Ashuŋ Shunso 25

Pɔɔl ka bee sha keyɔ Romebi be ewurgboŋ na kutɔ be asheŋ

1Fɛstes ka ba kasawule na so mbe kachɛ sasopo nɛ e yili Sizariya n yɔ Jerusalɛm. 2Nɛ bɔrɛmatapowuraana na nɛ Juwebi be benimuana na ba kaa kaŋɛ mo alubi nɛ Pɔɔl wora. 3Kumo be kaman nɛ b kule Fɛstes fanɛ e wora ania n chɛ bumo to n shin nɛ Pɔɔl e ba Jerusalɛm. B ka daŋ kre Pɔɔl be kemɔ ekpa to be nia so nɛ b daŋ kaŋɛ loŋ na. 4Nɛ Fɛstes kaŋɛ: “Pɔɔl wɔ kabuti to ashi Sizariya, ma alɛ gbagba maaŋ chɛr nseŋ bɛta n yɔ Sizariya. 5Amoso, men shin nɛ menyi be benimu e tu ma n yɔ Sizariya n ya kaŋɛ alubi nɛ e wora nɛ fanɛ e wora amo nna na.” 6Kumo be kaman nɛ Fɛstes naŋ ji fanɛ nchɛ burwa ŋko nchɛ kudu basa na be kade na to pɔɛŋ nseŋ naŋ bɛta n yɔ Sizariya. Kumo be ŋklade nɛ e ya chena mbe kakpa nɛ e ji demu n shin nɛ b ya bar Pɔɔl. 7Pɔɔl ka ba nɛ Juwebi nɛ b shi Jerusalɛm m ba na yili ŋ kulti mo nseŋ malga kenishipereso be asheŋ lubi damta mo nɛ b kaŋɛ fanɛ e wora, ama bumo alɛ daa maŋ tiŋ ŋ ŋini fanɛ asheŋ nɛ b daa malga na la kashenteŋ. 8Nɛ Pɔɔl malga le ŋ kuŋ mbe kumu: “M maŋ wora shɛŋ n da Juwebi be mbra na ŋko bɔrɛlambu na ŋko Romebi be ewurgboŋ na so.” 9Ŋkpal kenya ketre Juwebi na kutɔ so, Fɛstes daŋ bishi Pɔɔl nna: “Fee sha keyɔ Jerusalɛm nɛ n ya ji fo asheŋ nɛ b yɛ fo wora ere be demu ndoŋ a?” 10Nɛ Pɔɔl kaŋɛ: “Romebi be ewurgboŋ na be demujikpa gbagba ere to nɛ m baa yil nɛ b ji ma demu na. Fo gbagba baa nyi fanɛ m maŋ wora Juwebi na shɛŋ. 11Nɛ n daŋ wora kusɔ ko nna n da mbra na so nɛ k daga ma luwu, n daa maaŋ gelge kumo be loŋ. Ama nɛ kashenteŋ maŋ wɔ asheŋ nɛ baa kaŋɛ fanɛ n wora ere to, esa kikɛ maaŋ tiŋ n ta ma m bɔɔ bumo enɔ. Romebi be ewurgboŋ na nɛ mee kule fanɛ e keni ma demu na to.” 12Ndoŋ nna nɛ Fɛstes bishi mbe beyaasepo kusɔ nɛ e beeŋ wora Pɔɔl pɔɛŋ nseŋ kaŋɛ Pɔɔl: “Fo yɛ Romebi be ewurgboŋ na e keni fo demu na to, amoso, mo kutɔ nɛ feeŋ yɔ!”

Fɛstes ka kaŋɛ Ewura Agripa Pɔɔl be asheŋ

13Kede be kaman saŋko nɛ Ewura Agripa nɛ Benis ba Sizariya nɛ b ba chɔrɔ Fɛstes n wora mo ansaŋ nɛ keba. 14B wora nchɛnnyɔ ndoŋ nɛ kachako nɛ Fɛstes kaŋɛ ewura na Pɔɔl be asheŋ fanɛ: “Filiks yige kabutipo ko nfe. 15Ŋ ka yɔ Jerusalɛm nɛ Juwebi be bɔrɛmatapowuraana na nɛ benimuana na ba kaŋɛ ma asheŋ lubi nɛ b wu mo so nseŋ kaŋɛ ma fanɛ ŋ kaŋɛ fanɛ e wora n da so. 16Ama ŋ kaŋɛ bumo fanɛ Romebi maa shin nɛ baa gberge esa kusoe ŋkpal kulubi kama so she mo nɛ basa nɛ b kɔ abar na ba yili nna geeŋ nɛ e malga n sɔ mbe kumu ashi kulubi nɛ b yɛ e wora na to. 17Bumo kikɛ ka kpal loŋ so m ba nfe nɛ n nya manaŋ kumo be ŋklade n ya chena demujikpa n shin nɛ b bar amo be kanyɛn. 18Ama basa nɛ bumo nɛ mo daa kɔ abar na daa maŋ tiŋ n wu mo kenishipereso be alubi nɛ n daa tama fanɛ baaŋ wu mo na be kekama. 19Bumo gbagba be kabɔrɛshuŋ nɛ ebuninyɛn ko nɛ baa tre Yesu na be emɔrɔana nawule be asheŋ nɛ b daa kɔ. Pɔɔl bee kaŋɛ nna fanɛ amo be kanyɛn na wɔ ŋkpa to. 20N daa maŋ nyi ekpa nɛ meeŋ bɔla so n naŋ nu kusɔ ko n ti so m pin bumo be demu na to nseŋ bishi Pɔɔl fanɛ e bee sha keyɔ Jerusalɛm nɛ b ya keni demu na to a. 21Nɛ Pɔɔl kini nseŋ kule fanɛ benapo e baa keni mo so nfe nseŋ shin nɛ Romebi be ewurgboŋ na e keni mbe demu na to kacha ko. Ndoŋ nna nɛ n shin nɛ benapo bee de mo so nɛ kachako nɛ e yɔ Romebi be ewurgboŋ na kutɔ.” 22Nɛ Agripa kaŋɛ Fɛstes: “Ma alɛ gba bee sha fanɛ e malga mbe demu na nɛ n nu.” Nɛ Fɛstes shuli so ŋ kaŋɛ: “To, echefo feeŋ nu kumo ashi mbe kɔnɔ to.” 23Kumo be ŋklade nɛ Agripa nɛ Benis ba luri nshɛrkpa na bunyanso nɛ basa sa bumo kemaŋkura ga. Bumo nɛ benapo be benimuana na nɛ kade na to be benimuana na e daŋ luri nshɛrkpa na. Ndoŋ nna nɛ Fɛstes shin nɛ b ya bar Pɔɔl. 24Nɛ e kaŋɛ: “Ewura Agripa nɛ menyi nɛ men wɔ nfe ere, men keni kanyɛn ere nɛ nfe be Juwebiana na nɛ Jerusalɛm to peyaana na kikɛ bee kaŋɛ ma fanɛ e wora alubi nsaa ponte a kaŋɛ fanɛ e maŋ naŋ daga kebaawɔtɔ na. 25Ama ma alɛ maaŋ tiŋ n wu kusɔ nɛ e wora n daga luwu be kasogberge. Mo alɛ naŋ kule fanɛ n shin nɛ Romebi be ewurgboŋ na gbagba e keni mbe demu na to, amoso, meeŋ shin nɛ b yɛr mo ndoŋ. 26Ama m maŋ kɔ shɛŋ nɛ n sibɛ ŋ kaŋɛ n nyɛnpe na mbe asheŋ. Amoso nɛ m bar mo menyi kutɔ nfe na, fɔnfɔŋ fo, Ewura Agripa kutɔ nɛ n tiŋ n nya kusɔ ko demu na be kaman n sibɛ. 27Ŋkpal manɛ so, a maŋ daga fo ka shin nɛ kabutipo yɔ loŋ, a maŋ sibɛ shɛŋ a ŋini ekama kulubi nɛ e wora.”

Currently Selected:

Ashuŋ Shunso 25: GJNb

Highlight

Copy

Compare