Ashuŋ Shunso 27

Pɔɔl ka luri ekuloŋgboŋ ko to n yɔ Rom be asheŋ

1B ka ba yili kumo fanɛ an luri ekuloŋgboŋ ko to m bɔla nchu so n yɔ Itali nɛ b ta Pɔɔl nɛ kabutipoana ko m bɔɔ Julias enɔ. E daa la Romebi be ewurgboŋ be benapo be katuŋ to be enimubi nna. 2Adramitiam nɛ an daŋ yili n luri ekuloŋgboŋ ko nɛ k daŋ bela ase a yil nɛ k yɔ Eeshia be efuli so be teku be nnɔ ase na to n yɔ. Anyi nɛ Masɛdonia be esa nɛ e shi Tɛsalɔnika nɛ baa tre mo Aristaakes na e daa la. 3Kumo be ŋklade nɛ an fo Saidɔn. Ndoŋ nɛ Julias wora Pɔɔl kelela n shin nɛ e lar n ya chɔrɔ mo teriana nɛ b sa mo asɔ nɛ a daga fanɛ e nya. 4An ka naŋ lar ndoŋ nɛ an kpal afu ko ka daa ber a shɛr anyi to so m bɔla Saipres so be kakpa nɛ afu na daa maa ber eleŋso na. 5An ta loŋ m ba bɔla teku na be mboŋ nɛ a taga to Silisia nɛ Pamfilia be efuliana so na, n naŋ ta ndoŋ m ba fo Maira nɛ k wɔ Lisia na. 6Ndoŋ nɛ benapo be enimubi na ba nya Alɛkzaandria be ekuloŋgboŋ ko nɛ k daa sha keyɔ Itali nɛ e shin nɛ an luri kumo to. 7Ŋkpal afu na so ekuloŋgboŋ na daŋ nite nchu na so nna boeŋ boeŋ loŋ nchɛ damta ko pɔɛŋ nɛ an ba kpar Kenaidas so n yɔ. Ŋkpal kananɛ afu na daa ber a shɛr anyi to na so an daa maŋ tiŋ m bɔla kakpa nɛ an daŋ bɔla so na n yɔ anishito, amoso, Kriit be kepla na so be kakpa nɛ k daŋ kuŋ anyi ashi afu na to nɛ an daŋ bɔla n ya mata Salmoni ŋ kpar so n yɔ. 8An daŋ baŋ kra teku na be kɔnɔ ase nna n ji awurfoŋ loŋ n ya fo kakpa ko nɛ baa tre Ekulonyilikpa Lela Nɛ Kafɔŋ Maŋ Wɔtɔ na. Ndoŋ nɛ Lasiya be kade to daa maŋ wɔ kufɔ.

9An daŋ chɛr ndoŋ ga hale nɛ anyi be kenaŋ pɛ ekpa ya ki kpakpa, ŋkpal manɛ so, saŋɛ na so nɛ kachɛ nɛ baa nyiŋi alubi be keyigempaŋ be asheŋ be daŋkare na gba baŋ so. 10Nɛ Pɔɔl fiɛ bumo so ŋ kaŋɛ: “M braana, n wu fanɛ yili nfe a yɔ, anyi be enite ere be ekpa ere to lubi ga. Ekuloŋgboŋ ere nɛ kumo be esulɔ ere be adamta beeŋ jija nɛ basa gba e mur.” 11Ama benapo be enimubi na daŋ kplaŋ Pɔɔl be kamalga na so nna nseŋ yirda kusɔ nɛ ekuloŋgboŋ na be befarpoana na be enimu nɛ ekuloŋ na wura na kaŋɛ nna. 12Ndoŋ be ekulonyilikpa na ka daa maa la kakpa lela awo to so, basa na be bedamta daa sha keyige eyilikpa na nna nsaa wɔ ekuloŋgboŋ na to a bɛ teku na so a sha kewora ania n fo Finiks nɛ baaŋ tiŋ nna na. Ndoŋ daa la Kriit be ekulonyilikpa nna a kɔ nnɔ anyɔ, kukoŋwule daa wɔ epeŋitɔrkpa be jisoso be kaba so nna nɛ kukoŋwule malɛ daa wɔ epeŋitɔrkpa be bena so be kaba so. Ndoŋ nɛ b daa beeŋ tiŋ n shir a wɔ hale nɛ awo na be jemanɛ e ya choŋ.

Afugboŋ ko ka ber teku na so be asheŋ

13Afubi ko ka chela n shi kelargato be kaseto be kaba so m ba nɛ basa na fara a tama fanɛ asheŋ nɛ b daŋ kre fanɛ baaŋ wora na beeŋ nyalɛ n sa bumo. Ndoŋ nna nɛ b gberge ekuloŋgboŋ na be kebɛlso gbɛgbɛso nɛ baa ta a lɛ nchu to nɛ k bee pɛ ekuloŋgboŋ na to a yili na ashi to nseŋ luri ekuloŋgboŋ na to n ta m mata Kriit be teku na be ekarso loŋ a yɔ. 14Ama k maŋ chɛr ko nɛ afugboŋ ko nɛ baa tre epeŋilarkpa be bena so be kaba so be afu na shi kepla na so m ba ber ekuloŋ na 15nɛ k shɛr afu na to kanaŋkamaso ŋ gben nseŋ shin nɛ afu na kɔ anyi be ekuloŋgboŋ na a yɔ. 16An ka bɔla Kawda be kepla na be epeŋitɔrkpa nɛ an luri kakpa ko nɛ k kuŋ anyi gbrɛ ashi afu na to. Ndoŋ nɛ an wora ania ga m ba tiŋ m mɔlga ekulombi nɛ kegboŋi na daa gberge na ashi kebure to. 17B daŋ gberge kumo nna n wɔtɔ kegboŋi na be epunto nseŋ ta efɔlana m bɔla kegboŋi koŋwule na be kaseto ŋ kre kumo kpakpa. Ŋkpal b ka daa lɔ kufu fanɛ baaŋ ya ber Libiya be teku be ekarso be keplagboŋ na to n nia so, b daŋ yɔɔ ekuloŋ na be wajɛ gbɛgbɛso nɛ afu bee ber a yɛr ekuloŋgboŋ na nna nseŋ shin nɛ afu na e baa kɔ ekuloŋ to na a yɔ loŋ. 18Kare ka chɛ nɛ afugboŋ na kraa ber eleŋso nɛ b fara a lara kumo to be esulɔ na a lɛ nchu na to. 19Kare ka naŋ chɛ nɛ bumo gbagba bela ekuloŋ na to be asɔ damta ko nɛ a daŋ daga fanɛ b baa kɔ a shuŋ kumo to na be ako n lɛ nchu na to. 20An daŋ ji nchɛ damta ekuloŋgboŋ na to a maa wu epeŋi nɛ achɛkpabi nɛ afu na malɛ kraŋ baa ber eleŋso, nɛ an ba gben n yige kebaatama anyi be kenaŋ pete be asheŋ.

21Basa na ka ta nchɛ damta loŋ a maa ji shɛŋ nɛ kachako nɛ Pɔɔl koso n yili bumo to ŋ kaŋɛ: “M braana, a daga men ka daŋ bɛ ma kɔnɔ so n daŋ shir Kriit to nɛ an daŋ tiŋ ŋ gelge le be awurfoŋ nɛ jɛrbi nɛ anyee ji ere. 22Ama mee kule menyi nna fanɛ men baa kɔ kenyɛn, ŋkpal manɛ so, menyi be ekama maaŋ paŋ mbe ŋkpa, ekuloŋgboŋ ere nawule e naaŋ mur. 23Ŋkpal manɛ so, ndre kanyɛso Ebɔrɛ nɛ e wɔ ma nɛ mee bunyaŋ mo na be malaika kaŋ ba ma kutɔ nna m ba kaŋɛ ma: 24‘Pɔɔl, sa maa lɔ kufu. A daga fanɛ fo ya yili Romebi be ewurgboŋ na be anishito. Ŋkpal Ebɔrɛ malɛ nɛ mbe kelela so, basa nɛ fo nɛ bumo wɔ nchu so be enite ere to ere be ekama maaŋ mur.’ 25Amoso, men baa kɔ kenyɛn, ŋkpal manɛ so, n yirda Ebɔrɛ fanɛ kusɔ nɛ e kaŋɛ ma na maaŋ chɛrga kikɛ. 26Ama afu ere beeŋ ber anyi n ya lɛ kechɛɛ ko so bre.”

27Anyi be kachɛ kuduanasopo be kanyɛso nɛ afu na wɔtɔ a kpata anyi ashi Eedria be teku so. Kiidiso be jemanɛ ko nɛ ekuloŋgboŋ na be befarpo na kaŋɛ fanɛ baa tama fanɛ anyee taga to kedeŋi so. 28Ndoŋ nna nɛ b lɛ efɔl gbɛgbɛso nɛ b kɔ a karga nchu be nchiŋ na n wɔtɔ nchu na to n wu fanɛ kakpa nɛ b daa yil na be nchiŋ wɔ ayadra kalfa nɛ adunyɔ. B ka yɔ anishito gbrɛ nɛ b naŋ wora loŋ n wu fanɛ ndoŋ malɛ wɔ ayadra adekpanu. 29B daa lɔ kufu nna fanɛ ekuloŋgboŋ na beeŋ ya dii kefaltagboŋ ko so nseŋ kpal loŋ so n ta abɛlso gbɛgbɛso ana ko n lɛ ekuloŋ na be kamanto n wɔtɔ nchu na to nɛ a ya pɛ ekuloŋ na to n yili nɛ b baa kule Ebɔrɛ a jo nɛ kare ya chɛ. 30Ndoŋ nna nɛ ekuloŋgboŋ na be befarpo na wora ania nɛ b lar n shile nseŋ yɔɔ ekulombi na to n wɔtɔ nchu na to nsaa kute a wora fanɛ b ka bee sha keta abɛlso gbɛgbɛso na be ako n lɛ n wɔtɔ ekuloŋ na be anishito malɛ na. 31Nɛ Pɔɔl kaŋɛ benapo na nɛ bumo be enimubi na: “Befarpo ere baŋ lar ekuloŋgboŋ ere to, men maaŋ lar kikɛ.” 32Ndoŋ nna nɛ benapo na ku efɔlana nɛ a kre ekulombi na m mata kegboŋi na n shin nɛ k yɔ.

33Kare ka bee taga to kechɛ nɛ Pɔɔl kule basa na kikɛ fanɛ b ji ajibi nseŋ kaŋɛ bumo: “Menyi be nchɛ kuduana nde kabre men ka bee jo a maa ji shɛŋ. 34Jande men ji ajibi n nya eleŋ m mɔlga menyi gbagba be amu. Menyi be ekama maaŋ paŋ mbe kemin koŋwule gba.” 35Pɔɔl ka malga le n loge nɛ e ta bodobodo n di Ebɔrɛ epaŋ bumo kikɛ be anishito nseŋ bu kumo to n fara a we. 36Nɛ basa na ji kenyɛn nɛ bumo be ekama malɛ ji ajibi. 37Anyi kikɛ nyam daa wɔ basa alfa anyɔ nɛ adushunu nɛ ashe ekuloŋgboŋ na to. 38Ekama ka ji n kukwe nɛ b ta ayu nɛ a wɔ ekuloŋgboŋ na to na n lɛ teku na to nɛ ekuloŋgboŋ na e fuga so.

Ekuloŋgboŋ na ka bure be asheŋ

39Kare ka chɛ befarpo na maŋ tiŋ m pin teku na be kedeŋi nɛ b fo na. Ama b wu teku na ka ku kasawule n wɔtɔ nchu na be kakpa ko nseŋ naŋ wora kewawa nɛ b yili kumo bumo be ŋgbene to fanɛ b shin nɛ ekuloŋgboŋ na e ya fo kasawule na n yili nɛ baaŋ tiŋ nna na. 40Ndoŋ nna nɛ b ku abɛlso gbɛgbɛso ana na be efɔlana na to n shin nɛ abɛlsoana na ka nchu na to nseŋ saŋɛ ekuloŋ na be kamanto be ndibi paŋgelambi nɛ b kɔ a niŋi kumo na malɛ epul na to. Ade be kaman nɛ b maŋ ekuloŋgboŋ na be wajɛ gbɛgbɛso nɛ afu bee ber a yɛr kumo na so ashi ekuloŋgboŋ na be anishito nɛ afu na e ber ekuloŋgboŋ na n yɔ anishito kedeŋi so. 41Ndoŋ nna nɛ ekuloŋgboŋ na ya ber kechɛɛsawule ko to nchu na to nɛ kumo be anishito nia nɛ k tia ŋ gben nsaa yil nɛ atiligboŋ ko bee kpata ekuloŋgboŋ na be kamanto eleŋso a bure kumo. 42Nɛ benapo na kre kemɔ kabutipoana na kikɛ nɛ bumo be ekama e sa maŋ laa n dii n shile n yɔ. 43Ama benapo be enimubi na ka daa maa sha nɛ Pɔɔl e wu so, e daŋ ju benapo na ashi loŋ be kesheŋ na to nna nseŋ kaŋɛ basa na be bumo nɛ b daa nyi kalaa na kikɛ fanɛ b fara n tɛ n luri nchu na to a laa a dii. 44Nɛ bumo nɛ b ka na malɛ pɛ ekuloŋgboŋ na be ndibi fɛtaso na to m bɛ kaman a ba. Loŋ nɛ ekama daŋ wora n dii nɛ alenfia.

Currently Selected:

Ashuŋ Shunso 27: GJNb

Highlight

Copy

Compare