Ashuŋ Shunso 28

Kusɔ nɛ k wora Pɔɔl ashi Malta be asheŋ

1An ka dii kedeŋi so nɛ alenfia nɛ an nu fanɛ kepla na nɛ baa tre Malta. 2Ndoŋebi daŋ chɛ anyi to ga. Bɔrɛ daŋ fara nna a ba nɛ awo ko ba nɛ b puga edɛ n sa anyi nɛ an wɔl. 3Pɔɔl ka chala ndibi a wɔtɔ edɛ na to nɛ kuwɔ ko lar ndibi na to ŋkpal kuwuloŋ na so m mea mbe enɔ kpakpa. 4Kepla na so be basa na ka wu kuwɔ na ka chul Pɔɔl be enɔ so nɛ b kaŋɛ abar: “Kanyɛn ere la emɔpo nna, k maŋ kɔ emɔrɔ. E tiŋ n lar nchu na to nɛ alenfia, ama kashenteŋ be ekpa so be ebɔrɛ na maaŋ yige mo nɛ e baa kraa wɔtɔ.” 5Ama Pɔɔl tiŋ ŋ ŋmenyaŋ kuwɔ na n wɔtɔ edɛ na to nɛ k maŋ tiŋ n doro mo kikɛ. 6B daa dara mo nna a keni kananɛ e beeŋ tiŋ to n tɔr epul na to n wu. Ama b ka jo loŋ n ya gben a maa wu kulubi kikɛ ka bee nya Pɔɔl nɛ b chɛrga bumo be nfɛra nseŋ kaŋɛ: “Ebɔrɛ ko e la mo.”

7Kakpa nɛ kesheŋ ere daŋ wora Pɔɔl na nɛ kepla na so wura be adɔsawuleana so daa maŋ wɔ kufɔ. Ewura na be ketre e daa la Pablias. E daŋ sɔ anyi kasawule na so nseŋ keta anyi kufɔ nɛnɛ ga nchɛ nsa. 8Pablias mo tuto be eyur daŋ bel edɛ nna nɛ e dese ebu to a lɔ epun to nɛ Pɔɔl luri mbe ebu na to n ta mbe enɔana n deŋi mo so nseŋ kule Ebɔrɛ n sa mo nɛ e nya alenfia. 9Kede be kaman nɛ kechɛɛsawule na so be belɔpo kikɛ ba nɛ e chɛ bumo. 10B daŋ kɛ anyi asɔ damta ga ndoŋ. Kachɛ nɛ an ba kaa lar ndoŋ nɛ b naŋ ta asɔ nɛ anyeeŋ ya kaa sha ekpa to n wɔtɔ anyi be ekuloŋgboŋ na to.

Pɔɔl nɛ mo braana na ka lar Malta n yɔ Rom be asheŋ

11Afɔl asa be kaman nɛ an luri Alɛkzaandria be ekuloŋgboŋ ko nɛ baa tre kumo Mborobi na to n yɔ. Kepla na so nɛ k daŋ ba kaa wɔ loŋ nɛ awo be jemanɛ ba choŋ. 12Ndoŋ nna nɛ an ta n ya fo Sirakyus be kade to n ji nchɛ asa ndoŋ pɔɛŋ 13nseŋ ta loŋ m ba fo kadegboŋ ko nɛ baa tre Rɛjiam. Kumo be ŋklade nɛ afu ko shi epeŋitɔrkpa be bena so m ber m ba. Kumo be kachɛ nyɔsopo nɛ an fo Putioli be ekulonyilikpa. 14An ka ba wu bebɛsopo ko ndoŋ nɛ b shin nɛ an ji bɔkwe bumo kutɔ. Asheŋ nɛ a daŋ wora anyi anyi be enite na to pɔɛŋ nɛ an ya fo Rom nna na. 15Bekurgepo nɛ b wɔ Rom na ka nu anyi be asheŋ nɛ b lege anyi m ba hale Apias be Kebɛ nɛ kakpa nɛ baa tre Befɔ be Ewushikpa be Nwu Asa na. Pɔɔl ka wu bumo nɛ e nya kenyɛn chɔrɔ Ebɔrɛ ga.

Kusɔ nɛ k wora Pɔɔl ashi Rom be asheŋ

16An ka ba Rom nɛ Romebi be abane be benimuana na shin nɛ Pɔɔl gbagba wɔtɔ a keni mbe kumu so nseŋ shin nɛ b lara enapo nɛ e baa de Pɔɔl so.

17Pɔɔl be kachɛ sasopo ashi Rom nɛ e tre ndoŋ be Juwebi be benimuana na m ba shɛr ŋ kaŋɛ bumo: “Ŋ kurgepoana, m maŋ wora shɛŋ n da anyi be basa ŋko edaŋkare nɛ an nanaana sa anyi na so nɛ m peebi ti ma ebu ashi Jerusalɛm nseŋ naŋ ta ma m bɔɔ Romebi enɔ. 18Romebi na ka bishi ma asheŋ a maŋ wu kulubi kikɛ nɛ n wora nɛ k daga luwu nɛ b daa shin nɛ b yige ma. 19Nɛ Juwebi na maŋ shuli kumo be loŋ nɛ ŋ gben ŋ kule fanɛ b shin nɛ Romebi be ewurgboŋ na gbagba e keni ma demu na to, mannɛ fanɛ ŋ kɔ kusɔ ko nna a sha keta n wu m peebi na kulubi. 20Amoso nɛ n tre menyi nɛ ŋ kaŋɛ menyi amo na. Esa nɛ Israɛlebi na bee tama fanɛ e beeŋ ba na malɛ so nɛ ŋgbɛlɛbi ere wɔ ma enɔana to na.” 21Nɛ b kaŋɛ mo: “Esa kama maŋ sibɛ anyi nwɔl ashi Judiya ŋ kaŋɛ anyi fo asheŋ, an kurgepo kama malɛ maŋ shi ndoŋ m bar anyi fo baru lubi ŋko kulubi kama nɛ fo wora be asheŋ. 22Ama kaŋɛ anyi kusɔ nɛ k wɔ fo kumu to, kusɔ nɛ fee fɛ, ŋkpal manɛ so, an nyi basa ka bee malga kaplɛkama a gbiti katuŋ nɛ fo wɔ na to be basa.” 23Kede be kaman nɛ b sa Pɔɔl kachɛ nɛ baaŋ ba. Kachɛ na ka fo nɛ bumo be bedamta ba kakpa nɛ Pɔɔl daa wɔ na nɛ e baŋ yili chipurso m bɔ Ebɔrɛ be kuwura na to be asheŋ na ŋ ŋini bumo loŋ n ya fo kanyɛso. E daŋ bɛ Mosis be mbra na nɛ anebiana na be nsibɛ na so nna ŋ kɔ ga n fin keshin nɛ basa na yirda Yesu. 24Beko daŋ yirda mbe kamalga na nɛ beko malɛ kini keyirda kumo. 25Pɔɔl ka malga kesheŋ koŋwule ere n loge nɛ b fara a ji abar emɔrɔ a yɔ. Le nɛ e daŋ kaŋɛ: “Kashenteŋ nɛ Kiyoyu Cheeŋ na daŋ shin nɛ anebi Aizaaya daŋ wu ŋ kaŋɛ men nanaana fanɛ e ya kaŋɛ basa na le:

26‘Menyeeŋ nu hale n ya gben, ama men maaŋ pin to.

Menyeeŋ keni hale n ya gben, ama men maaŋ wu shɛŋ.’

27‘Ŋkpal basa ere be ŋgbene ka du kpakpa so

b ti bumo be asoe

nseŋ buu bumo be anishi so.

Nɛ mannɛ aloŋ, bumo be anishi beeŋ bugi asheŋ be kewuto

nɛ bumo be asoe e bugi asheŋ be kenuto

nɛ bumo be ŋgbene e bugi asheŋ be kepinto.

Ebɔrɛ yɛ: Loŋ na baaŋ ba ma kutɔ

nɛ n lara bumo ashi bumo be kebaawɔtɔ dra to

n sa bumo kebaawɔtɔ popɔr.’ ”

28Nɛ Pɔɔl naŋ kaŋɛ: “Amoso, men baa nyi fanɛ Ebɔrɛ shuŋi basa nɛ baa bɔ mbe kumɔlga be kubɔya na nnyamase gba kutɔ. Bumo ere beeŋ bugi asoe n nu.” 29Pɔɔl ka malga asheŋ ere n loge nɛ Juwebi na pesaŋ to a ji abar emɔrɔ kpakpaso a yɔ.

30Pɔɔl be nfɛ anyɔ nɛ e sɔ esa ko be ebu a wɔtɔ a ka ebu na wura. Ndoŋ nɛ e daa wɔ a sɔ basa kama nɛ b daa ba m ba kaa chɔrɔ mo. 31Ndoŋ koŋwule na malɛ nɛ e daa wɔ a bɔ Ebɔrɛ be kuwura na to be kubɔya na a sa basa kenyɛnso a malga kayurwushiso a ŋini Enyɛnpe Yesu Kristo be asheŋ.

Currently Selected:

Ashuŋ Shunso 28: GJNb

Highlight

Copy

Compare