Ashuŋ Shunso 24

Juwebi na ka kaŋɛ fanɛ Pɔɔl wora kulubi be asheŋ

1Kumo be nchɛ anu be kefɛato nɛ bɔrɛmatapo nimuso Ananiyas nɛ benimu ko nɛ mbraŋinipo nɛ baa tre Tetales yɔ Sizariya n ya kaŋɛ Gomena Filiks ashi demujikpa na kulubi nɛ Pɔɔl wora. 2B ka tre Tetales, nɛ e ba fara le a kaŋɛ alubi nɛ Pɔɔl wora: “Ebunyampogboŋ, ŋkpal fo kanyiasheŋ so nɛ fo tiŋ n juŋkpar anyi n shin nɛ an nya kagbenewushi saŋɛ kikɛ m ba fo mbre nɛ asheŋ lela damta tiŋ n wora anyi be efuli ere so nɛ kumo be ketre dii na. 3Saŋkama kumo be loŋ bee par anyi ga kaplɛkama. Anyee chɔrɔ fo ga ŋkpal loŋ so. 4M maa sha fanɛ m baa kɔ kechɛchɛrase nfe a wora fo, amoso, mee kule fo nna fanɛ fo wora ania n nu anyi be kamalga shiimbi ere. 5An wu fanɛ kanyɛn ere la esa lubi nɛ kabɔlarwura nna. E wɔtɔ nna a yɔ kaplɛkama n ya kaa ta Juwebi a wɔtɔ kebagato to nseŋ naa la basa nɛ baa tre bumo be amu Nazarinebi be katuŋ na to be enimu. 6Ade be kaman nɛ e daa naa sha kejija bɔrɛlambu na to nɛ an pɛ mo. [An daa sha nɛ an bɔla anyi be mbra na so nna n ji mo demu 7nɛ benapo be enimu Lisias ba suge mo eleŋso anyi kutɔ, 8nseŋ yili demu na fanɛ basa nɛ bumo nɛ kanyɛn na kɔ abar e ba fo kutɔ.] Fo gbagba baŋ bishi kanyɛn na, feeŋ pin alubi nɛ e wora na kikɛ nyam.”

9Ndoŋ nna nɛ Juwebi na kikɛ shuli n chɛ Tetales to ŋ kaŋɛ fanɛ alubi nɛ b kaŋɛ fanɛ Pɔɔl wora na kikɛ la kashenteŋ nna.

Pɔɔl ka malga ŋ kuŋ mbe kumu be asheŋ

10Ade be kaman nɛ gomena na wora Pɔɔl enɔ fanɛ e malga nɛ Pɔɔl kaŋɛ: “Fo ka fara a ji efuli ere so ebi demu k chɛr ga kabre. Amoso, k par ma ga ŋ ka bee sha kemalga ŋ kuŋ ma kumu fo anishito ere. 11Yili kachɛ nɛ n yɔ Jerusalɛm nɛ n ya bunyaŋ Ebɔrɛ na m ba fo kabre maŋ naŋ fo nchɛ kuduanyɔ. Nɛ fee sha, fo bishi n nu. 12Juwebi na maŋ wu ŋ ka bee ji esa kikɛ emɔrɔ ashi bɔrɛlambu na to, bumo alɛ maŋ wu ŋ ka bee we a wɔtɔ basa ashi bumo be nshɛrbuana to ŋko kadegboŋ na to be kaplɛkama. 13Bumo alɛ maŋ kɔ shɛŋ nɛ b ta ŋ ŋini fo fanɛ asheŋ nɛ baa malga ere la kashenteŋ nna. 14Kashenteŋto, an nanaana be Ebɔrɛ na nɛ mee bɔla ekpa nɛ b yɛ k la efɛ na so a bunyaŋ. N yirda asɔ nɛ a wɔ Mosis be mbra na to nɛ anebiana na be nwɔl na to kikɛ nyam. 15Tama koŋwule nɛ basa ere kɔ Ebɔrɛ so na nɛ ma alɛ gba kɔ, kumo e la fanɛ basa lela nɛ belubi kikɛ nyam beeŋ ba tiŋi luwu to. 16Amoso, saŋkama mee wora ania nna nɛ m baa kɔ kagbene koŋwule nɛ k maa wora ma shikashika ashi ma nɛ Ebɔrɛ nɛ nyiŋgbasa be kebaawɔtɔ to. 17Ŋ ka lar Jerusalɛm kumo be nfɛ damta nde kabre, nɛ n naŋ bɛta n ta amansherbi nɛ n ya kɛ ma basa nseŋ lara sarga. 18Le be kesheŋ ere nɛ n daa wɔ bɔrɛlambu na to a wora nɛ b wu ma. Saŋɛ na so nɛ n wora kefɔr eyurpi n lɛ be daŋkare na be asheŋ n loge. Jimaŋ kikɛ daa maŋ wɔ ma kutɔ, kebagato malɛ kikɛ daa maŋ wɔtɔ. 19Ama Eeshia be efuli so be Juwebi ko malɛ daa wɔtɔ, amoso, a daga fanɛ bumo alɛ gba ka ba nfe m ba kaŋɛ fo alubi nɛ b wu ma so nɛ fanɛ b wu alubi ma so nna na. 20Ŋko fo shin nɛ basa ere e kaŋɛ fo kulubi nɛ b wu ma so, saŋɛ nɛ n daŋ yili nshɛrwuraana na kutɔ na. 21Kusɔ koŋwule nɛ n daŋ ba n yili bumo to ndoŋ ŋ kaŋɛ e la: ‘Menyee ji ma demu kabre nna ŋkpal ŋ ka yirda fanɛ bumo nɛ b wu na kikɛ ka beeŋ tiŋi luwu to so.’ ”

22Ndoŋ nna nɛ Filiks nɛ e daŋ nu Enyɛnpe be ekpa na be asheŋ ga ŋ ku so na shin nɛ b yige demu na be kenu nseŋ shin nɛ e kaŋɛ basa na: “Benapo be enimu Lisias kaŋ ba, meeŋ keni menyi be demu na to.” 23Kumo be kaman nɛ e shin nɛ benapo be enimubi nɛ e daa de Pɔɔl so na keta Pɔɔl n ya kaa de mo so. Ama e daŋ sa mo ekpa n shin nɛ mo teriana daa tiŋ a chɛ mo to kanaŋkamaso nɛ b daa sha.

Pɔɔl ka malga n sa Filiks nɛ Drusila be asheŋ

24Kachako malɛ nɛ Filiks keta mbe eche Drusila nɛ e daa la Juw na m ba shin nɛ b ya bar Pɔɔl nɛ e ba malga keyirda Yesu Kristo be asheŋ nɛ e nu. 25Ama Pɔɔl ka ba kaa malga alela be kebaawora nɛ kamootiŋ nɛ Ebɔrɛ be demujiachɛ be asheŋ nɛ kufu pɛ Filiks nɛ e kaŋɛ: “Feeŋ tiŋ a yɔ naniere. N naŋ nya kachena meeŋ naŋ tre fo.” 26Saŋkama e daa tama fanɛ Pɔɔl beeŋ sa mo amansherbi nna. Amoso, e daa sha kebaatre mo a malga mo kutɔ ga. 27B wɔtɔ loŋ nɛ nfɛ anyɔ ba choŋ nɛ Pɔkias Fɛstes ba sɔ mo so a la gomena. Ŋkpal kenya ketre Juwebi na kutɔ so, Filiks daŋ yige Pɔɔl kabuti na to nna nseŋ yɔ.

Currently Selected:

Ashuŋ Shunso 24: GJNb

Highlight

Copy

Compare