Ashuŋ Shunso 10

Pita ka yɔ Kɔɔnilias kutɔ be asheŋ

1Kanyɛn ko daa wɔ Sizariya nɛ baa tre mo Kɔɔnilias. E daa la Romebi be benapo kalfa be enimu nna ashi benapo be katuŋgboŋ nɛ baa tre Itali be Katuŋ na to. E daa la abɔrɛshenshapo nna, mo nɛ mbe kowu to ebi kikɛ daa bunyaŋ Ebɔrɛ nna. 2E daŋ chɛ Juwebi be betirpo to ga nseŋ daa kule Ebɔrɛ saŋkama. 3Kachako kapaso, fanɛ kerfi asa be jemanɛ nɛ e ku bɔrɛdare ko n wu Ebɔrɛ be malaika geeŋ ka ba kaŋɛ mo: “Kɔɔnilias.” 4Nɛ e ta mbe anishi n yuu malaika na so kufuso nseŋ bishi mo: “Manɛ nna, n nyɛnpe?” Nɛ malaika na kaŋɛ: “Ebɔrɛ nu fo kabɔrɛkuleana nseŋ naŋ wu fo kelela be kewora na nsaa shin nɛ e wora asɔ nɛ fee kule na. 5Shuŋi basa Jɔpa nɛ b ya tre kanyɛn ko nɛ baa tre Saimɔn Pita na. 6E wɔ Saimɔn nwɔlgbitipo nɛ e wɔ a mata teku na pe.” 7Kede be kaman nɛ malaika nɛ e daa malga mo kutɔ na yige mo nseŋ yɔ nɛ Kɔɔnilias tre mbe laŋ to be nyɛrbi anyɔ ko nɛ enapo ko nɛ e daa la abɔrɛshenshapo nsaa la bumo nɛ b daa shuŋ a sa Kɔɔnilias gbagba na be eko 8m ba kaŋɛ bumo kusɔ nɛ k wora na kikɛ nseŋ shuŋi bumo Jɔpa.

9Kumo be ŋklade b ka ya taga to Jɔpa nɛ Pita malɛ dii kuchoŋi kapaso be jemanɛ nɛ e ya kule Ebɔrɛ. 10Ndoŋ nna nɛ akoŋ pɛ mo ga nɛ e yɛlga keji. 11B daŋ kraa wɔ ajibi na be kewora to nna nɛ e ku bɔrɛdare ko n wu ebɔrɛso ka bugi nɛ kusɔ peŋgeleŋ ko fanɛ wajɛ nɛ kumo be ekarso ana kɔ kumo to a ba kasawule so. 12Nɛ asɔbɔya be yiri kikɛ nɛ asɔ gbeyeso nɛ kupuŋ to be mbuibi wɔ kumo to. 13Nɛ e nu ebɔl ko ka bee kaŋɛ: “Pita, koso m mɔ n we!” 14Nɛ Pita kaŋɛ: “Akai, Enyɛnpe, ŋkpal manɛ so, m maŋ naŋ ji kusɔ kama nɛ k maŋ walɛ so nɛ anyi Juwebi bee kishi kikɛ.” 15Nɛ ebɔl na naŋ kaŋɛ mo: “Sa maa tre kusɔ nɛ k la kusɔ lela Ebɔrɛ kutɔ kusɔ nɛ k maŋ walɛ so.” 16Ela asa nɛ e daŋ ku le be bɔrɛdare koŋwule ere pɔɛŋ nɛ b gberge kusɔ na n naŋ yɔ ebɔrɛso.

17Loŋ be bɔrɛdare nɛ Pita daŋ ku na be kifito be kepin daŋ chinchiŋ mo ga. Jemanɛ ere so nɛ basa nɛ Kɔɔnilias daŋ shuŋi na wu kowu nɛ Saimɔn daa wɔ to na m ba kaa yil kumo be kabuna to 18m bishi awɔrso: “Nfe nɛ kafɔnyɛn ko nɛ baa tre Saimɔn Pita wɔ na a?” 19Pita daŋ kraa pin bɔrɛdare nɛ e ku na be kifito nna a gben nɛ Kiyoyu Cheeŋ na kaŋɛ mo: “Nu nfe, benyɛn asa ko bee fin fo. 20Amoso, koso m bela ase ŋ gbelge n ya shuli n tu bumo n yɔ, ŋkpal manɛ so, ma e shuŋi bumo.” 21Nɛ Pita gbelge n ya kaŋɛ basa na: “Ma nɛ menyee fin na. Manɛ e bar menyi?” 22Nɛ b kaŋɛ: “Kɔɔnilias, benapo be enimu na e shuŋi anyi. E la esa lela nna a bunyaŋ Ebɔrɛ nsaa la Juwebi kikɛ be ebunyampo. Ebɔrɛ be malaika ko e ba kaŋɛ mo fanɛ e shin nɛ fo ba mo pe m ba shin nɛ e nu kusɔ nɛ feeŋ kaŋɛ mo.” 23Ndoŋ nna nɛ Pita shin nɛ b luri m ba di ŋ klade.

Nɛ e bela ase nɛ mo nɛ bumo nɛ Jɔpa be bekurgepoana ko yɔ. 24Kumo be ŋklade nɛ e fo Sizariya kakpa nɛ Kɔɔnilias nɛ mbe basa nɛ mo teriana gbagba nɛ e daŋ tre na daa wɔ a jo mo na. 25Pita ka daŋ baa sha nɛ e luri nɛ Kɔɔnilias shɛr mo to ŋ gbir mbe anishito. 26Nɛ Pita kaŋɛ mo: “Niŋi to n yili, ŋkpal manɛ so, ma alɛ gba la nyiŋgbasa nna.” 27E ka koso nɛ mo nɛ Pita malga abar kutɔ loŋ hale n ya luri ebu na to nɛ Pita ya wu basa damta nɛ b shɛr na. 28Nɛ e kaŋɛ bumo: “Menyi alɛ gba baa nyi geeŋ fanɛ Juwebi be mbraana na ka bee ŋini fanɛ Juw be esa e sa maŋ kaŋ ya chɔrɔ ŋko n shin nɛ mo nɛ kanyamase e ba abar so kikɛ. Ama Ebɔrɛ ŋini ma fanɛ n sa maa ta dimɛdi pɔtɛ kama fanɛ eyurpiwura fanɛ kananɛ anyi Juwebi bee tre nnyamase na. 29Amoso nɛ n nu menyi be ketre a maŋ ji emɔrɔ nseŋ ba na. Ama men kaŋɛ ma kusɔ nɛ k ba nɛ men shuŋi n tre ma.”

30Nɛ Kɔɔnilias kaŋɛ: “Kachɛnawase be kapaso, kerfi asa, saŋɛ ere so nɛ mee kule Ebɔrɛ ashi ma pe nɛ kanyɛn ko buu asɔ fuful m ba yili ma anishito nseŋ kaŋɛ ma: 31‘Kɔɔnilias, Ebɔrɛ nu fo kabɔrɛkule na nseŋ naŋ wu fo alelasheŋ na. 32Shuŋi esa Jɔpa nɛ e ya tre kanyɛn ko nɛ baa tre Saimɔn Pita na. E wɔ Saimɔn nwɔlgbitipo nɛ e wɔ a mata teku na pe.’ 33Kumo so nɛ n shuŋi epul na to fanɛ b ya tre fo nɛ fo alɛ shuli m ba na. Ebɔrɛ malɛ be anishito nɛ anyi kikɛ tase nfe a jo kusɔ kama nɛ Enyɛnpe na kɔ a sha nɛ fo kaŋɛ anyi na.”

Pita be kamalga be asheŋ

34Nɛ Pita fara mbe kamalga ŋ kaŋɛ: “Naniere nɛ m pin kashenteŋto fanɛ Ebɔrɛ maa kpɛa to. 35Esa kama nɛ e bee ŋana mo nsaa wora asɔ nɛ a bee bɔla ekpa nɛ e bee sɔ. 36E maa keni yiri nɛ k la mo. Men nyi kubɔya nɛ e sa Israɛlebi a kaŋɛ baru lela na be asheŋ fanɛ anyeeŋ tiŋ n nya kagbenewushi Ebɔrɛ kutɔ ashi Yesu Kristo nɛ e la basa kikɛ be Enyɛnpe na to be asheŋ. 37Kabɔrɛbɛr nɛ Jɔn daŋ bɔ kumo be kubɔya na be kaman men nyi kusɔgboŋ nɛ k daŋ fara Galili to n wora n yɔ Judiya kikɛ to na be asheŋ. 38Men nyi Nazarɛt be Yesu na be asheŋ nɛ kananɛ Ebɔrɛ lara mo nseŋ shin nɛ Kiyoyu Cheeŋ na nɛ eleŋ ba mo so. E daŋ yɔ kaplɛkama n ya wora kelela nseŋ chɛ basa damta nɛ b daa wɔ Setani be enɔ to na, ŋkpal manɛ so, Ebɔrɛ daa wɔ mo to. 39An la asheŋ nɛ a wora ashi Jerusalɛm to nɛ Juwebi be efuli so nɛ k ka na kikɛ be eshɛdajipoana nna. B daŋ gbir mo m mata kedibi largato so nna m mɔ mo. 40Ama kumo be nchɛ asa to nɛ Ebɔrɛ shin nɛ e tiŋi luwu na to n ta mbe kumu ŋ ŋini anyi. 41Mannɛ basa kikɛ e daŋ wu mo she anyi, bumo nɛ Ebɔrɛ lara fanɛ an baa la mbe eshɛdajipoana na. Ebɔrɛ ka shin nɛ e tiŋi luwu to na be kaman anyi nɛ mo daŋ ji nseŋ nuu. 42Mo e kaŋɛ anyi fanɛ an baa bɔ baru lela na a sa basa a bugi to a kaŋɛ fanɛ mo e la emo nɛ Ebɔrɛ lara fanɛ e baa la basa keniso nɛ bumo nɛ b wu be demujipo na. 43Anebiana kikɛ daŋ malga mbe asheŋ ŋ kaŋɛ fanɛ ekama nɛ e yirda mo, e beeŋ nya mbe alubi be ketampaŋ ashi mbe ketre na be eleŋ to.”

Nnyamase ka nya Kiyoyu Cheeŋ na be asheŋ

44Pita daŋ kraa malga nna nɛ Kiyoyu Cheeŋ na gbelge m ba bumo nɛ b daa nu kubɔya na so. 45Juwebi be beyirdapoana nɛ b daŋ tu Pita n shi Jɔpa m ba na ka wu Ebɔrɛ ka ta mbe Kiyoyu Cheeŋ na ŋ kɛ nnyamase na malɛ n shin nɛ e gbelge bumo so na, nɛ k chinchiŋ bumo ga. 46Ŋkpal manɛ so, b daŋ nu kananɛ b daŋ gbar ŋgbar nɛ bumo gbagba maa nu nseŋ kaŋɛ fanɛ Ebɔrɛ e la durnya be Enyɛnpetale. 47Nɛ Pita kaŋɛ: “Basa ere gba nya Kiyoyu Cheeŋ na fanɛ anyi. Amoso, esa mo e naaŋ tiŋ ŋ kuŋ bumo ekpa fanɛ b sa maŋ ta nchu m bɛr bumo kabɔrɛbɛr na?” 48Ndoŋ nna nɛ e shin nɛ b bɛr bumo kabɔrɛbɛr ashi Yesu Kristo be ketre to. Kumo be kaman nɛ b shin nɛ mo nɛ bumo chena kade na to n wora nchɛnnyɔ.

Currently Selected:

Ashuŋ Shunso 10: GJNb

Highlight

Copy

Compare