Ashuŋ Shunso 8

1Sɔɔl gba daŋ shuli fanɛ Stiven be luwu na bɔla ekpa.

Sɔɔl ka tɔrɔ beyirdapoana na be asheŋ

Kumo be kamɔnchɛ na kikɛ nɛ b fara a tɔrɔ Jerusalɛm to ebi be beyirdapoana na ga. Nɛ beyirdapoana na kikɛ pesaŋ to n sɔ Judiya nɛ Samɛria be efuliana na kikɛ so ŋ ka beshuŋipo na. 2Ebɔrɛ be bebɛsopo ko e daŋ puli Stiven nseŋ boŋ to n shu mbe keeli ga. 3Ama Sɔɔl malɛ daa kɔ a fin kemur beyirdapoana na kikɛ nna nyam. E daa nite basa peana nna a nyaŋ beyirdapoana na, benyɛn nɛ beche kikɛ a lar n ya kaa ti ebu.

B ka bɔ baru lela na n sa Samɛriaebi be asheŋ

4Beyirdapo na nɛ b daŋ pesaŋ to na daŋ yɔ kaplɛkama nna n ya kaa bɔ kubɔya na. 5Filip daŋ yɔ Samɛria nna n ya bɔ Yesu Kristo na be asheŋ n sa ndoŋebi. 6Jimaŋana na ka nu Filip be kamalga nseŋ wu emamachisheŋ nɛ e wora na nɛ b bugi asoe n nu mbe kamalga kɔnɔkoŋwuleso. 7B daŋ wu mbuibi lubiana ka boŋ to awɔrso n lar basa damta to nseŋ naŋ wu eyurwusowuraana nɛ ebobi damta gba ka nya alenfia. 8Amoso, kagbenefuli daŋ bɔlɔ Samɛria be kade na to kikɛ nna.

9Jemanɛ na so malɛ kikɛ nɛ kanyɛn ko nɛ baa tre Saimɔn daa kɔ ŋkilgi be kudur a wɔ Samɛria be kade na to a wora emamachisheŋ a shin nɛ Samɛriaebi na be nnɔ daa mɔ bumo ga. E daa tre mbe kumu esagboŋ ko nna. 10Nɛ kade na to be basa kikɛ, benimu nɛ mbia daa bugi asoe a nu asɔ nɛ e bee kaŋɛ. Le nɛ b daa kaŋɛ: “Kanyɛn ere e la Ebɔrɛ be eleŋ nɛ baa tre Eleŋgboŋ na.” 11Saŋɛ nɛ e daŋ fara a wora emamachisheŋ ŋana so damta na daa maŋ taga to, amoso, b daŋ bugi bumo be asoe kikɛ nna n nu kusɔ kikɛ nɛ e daŋ kaŋɛ bumo. 12Ama b ka yirda Filip be baru lela nɛ e bee bɔ a kaŋɛ Ebɔrɛ be kuwura na nɛ Yesu Kristo be ketre be asheŋ na, nɛ b bɛr bumo kabɔrɛbɛr, beche nɛ benyɛn kikɛ. 13Saimɔn gba daŋ yirda Filip be kubɔya na nɛ b bɛr mo kabɔrɛbɛr. Kumo be kaman nɛ e ta mbe kumu m mata Filip nseŋ wu Ebɔrɛ be eleŋ be emamachisheŋ ŋiniso nɛ Filip daŋ wora na nɛ mbe kɔnɔ mɔ mo ga.

14Beshuŋipo nɛ b daa wɔ Jerusalɛm to nseŋ nu fanɛ Samɛriaebi yirda Ebɔrɛ be kubɔya na nɛ b shuŋi Pita nɛ Jɔn bumo kutɔ. 15B ka yɔ nɛ b ya kule Ebɔrɛ n sa ndoŋ be beyirdapoana na fanɛ b nya Kiyoyu Cheeŋ na, 16ŋkpal manɛ so, saŋɛ na nɛ Kiyoyu Cheeŋ na maŋ naŋ gbelge bumo be ekama so. Enyɛnpe Yesu be ketre to nawule nɛ b daŋ bɛr bumo kabɔrɛbɛr. 17Nɛ Pita nɛ Jɔn ta bumo be enɔana n deŋi n deŋi bumo so nɛ Kiyoyu Cheeŋ na gbelge bumo so. 18Saimɔn ka wu beshuŋipo na ka ta bumo be enɔana n deŋi n deŋi basa na so nɛ b nya Kiyoyu Cheeŋ na nɛ e ta amansherbi m ba kaŋɛ Pita nɛ Jɔn: 19“Men sɔ nseŋ sa ma eleŋ na nɛ esa kama nɛ ma alɛ ta ma enɔ n deŋi mo so e nya Kiyoyu Cheeŋ na.” 20Nɛ Pita kaŋɛ mo: “Fo nɛ fo amansherbi ere beeŋ mur, ŋkpal fo ka bee fɛ ketɔ Ebɔrɛ be kakɛ so. 21Fo maŋ kɔ shɛŋ anyi be kushuŋ ere to, ŋkpal manɛ so, fo kagbene maŋ bɔla ekpa ashi Ebɔrɛ kutɔ. 22Amoso, lar le be nfɛra lubi ere to nseŋ kule Enyɛnpe na nɛ e ta fo nfɛra fɛso lubi ere m paŋ fo. 23Ŋkpal manɛ so, n wu yurkishi lubi ka bɔlɔ fo to nɛ alubi nyaŋ fo kpakpa a wɔtɔ.” 24Nɛ Saimɔn kaŋɛ Pita nɛ Jɔn: “Jande, men kule Ebɔrɛ n sa ma nɛ asheŋ nɛ men malga ere be kekama e sa maŋ wora ma.”

25Pita nɛ Jɔn ka ji bumo be shɛda nseŋ bɔ Enyɛnpe be kubɔya na n loge nɛ b bɛta n yɔ Jerusalɛm. B ka daa wɔ ekpa to a yɔ b daŋ bɔ baru lela na nna n sa Samɛria be ndewurbiebi damta.

Filip nɛ Itiopia be krachigboŋ be asheŋ

26Nɛ Enyɛnpe be malaika ko kaŋɛ Filip: “Ta a ba kapaso, bela ase ŋ koso n yɔ ekpa nɛ k shi Jerusalɛm a yɔ Gaaza na.” Basa maŋ naa nite ekpa na so ga. 27Nɛ Filip bela ase n yɔ. Saŋɛ na so nɛ Itiopia be krachigboŋ ko wɔ ekpa na to a yɔ epe. 28Amo be kanyɛn na daa la krachigboŋ ko nna a keni Itiopia be ewurche Kandasi be amansherbi so. E daŋ yɔ Jerusalɛm nna n ya bunyaŋ Ebɔrɛ nseŋ luri mbe gbaŋɛturko to m bɛta a kraŋ anebi Aizaaya be kawɔl a yɔ epe. 29Nɛ Kiyoyu Cheeŋ na kaŋɛ Filip: “Nite n yɔ gbaŋɛturko ere akpa n ya tu kumo.” 30Ndoŋ nna nɛ Filip shile n yɔ n ya nu e ka bee kraŋ anebi Aizaaya be kawɔl nɛ e bishi mo: “Fee pin kusɔ nɛ fee kraŋ ere to a?” 31Nɛ krachigboŋ na bishi mo: “Esa baa maŋ ŋini ma, nuso nɛ ma alɛ beeŋ tiŋ m pin amo to?” Kumo be kaman nɛ e kule Filip fanɛ e dii gbaŋɛturko na n tu mo n chena. 32Abɔrɛsibɛ na to be kakpa nɛ e daa kraŋ na nde:

“E daa du fanɛ kubolpɔ

nɛ b kɔ a yɔ nɛ b ya teŋ nna.

E daa du fanɛ kpakpafɔlbi

nɛ baa ku kumo be afuibi

nɛ k la to boeŋ nna.

E daa maŋ kaŋɛ shɛŋ.

33B daŋ fɛl mo ga nseŋ kini keji mo demu

nɛ kumo be ekpa so.

Wanɛ e naaŋ tiŋ m pin

mbe jemanɛ na to ebi be alubi to?

Ŋkpal manɛ so,

b bar mbe durnya ere to be ŋkpa ekar.”

34Nɛ krachigboŋ na bishi Filip: “Kaŋɛ ma esa nɛ anebi ere bee malga mbe asheŋ ere, mo gbagba be asheŋ ŋko esa pɔtɛ?” 35Ndoŋ nna nɛ Filip fara abɔrɛsibɛ be kakpa nɛ kanyɛn na daa kraŋ na gbagba m bɔ Yesu be baru lela na n sa mo. 36B ka wɔ ekpa na to a yɔ na nɛ b ya wu kabombi ko nɛ krachigboŋ na kaŋɛ: “Keni, nchu nde nɛ manɛ e naa wɔtɔ a kuŋ fo kebɛr ma kabɔrɛbɛr?” 37[Nɛ Filip kaŋɛ mo: “Fo baŋ yirda nɛ fo kagbene kikɛ, meeŋ bɛr fo kabɔrɛbɛr na.” Nɛ e shuli so ŋ kaŋɛ: “N yirda fanɛ Yesu Kristo e la Ebɔrɛ Pibinyɛn na.”] 38Kumo be kaman nɛ e shin nɛ gbaŋɛturko na yili nɛ bumo benyɔ na, Filip nɛ krachigboŋ na luri nchu na to nɛ Filip bɛr mo kabɔrɛbɛr na. 39B ka bee lar nchu na to nɛ Enyɛnpe be Kiyoyu na ba ta Filip ndoŋ nɛ krachigboŋ na maŋ naŋ wu mo nseŋ la to m pɛ ekpa a yɔ nɛ kagbenefuli. 40Azotas nɛ Filip daŋ wu fanɛ Kiyoyu na yɛr mo nɛ e yɔ nde na kikɛ to n ya kaa bɔ baru lela na n ya fo Sizariya.

Currently Selected:

Ashuŋ Shunso 8: GJNb

Highlight

Copy

Compare