɛ Sɔɔl daŋ bɔ kubɔya na Yesu be ketre to kenyɛnso ashi Damaskɔs. 28Ndoŋ nna nɛ Sɔɔl tu bumo a wɔtɔ nsaa nite Jerusalɛm kikɛ to a bɔ kubɔya na Enyɛnpe be ketre to kenyɛnso. 29Mo nɛ Juwebi nɛ b daa malga Griik to na gba daŋ malga n ji emɔrɔ nɛ b kre bumo be nia a kɔ a fin kemɔ mo. 30Bekurgepoana na ka nu kumo be asheŋ nɛ b keta Sɔɔl n yɔ Sizariya n ya shin nɛ e yɔ Taases. 31Kumo be kaman nɛ asɔriebi nɛ b daa wɔ Judiya na nɛ Galili nɛ Samɛria na lar bumo be etɔrɔ na to n nya kagbenewushi gbrɛ. Kiyoyu Cheeŋ na e daŋ shin nɛ b daŋ yɔ anishito nseŋ wora keshi n ti so a wɔ Enyɛnpe be kebunyaŋ be kebaawɔtɔ to.

Pita ka yɔ Lida nɛ Jɔpa be asheŋ

32Pita gba daŋ yɔ mboŋ damta. Kachako e yɔ nɛ e ya chɔrɔ Ebɔrɛ be bebɛsopo ashi Lida 33n ya tu kanyɛn ko nɛ baa tre Eeneeyas ndoŋ. E daa la eyurwusowura nna a dese kakpa koŋwule nfɛ burwa. 34Nɛ Pita kaŋɛ mo: “Eeneeyas, Yesu Kristo e naa chɛ fo na. Niŋi to m bɔɔ fo kusɔ deseso na to.” Epul na to nɛ Eeneeyas niŋi to. 35Lida nɛ Shɛrɔn be basa kikɛ daŋ wu mo nseŋ ki Enyɛnpe be bebɛsopo.

36Kache ko daa la eyirdapo a wɔ Jɔpa nɛ baa tre mo Tabita. Mbe Griik tre e la Dɔɔkas. Kumo be kifito e la Chibir. Kelela nɛ e daa wɔtɔ a wora saŋkama nsaa chɛ betirpo to. 37Ndoŋ nna nɛ kulɔ ko ba pɛ mo nɛ e wu nɛ b ber mo nseŋ ta mo n nase esoso be ebu ko to. 38Jɔpa nɛ Lida daa maŋ wɔ kufɔ, amoso, beyirdapo nɛ b daa wɔ Jɔpa na ka nu fanɛ Pita wɔ Lida nɛ b shuŋi basa anyɔ ko mo kutɔ fanɛ b ya kaŋɛ mo le: “Jande, wora ania n yeŋi so m ba anyi kutɔ.” 39Nɛ Pita bela ase n tu bumo n yɔ. E ka fo ndoŋ nɛ b keta mo n yɔ esoso be ebu na to nɛ bekulpocheana na kikɛ ba kulti mo a shu nsaa ta nle nɛ asɔbuuso nɛ Dɔɔkas daŋ lue saŋɛ nɛ e daa maŋ naŋ wu na a ŋini Pita. 40Nɛ Pita shin nɛ bumo kikɛ lar ebu na to nɛ e gbir ŋ kule Ebɔrɛ nseŋ kilgi ŋ kaŋɛ ebuni na: “Tabita, koso!” E ka bugi mbe anishi n wu Pita nɛ e niŋi to n chena. 41Nɛ Pita pɛ mbe enɔ to n chɛ mo to nɛ e niŋi to nseŋ tre beyirdapo na nɛ bekulpocheana na m ba ta mo ŋkpa to m bɔɔ bumo enɔ. 42Kumo be baru daŋ sɔ Jɔpa to kikɛ nɛ basa damta yirda Enyɛnpe na. 43Kumo be kaman nɛ Pita chena nwɔlgbitipo ko nɛ b daa tre Saimɔn pe ashi Jɔpa be kade na to n wora nchɛnnyɔ.

Currently Selected:

Ashuŋ Shunso 9: GJNb

Highlight

Copy

Compare